2007年9月14日星期五

9-14(fri) 孫耀威

呢期好欣賞孫耀威…唱歌好聽, d歌經典(呢樣嚴格o黎講唔算十分關佢事), 幾靚仔, 居然發現佢人又叻, 讀書得, 會考勁, 英文又好, 仲走埋去讀mba, 早知我都去報個mba讀o下認識孫耀威! 佢出番o黎之後個感覺真係掂o左好多!

不過佢無啦啦o係出番o黎走紅o既時候走去讀mba, 又係怪o既, 咁忙點讀呀? 雖然話係allocation of time o既問題, 但學佢自己話齋, 成日又要出show又要出trip, 但mba都要繼出席率o架, 唔係話你想allocate就allocate到! 點解之前咁多年唔讀, 呢期“鹹魚翻生”先o黎讀, 真係有d難搞…又或者佢報o個時未“翻生”o卦?! 世事往往都係咁…



前兩日去唱k睇番孫耀威第一首主打歌“我知道你在等我”, 佢o既第一首歌o係台灣出先…個style都好台灣, 有d娘…感覺其實似另一個林志穎… 唇紅齒白咁! 睇番呢個mv, 我明白點解我當年無欣賞佢, 反而依家會欣賞…因為佢成個感覺都唔同o左好多!

佢o個時唔係話唔靚仔, 但呢隻唇紅齒白糖衣偶像, 絕對not my cup of tea…反而依家個感覺正常好多! 男藝人大部份都係過o左三十歲, 成熟d, 有d經歷反而更加吸引…好似棒球小子年代的鄭嘉穎vs依家o既鄭嘉穎情況一樣!

睇睇o下當年的孫耀威, 有d似之前”大飲茶”個主持蘇敏聰, 又或者係亞視o既 “藍月亮”羅頌華哥哥…仲有d方力申o個隻style, 不過個樣就唔多似!


(2007孫耀威…型好多…雖然我就鍾意佢以前d歌多d!)

無綫原來除o左重播“真情”, o係朝早6點幾仲重播緊“開心華之里”…呢套我又係曾經好鍾意睇, 仲要係鍾意朱健鈞同麥家琪o個下頂癮…不過佢到最後未播完忽然被腰斬改播“梅花三弄”, 仲要連拍好o個幾集都唔播埋…當時瘋狂的我有寫信去“香港電視”投訴, 不過都係無用, 套劇連正正經經o既結局都無…好可憐! 可說係一大遺憾!

套“歲月風雲”真係愈搞愈唔得…點解做極都未做完? 真係無論口碑同收視都咁差…無綫每次一搞呢d超大製作都唔掂…搞番d小本製作咪仲好!

近期講到華振邦鍾意同o左暗戀 (or明戀) 佢好耐o既秉怡一齊…雖然我鍾意睇林峰拍胡杏兒, 但個劇情明明係華振邦真係一d都唔鍾意秉怡, 頂多係有d感激…夾硬同o左佢一齊, 真係好夾硬囉…我唔鍾意咁! 終於阿秉怡都悔婚…不過呢, 真係好搵o黎搞…睇到人好激氣! 唔知點解令人諗起幾年前o既“再生緣”, 胡杏兒飾演o既劉燕玉又係發現阿皇甫公子 (林峰) 愛o既係另有其人 (葉璇), 毅然留書出走讓愛! 估唔到今次呢個時裝版劇情居然係exactly一樣! Btw, 大家有無睇有線套“補習天后”? 好似話都幾抵死? 可惜我屋企已cut左有線, 無得睇我曾經好欣賞o既葉璇 (不過佢依家個感覺真係唔同o左…以前無綫有得俾佢發揮, 雖然大部份香港人都唔buy葉璇, 但佢真係幾聰明, which我好欣賞…佢o係無綫先有用武之地, 起碼會有人記得佢…我以為佢打算番大陸拍劇都話呀, 但係如果佢諗住留o係香港拍戲, 佢當初離開無綫o既決定真係錯o左! 依家人氣跌成咁, 當初做佢配角o既胡杏兒, 楊怡都上晒位…唔好計再之後先紅o個d添啦…真係好可惜!)

講埋套“歲月風雲”先…跟住又夾硬要吳唱k講佢最唔掂o既英文, 更要強調係佢弱項…洗唔洗咁刻意呀? 不過當然點都唔夠佢d “雅芳婷”, “恒生”同埋洗髮水咁刻意…平時容祖兒d mv成日無啦啦都煮個面已經夠刻意, 但呢套劇再over多十倍…hard sell到令人對o個隻產品直頭反感…弄巧反拙!

同埋好騎呢…有晚搭地鐵, 深夜差唔多收爐o既時候, 有個清潔工人一邊抹電梯一邊係咁o係度唱“我對你…這一生…哪個可比”…估唔到林峰首插曲真係咁hit!

Oh…仲有, 地鐵終於無o左個咩“小心梯邊夾腳仔”口號…好難聽, 好肉酸…抽起咪好囉!

17 Comments:

Anonymous 匿名 said...

其實一邊做野一邊讀書真係幾辛苦, 雖然話時間係自己分配, 但如果份工係勁忙果隻, 咁真係唔知點分配好, 尤其孫耀威做呢行, 好多野都不在自己控制中, 難怪佢話上左半日堂已經有壓力.

BTW, 蘇敏聰D英文好似幾得架, 如果我冇記錯的話.

“歲月風雲”真係可以收檔, 實在太有拖長黎做嘅感覺, 完全係悶爆!

11:46 上午  
Anonymous Crazy said...

原本孫耀威岩岩出返黎個時我都覺得佢ok,不過佢後來成日提住佢前女友,乜都可以拉到黎講就令到我對佢冇咩好感啦 !!

mtr個個廣告真係好唔得,懶攪笑咁咩"夾腳仔"...但佢搵個好似播新聞咁既女聲,仲要一本正經咁黎讀,一聽真係好梗耳!!!

4:41 下午  
Anonymous christy said...

歲月風雲越睇越頂唔住。 真係唔知佢咩事, 果個華振邦好似結婚狂咁, 拍親拖都嗌結婚, 次次都結唔成都冇放棄過佢呢個夢想, 真係好厲害!
我唔係好鍾意個編劇搞到劇中個個d感情關係咁多波折咁複雜。

不過我覺得呢套劇好成功地sell左林峰首受新歌。 記得第一次聽果時唔覺好好聽, 但係諗返起佢個劇情再加埋每日播一次 [ 有時唔止 ] , 得左, 起碼我呢個觀眾覺得首歌好聽左!
可能劇集歌曲就係有呢個好處。

6:29 下午  
Blogger J in the blog said...

乜句口號抽起咗喇? 我都覺得「小心梯邊夾腳仔」呢句口號好唔得,雖然係target group小朋友,但經過廣擴讀出來就好兒戲,口號唔係夾硬押韻就得既。

7:53 下午  
Anonymous rona said...

哈~~我呢期都buy buy地孫耀威。男人果然係跌過再起至有味道。不過我唔係好buy佢講嘢。認同crazy嘅講法,不停講前女友宣傳,貶低自己啦~

9:24 上午  
Anonymous 匿名 said...

講到補習天后,無意中睇到呢條片,幾搞笑架
http://www.youtube.com/watch?v=xAAQtxUZVCs

3:14 下午  
Blogger 芒姐 said...

匿名,

thanks...我都聽人講過呢段, 話好抵死...尤其諗起近年的騎呢補習廣告...

2:04 上午  
Blogger 芒姐 said...

rona,

哈哈...咁又係, 佢根本唔需要咁做呀...

2:05 上午  
Blogger 芒姐 said...

J in the blog,

呢期無再聽到, 我諗佢抽起O左啩...之前係每一分每一秒都聽到, O個把女聲仲要懶認真咁讀出O黎...真係好難受! 同埋真係有史以O黎作得最差的口號!

2:08 上午  
Blogger 芒姐 said...

christy,

哈哈...你呢句"華振邦好似結婚狂咁"好正...搞到我笑O左一陣...好準確呀...真係唔知佢想點...

係呀, 我都覺得呢套劇最成功係SELL到林峰首插曲...日日播點都會入晒腦O既...

2:10 上午  
Blogger 芒姐 said...

Crazy,

我都認同, 不過或者係D記者成日問關於佢舊女友呢...但係牛唔飲水又的確唔GUM得牛頭低O既...

地鐵O個兩句押韻句語真係懶中之懶..."腳仔"一詞都出得街, 懶CUTIE但又唔夾, 仲要搵把AUNTIE聲好認真咁讀, 真係每日聽到都想罷搭地鐵!

2:13 上午  
Blogger 芒姐 said...

匿名,

孫耀威其實係應該DEFER一兩年先讀, 依家兩頭唔到岸囉! 不過我欣賞佢對讀書有熱誠呀 (ESP. O係呢行之中)!

我記得章志文O既英文幾好, 蘇敏聰就唔知...仲有, 芷珊姐姐都好得...英文好對做主持的確係好有幫助! 所以唱K真係不能做主持!

“歲月風雲”...真係...哎!

2:16 上午  
Blogger start said...

原本對孫耀威o既印象比較模糊,但聽過他o既新專輯之后,覺得他形象鮮明咗,男人果然系要有所經歷同埋成熟D先有魅力?

我覺得歲月風云最大o既缺點就系令人覺得太過"冇0野搵o野來做"咯。雖然話長劇系需要咁先有戲做,不過唔洗咁刻意hawa。

講起葉璇,恕我孤陋寡聞,其實她到底做咗D咩甘令人討厭?自從看了再生緣之后,我就非常欣賞她同林峰,豈料她的星途如此坎坷...

10:46 上午  
Anonymous Tone said...

負面新聞好多都係劇組同電視台做出來的,佢留係TVB最後一年負面新聞先開始多咗,然後走咗的第一年負面新聞去到最盡,好似情陷2之後就低調咗好多,可能唔想再配合"演出"了掛

8:53 下午  
Blogger 芒姐 said...

Re葉璇:

我都係睇完"再生緣"之後好鍾意佢...不過大部份香港人就好似不太欣賞佢, 反而O係內地佢同林峰真係好受歡迎...可能真係俾負面新聞拖累, D人覺得佢太姣咁嘛...哎...

1:52 上午  
Blogger start said...

原來又系個D虛虛實實o既負面新聞, sigh... 真系好可惜. 好想再睇林峰同葉璇合作.

9:00 上午  
Blogger 芒姐 said...

start,

哈哈...睇過"再生緣"O既人都覺得佢兩個先係最合拍...我都好想再睇到林峰同葉璇合作, 不過暫時機會好似微D...

2:28 上午  

發佈留言

<< Home