2007年9月13日星期四

9-13(thur) 真情再現

嘩! 由今日開始, TVB將會重播“真情”…今次真經典喇…一千幾百集, 如果播晒真係分分鐘播到2011年! 勁!

呢個安排我都覺得好掂呀…畢竟“真情”都係處境劇o既一大經典, 播o左咁耐, 收視仲曾經起起跌跌…一開始無綫以為會掂, 點知婆婆媽媽無咩人鍾意睇, 後尾就要調去11點播…o個時f.4禮拜五去補完a. maths, 返到屋企居然仲睇到, 你話經唔經典? 芒姐都曾經o係唔同時期為成“真情一大 fan屎” …我記得當年我o地返學都好into it, 成日代入角色話邊個係叉燒炳, 邊個係阿福, 邊個係阿家咁…係咁無聊o架喇, 無聊是福嘛!

跟住有幾期又忽然好多人睇, 掀起熱潮…好姨o個段不在話下啦, 仲有阿海+彩瑤+雙雙o個段三角戀, 立生+阿雪+banana (莫可欣飾演的rebecca), 後來又加o左個阿靜, may may同大奸人子浩, 仲有歸阿萊同低b琼…嘩! 數都數唔晒! 真係幾乎全台藝員都有做過…呢套劇都真係經典中的經典, 做足半個九十年代!

到佢99年尾結局時, 我都真係sad o左一陣…o個晚仲特登留o係屋企睇個ending show…本來仲話有個chatroom可以同d演員live chat…可惜, 最後我個電腦都係搞唔掂!

我當年又真係由第一集開始睇, 因為o個時睇完“刑偵1”好鍾意郭可盈, 所以知道呢套劇有佢, 即刻睇啦…點知佢做o左無耐, 又被調走, 因為要拍“刑偵2”…咁都好, 因為“刑偵2”真係拍得好好, 十分好睇…幾乎係唯一一套我覺得續集好睇過第一輯o既劇…真係無咩幾何!

真係“笑聲笑聲滿載溫馨”…聽到首歌同埋睇番d畫面, 同之前無啦啦睇“兒歌金曲頒獎禮”聽到“烏卒卒”一樣, 個心忽然la o下la o下…不過今次唔係諗起無憂無慮o既童年, 而係諗起考試多多o既中學生涯…不過都好enjoy好懷念! 讀書永遠都係最開心o既日子! 畢竟“真情”由95年播到99年, 陪我由中四餚到year2…伴我渡過好多重要時刻, 捱過o左兩大公開考試會考同高考…無佢, 亦都無今日o既我! 你知我係睇住電視讀書o架嘛! 第時如果考試時阿媽唔俾你睇電視, 我撐你...邊個話睇電視讀唔成書? 適可而止的睇電視, 有助妥善地分配時間…絕對有利讀書考試…hohoho!

尋日同今日“東張西望”都有家燕姐訪問, 為“真情”重播做勢! 李天翔哥哥做訪問….唔係話唔得, 但佢做主持真係好平淡, 有d dull…同o個jar港姐主持麥雅緻, 葉翠翠差唔多 (不過呢堆港姐雖然做得好悶, 但坦白講係improve o左好多, 都要鼓勵o下o既!)…之前都只係得vinci, amigo, 敖嘉年幾個可以做訪問, 依家俾佢o地做又真係未夠功力! 不嬲好鍾意睇人做訪問, 可以睇到佢o地o既說話技巧, 轉數快唔快, even待人接物技巧都可以o係一個訪問中睇到, 其實係好考功力o既一環!

無綫好少會咁大肆宣傳一套重播劇, 又搵晒d演員十年後再重聚o出黎開記招…睇o黎無綫真係好重視今次重播! 唔知今次會唔會掀起另一個熱潮呢? 播到2011, 唔知香港o個時係咩樣呢? 哈!

今次無綫呢個安排, 我覺得幾得…佢o地依家好睇重重播劇, 深夜12:15就“妙手”, 3點幾又有另一線, 不過本來話重播我罕有地好欣賞o既古裝劇 “奇幻人間世”, 等我開心o左一陣子…點知o個日一睇變o左陳曉東版o既“倩女幽魂”? 想點呀? 搞到人空歡喜一場, 同埋呢套“倩女r痕”好似無幾耐先重播過之嘛?!

Btw, 想講番少少之前套“大頭綠衣鬥殭屍”…sammi o個時肥嘟嘟幾可愛! 同埋又係盧婉茵做佢阿媽 (not exactly係阿媽, 類似湊大佢咁), 佢o地真係幾似樣…唔怪得知當年成日搵佢o地做兩母女, 連sammi自己都話似! 仲有, o個時sammi話成日俾人叫錯佢陳秀雯, 又成日寫錯佢個名做鄭秀雯…無錯! 連呢套劇臨尾上個字幕都係錯o既…真可憐! 新人就係永遠要經歷呢d…!

10 Comments:

Blogger J in the blog said...

芒姐,你好呀!我一直都有睇你個blog,今次係第一次留言。TVB重播舊劇真係太好喇,啱晒我呢d非電視精。雖然真情係經典,我真係一集都冇睇過,呢d煽情婆媽劇我都唔鍾意睇,而且我當時屋企好少開電視。反而最近我就有睇番妙手,以前冇睇過,現在當係新劇集睇,真係幾好。

仲有,唔知係唔係細個睇得太少電視,依家想睇d經典劇,網中人、法內情個d,當年播個陣我都未出世的劇,真係想睇吓點解當年會瘋摩整個香港。最好tvb jade播,免費嘛!

你早排寫關於兒歌,我好有共鳴呀。雖然當年冇得睇夜晚的劇集,但係我放學都有細路節目啊!我都係「430穿梭機」、「前閃電」年代的細路。睇完你既blog,先記起彊屍爺孫、叉燒包漢堡包的環節,仲驚覺我記得成首夏季sha la la......連我自己都驚訝,你個blog喚起我埋藏係腦裡最深的記憶,呢d兒歌係我的童年潛移默化成為潛意識,連我知己都唔知呀!! 兒童節目和兒歌帶來的美好回憶,足以証明睇電視係有好處!!當年的兒童節目又有娛樂性,又益智呀!

仲有呀,講d野你知,我尋日係銅鑼灣見到彊屍孫女芷珊姐姐,真係想走過去叫佢一齊跳番隻彊屍操。嘩哈哈哈哈!

12:26 下午  
Anonymous shaw_mag said...

Hu...hu...hu..., Mon Jeh, tvb stole my [奇幻人間世]。

12:34 下午  
Anonymous christy said...

芒姐又係我!! :p

exactly!! 我初初睇真情真係為左郭可盈, 因為果時既我由佢參選已經鍾意佢 [ 不過而家冇咁鍾意lu ], 果時真係勁唔想佢"返外國"離開真情.. 不過刑偵冇佢又真係唔可以!!! 哈哈哈! 但係我覺得真情後期好夾硬拖長feel, 冇一開始咁好睇, 但係佢完都真係有少少唔知點。

雖然唔鍾意佢重播長到咁既戲 [ 因為真係好驚佢播幾年 ], 但呢排睇佢佢重播成個感覺又返返黎, 首主題曲真係咁多年我都好記得!! 佢係其中一首咁舊但我又記得哂曲詞既主題曲! 重有既就係, 而家睇都係好期待郭可盈既出現! 哈哈哈 :D

如果大頭綠衣重播個時間早d就好喇, 我好想睇返呀. 呢套係主要睇sammi. 呵.

btw
我最唔鍾意睇麥雅緻做訪問。

1:52 上午  
Anonymous venus said...

我好鈡意雙雙,睇真情純粹係睇雙雙,雙雙真係好偉大又好可憐,好希望佢可以同阿海一起

我當年睇得斷斷續續,miss左吾少劇情,又忘記左吾少,心中有太多疑問,希望芒姐能解答:

當年首播時大家支持雙雙定係彩瑤?

維基百科度話謝霆鋒飾演"雙雙與向海之子,只在最後一集出現,因誤會而復仇,綁架其外婆、太公、太婆,被人以為以雙雙與國超之子"。
我記得雙雙把自己個仔同彩瑤個仔調左包,仲係情不自禁下將真相告知善姨,之後去左美國。
甘雙雙個仔應該係由阿海養大ga,又點會復仇?仲被誤以爲係雙雙同國超個仔添!究竟雙雙個仔係邊個養大ga?善姨吾係知道雙雙調包既事咩,佢無講出來咩?阿海同眾人係幾時先知真相ga?

彩瑤死後阿海同左阿貴一起,點解阿海吾去穩返雙雙?

雙雙去左美國后有無消息?雙雙既結局係點?

9:39 下午  
Anonymous venus said...

尼排重播既仲有開心華之里,芒姐有無睇阿?

9:43 下午  
Blogger 芒姐 said...

venus,

有睇O左少少, 但係暫時做到O既劇情唔係太有興趣, 同埋實在睇唔晒, 要取捨O下...哈哈! 我都有一期好鍾意睇華之里...

2:46 上午  
Blogger 芒姐 said...

venus,

當年D人應該係BUY彩瑤多D, 畢竟雙雙係第三者, 不過佢係一個善良又慘情的第三者, 所以D人又唔憎佢, 咁先難揀呀嘛...如果一面倒係某一個好晒, 咁就唔洗揀!

我當年都係投O左彩瑤一票, 不過雙雙個角色我都OK...

謝霆鋒做"雙雙與向海之子"我又真係完全無印象有D咁O既劇情喎...我諗要大家幫O下手!

其實好多劇情都唔記得, 畢竟年代久遠, 同埋佢O地O個段我無力追...真係唔記得, SORRY!

至於點解"彩瑤死後阿海同左阿貴一起至唔同雙雙"...呢個我隱約記得因為當時飾演雙雙的羅霖大肚, 要離開"真情", 之後做少奶奶都唔拍戲LU...佢個大仔都應該咁就11歲喇!

2:51 上午  
Blogger 芒姐 said...

christy ,

我認同...麥雅緻雖然當初係05年港姐之中做得最好O既一個, 至少讀稿無口窒窒...但佢做訪問的確悶...

真情其實D劇情又真係夾硬拖長, 其實係無咩劇情可言, 只不過陪伴O左大家咁耐, 真係好有感情! 完O左真係好似無O左D O野咁...

依家一聽首主題曲, 又係個心LA O下LA O下!

2:56 上午  
Blogger 芒姐 said...

shaw_mag,

咪係...太過份...

2:58 上午  
Blogger 芒姐 said...

J in the blog,

"妙手1"係幾好睇, "2"就已經無咁好, 整死晒D人, 有D人面全非囉!

當年的兒童節目, 又真係幾益智, 仲幾ENTERTAINING添!

哈哈...芷珊姐姐俾我個感覺幾NICE, 應該會肯同你跳番PART殭屍操啊!

3:01 上午  

發佈留言

<< Home