2007年8月31日星期五

8-31(fri) 閃電傳真機…those were the days!!!

(續前篇…呢篇又係勁長, 請各位自行找厠所位!)

好精彩…上期講開“兒歌金曲頒獎典禮”o既回顧, 呢個禮拜“放學icu”真係不停播番d八十年代尾/九十年代初o既“閃電”年代兒歌…好經典, 睇得人好開心!

前幾日播番李克勤主唱o既“閃電傳真機”主題曲, 其實好似有兩首主題曲…克勤唱o既係第一版, 松松姐姐係第二版! 記得當年克勤話佢自己收版稅都收到笑, 因為首歌好似係佢作詞…仲要係咁日日播兩次 (當年兒童節目係朝早播一次, 下午又播一次, 方便返上/下午班的小朋友)! 其實如果今次兒歌頒獎禮搵埋克勤出席, 應該會更精彩…


(“閃電傳真機”mv: 好搞笑…李克勤一人分飾十角…)

除o左譚玉瑛姐姐, 我其實覺得芷珊姐姐 都係好經典…依家成日睇到“東張西望”, 都會諗起“430”或者“閃電”年代o既佢, 尤其係“殭屍孫女”…其實佢真係保養得幾唔錯o下! 前兩日佢代表“東張西望”訪問陳慧嫻, 志雲總經理仲問佢o地兩個諗番起當年一齊o既“少女雜誌"組合有咩感覺? 無綫真係最鍾意搵芷珊姐姐訪問一d同佢有“啦間”o既藝人, 好似鄭伊健+雙琪+蒙嘉慧, 仲有梁家輝同埋今次o既陳慧嫻!

“戚”起條筋要懷o下舊, 諗起好多當年睇“閃電”的回憶…在網上找到關於“閃電傳真機”各環節的資料…真係好得…好detailed啊! 又係好感動啊! 原來有咁多人懷念當年的兒童節目…真係又要再講多句: those were the days!!!

殭屍爺孫

殭屍爺爺和殭屍孫女是住在《閃電傳真機》錄影廠底下的坑渠,但經常被樓上的聲音騷擾,所以會變身成人到樓上去。殭屍爺爺會稱自己為<姜老孫>,殭屍孫女會稱自己為<姜蔥餅>,同時會叫黃智賢(ben)做"笨”哥哥

疆屍孫女的口頭禪:「嚇到我個心 bup lup bup lup咁跳啊!」, 最鍾意lolipop(波板糖)

跳跳紮紮遊香港

《跳跳紮紮遊香港》是另一由殭屍爺爺和殭屍孫女主持的環節,介紹香港風光名勝。

駱俊文 飾 殭屍爺爺
黎芷珊 飾 殭屍孫女


(跳跳紮紮遊香港by兒歌皇后松松姐姐…睇到呢d舊mv, 個心又係la o下la o下…救命!)

殭屍操

殭屍爺孫每星期也會教小朋友跳「殭屍操」,總共有四十九式,而每期《香港電視》亦會刊登。部份「殭屍操」口訣如下:

第一式: Woo Woo Woo(嗚嗚鳴) 捐山窿 時時做 骨都鬆
第二式: 跳跳跳 大聲叫 彈彈彈 扒下飯
第三式: 伸直手 擘大口 儲夠氣 四圍走
第四式: 撐嚇船 搬嚇磚 腰骨好 唔會攣
第五式: 哈哈哈 大傻瓜 傻瓜大 搬去賣
第六式: 撲撲撲 縮嚇膊 盪盪盪 兩頭望
第七式: 揸拳頭 攤大手 擺向左 擺向右
第八式: 一朝早 讀書好 搖向左 搖向右
第九式: 左踢踢 右踢踢 跳向前 過大石
第十式: 捉田雞 跳落水 撥兩撥 撐嚇腿
第十二式: 開蚊帳 有隻蚊 拍唔到 會咬親
第二十式: 無事時 寫大字 有要事 唔好遲
第三十五式: 放風箏 用力掹 姿勢好 人人跟
第四十九式: Woo Woo Woo(嗚嗚鳴) 出山窿 日日做 精神好

[芒按: 以下係我早前結集多期香港電視打出o黎o架…真係有put effort o架…呵呵呵! 不過殭屍操又真係好經典, 細個真係有跟住唸同埋做o架…好得啊! 發覺其實有d似蝦仔daddy式o既押韻句語…不過好明顯愈作愈有d江郎才盡o既感覺!]

殭屍操口訣

第一式: 鳴鳴鳴, 捐山窿; 時時做, 骨都鬆!
第二式: 跳跳跳, 大聲叫; 彈彈彈, 扒吓飯!
第三式: 伸直手, 擘大口; [草]夠氣, 四圍走!
第四式: 撐吓船, 搬吓磚; 腰骨好, 唔會攣!
第五式: 哈哈哈, 大傻瓜; 傻瓜大, 搬去賣!

第六式: 撲撲撲, 縮吓膊; 盪盪盪, 兩頭望!
第七式: [手查]拳頭, 攤大手; 擺向左, 擺向右!
第八式: 一朝早, 讀書好; 搖吓頭, 擺吓腦!
第九式: 左踢踢, 右踢踢; 跳向前, 過大石!
第十式: 捉田雞, 跳落水; 撥兩撥, 撐o下腿!

第十一式: 搖搖搖, 過石橋; 過一條, 又一條.
第十二式: 開蚊帳, 有隻蚊; 拍唔到, 會咬親.
第十三式: 耕吓田, 插吓秧; 禾稻高, 收成好.
第十四式: 搖大船, 打大鼓; 大風吹, 好辛苦!
第十五式: 牛耕田, 馬拉車; 落大雨, 擔把遮.

第十六式: 抹抺抹, 掃垃圾; 過新年, 咪辣撻.
第十七式: 恭喜你, 賀喜你; 豆利是, 好歡喜!
第十八式: 手搖搖, 腳跳跳; 氹氹轉, 菊花園.
第十九式: 月光光, 照地堂; 新十五, 天清朗.
第二十式: 無事時, 寫大字; 有事時, 唔好遲.

第廿一式: 扭扭扭, 扮木偶; 好朋友, 手拉手!
第廿二式: 手騰騰, 腳震震; 練游水, 要熱身!
第廿三式: 眼碌碌, 嘴郁郁; o翁下鼻, 再放鬆!
第廿四式: 担下天, 望下地; 單腳跳, 跳飛機!
第廿五式: 摘蘋果, 放落籮; 籮好大, 再摘過!

第廿六式: 跳向東, 跳向西; 跳到攰, 坐番低!
第廿七式: 肚仔餓, 食燒鵝; 好味道, 唔嫌多.
第廿八式: 熱得滯, 無得瞓; 食西瓜, 涼浸浸!
第廿九式: 騎木馬, 射烏鴉; 烏鴉飛, 真激氣!
第三十式: 斬下柴, 種下花; 養埋魚, 誇啦啦!

[芒按: 可以睇得出, 係愈作愈差, 有江郎才盡之感! 頭o個幾式係幾鬼馬, 之後愈寫愈夾硬, 後尾直頭要話殭屍爺爺唔見o左本秘笈, 要公開徵求新o既殭屍操! 其實係頭五式最經典…大部份o個期o既小朋友都可以一字不漏地o翕到一兩式!]



麥氏偵探社

這是《閃電傳真機》內一解迷故事,麥偵探身穿褐色乾濕褸,身持甘筍,每集片頭也播放著像《鐵金剛》的片段,他需要於故事中破解不同的離奇案件,一但沒有甘筍吃便不能破案,他每次破案前也會說:「小朋友,俾一分鐘時間你哋諗下!」 之後電視螢幕上便會出現一個鐘倒數60秒(現實時間並不足60秒),跟著迷題便會由麥偵探解開。

麥長青 飾 麥偵探
黎芷珊 飾 戴銀(麥之第一個女助手/秘書) [芒按: 最記得戴銀呢位助手…原來真係所有o野都係第一代最經典!]
朱 茵 飾 糖糖(麥之第二個女助手)
張沅薇 飾 YOYO公主 (麥之第三個女助手,暗戀麥偵探)
姚安娜 飾 春麗(麥之第四個女助手)
駱俊文 飾 彼德市長
駱俊文 飾 方程式(數學博士之密探,常在麥偵探Office高樓窗口偷聽,卻常從高處墮下)
黃智賢 飾 數學博士(麥偵探的死對頭)
黃智賢 飾 查理(警察探長,也是麥偵探的好朋友,每次遇到案件的第一反應是說「有可疑!」

相關歌曲:《蛛絲馬跡》(主唱︰黃耀明)
《麥偵探的畫謎奇案》(主唱︰陳奕)

Auntie烏卒卒

《Auntie烏卒卒》是《閃電傳真機》早期一個教授英語的環節,後期因節目受歡迎而發展一系列關於烏卒卒的故事,占卜師烏卒卒是住沙漠中的一個帳篷內,身穿黑色阿拉伯吉卜賽女郎服裝,並擁有水晶球一個,占卜時會捽水晶球並口唸:「左捽捽、右捽捽,前捽捽、後捽捽」。

譚玉瑛 飾 烏卒卒(孤寒、愛想縮數,但最後會身受其害)
麥長青 飾 矇查查(烏卒卒僕人、叫烏卒卒做Madam烏卒卒)
朱 茵 飾 烏冬(烏卒卒外甥女)
黃智賢 飾 聲大大
顏菁葦 飾 烏英(另一占卜師,與烏卒卒亦友亦敵)

相關歌曲:
《烏卒卒》(作曲/編曲:顧嘉輝 填詞:鄭國江 主唱:陳松齡)


(呢個版本o既烏卒卒…你又聽過未? By金城武+吳奇隆!!!)

叉燒包與漢堡包

此環節介紹各式美食,而主持人的頭頂上分別有叉燒包和漢堡包的妝扮,他們在此環節中經常為吃中菜還是吃西餐而鬥嘴。

黃智賢 飾 叉燒包(介紹中菜)
梁詠琳 飾 漢堡包(介紹西餐)
張沅微 飾 豆沙包
黃智賢 飾 味王
駱俊文 飾 功夫迷
駱俊文 飾 味晶

相關歌曲:《叉燒包》(作曲/編曲:顧嘉輝 填詞:鄭國江 主唱:陳松齡)

愛登事家庭 (愛古怪家庭)

這個單元主要是介紹不同地方的新奇有趣新聞。改編自愛登士家庭。
黃智賢 飾 怪爸爸
譚玉瑛 飾 怪媽媽
麥長青 飾 怪管家
朱茵/顏菁葦 飾 小怪
??? 飾 阿手(是一個從寶箱出來的一隻手)
魯文傑 飾 達達Cousin(個頭髮疏得上面很高且箭豬頭)
姚安娜 飾 睡姨

鼠洞

講述一個老鼠洞的故事。而每次阿鼠爸爸和部下出場都會穿綠軍遊擊隊裝,牠的部下都會大喊:「阿鼠爸爸頂呱呱,係鼠見到佢都怕!」[芒按: 哈哈哈哈哈…我記得呢個啊! 好經典啊啊啊啊啊!!!]

駱俊文 飾 大盜阿鼠爸爸
麥長青 飾 大隻鼠,黃飛鼠,朱古力(貓)
黃智賢 飾 阿城
朱 茵 飾 阿雪
譚玉瑛 飾 醒媽,阿花(貓)
張沅微 飾 四眼鼠
顏菁葦 飾 Kitty (阿鼠爸爸的女兒,同時也是鼠俠吱吱吱)

相關歌曲:《小老鼠與大花貓》


(呢首歌又係好得意…曾經有好幾個version…呢個葉佩珩版本應該係第一個? 好似仲拿過兒歌金曲…後來陳婷欣都唱o左一個新version!)

戴家庭
[芒按: 呢個環節我好鍾意睇! 最深刻係jay姐姐用好typical好嗲+好唔鹹唔淡英文發音廣東話大叫: 家“dan”…特別留意個d音! 同埋家“ting”!!!!]


麥長青 飾 戴家庭(老二)/標叔叔(老師)
譚玉瑛 飾 戴家姐(老大)
駱俊文 飾 戴家彈(老三)
黃智賢 飾 爸爸/小彥
黎芷珊 飾 媽媽
朱 茵 飾 小茵(戴家庭的鄰居,家彈叫她牛王妹,家姐視她如姐妹)
粱詠琳 飾 小琳
張沅微 飾 小咪

相關歌曲
《戴家庭》(主唱︰溫兆倫)

點歌環節

兒歌通訊站:吳晶晶和黃寶君主持
叮噹榜: 吳晶晶和黃寶君主持(叮叮,噹噹),每一首候選歌會有一個人物代表,麥長青曾經扮過新城童夢,則卷千平; 梁詠琳扮過小雲
兒歌直播室由DJ Solo讀小朋友的來信(點歌),和播放兒歌。
朱 茵 飾 DJ Solo (愛收集海報和食零食)
顏菁葦 飾 Circle (Solo 接班人)

普通二人組

教授普通話環節,後來演變成一間國際學校的故事,裡面就讀的學生來自很多不同國家,例如中國、日本、印地安等,他們穿的是代表他們國家的服飾

麥長青 飾 誇啦啦(印第安人)
譚玉瑛 飾 舍監
黃智賢 飾 Rambo
駱俊文 飾 Turbo
朱 茵 飾 Susan
張沅微 飾 美子(日本和服女學生)
顏菁葦 飾 滿分(中國人)

認字特警

由羅貫峰、李天翔飾演特警,教授常見的錯別字。

校外智多星

用扭計骰做片頭,「校外智多星」突擊隊會隨時在每一間學校門口出現,問小朋友有關常識及時事問題,每答對一題,被會送出一份獎品,並在回答者身上貼上一顆星貼紙。最後會有一條本週時事難題,考大家有沒有留意新聞,答對的小朋友會有一份大獎。[芒按: 呢個環節又係好記得!]

遊戲

魔域傳說,以古埃及為背景的遊戲,每次參賽者4位,分別稱為「一石」、「二鳥」、「三蟲」、「四Duck」。遊戲目的是從老妖手中救回公主。
[芒按: 呢個遊戲我好記得…尤其係「一石」、「二鳥」、「三蟲」、「四Duck」呢四個名!!! 同埋我覺得呢個遊戲本身設計得好得! 好好玩…個setting都幾有心思! 好記得fing甩毒虫o個part!]

第一關:參賽者要將四個炸藥及一個響鬧逐一運返地面,用滑梯滑落斜坡,然後再用繩索連物件爬回地面;
第二關(舞得壇):參賽者身上會被貼著十二隻「蜘蛛」,然後要在一分鐘內狂跳,把「蜘蛛」跳走;
第三關:參賽者要回答老妖(譚玉瑛飾演)的問題,在發泡膠粒池找答案(通常為普通的加減乘除四則運算問題),達到一定分數便可以救公主,但是不一定能救到真公主,因為老妖會叫參賽者在2個石壁中選擇其一(一個後面是真公主,一個則是假公主),然後把其打破,所以如果選錯了,一樣是輸了,還要被老妖留下做奴人。


(“閃電傳真機”第一代主持)

因為在網上搜集資料, 無意中搵到呢位以前(應該係430至前閃電年代) 做童星的妹妹(其實可能係姐姐)的blog…佢應該同我差唔多大…好驚喜! 有好多舊相睇! 我記得呢個姐姐呀…o個時都幾鍾意佢, 覺得佢做得幾好, 不過唔記得佢叫咩名! 仲見到o個個年代其他童星好似劉淨然, 羅洛芹, 仲有一個係咪叫陳嘉嘉 (?!) 長大後同譚玉瑛姐姐的合照…好感動啊! d小朋友全部咁大個喇…真係好似睇住佢o地大咁…!

[芒按: 歡迎各位add to the list…集思廣益!!! 為我們的兒童節目提供更多資料!]

22 Comments:

Anonymous christy said...

我好記得個遊戲!!!
細個成日同表姐狂玩呢d遊戲! 哈哈哈! 我覺得好好玩架! 呢個遊戲其實真係幾有心思! 好鍾意:)
多謝你呢篇weblog.. 令我記返起好多"閃電"memories! :D

4:25 下午  
Anonymous Vince said...

認字特警好似後來有好多個, 要加個編號俾佢地

嗰個fing蟲遊戲非常正, 個鏡頭仲要郁來郁去

有一個環節係教小朋友整小食(不過唔記得係唔係閃電傳真機), 整完之後譚玉瑛姐姐問D細路好唔好食, 有次有個細路竟然話唔好食........

12:21 上午  
Anonymous Vince said...

後來有個環節扮報館, 唔知叫"傳真通訊社"定"傳真超短波"......

仲有, 究竟駱俊文去咗邊?

12:27 上午  
Anonymous 匿名 said...

芒姐你呢篇真係好好好好睇!!!
估唔到仲有人記得呢d環節!!尤其彊屍爺爺,"物"偵探同埋戴家庭呀,雖然記憶好模糊,但係你勾起左我久違的童年回憶,真係"往事只能回味"呀!!!
你真係好勁好有heart呀,咁都記得!!
p.s唔知大家知唔知曾做主持的張沅微(覺得佢好靚)同埋彊屍駱俊文(成日同黃澤鋒撈亂)而家點呢,仲有冇其他"閃電"人ge消息?

8:23 下午  
Anonymous 匿名 said...

我最愛既閃電,閃電,閃電傳真機啊!多謝芒姐俾返d童年回憶我!其實我算係後期閃電fans,好多節目播既時候我係讀緊幼稚園,不過好多節目我都仲記得,細個最鍾意"愛登時家庭",覺得佢地個個著哂黑衫勁型,好鍾意阿手!哈哈~仲有當然係烏卒卒啦,超經典!!

後期有個都好好睇架,講一個家庭係vicky姐姐做賓賓,之後張潔蓮姐姐同...好似係ben哥哥扮一對龍鳳胎既故事,好好睇好好笑架!vicky姐姐扮賓賓好得意架!

12:18 上午  
Anonymous 匿名 said...

芒姐你實在太強啦, 我要Orz

10:47 上午  
Anonymous Grace said...

多戲芒姐, 真係咩回憶都番晒黎. 個人最鐘意"鳥萃萃"同"麥偵探".
不過"認字特警"就冇任何印象囉,因為當時已經出左黎社會做野.

至於昔日主持既消息, 我淨係知顏菁葦早年同gary 哥哥譚偉權結束愛情長跑, 做左譚太.每當gary有話劇上演, 顏一定到場打點.若有幸大家都可以見到佢, 佢仲好靚.

11:31 上午  
Blogger Janice said...

對"三蟲"呢個遊戲印象好深刻呀!!!
超得loh!
當年睇親呢O的遊戲part都會幻想, 如果俾自己去玩, 一定玩得好過O的參賽者! haha ! 但當然冇試過報名玩啦 :P

btw, 有冇人真係報過名玩閃電傳真機o的遊戲呢?

12:15 上午  
Anonymous 匿名 said...

嘩﹐太勢利啦! 首共享陽光都有人up到上youtube度? 我而家仲記得點唱長腿叔叔tim! Memory 呢樣0野真係嚇死你!

仲有呀﹐搞笑0既係﹐我竟然記得Sunny哥哥首歌但430穿梭機D歌詞就只記得頭一,兩句!

其實以前好驚睇到殭屍爺、孫著古裝﹐所以我比較留意佢地換0左時裝0個時D Segment多D
also, 以前細個唔係幾鐘意呀黑殭屍harp白殭屍,又嫌白殭屍太蠢!

10:59 上午  
Anonymous van said...

駱俊文冇做電視之後去左搞小生意...
當年我屋企想裝個濾水器,阿媽唔知點解搵到一間公司代理呢d野,然後佢老板仲親身走上黎裝,佢一上到黎,心諗:"呢個咁似做兒童節目既?",個時細個唔係太睇兒童節目,唔知佢叫咩名,淨係知佢姓駱.而我阿媽當然唔知佢做過電視啦,跟住佢安完之後臨走留低咭片,睇返個名就肯定係佢
d濾水器成年要換個濾芯,一次會同佢買兩個,所以大約年半到又會見佢上黎換芯...不過睇佢做得唔錯,至少而家十幾年我屋企仲係用緊佢代理既芯,佢公司仲發展左,代理多好多唔同產品,佢公司(寫字樓)當年就係火炭,而家就唔知有冇搬到lu

12:25 下午  
Blogger 芒姐 said...

van,

咁搞笑? 下次記住問文哥哥攞簽名啊!

2:44 上午  
Blogger 芒姐 said...

匿名,

係...YOUTUBE真係咩都有...以後要拾回童年回憶, 易過以前好多!

2:47 上午  
Blogger 芒姐 said...

Janice,

我都聽過我D朋友話細個去過玩O個D遊戲...不過佢無講個詳情俾我聽! 院

「一石」、「二鳥」、「三蟲」、「四Duck」呢四個名我個人認為係改得超好...無得頂啊!

2:49 上午  
Blogger 芒姐 said...

Grace,

唔好客氣...尋回童年回憶, 我都好開心!

我都想知顏菁葦變O左咩樣...我成日都覺得佢有D似閃電一個小演員CANDY囉...

2:51 上午  
Blogger 芒姐 said...

匿名,

真係過獎喇...

2:52 上午  
Blogger 芒姐 said...

匿名,

唔洗多謝...其實我諗正如另一位讀者講, 一個兒童節目好唔好睇, 好取決於你係邊個年代...自己童年時代的兒歌/兒童節目, 永遠都係最好睇O既, 因為包含好多童年回憶, 一聽到O個隻歌/O個個節目, 就會諗番起O個段時間! 所以可能依家D兒歌, D小朋友都覺得好好聽, 係我O地覺得唔好O者...

vicky姐姐做賓賓O個個環節我都有睇過 (不過我O個時超大個喇)...應該唔係BEN哥哥...O個時佢離開O左兒童節目好耐...VICKY姐姐O個期仲有首歌叫"驚人發現"嘛...哈哈...我雖然好大個, 反而偶然會睇O下呢D節目...HOHO!

3:03 上午  
Blogger 芒姐 said...

匿名,

哈哈...多謝多謝...好多資料我都係結集網上資料O者...唔係我記得咁多...集思廣益永遠都係最強O既!!!

3:05 上午  
Blogger 芒姐 said...

Vince,

教小朋友整小食環節我都記得..."傳真超短波"係報導番D兒童節目/環節NEWS O架嘛!

3:07 上午  
Blogger 芒姐 said...

christy,

唔好客氣...

FING毒虫呢個遊戲真係好得!

我記得再早D(可能係"430"末期), 有個遊戲我又係幾鍾意...不過呢個遊戲益智多, 毒虫就體能多...佢有十個牌, E.G.開個題目係關於夏天, 咁D參賽者就要O係限定時間O翕同夏天有關的東西, 好似西瓜/游泳/熱/雪糕ETC., 睇O下中幾多個...我O個時覺得幾好玩...因為我鍾意呢D益智GAME多D...

3:13 上午  
Anonymous 匿名 said...

傳聞鄧健泓因做節目時搶對白而遭監製鬧... 抵死! 至憎人爭野講!!

1:50 下午  
Blogger 芒姐 said...

匿名,

真係? 佢咁大膽?!

8:47 上午  
Anonymous 匿名 said...

thanks for share...

11:41 上午  

發佈留言

<< Home