8-13(mon) 2007香港先生選舉
話咁快“香港先生”又去到第三屆, 每年個setting同埋節目內容都一樣, 真係慳水慳力, 不過最緊要反而係d女士o既表現!
呢個節目基本上除o左“騎呢”, 都無第二個詞語更適合去形容! 雖然好騎呢, 但又好好笑…睇得人好開心, 最開心係睇d女人笑到碌地個樣! 仲有d香港先生o既核突動作, 真係睇到全家都笑到碌地!
好少見d人開心成咁…每年令d觀眾咁開心一次, 都係好o既! d女人直頭癲晒咁, 其實係乘機大解放發洩o下o者, 同埋乘機恥笑o下d男人…宣洩o下對於男女不平等的不滿…難得d男人又自己報名o黎俾你笑喎! 你鍾意對d女人評頭品足呀嘛…依家咪評番你囉!
d三/四線女藝人有得出o黎睇o下show出o下鏡又開心, 咁咪大家都開心囉! 最正係年年都有伍姑娘, 因為佢表現最出位, 每年都好落力, 好識俾反應…之後十年都應該搵佢o黎! 不過最搞笑係連平時好正經o既向海嵐都好似癲o左咁…呢個節目o既吸引力真係大喇!
(好騎呢啊!!!)
仲有阿袁彌明, 呢期以“敢言”出o左位, 依家講親咩意見都係要彈彈彈, 平時無藝人夠膽咁講o野得罪人, 佢就有吉士! 咁又係, 佢如果“正路”地靠樣靠演技真係出唔到位, 唯有靠第二樣o野…咁都好o既, 起碼搵到自己條路, 做藝人寧願多人講 (無論好定唔好), 都總好過一池死水, 無人知係邊個! 佢要o係陸詩韻, 葉翠翠, 麥雅緻o個堆同屆港姐暨“娛樂直播”主持中突出自己, 又係要殺出另一條新血路o既…雖然真係得人多稱呼人少…不過我都幾欣賞佢o既guts…起碼夠膽殺出另一條新血路!
至於其他o個d評判, 寇鴻萍個大女唐貝詩又好似真係靚o左, 幾似佢個樣, 早幾年睇報紙見佢奇裝異服, 又整埋d smoky eyes, 好怪咁, 依家正常番咪靚d囉…不過都係佢阿媽個樣好d, 佢就唔知點解勁似羅明珠!
主持方面, 張可頤久休復出, 但仲係有d腫, 個妝又太濃, 仲要其實無咩發揮…佢都係做戲好過做主持喇!
d香港先生依舊笑爆嘴…質素一年比一年差, 真係好騎呢…反而當年亞視“港男”d質素仲好! 仲要個個都咬字不清咁! 到依家都唔明點解d男人會肯參加呢d選舉…需知道男人參加選美比起女人參加選美需要多10倍勇氣…性別歧視呢樣o野, 你唔係想話俾我聽無呀?
(報紙話呢位先生個動作似鹹蛋超人…笑死我!)
最老o個位叔叔, 43歲…其實年紀又唔係真係好大, 但個樣真係好老囉…諗o下劉華都已經45going to 46, 三哥都48啦…但個look都後生過佢好多…同埋佢作為人生閱歷咁豐富o既人, 點解講句o野都無咩point, 仲要口窒窒? 太可憐喇!
最細o個位18歲“小朋友”, 其實都唔細, 但唔知點解好似未發育咁?
o個個什麼翻版阿rain…對眼好似有事咁, 仲有個嘴更加唔知想點…本來阿rain我都唔覺得佢得o架喇, 但俾個咁o既人話似佢, 我真係feel so sorry for阿rain!
至於o個個tum得d女士好開心o既女人湯丸六號李豪…都好厚粉o下, 差d厚過張可頤…最怕d人厚粉, 女人已經好驚, 仲要係男人!
o個個拍過“少年古惑仔”o既維他奶仔袁偉豪先輸後贏, o黎一個反高潮, 好明顯有舖排…搞一個“失而復得”等大家“驚喜”o下…雖然又真係好expected! 其實呢d大家understood o既遊戲規則, 咩投票打電話, 大家都明o架喇…一場遊戲o黎o者!
佢都算最好樣o個個, 雖然阿北京人都幾出位, 但無理由俾佢做“香港先生”o架? 同埋由細睇到佢大, 細個仲睇o個本教壞人雜誌“yes!” (唔係話佢意色不良o個part, 而係佢利用雜誌去抹黑“毒瘤明”的手法…我真係超鄙視! 人o地想追你女友o者, 仲要都未追…洗唔洗好似殺你全家咁呀? 呢d人實在太無品) o既年代, 佢已經走去選校草…10年喇, 佢居然仲樂此不疲去選香港先生…真係好熱衷於娛樂圈囉!
香港先生回顧:
2006香港先生
2005香港先生
posted by 芒姐 at 1:51 上午
10 Comments:
芒姐，我星期六都有睇香港先生呀。好明顯女性對呢個選舉係熱衷好多囉，當我阿媽、我表妹同我睇緊呢個笑到碌地的節目時，我舅父就訓到成隻死豬扯晒鼻鼾咁，我阿爸就冇黎表情，個對比真係好大。
成晚個節目都好好笑，特別係果個乜乜「型男奇藝坊」，嘩，好似睇緊馬戲咁呀陰公。
最頂唔順係阿6號囉，之前都覺得佢冇乜野，但係佢比賽當晚唱《裙下之臣》的時候，佢一副以為自己好靚仔的樣，睇到真係好想死，好想打爆個電視機呀!!!!
不過唔知點解班香港先生濕完身之後個髮型勁老土，老土到爆呀。
我好後期先知果隻袁偉豪拍過維他奶廣告, 剛剛係youtube睇番個廣告, 個感覺都好驚嚇, 因為袁生真係老左好多, 佢依家副尊容真係一D都唔似26歲, 唔知仲以為佢同孫耀威同年, 但事實係大佢一大截的孫耀威都保養得好過佢好多, 十年o者, 你話由青年變中坑都可能會走樣走得勁D, 但由少年變青年唔洗殘得咁快下嘛? 我諗佢真係浦得好勁, 唔係點會殘得咁快! 事實證明, 無論係男係女, 如果太爛玩太夜訓, 都會好快殘! 大家以後都係早D go to bed 喇, ha ha!
芒姐，你講袁偉豪果part，簡直講中哂我既心聲啦!!! 當我睇到佢有份參選時，我心諗，你唔係fa，十幾歲腦筍未閂埋就去選校草，而家成年喇廿六歲就去選港男(唔知係咪因為先入為主~總覺得"港男"好聽過"香港先生")。芒姐你話佢真係好熱衷於娛樂圈，其實真係已經好"厚道"喇。我其實心底覺得佢根本由細到大都發明星夢! 不過，諗諗下，又或者做明星的確係佢夢想來既，佢都係堅持要實現佢既夢想0者。所以都係祝佢好運啦！老實講，我個人覺得佢個樣好過高鈞賢同上屆果個什麼黃長發？(不過我果晚冇睇香港先生，唔知佢表現係點)
同埋講開yes校草，唔知芒姐有冇留意一個叫"陳少邦"既人呢? 佢都應該加入左無線幾年了。雖然佢通常做d大閒角，特別常做d古惑仔，不過我覺得佢做戲都算好俾心機。記得有次睇【水滸無間道】，佢好似做郭政鴻其中一條ｏ靚。咁陳少邦同另一條o靚，唔知係咪因為hi野hi得多，所以平日成日流鼻涕呀抽筋咁。我見每次一有佢，佢就真係好努力咁做呢d動作(就算個鏡頭不是集中在佢身上)，雖然可能真係over左d，但起碼可以吸引到觀眾既注意。同埋佢好似係訓練班，唔係走"捷徑"入娛樂圈，所以我希望佢會上位架。果個"六折"個樣個格咁唔掂都有得做主角啦。
紙巾,
哈哈...陳少邦梗係有留意啦...成日都有提起佢添...
"四葉草2"O個個呀嘛...
http://hejnom3.blogspot.com/2005_04_15_archive.html
http://hejnom.blogspot.com/2006_10_15_archive.html
"最搞笑係見到吳卓羲同埋“4葉草2”做司徒瑞祈partner o既陳少邦做咖哩啡 (前排larp到“烈火雄心2”, 居然又係見到佢兩個做歐錦棠師兄弟)…吳卓羲上位都真係上得幾快, 唔洗一年就由乘客甲、乙、丙升格為飛機師, 依家仲做埋歌星添…真係有運行!"
...佢個PARTNER吳唱K已經上左位幾年, 佢仲係做二打六, 真係慘!
你講開我腦海即刻出現番佢兩個戴住"校草"彩帶的LOOK...都幾攞膽O下!
袁偉豪真係好想入娛圈, 屢戰屢敗, 屢敗屢戰! 咁佢又真係算呢屆之中比較好樣同埋質素平均...我都覺得佢好樣過前兩屆! 樣O黎講高鈞賢都唔算差, 黃長發就真係一個笑話...佢阿哥黃長興都好樣過佢好多!
匿名,
哈哈...咁死喇! 我都好愛夜夜都唔瞓...實殘得好快! 不過佢同以前個樣比又真係一下子老O左好多O既...
李小球,
咁又係...好似大部份女性覺得好好笑, 男士連睇都無興趣睇...所以佢淨係請600位女嘉賓去現場投票係好O岩O既選擇!
D先生真係勁騎呢...6號位先生, 唔知係咪自己[手查]O左好多私伙粉呢? 嚇死人!
係呀......6號真係一副「小白臉」樣，好驚呀~!!我都仲曬得黑過佢囉陰公......
仲有一樣恐怖野，就係我前晚上某uxxxxx forum睇野，見到有人想要6號比賽當晚唱的《裙下之臣》囉......你估會唔會係佢本人丫拿？
講真,都唔知選左d乜出黎。0個d咁既問答環節就問非所答。依依鵝鵝唔知佢講乜,講完一輪都唔知佢講左d乜。才藝就一半半啦, 有d就真係真材實料既,好似大小提琴同11號跳舞咁。但係2號既什麼花式健身球就不敢恭維喇。佢同平既做gym有咩分別? 同埋阿7號真係好聰明,自知唔唱得自彈自唱首咁既歌,彈又冇功架可言,唱又冇技巧,佢都真係一丁屎才藝都冇,或者佢除褲扭籮會好睇d。話時話,第一次有人話佢除褲拄籮時,佢0個時就否應話可能會玩得投入,但係冇除褲。到有人搵到料佢又改口供話0個時唔識諗喎。真係真真假假。其實除左7號個樣among其他比賽者中比較好d之外,冇咩係可以另佢摘冠囉。如果有上屆阿黃長興,單睇樣佢都要講拜拜。好明顯個冠軍特別比佢架啦今次。到最後階段,0個3個要表演武術定唔知係乜。真係天有眼,佢又係耍棍,11號又係耍棍。好明顯啦,人地有功夫舞蹈底梗係好睇過佢好多啦。真係可能因為11號天生個樣唔夠sharp同埋天生唔係香港人啦,真係整定哂。
其實唔知係唔係為左想比個機會7號,就搵埋哂d咁既質素既男人入圍。真係係旺角隨手拿10個都好睇過佢地囉。呢個節目一d代表性都冇。最緊要今日睇報紙, 第一屆冠軍話自己入左行之後,好努力咁擺脫港男既形象喎,真係好諷刺。
2號好似司徒瑞祈呀, 成晚我都以為係司徒先生比賽緊。43歲阿叔成個show都發緊夢, 又話咩野我有2個仔又咩野你又有個仔,語無倫次。不過最搞笑都係阿do姐, 係最後猛咁係度嗌7, 11, 7, 11。7-11真係多謝哂。
李小球,
都有可能! 同埋D騎呢O野一向都有MARKET, D人用O黎笑O下都開心嘛!
Esaltato,
算啦, 今年O既質素, 可以做到呢個娛樂性, 都算幾好O架喇...睇"香港先生", 大家都係預O左得啖笑O者!
旺角搵十個係會質素好過佢O地, 可惜旺角D人唔會想參加呢個比賽呢! 如果想入娛圈, 可能讀訓練班都仲好D...參加得呢個騎呢比賽, 預O左一世都比人笑...
發佈留言
<< Home