9-7(fri) 1992兒歌金曲頒獎典禮

(繼續續前篇)

既然懷開舊, 咁就一拼懷埋佢, 繼嬻再一齊回憶美好的童年! 希望年青的一輩容忍多我o地呢d哥哥姐姐多一陣…!

因為今年兒歌金曲懷的舊“戚”起o左我條筋, 特登摷番都已經幾花o下o既珍藏錄影帶“1992兒歌金曲頒獎典禮”出o黎睇…真係好經典啊! 真係要再次多謝youtube, 連呢個節目o既片段都有朋友upload左, 令我可以摷番d精彩片段同大家一齊分享…唔洗齋講咁dry…!

其實呢一屆應該係第一屆兒歌金曲頒獎禮, 因為92年係無綫銀禧, 所以特登整o左個“無線銀禧兒童節”o黎贈o下興! o個時好似14歲以下都可以投票, 我都食都o個水尾有資格去投o下…每個投票o既小朋友仲可以得到一本有晒咁多首候選兒歌o既書仔…我好珍而重之o架! 我諗我其實真係幾鍾意聽兒歌...! 後尾返到學校仲發現有個同學仔真係去o左呢個頒獎禮…有d羨慕佢添! 哈哈!

o個年仲特登整o左首“無線銀禧兒童節”主題曲, 搵o左當時最大規模o既唱片公司寶麗金一班歌星張學友+黎瑞恩+李克勤+湯寶如+唐韋琪+草蜢唱o左呢首“未來的天才”…又係好好聽, 仲好勵志添…



(嘩…好勁喎…連tvb版“未來的天才”mv都有兩個…)



亦因為呢一年係第一屆, 所以d候選歌係特別好聽…原因係儲埋o左好多年o既經典兒歌都成為呢屆o既候選歌…之後無一屆可以媲美! 同埋我真係覺得以前d兒歌係好聽d…當然, 我唔排除係情意結因素o既…正如有位讀者所講, 一首兒歌/一個兒童節目好唔好睇, 好取決於你係咪屬於o個個年代...自己童年時代的兒歌/兒童節目, 永遠都係最好睇o既, 因為包含好多童年回憶, 一聽到o個隻歌/o個個節目, 就會諗番起o個段美好的時光!

咁呢個第一屆舉辦o既兒歌頒獎禮節目當然係大獲好評…又好睇又健康, d小朋友第一次做主角, 當然睇得好開心! 每首得獎歌, even係候選歌都好好聽…因為全部都係陪住你成長o既歌, 同埋即使個主唱者唔紅, 都仍然可以得獎…同依家為捧人而搞頒獎禮, 連佘佘都可以拿金曲金獎係完全兩回事(當然, o個屆都有少少係俾寶記班歌手攏斷…除o左得獎o既草蜢, 唐韋琪同三小花, 仲有學友, 克勤o黎表演…再唱埋首主題曲“未來的天才”…但係依家俾無記自己d藝人攏斷就更騎呢)…雖然我o個時都讀緊初中, 但仍然好鍾意睇! 之後o個幾年, 已經無咁精彩, 跟住又好似停辦o左一兩年, 到近年再搞番, 個感覺已經差好遠喇!

睇下下面十首得獎歌曲名單…你就會知我唔係呃你…

1) 烏卒卒
2) 夢中天使
3) 叮噹
4) 夏季Sha La La
5) 如果一打
6) 仙樂處處飄
7) 快樂專線
8) 學生哥
9) 你給我記住
10) 嘩!伙頭仔昆布

好勁呀…依家網上世界真係好勁, 咩資料都有…連wikipaedia都有關於“兒歌金曲頒獎禮”o既資料!!!

92年呢屆係由阿旦, 吳晶晶同周慧敏主持…兒童節大使係陳松齡同郭富城, 而唔係貽興王囉…唔該!) o個時睇完呢個節目, 仲特登走買去o左餅有晒呢d兒歌o既錄音帶…因為d歌實在太好聽…兒歌真係幾得o架!

松松姐姐呢屆有三首歌得獎, 簡直係兒歌界o既劉德華 (印象中只有劉華o係91年勁歌一人獨得三首歌…之後都後無來者, 同埋因為唔可以得失各唱片公司, 依家一人最多分一隻, 皆大歡喜嘛!)…三首歌分別係“夏季sha la la”,“烏卒卒”同埋“叮噹”(呢首其實就真係唔太得, 仲要唔係平時我o地聽開的“叮噹呀…誰都喜歡你, 小貓也自豪”…係一首新版本, 不過用o左一陣就無用喇, 同其他兒歌o既經典程度差好遠!)…三首歌之中, 我最鍾意o既唔係“烏卒卒”(不過無可否認佢係最經典)…而係“夏季sha la la”!!!

“夏季sha la la”好似係91年暑假推出…取代o左八十年代每年o既“共享陽光”! 一聽到首歌就覺得好夏日, 好開心, 好令人諗起當年無憂無慮o既暑假! 可能因為首歌係我最喜歡的1991年推出, 最開心+最無憂無慮o既六年級暑假…好令人懷念…所以更加加o左分! 都話一首歌好唔好聽, 有一半係感情分!


(“夏季sha la la”mv…又係勾起好多童年回憶! 呢個mv又係真經典…嘩, 七彩到呀, 又跳草裙舞
…真係好sha la la!!!)

當然唔少得o岩o岩獲選為 “至尊兒歌金曲”, 當年o既得獎歌曲“烏卒卒”啦…15年後再聽番呢首歌…真係好感動! 時間真係過得…太…太…太…快喇! 大家一齊來個15年前後大對比…就會明白點解o係今年o既兒歌金曲見番松松姐姐…內心會咁感動!


(烏卒卒@1992兒歌金曲頒獎禮)


(烏卒卒@2007兒歌金曲頒獎禮)

仲有另一首我認為經典程度有資格媲美“烏卒卒”o既長腿叔叔主題曲“夢中天使”…奈何真係因為vicky姐姐太唔好, 所以呢首歌無得再得獎! 但係我相信又係每個小朋友都識唱…紅歌唔紅人o既一大例子…真係慘! 其實vicky姐姐唱歌真係唱得好唔錯! 咁多年不停有人翻唱或者係唔同節目唱o下, 但無人唱得好過佢 (當然加埋先入為主呢個元素啦!)!!! 同埋…我難以理解我點解o係youtube會搵唔到佢唱o既“夢中天使”????? 佢係咪真係唔紅成咁? 太可惜! 只係搵到呢個去學校唱o既live version…都好! 睇現埸反應…就知呢首歌真係有幾咁hit…係人都識唱!

仲有…o係個兒歌網搵到以下關於呢首歌o既資料…笑爆o左嘴…寫得好抵死:

(話說當年唐韋琪初出道，係以一個流行歌手的姿態出現，未主持兒童節目的。佢好似其他新歌手咁唱一下 (注意，最初只係唱一下) 兒歌，但唔知好彩定唔好彩，佢唱的兒歌《夢中天使》(長腿叔叔主題曲) 極受歡迎，首歌的知名度遠勝佢第一隻碟的主打歌《飄戀》(歌名由網友提供)。而在當年年尾的港台新人頒獎禮上，每個新人歌手都有機會出場亮相，兼且會有佢唱的歌播出。而唐韋琪出場時播的居然是《夢中天使》，而唔係佢俾電台的主打流行歌，這個情況都十分特別。

另外，當年無線在頒獎禮前一或兩個星期的《勁歌金曲》，請晒當年所有有簽無線的新人，唱佢地的歌兼亮相兼拉下票。而當唐韋琪佢唱完佢首流行曲後，坐在另一邊的主持阮兆祥，就笑笑口咁話：「如果唐韋琪佢唱長腿叔叔的話, 我都唱番首大水牛布斯」(大約意思，我都唔記得那些字眼)。當時好想睇下唐韋琪有乜反應，可惜鏡頭冇影她.
可能佢以為自己句野好好笑，我聽完之後都唔覺得好笑，反而覺得佢句野不知所謂：一來套卡通應該係叫《肥牛牛布斯》, 二來套卡通冇主題曲，三來佢要唱都唱佢自己的歌《俏皮扮野貓》啦！)


至於我最鍾意o既一首…其實我都唔知點揀, 因為有好幾首我都超級鍾意, 不過我想揀jay姐姐o既“如果一打”…因為真係好經典! 仲要係經典在首歌本身, 而唔係因為主唱o既歌手紅…我諗依家都無咩人識jay姐姐, 又或者只係記得佢係d劇集做八婆, 同埋曾經係danny summer個女友! 我對於呢首歌連候選今年“至尊兒歌金曲”都無份…感到極不知所謂囉!!! 不過好似連“夢中天使”都無…我好懷疑係點揀出o黎? 唔係候選都無呀? 唐韋琪姐姐仲要有份做呢個節目…唔知會唔會好心傷?!

不過呢首歌真係無得講, 好得呀! 個旋律好兒歌, 好易上口…仲有d歌詞真係…好特別! 細個時一聽到個名“如果一打”, 已經覺得好得意! o個時覺得點解咁怪, 咩“如果一打”其實唔係好make sense, 文法上有d怪…當然, 只係o個時唔識欣賞…之後睇番, 其實佢煞食就係玩字呢part…將“如果”用作一個noun, 好特別…依家睇番就更正! 原來呢首歌仲係“第一屆樂韻譜兒歌創作大賽的冠軍作品”…唔怪得知!!!

呢首歌又係超經典…只係聽到個前奏…心頭已經有一陣感動! 好鍾意去k唱…不過都係唔夠呢個tvb原裝mv版本咁經典…相信所有我個年代o既小朋友一定記得呢個mv…當阿小演員candy打開個音樂盒, jay姐姐就以仙子造型(其實係芭蕾舞衫) o係音樂盒跳出o黎同佢一齊跳舞, 再跟住就係d小朋友個個都頭戴一朵大花花, 坐o係條樓梯度左右搖攞…唔知點解真係好深刻!


(如果一打by梁詠琳)

佢仲有另一首得獎歌“快樂專線”, 係同馮家俊合唱, 後來一班閃電主持都好似重唱過…呢首歌我都好鍾意…好輕快勵志…可惜搵唔到mv!


(oh, 仲搵到呢首“叉燒飽與漢堡飽”…不過唔係得獎兒歌! 又係好得意…同埋佢同ben哥哥呢個環節我都好鐘意睇…仲有佢o地兩人頭上頂帽…好鍾意! 你話首歌好好聽又唔講得上…但係真係充滿住童年回憶囉…! 同埋“閃電”前期d環節真係寫得好好, 好有heart…每日有不同theme, 好似星期一做“戴家庭”etc…仲要d環節幾得意但又有意義, 好似“叉燒飽與漢堡飽”介紹中西菜色, 順道講o下中西文代差異…都幾有諗頭幾新鮮!)

jay姐姐o個時真係唱好多兒歌…其實tvb都算比機會佢! 佢88參加新秀, 之後就被揀o左入新開張o既“閃電傳真機”做第一代主持! 92年有一集“婦女新姿”, 搵o左看似同佢無o黎“啦間”但其實係同佢同屆參加新秀得o左季軍o既sammi一齊上去接受訪問, 仲播番佢當年參賽唱“海旁獨唱”o既片段…

仲有一首又係我好好聽+我當年好鍾意, 但係無咩人識o既國語歌…“你給我記住”! 除o左首歌, 個mv我都好鐘意…一班小演員o係碼頭跳舞…幾得意!


(“你給我記住”… o個時覺得好好聽…不過絕對唔係呢個version…但係網上搵唔到呀!)

當然, 仲有呢首啦…“仙樂飄飄處處聞”主題曲…袁鳳瑛主唱o既“仙樂處處飄”! 呢首又係好好聽…都話呢一屆充滿好歌…首首都咁好聽…真係唔知點揀!!!


(“仙樂處處飄”@1992兒歌金曲頒獎禮)

仲有呢首…”學生哥”…一個個…我o地日日記住隻歌…


(”學生哥”mv…by劉小慧+黎瑞恩+周影)

至於“嘩!伙頭仔昆布”…個人認為ok啦, 唔係特別好聽! 反而唔明點解克勤隻“閃電傳真機”會入唔到圍…?! 好好聽又係唔講得上…但作為閃電主題曲, 都有一定份量同經典程度呀…

原來92年兒歌金曲頒獎禮已經有回顧o既一part…“跳飛機+430穿梭機+閃電傳真機”…永遠都係回顧o個part最煞食!!!



oh, 我終於搵番呢個有好多兒歌/兒童節目資料o既網頁…點解成日搬呀? 每一次都要再search過…不過佢真係整得好detailed…detailed到你不能相信…都話世上對電視節目有心的人多的是…以前無internet真係唔知!