9-22(mon) 家好月圓慶團圓
尋晚“家好月圓”終於慶o左團圓…好勁! 條街真係少o左好多人, 連好多平時要等位o既食肆, 都無晒人(聽聞仲因為有波睇啦o下)…仲要我好多平時唔多點睇電視o既朋友, 尋日都話坐定定o係屋企睇大結局! 呢種趕返屋企追結局o既情況, 真係令人以為返番八十年代…估唔到繼上年"溏心夜宴"之後, 今年仲可以搞多一次呢個眾志成城人人趕返屋企睇大結局熱潮!
其實情況同上年係完全一樣…套劇唔係特別好睇, 結局更加唔會有咩精彩o野, 但因為確係一個熱潮, 成個氣勢都好勁, 無睇簡直同人無話題 (well, 可能誇o左少許!)…我上個禮拜同人講話我仲未睇到徐子珊出場, 個朋友即刻俾o左個好不屑o既表情過我…that's what we called "peer pressure"...wahahahahha! 好彩我前幾日追番晒之前o個三個禮拜十幾集...呢幾日終於無慢人十拍...可以一邊睇大結局一邊同朋友們sms討論劇情...終於我都唔太out喇…仲可以即時同好多個朋友一齊研究劇情...感覺好型, 好眾志成城囉...嘩哈哈哈哈哈!
我亦都終於明白佢個“家好月圓慶團圓”之夜點解唔校到o岩放o係中秋之夜 (雖然話係奧運期間停播o左幾集, 但如果真係要校o岩時間中秋播大結局都唔難, 只要之前o個一兩個禮拜六日播埋, 又或者結局周每晚都播兩集咪得囉…佢要搞無理由搞唔到, 問題在於佢想唔想咁做!)…因為中秋始終都係中國人大節日, 大家要去做節/賞月, 又未必真係會因為你個結局留晒o係屋企…所以揀呢一日點都係計過o既!
個“家好月圓慶團圓”節目基本上係照抄上年個"溏心夜宴", 連地點都無變…不過我又估唔到佢個節目咁短…好似咩都無做過咁, 淨係唱o左兩首歌同埋上演o左一兩個鬧劇, 我以為會長d添…至少好似上星期五“東張西望”咁, 每個演員講o下感受再播o下d精彩片段或NG片段呀…如果唔係整呢個咁o既show有咩意思?!
其實阿馬賽做主持真係ok喎…新人o黎講算係好好添! 雖然佢講廣東話唔係好正, 但都做得幾好…好過阿思琦妹好多, 楊小姐連齋答一兩句簡單o既問題都窒o左三次…真係想點呢?! Tvb如果要開個“藝員說話技巧再培訓班”, 除o左一定要安排阿“柯佬-黎”同“al彿-蒙”去上之外, 楊小姐都應該規定要去參與囉!
至於個結局本身, 亦都同上一輯簡直有異曲同功之妙…又係有d落雨收柴, 又係o黎一招“反諫計”, 上次係mk wong, 今次係于素秋…但又真係未免太估到佢下一步想點…o個d扮結婚, 扼阿媽再分番d股份俾jo飽同荷媽…真係阿毛都估到你想點! 同埋真係唔好日日喊得唔得? 我就算當係編劇寫成佢個角色咁“克人憎”, 但應該無寫埋要日日喊o卦? 我真係每一集都想問佢…你喊夠未? 佢又未喊到楊怡o個個境界, 你見到佢喊都覺得好慘, 有時會想喊埋一份…但見鍾嘉欣個樣有時反而想笑…但最想係去廁所, 因為好明顯係廁所位!
如果真係個編劇寫成佢咁, 一定係無綫好憎佢! 舊年常在心一角捧到佢上天, 成為新一代少男殺手 (雖然舊年我都好頂唔順佢d喊, 但都無今一輯咁難頂!)…今輯呢段咁拖泥帶水肉麻當有趣o既"朱元璋"之戀…擺明就係想玩死佢, 推番佢落谷底…呢期佢同吳唱k的情況一樣, 出完碟反而人氣插水!
最嬲係尋晚睇睇o下懶緊張 (relatively啦o下) o既徐子珊變節場口, 居然有人打電話o黎…我心諗你o係于素秋同凌b o個d場口打電話o黎我都無咁嬲呀! 哈!
同埋亦都同上輯一樣…點解紅姨到最後會忽然變番好?! 以佢d咁o既人, 無論受到咩恩惠, 人o地點以德報怨佢都應該唔會因此而感動…又係同上年細契忽然覺悟o個度一樣咁odd! 同埋請問紅姨最後係咪即係同o左阿恭一齊呢? 定係我get錯o左?!
阿天賜就仲快手…sa姨一入醫院佢就肯變節, 如果佢係咁易變番好, 一開始就唔會咁啦…真費解?!
我仲有好多度唔明… 之前明明話jo飽同紅姨係攞o左公公間“家好月圓”個招牌o黎經營, 點解o係法庭又出現o左個“紅祖餅家”?! 定係我中段又miss o左?!
仲有, 阿圓同嘉美o個段又係, 無啦啦幾時變o左真愛?! 阿圓對嘉美都算啦, 當佢貪佢靚…但係嘉美明明係話講到當紅姨係偶像, 同埋佢擺明同阿圓一齊係為錢 (佢對阿卡我就當係真愛啦o下)…又忽然覺悟然後變節…個轉捩點o係邊度?
咁阿卡同阿月又算係幾時一齊o左? 阿月生日去睇阿黃o個日? 但係明明之前jo飽生日o個幕又好似講到佢o地已經一齊o左, 之後去睇城城又好似未…都唔連戲o既?! 不過咁, “阿黃=城城”呢個位幾好笑…初時我都無諗到!
亦都好彩最終阿卡同阿月都無死到…之前d報紙雜誌仲講到佢o地 (或者是但一個) 會死…我一路睇一路幾驚佢兩個會死…始終呢d“家好月圓慶中秋”戲死人都唔係咁好啦…梗係要大團圓o架嘛! 為o左要大團圓, 犯駁d係可以接受o既! 雖然呢套劇成日養女又同o左阿哥一齊, 于素秋同管家仔都叫做係屬於同一個家庭, 雖然大家無血緣關係, 但感覺有點兒…o下…未免太~~~家好月圓囉!
同埋其實于素秋始終係佢o地頭號敵人o既女, 佢o地又有無可能一路 (even o係打緊官司途中) 對佢全無介心? 仲當正佢係自己人…雖然睇電視唔好駁故, 但係呢樣我覺得有d牽強!
仲有我想講係o個段"我身體比你好呀, 你死得比我早呀"…好攞命囉! 仲要全家分組玩o個o下真係唔得你死…不過又幾好笑, 忍唔住笑o左出o黎添…令我諗起n年前o個d o camp口號! 咁都俾你諗到仲要做埋出o黎…真係要寫個“服”字俾你! 同“親人枚”或者咩“堂大過姑, 姑大個姨, 姨大個表…”o個d一樣咁無聊…但就係因為佢無聊, 反而幾好笑!
Oh, 終於有人post o左上youtube喇…好o野! 無心害你@JSG…
(關菊英-無心害你@JSG)
posted by 芒姐 at 11:29 下午
29 Comments:
其實呢家好有好多位都連唔到戲咁架，唔通製作期間cut左？哈哈，不過佢地都有大意位，例如有一場醫院戲好似係亞ＭＡＭＡ去果場，亞紅姨響病房拎個手袋同響病房就去toilet個手袋就唔同左喇哈哈。
不過講cut片，最應該cut既係于素心d感情戲三角戀囉。都唔明點解咁多眼淚，係又喊唔係又喊。其實家好播之前我重以為擺明力捧既林峰會有好大發揮tim..... 而家咁樣我諗..佢..應該..唔會靠家好黎食糊掛？！俾jo飽啦不如 :) （但其實我最重要係亞卡哈哈）
anyway 我覺得家好成日都交代不足，你講得岩，我都唔明一個奸到出汁／講大話當飲水既人又會突然變返好人既，如果係咁易就晨早變返好啦。
"我身體比你好呀，你死得比我早呀" 呢個真係攞命到喊囉！真係有冇人屋企會咁玩呀？重有其實呢句野有咩野玩呢除左猛咁講之外？
p.s.１: 紅祖餅家係家好月圓前身。
p.s.２: 四大名捕林峰徐子珊又黎喇。林峰古裝look確實較討好。
芒姐
我覺得一開始係應該有四十一集(最後一集兩小時), 不過因為某D原因CUT到40集. 我都覺得有好多戲CUT o左.
我想你留意一下個崔健邦, 佢真係不經意流露o左把寸嘴出o黎. 係家好月圓團圓夜入面有一個整餅環節, 朱凱婷好醒目地問荷媽問題, 費事整餅時dead air, o個個崔健邦話"佢地都沒有咪, 答唔到". 真係好白痴lor. 係人都識得遞自己個咪俾人啦. 仲以為自己懶醒.
仲有 佢o係勁歌金曲對班後生演員都好唔客氣, 仲窒周聰前輩講o野慢. 我(目第)完都有D唔高興.
"o個d扮結婚, 扼阿媽再分番d股份俾jo飽同荷媽…真係阿毛都估到你想點! " 雖然我都估到係做無間道假結婚，不過見到管家仔好難過但係又要大方祝福嗰下，我都係喊咗出黎，我覺得管家仔好慘啊！同埋平時都好似係佢關心人多，反而屋企人都冇咩人理佢。
肉麻當有趣o既"朱元璋"之戀好難頂！講一次就算啦！集集都"朱元璋"！常在心已經夠煩啦！于素秋煩得黎仲要好乞人憎！醫生成熟d啦唔該！我好驚佢醫死人啊！
芒姐你問嘅問題全部都係我都唔明嘅地方，我都懶理喇，唔好問，只要信。
"仲有我想講係o個段"我身體比你好呀, 你死得比我早呀"…好攞命囉! 仲要全家分組玩o個o下真係唔得你死…" 我簡直滴汗啦！呢家人齊心得黎好弱智...未見過人一家老老嫩嫩齊齊玩咒屋企人死...
不過我覺得家好月圓幾好睇，好睇過溏心好多。
芒姐
我想睇下你點評少四...
我好期待..
講起cut片，片頭我都見到有一幕于素秋從後面攬住管家仔，點解好似唔見咗？
林峰古裝扮相確實翩翩少年，或者今年唔係管家仔而係無情攞？徐子珊家好做得唔錯，都幾想睇佢點做臥底。陳鍵鋒我幾欣賞，其他兩個我都幾ok，所以會睇"少年四大名捕"。
講到疑團, ronald仔究竟係咪jimmy個仔, jimmy係雯雯(嘉美紋身刺上"雯雯"二字)阿哥, 咁阿雯雯究竟同嘉美有咩關係? 搞les乎? 定係雯雯其實係男人? ronald實情係雯雯個仔? 究竟阿雯雯係咩人, 點解嘉美話sa姨當初介紹雯雯俾佢係害左佢一生? 點解區區一個小紋身可以令嘉美唔敢游水? 佢外國大, 講到自己咁竹昇, 又點會為區區一個小紋身而唔敢游水? 好費解啊!
雯雯確係一個疑團, 係咪嘉美仲係唐山大兄年代的 (女) 戀人呀? 我覺得徐子珊真人的咀臉都應該係差唔多乞人憎, 所以做奸人先做得咁傳神...
"朱元璋"之戀完全唔知想點, 彷似係呢一集一齊, 下一集分開, 呢個循環重覆左九萬次, 估唔到糾纏到最後一集, 係咪當觀眾白痴架?
miss 左大結局, 同時亦都冇意慾搵返黎睇...
想回應一下樓上samatha所講的"我覺得徐子珊真人的咀臉都應該係差唔多乞人憎, 所以做奸人先做得咁傳神..."點解咁多人會有咁o既諗法呢？咁唔通林峰做黎做去都係深情小少爺，佢真人又一定係咁？你可以覺得佢唔夠其他女角靚(我覺得ok)，可以覺得佢講英文d音怪怪，但做番奸角應有o既表情都唔o岩？我唔敢講徐子珊演技no.1，但真係睇到佢不斷進步，由學警、舞動、甜言蜜語、家好到依家開始播的少年四大名捕，每套角色都好唔同，唔似某d演員做黎做去都係o個幾樣，睇到想訓...徐子珊可能尚欠一點觀眾緣，正如依然有好多人好buy阿思琦妹咁，係冇得解釋原因，做藝人的唯有不斷努人等人認同而已，做觀眾的，也不必太對號入座，把角色性格投射到藝人身上吧！
芒姐~
紅姨應該冇同表叔恭一齊，她自己一個去紐西蘭，表叔恭就同姨婆留返在香港搞生意仔。不過，又估唔到表叔恭咁忠心喎，于素秋做完場大龍鳳，紅姨後來咪喊/嬲住走既，表叔恭好似話"等埋啊，表嫂～"。
我覺得紅姨變返好人都ok既，因為佢都話哂坐左幾年監，可能佢諗通左卦。但係我唔係好明恩賜囉，真係變得好快喎。同埋joe飽一家又搞笑，佢地明知恩賜收左一千萬(!?)講假口供，但大家都冇野架喎，仲有講有笑。另外，蓮子蓉只係出現頭果十集到，亦唔覺佢同sa姨有傳緋聞喎，但結局講到佢地有d野咁。(忽然諗起開拍時d宣傳片，sa姨話佢有兩段姊弟戀。心諗唔係咁都算嘛? 好格硬喎...)
同埋我都十分唔明白阿卡同阿月條感情線，我都唔明佢地幾時起埋一齊既。係咪好耐之前有集講阿月寫封信俾阿卡?所以阿卡先知道阿月鍾意佢?我miss左果集。但之後睇果d，佢地兩個關係都好撲朔迷離。大結局定之前有集，阿月在後面攬住阿卡，話佢唔會熄燈，之後佢地兩個攬住。究竟係兄妹之情定男女之情？同埋，正話你咁講，joe飽生日時佢地兩個又似在一齊，但"阿黃=城城"單野又唔似係。最後坐在梳化時，佢地又講到生幾多個仔女。搞到我好迷惘啊!!
同埋其實祖母點解臨終前都要搵阿紅呢?其實又好似唔多解得通?
最後我想講下凌b同于素秋既"豬腳薑"既睇法。我初時聽到"凌b"個名同急口令都打哂冷震，但當個個都話核突時，我竟然開始覺得個名其實好好笑。我仲叫自己同細佬和d fd做"x b"(x=姓氏)，而英文名係"咩咩baby" (credit to angelababy)，擺明"肉麻當有趣"。
同埋首"豬腳薑"其實有一刻我係覺得"好聽"架，嘩哈哈。就係凌b離開機場時，首"豬腳薑"d聲咪經過特別處理，好似遠左咁。果下，我都有少少少少少咁多感動。其實"定情急口令"呢條橋係幾絶既，如果handle得好，其實應該掂架喎。(即係好似"大時代"唱"紅河村"咁)但究竟衰咩? 除左衰"豬腳薑"同"朱元璋"果幾隻字，係咪都同人有關？我覺得第二d人講可能會ok?? 哈哈~
p.s. sor啊芒姐，好似講左太多野添，哈哈。其實d問題係我自己唔明所以在這裡抒發下，你唔駛覆返我架:)
個人覺得徐子珊最攞命係佢把聲, 成日好似響度扮卡通聲咁, 又尖, 又嘈, 好刺耳.
佢嘅英文太過刻意模仿美國口音, 但佢始終好大個先去美國, 那刻意模仿美國的口音實在太假(其實法拉都係好大個先去美國, 但佢D ACCENT 又PICK UP 得好好喎), 又係聽得人好唔自在, 令觀眾未見其人先怕其聲.
如果佢肯改下佢把卡通聲, 平時收歛下唔好太作狀, 應該會好DD...
我諗有d戲係cut咗，阿圓同嘉美結婚係硬照交待，你估亞視"主播天下"咩?阿卡同阿月個結局似係補拍，因一路都話阿卡會死．
芒姐，我就係之前嘅kn吖。我以後都用呢個nickname，你要記住我喎。我係你忠實fans黎咖！
1．我覺得徐子珊最大嘅問題就係，佢個人太容易over（ namely過火or作狀）。一啲都唔識得拿捏分寸。大家記唔記得，佢由啱啱當選 MK嗰時就係咁癲咖喇。嗰時有個專訪係Anna Yau做。佢一啲都冇啱啱當選嗰啲港姐咁矜持同斯文，口水多多咁，講到停唔度口。 所以Ending嗰時Anna話：從來都冇見過一個咁“健談”嘅港姐啊。明抬暗踩囉。
2．紅姨變番好人，應該係佢同JO飽最尾嗰part對話，俾人感化咗掛。
3．除咗“朱元璋”“我身體比你好”，仲有一個煩到嘔就係“我說你行，你行不行”嗰度，咩超行，勁行，爆行，好煩啊
我想講下大結局嗰個“四年以後”，點解四年以後各個女主角無一例外電“攣”曬啲頭髮？“攣”頭髮就代表四年以後？？？好搞笑。仲有無線真係娘到爆，竟然揾曬全部人上臺唱歌就算數，一啲都唔touch，行貨到死！
p.s.勁贊同今年視帝，應該係JO飽！
哎...見你地傾得咁開心,我岩岩先去完旅行冇睇到家好最後果幾集添,好彩叫人錄左,呢兩日要惡補返唔係既話怕返工冇話題,哈哈
凌b同秋好果段又煩又悶,相比卡月果part就生動好多了,不過我睇家好主要都係睇班老戲骨演技大哂冷多d
芒姐,我係"馬敏兒"既專題度寫左d有關"盞鬼老豆"既小小資料,如果你有與趣可以去睇番:-)
張c奶,
睇o左你post的關於馬敏兒+"盞鬼老豆"o既資料啦...個劇名我記得, 但套劇完全無印象...有無o係黃金時間上過呢? 點解好似真係無睇過咁o架?!
Nilly,
無問題...我會記得你呢個"朵"...哈!
徐子珊選港姐時幾ok, 雖然真係幾"健談", 之後跌晒watt, 再加電台訪問失言單o野, 到後來keep番fit又靚o左好多...狀態時上時落...演技係比初出道時好o左好多, 但我依然未睇到佢演技好到可以拿獎呢個地步!
四年以後“攣”髮...哈哈...可能咁樣大d contrast等大家睇唔到字幕都知過o左幾年o卦?!
Clement,
係囉...勁落雨收柴!
匿名,
oh, 好中point!
你唔講我都無咁覺得...徐子珊的確係把卡通聲最趕客, 其他o野都可以接受! 樣都好番好多!
仲有accent都係, 我以為係我自己聽錯, 覺得佢d英文口音有時有d怪, 即係好刻意去扮native o個種, 咁顯得仲突兀! 其實自自然然仲好...
紙巾,
無錯...你講得o岩, 我睇番o個part, 原來阿紅姨係話姨婆留o係香港陪表叔恭, 我一邊上網一邊睇, 所以聽錯o左以為佢留o係度陪阿恭...wahahahhaha!
係囉...我本來都期待睇sa姨同天賜+蓮子蓉的三角戀...又無o左!
阿卡不嬲都知阿月鍾意佢 (即係阿月寫信向全家坦誠自己講o左一個大話, 就無唔認鍾意阿卡o個度)...但佢o地幾時一齊o既位, 係跳來跳去...明明jo飽生日感覺係一齊o左, 點知接住落o個段又講佢o地未一齊!
嫲嫲臨終前搵阿紅應該係想同佢講番大家的君子協定每邊50%, 佢o個時唔知自己咁快死 (但其他人個個都知), 所以先搵佢傾o左先, 點知變o左遺言!
btw, 我同d friend都係會叫"咩咩baby"...係呀, 擔佢夠攞命嘛!
我都唔知"朱元璋"同"豬腳薑"有咩關係...除o左押韻之外?
電蟲,
咁又喜好呢d o野又的確subjective o既...徐子珊的確有好多進步, 但亦真係暫時都仲欠缺一d觀眾緣!
samantha,
"朱元璋"之戀係今次"家好"最大敗筆! o徙晒大家d時間...
係囉, 雯雯o個part 撩起o左之後又無交代就完o左...
匿名,
你講o既疑團, 我都想知答案...
匿名,
"少四"我未睇呀...但事先聲明我從來不大buy古裝片, 雖然四個男角我都ok, 女角就一般...睇完話你知....
++,
唔知tvb係咪覺得鍾嘉欣做呢d成日喊+為苦情而苦情o既角色做得好好, 所以一而再再而三要佢做呢d角色, 仲要一次俾一次煩, 真係害死佢!
o個段"我身體比你好, 你死得比我早"…好明顯係inspired by大學dem cheer o個d咩"hong kong hong kong hong kong u"咁啦...咁都俾佢諗到仲夠膽用落劇情度...我都服o左佢! 不過真係幾好笑o下, 我o地依家成日將呢段o野借來一用!
Mr. Parko ^_^,
係啦, cut o左好多, 搞到枝離破碎! 崔建邦我有留意呀...佢係咁o架啦! 不過咁, 朱凱婷o個part我又覺得係佢幫佢o地打圓場緊喎, 因朱問完荷媽好似無睬佢, 所以場面有d尷尬...
christy,
呢期tvb d戲演員repeat得太勁, 咁樣排陣唔係咁好, 畢竟所有o野都要保持一定新鮮感!
無o架..."我身體比你好呀，你死得比我早呀" o個句就係好似o camp dem cheer咁猛講鬥講大聲講...完全無o野可以玩到, 不過騎呢得來幾好笑!
哈哈, 好正
睇到都忍唔住要留言
其實我都覺得cut左勁多
仲有好多戲可以交代
不過覺得無記又想緊湊d而cut晒
我覺得講紅姨最後變番好真係唔ok喇
太突然喇, 連佢個邪留丸頭都無埋
仲有表叔恭, 又話講佢之前虧空公款既, 都無晒下文
嘉美又係忽然同阿圓好番, 恩賜又忽然轉好都勁odd
阿卡響傢俬鋪訓左落阿月果度
其實原本係咪就咁講佢熄燈去左
不過無記唔想俾人鬧話唔係大團圓結局而講佢最後都無事??
同埋始終覺得佢同阿月一齊左怪怪地
管家仔同于素秋一齊都無咁odd, 但阿卡同阿月一齊仲生埋仔, 直情好似N年前套日劇同一屋詹下咁
仲有, 其實我無睇過第一輯架, 一集都無
之前就係好怕吵吵鬧鬧
跟住勁無話題勁out
今次一集都不能錯過追晒
日日返工都同同事傾劇情, 又勁講"唔駛驚荷媽係大廳"呢d punchline, 好開心
唔知無記仲會唔會食住條水搞個season 3
抑或另創一套"鬧"劇出黎喇
東尼，
係呀係呀， 我都覺得＂阿卡響傢俬鋪訓左落阿月果度＂...原本應該係似講佢會熄燈...反正後尾O個段"家好月圓大合唱"都似臨尾加落去多D!
咪係, 雖然我幾鍾意阿卡同阿月呢對, 但佢O地雖然無血緣關係, 但本身由細到大都係兄妹關係, 最終一齊O左其實都幾ODD!
haha。關於阿月同阿卡﹐我想左勁耐﹕因為阿月其實不是養女﹐而係童養媳。Wakaka。
唔該無記編劇可否有些少新意﹐最後他們各自找到幸福重好啦！
不過﹐楊怡今次真係好好戲﹐雖然己拿過飛躍﹐但都想佢再下一城﹐希望多D好角色
比佢做啦！
kame,
哈哈...不過現實生活中, 如果咁樣兩"兄妹"結婚...感覺都幾"亂倫"o下...仲要係一齊長大喎...
楊怡d戲其實一向都真係幾好, 不過今次個角色, 同埋套戲多人睇囉!
發佈留言
<< Home