2007年9月21日星期五

9-21(fri) patrick哥哥

無綫o個個“味分高下”, 做o左幾個禮拜…睇睇o下都真係…好悶!!! 雖然同“獎門人”一樣都係糟質藝人同埋浪費食物…但係獎門人好睇好多同埋好笑好多囉! 同埋o個時有曾志偉搞o下氣氛…依家得庾澄慶同鄧健泓…哈林話係台灣綜藝節目的紅主持, 我個人其實又唔覺得特別出眾, 可能我無taste啦o下! 至於阿patrick哥哥…其實佢搞笑真係唔多得, 睇得出佢好落力 (甚至過份落力…可能係兒童節目時遺留落o黎o既習慣…畢竟做兒童節目表情係要誇張d), 但真係sorry…差o左少少, d gag亦真係爛o左少少, 雖然都勉強好過貽興王少少!

其實對patrick哥哥唔反感o既, 畢竟當年都睇過佢o既兒童節目同埋唱o下d奇怪兒歌, e.g. “我愛胡思亂想” (唔知有無人聽過? 大約96/97年…其實我o地當時都好大個, 但放學後少不免都會開o下電視睇o下d無聊節目…成日都會聽到呢隻歌, 仲有滕麗明的“咕嚕咕嚕魔法陣”…仲成日同d同學仔一齊笑…其實呢隻歌騎呢得o黎, 都ok好聽, 勝在輕輕鬆鬆, 又令我諗起鄧梓峰!)…不過佢近年d負面新聞又係多o左少少, 又追女又“pit”女, 而且佢做主持真係“mun”o左少少…不如去番唱“直上”啦…我鍾意聽! 同埋o係TVB近期呢個車輪式力捧攻勢下, 幾乎每日都要見佢兩下, 真係本來唔憎佢都睇到憎佢…依家連“勁歌”都由佢取代第一代寵兒amigo哥哥 (amigo仲勁, 有得去爬山, 仲要同梁榮忠一齊…其實, 無綫對梁榮忠都幾唔錯o下, 一而再再而三咁俾機會佢再上位…大家都知次次去得玩呢d攀山涉水o既都係要力捧o個批…第一代去南極玩o既咪係當年紅透半邊天o既“刑偵孖寶”張大勇同埋義仔囉! 估唔到12年後, 又係佢被選中…tvb真係待他不薄!), 咁樣又o黎一個overdose, 下一個俾人鬧到好似貽興王咁o既, 會係patrick哥哥…今次真係愛你變成害你喇!


(10年前的patrick哥哥+佢當時的女友lulu姐姐 (蓋世寶)+譚玉瑛姐姐@90年代尾“閃電傳真機”一個遊戲環節“咕啦咕啦開心樂園”…呵呵呵! 好鍾意睇佢o地o係度“做早操”囉!)

哈哈…睇番原來舊年都有講過patrick哥哥同佢前女友lulu姐姐…依家再search o下終於解開疑團, 雖然唔知係咪可信…報導話係: “鄧 健 泓 99 年 (應該係96年) 加 入 無 線 兒 童 節 目 《 閃 電 傳 真 機 》 後 認 識 另 一 主 持 蓋 世 寶 , 二 人 熱 戀 約 一 年 後 , 有 傳 女 方 因 情 緒 失 控 , 用 利 器 刺 傷 鄧 健 泓 大 髀 , 後 需 送 院 引 起 傳 媒 報 道, 引 致 分 手”…應該就唔係因為傳媒報導而引致分手o既, 不過刀插大髀事件我記得…只係唔知邊個插邊個, 後尾仲話係家居意外, 唔知咩執o野唔小心把刀跌落o黎插親喎…是但啦!

仲有, o個幾位什麼 “士多啤梨啤梨蘋果橙”小姐, 再夾硬加多四個咩“梳打、奶茶、忌廉、雜果賓治”湊夠八個o既“味之天使”…真係好少會搵到一jar咁“美艷”o架喎! 通常樣貌唔靚但又有得入隊o既, 必有過人之處, 好似當年cookies o既kary咁, 起碼佢叫做比較唱得跳得…但今次呢幾位真係嚇到你呢…完全唔知有咩可取之處? 仲要每集走出o黎教你煮食貼士…真係唔知想點? 通常搵呢d咩 “味之天使”呀, “千金小姐”呀, “粥粉麵飯”呀…都係為o左達到養眼的效果…今次呢幾位…真係數唔知有咩功效呢? 驚嚇指數有100!


(仲有呢首…放學icu主題曲“投投籃球”by鄧健泓+放學icu主持…唔知大家有無聽過? 我當年第一次聽又係笑o左好耐…唔知點解, 覺得好好笑…d歌詞, 個beat, d畫面etc…後尾聽聽o下, 又覺得都ok o既…幾輕快, 幾開心o既感覺! 仲要係…聽到我都識唱囉! 救命!)

12 Comments:

Blogger Flora said...

好驚訝自己居然都睇過嗰首投球投球-.-
因為我已經脫離咗d放學icu好耐喇
我仲記得嗰時
係我第一次見到tvb嗰隻奇奇怪怪既吉祥物
(應該係吉祥物掛,我冇深究過)
心諗: 救命丫~做乜學人整隻咁既野呀

p.s. 我都好想Patrick再唱番歌呀
好懷念佢首一個鐘之後

6:01 下午  
Anonymous Vince said...

噢!!"我愛胡思亂想"......個背景好似係D玩具.....至於"圓圓圓籃球".....直頭係經典.....我都真係聽到識唱

12:39 上午  
Anonymous javaer said...

但係JJ真係幾紅(最少在男人中).佢係大陸拍既片已經做主角,落到香港就做跟出跟入.

2:00 上午  
Anonymous christy said...

其實我幾鍾意patrick架.
唱歌都okay. 同埋岩partner既話佢都可以好搞笑 :P
不過真係好驚佢會俾tvb搞到本身唔憎佢既都會因為爆光率過高而發現佢既唔好而憎左佢...
就好似貽興王唔係善長做抄口齒伶俐/遊戲節目主持但係都要迫住做搞到多左人唔鍾意佢多過鍾意
其實志雲兄咁鍾意做主持不如佢撈埋啦, 唔好累到人地變犯眾憎。

btw
哈哈哈我琴日o係CWB MTR又聽到用新聞/天氣報道tone講果句「小心梯邊夾腳仔」slogan呀哈哈哈聽到真係好想笑!! XD

12:35 上午  
Blogger 芒姐 said...

christy,

OH...我今日O係地鐵都聽到"夾腳仔"...真係救命...點解會出現番?!

我好認同你咁講, 好多時本來唔反感, 但係咁樣日日睇法, 唔反感都變反感...好似食O野咁, 就算本來好鍾意食, 食滯O左都會嘔啦...OVERDOSE永遠都係弄巧反拙!

1:23 上午  
Blogger 芒姐 said...

javaer,

係...除O左JJ係幾好樣, 佢已經跑出O左啦...其他幾位, 尤其某幾個O翕唔出名O既, 又真係幾得人驚!

1:25 上午  
Blogger 芒姐 said...

Vince,

O個時成日播, 聽聽O下都入晒腦...都幾得意呀!

1:26 上午  
Blogger 芒姐 said...

Flora,

"放學icu"首播時, 我都特登錄O左幾集O黎睇, 不過後尾真係頂唔順...但首歌都幾係趣緻, 頭O個幾段KEEP住得O個幾個音...

1:27 上午  
Blogger Ten Ten said...

小弟歐十十特來拜訪芒姐,對於妳的分析十分認同及拜服。其中「插刀仔」那單野是真的,台內好多人都知;二人相戀之事,台前幕後亦好清楚。
其實我對鄧健泓都無所謂喜好或討厭,佢D歌有幾首更幾好聽呢!不過個人俾人既印象真係麻麻,負面形象太重喇!
至於果班甚麼味之天使真係o徙氣啦!TVB重以為自己要捧邊個邊個就會紅,都要講質素架大佬!電視係即食資訊,但現在的人講究健康,唔係你俾乜我地就食乜架!

2:37 上午  
Blogger 芒姐 said...

十十兄:

多謝你俾面大駕光臨...係我有失遠迎先O岩啦!

正如我O係你BLOG的留言, 你最新一篇真係寫得好好, 超抵死, 笑死我!

我都認同佢 (你所指的"拍七"...其實"拍七"係咪一個啤牌遊戲? 我細個好似有玩過咁?! 所以一睇呢個名, 忍唔住笑O左出O黎巴!)真係要洗洗底, 形象差做得幾好都無用 (雖然佢都唔係做得特別好, 我只能說, 作為主持好過貽興王少少咁多)...同埋過份曝光, 其實係對佢有百害而無一利, 食多都會滯, 點解TVB會唔明呢個道理?

4:32 上午  
Blogger Ten Ten said...

哈哈,妳想得複雜了……所謂「拍七」,其實是他的英文名譯音,在廣東話來說是低俗的諧音粗口,如「拍七你呀!」之類,hee,我比較巿井,別見怪。
至於妳說的啤牌遊戲,是不是「kum綿胎」呢?
TVB最喜歡咬塊塊餅,而且以為自己要捧邊個邊個就會紅;大台作風,十多年前可能還會見效,今時今日?真係等著瞧吧!

3:01 上午  
Blogger 芒姐 said...

十十兄:

oh...我以為最o左"7", 仲有hidden meaning添! 哈哈哈哈...我記得喇...個啤牌遊戲叫"排七", 唔係"拍七"...hohoho, 人老o左記憶力衰退添...

5:36 上午  

發佈留言

<< Home