8-25(sat) 2007兒歌金曲頒獎典禮
嘩…真係好感動呀…好多年無睇過咁好睇o既“兒歌金曲頒獎典禮”!
之前十年o個d都係好悶好求其 (雖然我年年點都會俾面睇o下…但我都唔記得我舊年有無睇到…因為我只係搵到前年o既“2005兒歌金曲頒獎典禮” 同埋後記:“觀眾不滿鄭欣宜吻吳卓羲投訴破今年紀錄” , 舊年就真係搵唔到), 但係今年居然主力回顧番好多精彩環節 (好似auntie烏卒卒, 殭屍爺孫, 麥偵探, 吱吱鼠…), 仲叫番好多代o既兒童節目主持出o黎…真係好經典啊! 好多年無keep兒歌金曲o既帶喇…不過今年真係好有意思…我決定要keep起佢! 勁!
今年個節目大部份內容都好精彩…除o左d得獎歌曲真係完全唔得, 只係sell旗下藝員o既一個機會, 全部得獎o既都係tvb d藝員…d cast基本上係一個年青版o既台慶, 而d得獎歌曲真係一d都唔好聽…同以前d完全無得比!
仲有, o個段港男+港姐舞蹈都好難受…請問同兒歌金曲頒獎禮有咩關係呀? 同埋安排個極高港姐周美欣配極矮港男胡志偉pair up跳舞, 令佢o地跳得極leh heh…係咪玩o野呀? 阿胡生極落力, 可惜佢個拍檔太高頭大馬…搞到佢o地真係好leh heh! 反而王君馨同袁偉豪o個pair就跳得幾好!
另一度玩o野o既就當然係搵貽興王做兒童節大使…真係唔知點解要咁玩佢? 係咪想玩死佢? 佢仲要懶cutie咁o係度“jip jip jip”...我真係戥佢難受, 亦戥所有觀眾難受! 仲有佢個好拍檔沈卓盈又o係度…真係最緊要進步! 我相信呢期鄧健泓都步向做王貽興第二, 崔建邦第三喇…又係咩節目都有佢份! “廣告頒獎禮”, 接“最緊要進步”o個個“味分高下”, 跟住“兒歌”又有佢, 好似“勁歌優秀選”都會有佢, 仲話佢會踢走amigo做“勁歌”主持添…tvb捧人真係永遠都用o個套…就係夾硬食滯你!
(嘩! 超勁呀…youtube已經有人將開幕o個part post o左上去…!)
不過唔緊要啦…佢搵番好多闊別螢光幕多年o既兒童節目主持出o黎呢個舉動我真係好欣賞…好難得, 好感動! 仲要最後一part係回顧番咁多年o既兒童節目…跳飛機, 430穿梭機, 閃電傳真機, 至net小人類, 同埋依家o既放學icu…仲要唱晒咁多首兒童節目主題曲 (仲有原唱者松松姐姐唱番佢首 “閃電傳真機”…但真係好可憐, 佢o地仲要一齊唱番依家首騎呢“放學icu”主題曲…相信除o左莫生之外, 松松姐姐, 朱茵同sunny哥哥聽都未聽過首歌…點解唔叫番原唱者patrick哥哥唱?! 反正都要力捧佢咯! 更騎呢o既係…我都識唱少少呢首歌…哈哈哈!)…真係回憶番晒埋o黎!
譚玉瑛姐姐o既auntie烏卒卒 (嘩…佢個樣真係完全無變! 但係點解唔搵番麥包哥哥做矇查查…明明佢都o係度o架嘛?!), 麥包哥哥啦, 芷珊姐姐啦 (又點解芷珊姐姐o黎到, 都唔扮番殭屍孫女? 我很喜歡佢同殭屍爺爺的殭屍操…“嗚嗚鳴…捐山窿…時時做…骨都鬆”…不過佢o地今次都有跳番殭屍操頭十式…雖然跳得十級混亂, 但依然好經典! 唔得…我一定要寫多篇 “我的兒童節目” 啊!), 笨哥哥 (ben哥哥黃智賢), “兒歌兒歌”o既吳晶晶姐姐同POLLY姐姐 (佢仲要做o左警察喎!)…佢兩個真係保養得好好…10幾年前佢兩個又係同阿旦一齊做兒歌金曲主持 (當時我頂多係初中), 個樣同依家完全無變…好驚…不老的傳說啊!!! Oh, 仲有後期少少o既朱茵, 魯文傑哥哥, 姚安娜姐姐! 相信我o地o個個年代o既小朋友, 尤其係我呢d咁愛懷舊的人, 見番佢o地…真係會好感動! 唔係講笑, 係真係由個心裡面感動番出o黎o個隻!
仲要有埋曾華倩姐姐, 張國強哥哥, sunny哥哥, 同怪獸嚴秋華都有…相信比我再早兩代的朋友, 都會好感動…而我就係睇到“前閃電”年代最感動o既一群! 同埋真係好鍾意譚玉瑛姐姐囉…佢講o野個感覺好authoritative! 成個校長咁…一個字: 型!
(超經典歌曲: 1984年“共享陽光”…呢首歌我好鍾意聽o架!)
(另一版本:“共享陽光”閃電傳真機版…有jay姐姐, 譚玉瑛姐姐, 芷珊姐姐, 仲有文哥哥, ben哥哥同埋麥包哥哥…當然, 後來已經俾“夏季sha la la”取代o左! 一講開呢d懷舊o野…真係講十日都講唔完!)
之後o既“後閃電”到“至net小人類”年代o既代表…情挑三哥o既張美妮姐姐, 唐韋琪姐姐, 蔡子健哥哥, 蓋世寶姐姐…其實應該仲有佢舊愛patrick哥哥…點知佢就做o左另一個身份…得獎歌手…呢期力捧嘛!!!
發覺真係好多代o既主持都全部仲o係tvb…不過已經去o左唔同崗位, “東張西望”o既芷珊姐姐 永遠負責訪問佢d舊愛…仲有居然無啦啦入o左戲劇組負責情挑三哥o既張美妮姐姐, 同埋“爸爸閉翳”o既家齊…麥包哥哥etc.!
至於壓軸最經典至尊兒歌得獎歌曲係“烏卒卒”…我覺得都算係好實至名歸! 兒歌天后呢個名堂…松松姐姐又真係當之無愧! 一路聽松松姐姐唱呢首歌同睇埋後面d片段…個心真係la下la下…你明唔明o個種感覺? 可能真係因為我o地成長於o個個年代, 係我o地童年的集體回憶啊! 唔知依家d小朋友仲識唔識呢首歌呢? 又或者唔知細我十年o個d, 都有無聽過呢首歌呢?!
(“烏卒卒”MV…真係好經典! 聽到幾乎想喊…唔知點解…真係those were the days…我的小學年代啊!)
其實另一個o係兒歌界都有一定地位o既應該係唐韋琪姐姐…佢首“長腿叔叔”又係經典…雖然同松松姐姐o既經典程度係有一定距離, 但松松姐姐o既地位都叫做有人肯定, 佢就係完全提都無人提o下…真可憐!
至於其他d得獎金曲, 基本上係俾TVB藝員攏斷…以前真係會因為首兒歌紅而得獎, 好似松松姐姐可以一年拿三首兒歌金曲, 有d不知名o既主唱者都會得獎, 近幾年真係變晒質, 變成宣傳旗下藝員o既show, 無咩意思…所以都好耐無好落力咁睇喇…但今次因為有回顧, 所以即刻加晒分!
除o左回顧o個part, 其他就係似年青版台慶…全部力捧花旦小生…林峰, 黃宗澤, 鄭嘉穎, 佘詩曼, 胡杏兒, 廖碧兒, 鍾嘉欣, 湯盈盈…再無啦啦叫埋d經理人合約的藝員出現乘機大晒冷…鄧健泓, 司徒瑞祈, 楊秀惠, 仲有女生宿舍個前成員macy…好似話都係o岩o岩簽o左經理人約!
依家d兒歌真係未聽過…廖碧兒同胡杏兒有隻咩 “朱古力與雲呢嗱”咩? 真係未聽過…不迥幾鍾意睇佢兩個一齊…令人諗起 “律政新人王”的好拍檔ling ling同jessica! 不過佢o地唔敢唱live…扣分! 林峰又係唔敢唱live…都要扣分! 平心而論, 唱得最好o個個反而係常在心鍾嘉欣…佢仲要係唱live添!
唯一最好聽o個隻歌就係kenny+deep+泳兒+鍾舒曼o個隻“小學館”…但真係唔知幾時變o左兒歌囉?!
家燕姐個大女搞咩? 以前個樣都ok…依家去o左外國幾年大o左幾個碼, 個樣仲搞成咁…仲有佢件紅衫…娘到唔娘…我以為佢準備自殺添!
鄭嘉穎…雖然我都幾buy, 但係佢o既身份真係有d尷尬…基本上回顧緊o個班人, 係同佢同一個年代…但係佢就要拍埋細佢十年有多的mk wong身邊一齊宣傳新歌…佢唱“棒球小子”o既時候, mk wong分分鐘仲讀緊小學…不過真係不得不讚佢年近40, 真係保養得超好, 拍埋mk wong度佢仲煞食d添!
同埋其實我覺得o個隻咩“軍曹三”都唔好聽o既…唱“強劍泰文版”好好多啦! 其實我真係唔明點解隻青蛙 (係咪青蛙o黎?!) 會咁紅呢? 又唔係靚又唔係得意 (喜歡牠的朋友請不要打我!)…又keroro, tamama咁…我成日都覺得好好笑…好似粗口咁!
仲有…點解阿局長李少光個仔李霖恩, 前幾年睇報紙, 唔係話佢終於識諗退出o左娛樂圈啦咩? 點解依家又返番o黎做“放學ICU”? 佢真係咁留戀娛樂圈?!
唔好意思…呢篇真係太長…因為講開童年回憶…真係特別高興…停唔到口! 下期繼續…
posted by 芒姐 at 12:10 上午
29 Comments:
「…個心真係la下la下…你明唔明o個種感覺?」
明, 好明, 只不過你同我嘅感動位唔同0者... 你我年齡相差一大段, 我嘅童年應該屬於前430年代, 即有朝偉、華倩同星爺嘅年代... "烏卒卒"令你感動, 讓我無比感慨的卻係"叮噹"、"藍精靈"、"黃金戰士"、"IQ博士"、"未來警察"... 雖然大家年代不同, 感動位不同, 不過我好明你o個種感覺, 因為我都係一個愛懷舊、常記掛著童年的人！
懷舊人，
叮噹都係我年代喎！應該話，叮噹o係每個小朋友o既年代都有出現！直到依家，叮噹都係咁受歡迎，歷久常新！
我o既年代係閃電傳真機，所以烏卒卒,殭屍爺孫,麥偵探,吱吱鼠...呢d我全部都好有感情！估唔到今次搵埋咁多節目主持人返o黎，好有心啊！好似大家返o黎開P咁！不如唔好頒獎啦，唱多d經典兒歌啦，哈哈！
我細細個時，日日放學都趕住返屋企睇閃電傳真機，裏面d卡通片好正o架！d兒歌都好好聽！唐韋琪姐姐d兒歌都好好聽o架！“長腿叔叔”固然係經典啦！仲有一個姓袁o既姐姐！係咪叫咩瑛？唔記得啦！都好好聽架！
依家咁大個，已經唔睇兒童節目喇!所以依家d兒歌聼都未聼過！不過呢個年代o既小朋友自然識得唱o架啦！而且都會覺得好好聽添！一首兒歌好唔好聽，好大程度係取決於首歌係咪屬於自己年代o既回憶。
不過不得不說今次d主持人，點解要搵旦哥同曾華倩？雖然係有名氣，都好似做過兒童節目（年代久遠），不過唔覺得適合做兒歌金曲頒獎典禮司儀喎！曾華倩淨係識得問人“星仔點啊”。個張嘉兒仲衰，好幾次接唔到稿，要旦哥提佢。旦哥亦唔見得好好，感覺佢好似完全唔熟悉呢一範。
係呀! 我都係430+傳真機年代o架!!! 意外地睇到呢個節目，本來諗住熄電視啦，點知見到o的懷舊經典兒歌先知執到寶!
不過可惜o既係佢除o左「烏卒卒」(首歌我到而家廿年後都仲識背!)之外，其餘o的歌都無播番o的舊片段o既! 同埋係啦，我都唔明做乜唔叫番麥包同芷珊姐姐扮番佢地自己o的角色囉，話晒感覺好唔同架嘛!
我都好鍾意懷舊架，特別係兒歌同卡通片(因為好少人會為兒歌出帶或者出碟架嘛，同埋以前連錄影機都唔係太普遍，想錄低o的回憶好難得好珍貴o架，邊似得而家有internet咁易download)。以前有個好出名o既兒歌網可以聽番好多經典兒歌架，不過可惜而家變左兒歌歌詞網lu。好在前排o係youtube搵番小部份經典兒歌好似「如果一打」、「相聚一刻」、「伙頭仔昆布」、「陽光與海灘」呀咁，連閃電傳真機主題曲都有啊! 咁樣我先至搵番少少童年回憶咋!
鄧健泓好耐衰。
好耐衰??? 粗口????
係喎, 睇唔到自己打錯字。係樣衰。佢真係好樣衰。
我係閃電傳真機年代的,我好少睇兒歌頒獎禮,如果唔係玩集體回憶我都沒有興趣睇,好多回憶返返來,有幾首歌估不到自己都仲記得d歌詞,自己都surprise!
d得獎歌曲真係,我由睇第1首罵到第10首,真係無線玩野到,以前係d人唱兒歌做兒童節目做到出去,e.g麥包,patrick,子健,芷珊,現在變成d藝員一係冇地方紅就返返轉頭來唱兒歌,一係就d姐仔紅唔夠再霸多個地頭,我在forum睇到一句好頂癮,話"佘詩曼連兒歌頒獎禮d獎都貪",XD..
睇完兒歌頒獎禮,除了我未見過的sunny哥哥變o左叔叔,松松姐姐殘了不少之外,真的好多artist都冇老過呀,真係好surprise!
漏左句,一睇到嘉穎同bosco一齊,我立即想起在你的blogger看到的斷背版強劍,XDDDD
我見到譚玉瑛姐姐時真的好想哭,我真的太掛住她啦!
還有,好討厭那些小生花旦一個二個咪嘴,難道覺得小朋友比較好欺騙? 對林峰太失望了,已經簽約做歌手還不唱live. 現在對肯真唱的花旦們(阿佘,鍾嘉欣和湯盈盈)好感大增.唱得好不好不重要,因為所有人都知道他們不是歌手,不會expect太高.但至少他們尊重場合.
覺得阿佘有d慘,她未必想要這些獎(拿了都沒用,又會比人插),但唔通TVB給我我不要嗎?
最後,張嘉兒第一次做算不錯了,比去年那個好很多.看好她在主持方面的發展.
Polly 姐姐 is a police??? huh..
re: 真的好多artist都冇老過呀
都唔係, 朱茵自從跟左阿paul之後, 都老左唔少, 早一兩年仲有一排見到佢有幾層眼皮, 都幾驚心動魄。
有d懷疑我係咪無晒童年記憶...
我印象比較深刻的都係430穿梭機時代
因為當年轉左閃電傳真機我就無睇喇
「烏卒卒」我都好記得
不過我比較記得都係叮噹, IQ博士, 藍精靈同千年女王
...
我係桃桃
這之的兒歌頒獎禮真係要讚啊,松松姐姐的兒歌天后真係實至名歸,其實佢唱歌好好聽的,都唔知點解當年淨係係兒歌頒獎禮先見到佢,但係其他真正的頒獎場所就無佢分,唉...
說起上來,點解唔見伊健哥哥的?松松姐姐的好拍檔,佢都係兒童節目主持來的啊。
仲有,回覆三樓的匿名,你說的應該係袁鳳瑛啦,她唱的「仙樂飄飄處處聞」的主題曲,好像是叫「仙樂處處聞」啊,不知道有沒有記錯,頭幾句「宇宙誰在暗暗笑,輕輕送人間仙樂處處飄,女孩仍舊赤腳在跳,忘了青草隨她心情慢慢搖,最老的東西是甚麼,是大家出生已學會唱的歌,永遠青春是甚麼,大地的歌每日每夜唱和...」當年都好喜歡這首歌的,都是同長腿叔叔一樣的經典世界名著的主題曲,還是林夕填詞的哩。
http://www.56.com/u33/v_MTY5MDgwNzg.html
92年松松姐姐在兒歌頒獎禮唱烏卒卒
哈哈, 我都覺得鄧健泓幾樣衰, 尤其係佢個籮咁大嘅口!!
btw, 我覺得佢做主持唔係太好, 又係眼高手低果種, 想搞笑又搞唔到, 想抵死又抵死唔到, 最終落得乞人憎三個字... 突然覺得貽興王冇以前咁面目可憎!
匿名,
哈哈, 咁鄧健泓做主持都好過貽興王少少O既...雖然佢懶係搞笑又真係一D都唔好笑! 不過論樣貽興王就好佢少少!
匿名,
thanks! 當年O既松松姐姐唱得好過依家添!
匿名,
松松姐姐當年唱得更好聽, 依家倒退O左少少...不過佢真係好適合唱兒歌!
我諗佢只可以O係兒歌界走紅, 係因為佢當年走的OVER清純路線同演藝圈真係格格不入...到後期佢忽然來個大解放, 但已經太遲!
伊健哥哥O係兒童節目界唔算太紅, 同埋佢可能請都唔O黎呢! 佢O個期仲有陳家輝(梁小冰個老公)一齊都係做430主持!
Crystal,
你未免太"早熟"了...哈哈!
"430穿梭機"係有印象, 但從四年級變了做"閃電傳真機", 一做做O左十年又真係睇得最多印象最深刻!
匿名,
朱茵早幾年老得仲多, 呢幾年都KEEP得OK...其他哥哥姐姐真係KEEP得好好!
fiona,
Polly 姐姐話自己係紀律部隊...MADAM喎!
匿名,
譚玉瑛姐姐的確係十分經典...唔知佢依家仲有無做兒童節目呢?
係啦, 肯唱LIVE的藝員真的要加分!
我都覺得張嘉兒第一次做主持其實算OK, 好過前兩年O個D冠軍...奈何佢真係唔靚, 當選冠軍害O左佢!
笑哈哈 ,
佢事先無大肆宣傳玩集體回憶, 如果唔係應該更多人睇...O徙晒!
佘詩曼拿金曲金獎的確離譜, 不過可能佢都唔想O既...只係無綫呢個安排太OVER了!
哈哈...唔知點解依家成日安排嘉穎同bosco做"一對"...唔知係咪想安排佢O地做螢幕情侶? 我都寧願佢O地唱番"強劍"!!!
Esaltato,
如果PATRICK哥哥唔係成日懶好笑懶風趣, 感覺會好D!
g_amazing,
咪係, 叫O左D舊主持O黎又唔叫佢O地演番D經典角色...真係O徙晒!
我都覺得發明INTERNET的人好偉大...仲有YOUTUBE啊! 依家真係可以搵番好多經典片段!
"以前有個好出名o既兒歌網"...你指PAZU?我以前都成日去! 好彩依家YOUTUBE都搵番好多舊歌!
匿名,
袁鳳瑛的"仙樂處處飄"我都好鍾意聽...同“長腿叔叔”一樣係92年得獎金曲, 遲D我都諗住POST番!
咁又係, 我都好認同你講"一首兒歌好唔好聽，好大程度係取決於首歌係咪屬於自己年代o既回憶。"...所以依家D小朋友可能都好唔認同我O地呢D老餅話佢O地呢代D兒歌唔好聽!
我又反而覺得搵旦哥同曾華倩做主持好適合喎...阿旦做O左好多年兒歌金曲主持, 華倩就做O左好耐兒童節目, 同埋佢O地壓到台, 可以帶住D細O既!
懷舊人&匿名,
好高興大家明白我的感覺! 童年回憶永遠是令人懷念同埋美好的...
叮噹又的確係每個年代的小朋友都會識!
我最愛既閃電，閃電，閃電傳真機啊!多謝芒姐俾返d童年回憶我!其實我算係後期閃電fans，好多節目播既時候我係讀緊幼稚園，不過好多節目我都仲記得，細個最鍾意"愛登時家庭"，覺得佢地個個著哂黑衫勁型，好鍾意阿手!哈哈~仲有當然係烏卒卒啦，超經典!!
後期有個都好好睇架，講一個家庭係vicky姐姐做賓賓，之後張潔蓮姐姐同...好似係ben哥哥扮一對龍鳳胎既故事，好好睇好好笑架!vicky姐姐扮賓賓好得意架!
發佈留言
<< Home