8-17(sun) 我o地就係蝦碌…
我o地就係奧運…我o地就係蝦碌!!!
無綫可能今年個口號真係開得太囂張喇, 終於就俾人寸到爆! 邊個叫你咁多蝦碌呀?! d主持o既表現又俾人鬧爆…其實阿叻一貫都係咁, 都唔係今日o既事…其他o個d港姐擺到明係用o黎擺o架啦 (可惜個樣又唔係真係咁靚), do姐就正常啦, 方力申其實算幾OK o架喇, 其他o個d…算吧啦!都係俾亞視o既徐嘉樂搶晒…難怪人o地可以o黎一句: “這樣就是奧運!”o黎寸番你!
以下係o係某d討論區睇到o既…雖然部份有d誇, 有d就雞蛋裡挑骨頭o左d, 但都幾好笑…
部份節錄如下:
****************************************************
方方申(好興奮) : Keyman, 我講 D 八卦野俾你聽，你想唔想聽呀？
Keyman : 我唔想聽
張嘉兒搶著說 : 我想呀..........
(原來方力申講人地游水參賽者的緋聞)
Pearl播緊tennis
A:哇..打曬落網咁wor..
B:唔知會唔會打到羅莽(音:網)呢?
A:邊個羅莽?
B:我地既同事ah..
A:哦..
(靜左)
叻:我知道姚明點解著 13號??
自答:因為佢背住中國 13億人
馬術主持：馬術呢，就係馬的比賽.... 呢隻馬跑得好快.... 呢隻馬跑得唔錯喎.... 其實馬術，真係唔錯o架... (大家都唔知佢講緊乜... )
半個鐘之後..
主持：太好啦！專家終於來到啦，可以由佢從一個專業的角度講解下...
岩岩思琦妹又有個
我諗佢係想講菲比斯前無冇古人後無來者，
但佢講: 菲比斯真係..咩古人...前無來者呀..
琴晚睇tvb
有個運動員綁緊鞋帶
個旁述好認真咁講左1句 :: 拿,佢而家就做緊綁鞋帶既動作喇.
有次講游水
顧老闆: 屎怪水匹之 (芒按: 呢個係ok好笑…不過其實講錯字又真係好正常不過)
匪夷所思菲比斯 BY 方力申
最好笑o個段當然係:
有一日
有記者到左沙田馬術場地採訪
見到一位阿叔提早離開 冇觀看整場賽事 就上前訪問
記者:我想問下你點解咁早走呀?
阿叔:我抽筋呀
記者驚訝地問:下...你點解抽筋呀?
阿叔:我...悶到抽筋呀
(芒按: 嘩…d人咁抵死o既…笑死我! 仲要係新聞報導度出喎…可惜我想上youtube搵番又搵唔到!)
****************************************************
不過咁, 其實我又覺得好多唔洗彈得咁勁o既, 好似o個jar女主持, 係就係十居其九講廢話, 但其實你又可以expect佢o地d咩呀? 係咁上下o架啦…唔通佢o地識評術咩? 講幾句廢話都ok, 係要適可而止囉…講句公道說話, 俾人鬧爆o既(前)香港網球代表李思雅其實又唔係真係差成咁, 不過佢把聲真係ok難聽, 所以都係唔好俾佢講太多o野會好d! 第一次做奧運日日o係報紙俾人鬧成咁都好慘o架喇…係一開始安排佢去做球賽評術o既人玩佢o者!!
至於o個d keep on讀錯字, 好似葉翠翠將葉(佩延) [唔記得佢個名應該點寫] 讀成葉(佩廷), 或者張嘉兒將水花講o左火花, 將火亮講o左光亮呢個就幾好笑, 同埋話佢:“劉璇陣間就會係水立方度訪問一下d體操選手~” …咁呢d講錯o野係在所難免…不過佢又未免錯太多…無綫搵呢班口才完全唔得, 樣亦都唔見得太靚o既港姐做奧運, 真係玩佢o地居多!
最唔掂其實係一級豬楊思琦小姐, 佢畢竟都做o左7年, 經驗比起呢jar妹妹多好多, 但咁多年都無進步…只係就咁講o野都甩甩cut cut, 睇到dodo姐要等佢甩甩cut cut地講完一句好簡單o既短句都已經等得好唔耐煩…無發火都好俾面你! 佢國語係幾好, 但真係零急才, 完全無做主持o既天份, 尤其一要佢訪問完人之後作總結, 佢每次都唔知自己講咩…佢其實只係樣同身材比較可觀, 無綫點解唔安排佢去拍戲, 反而要佢做最唔耍家o既主持? 又係玩佢!
反而同佢同屆o既朱凱婷就真係適合做主持多d, 幾淡定…但點解依家個妝成日化到咁濃…我以為佢同do姐用埋同一個化妝師添?! 至於我最欣賞o既阿潘…真係失去o左好多光芒…太可惜!
(劉璇訪問楊威奪全能冠軍片段)
今屆無綫最掂係搵到劉璇做主持, 佢好代表到中國體操隊, 同埋個個都會俾番幾分薄面佢…嘩! 你睇o下體操隊d妹妹仔見到佢真係雙眼發光…大大大師姐喎, 點敢唔接受你訪問…又可以擁抱o下d體操隊選手, 又可以勉勵o下佢o地, 仲可以成日數1,2,3叫d妹妹仔一齊叫: “中國加油!”…今日又見佢叫個男選手哎: “我們就是奧運!”…真係威! 同埋佢真係靚o左好多, 佢d化妝好得呀…中國女體操隊屆屆d化妝都咁恐怖 (包括佢當年d藍eye shadow都係)…其實應該叫佢去教o下d妹妹化妝呀! 雖然呢班妹妹個個就算十幾歲都好似得8歲咁, 小朋友樣其實唔化妝仲靚! 今日自由體操男金o個位小男孩, 20 歲但個樣好似未發育咁…點解會咁o架?!
今日d賽事真係幾好睇…同埋因為係禮拜日, 終於有機會睇多d現場直播, 真係好緊張…平時錄o左或者睇番重播個氣氛真係完全無得比! 由細到大都好鍾意睇奧運, 好鍾意o個種眾志成城o既感覺…所以好懷念上屆同埋96年可以o係深夜睇奧運直播o個種感覺! 起碼可以選擇捱眼瞓, 但你依家唔可以選擇唔返工咁多日去睇奧運嘛!
除o左體操, 我最鍾意當然係睇跳水啦…晶晶又真係超晒班, 完全無對手…雖然我反而鍾意吳敏霞多d, 佢態度好似謙卑d! 佢兩個都係同初出道比靚o左好多…吳敏霞睇睇o下仲有d似羅美薇! 至於郭晶晶個樣變得仲勁, 今日晚間新聞講番佢o既事跡, 播番佢96年奧運個樣…嘩, 依家簡直係“變靚d”o既人版囉…瘦o左好多, 包包面無晒, 成個look唔同晒…真係女大十八變! 當然, 我最buy的依然係伏明霞! 真係無得講…佢有一種與別不同o既氣質!
同埋今晚霍老爺去頒女子三米板呢個安排…好老土囉…sorry!
仲有呀, 無綫上個禮拜d節目安排真係超級亂晒籠…其實你一早話停播晒d劇集咪好囉, 反正四年一之, 同埋都只係兩個禮拜o者…好過依家咁忽然播一日, 忽然又唔播一日, 忽然又tun o大去11點先播…一片混亂! 你明知奧運直播呢d o野一定會超時, 要咁調來調去真係好混亂! 抵俾人鬧o既…
posted by 芒姐 at 1:30 上午
13 Comments:
徐生講野專業~
態度都係一流
咁好既評述員真係....
無野可以挑剔~
TVB好心無記檢討下自己d馬仔...
以為收視好....就唔知羞恥點寫~
Hong Kong Economic Times
C20 | 人物 | 人物 | By 鄧龍傑 2008-08-15
徐嘉樂專訪 24年功力迸出的專業
機會總留給有準備的人，近日兩台熱播奧運節目，亞視評述員徐嘉樂的專業表現備受大眾讚許，那便是多年來默默準備的成果。
台上一分鐘，台下十年功，形容的不止運動員，還有評述員。
慢鏡重播，回到 1984 年，因曾擔任香港籃球及排球代表隊隊長，無綫故邀請徐嘉樂任該屆奧運評述嘉賓。89 年，本當教師的他，「因喜歡體育比賽，想做自己有興趣的事」，遂加入亞視轉當全職體育主持，至今已參與過 7 屆奧運評述。
體育迷應發現，他現在於 now 寬頻電視體育頻道亦有亮相，原來他早非「亞視人」。收費電視大量購入體育播放權，英雄無用武之地，徐嘉樂便於年前過檔。「與亞視在愉快情況下分開，離去時亞視表示希望今屆奧運能合作。所以跟 now 簽約前已表明，如亞視叫我便要回去做奧運。」now 亦兌現承諾，慷慨借將，兩台都顯出風度，奧運後，嘉樂便會返回 now 繼續主持工作。
4 年勤力準備
因懂得評述多項運動，而且可迅速認出運動員，並如數家珍地說出他們資料，超專業表現令嘉樂人氣急升。其實一切掌聲，都是以 4 年來的努力才能換取，「04 年已知 08 奧運一定多人看，但如要用較準確的角度去評述，自己水平未夠，故 4 年前便看足多項運動的世界錦標賽。雖然事後可看文字資料，但親身看足每一站賽事，才知當中發生何事，看多了，不知不覺便牢記入腦。」
奧運比賽項目繁多，他也沒可能每項都留意，故選擇也有策略。「如舉重是中國的金牌庫，便多留意此項目。」但平時難以看到舉重的世界比賽，他便到有機會接觸國家級舉重運動員及教練的宴會場合，親身向他們討教。「很多評述，其實不是我的意見，是國家級舉重運動員及教練提供的，只是通過我的口說出來而已。」
至於立即認出運動員的「修練秘技」，當中原來大有玄機。「認人不是靠認樣或號碼，如排球比賽來不及看樣，球員又會走位，故認人是要看動作及姿勢。」他說每個運動員動作都各有不同，看得多便記在腦內。「像殺波動作，趙蕊蕊身材夠高，她打背飛不用打得咁出，沒馬蘊雯那麼大動作，看多了便知道。」
坊間稱他是「人肉體育字典」，他立即說：「我絕對不是。」廿多年評述生涯，他坦然也會出錯。「每次犯錯便寫下，提醒不要再犯。」其中人名最易有差池，如當年仍稱南斯拉夫的運動員來港，他便問其領導有關運動員名字的正確發音，才知用英文拼出來的發音，與南斯拉夫的相差甚遠。「不懂的外國人名，便求其亂讀，這是以前犯的錯。現在好驚出錯，故會問清楚才講，否則寧願不說。」至於中文，他一有疑問便翻黃錫凌的《粵音韻彙》查證。「名字代表一個人，不可講錯。」
專業的綠葉
主持奧運是團體合作，互相補位，嘉樂稱其角色主力平衡，位置介乎眾主持及專家評述員之間。「有時自己看得太深入，忽略了普通觀眾需要，便靠谷德昭、林曉峰、袁彩雲發問，提醒我哪些是普通觀眾要知的。」相反一般人走漏眼的東西，主持留意不到便由他請教專家評述員指點一二。
他指專門分析始終要靠有關專家。「像跳水，我懂得看運動員某次跳得過高，但箇中竅妙是甚麼，便要請教專家。教練相關知識豐富，但不慣在電視表達，我負責問問題引導他們講。又或專家不是幾年來，每站比賽都看足，當中運動員故事又未必知道，我便作一個補充。」
嘉樂很謙虛，常提醒記者，眾星級主持及專家評述才是主角，「我只是綠葉」。就算真的如此，這塊「葉」應稱為「專業」才對。
明珠台兩個粵語評術員既金句[轉貼]
石金華=石 陳恩能=丹
翁金鏵=翁(有時會客串)
1.石:"韓國選手正準備抓舉時"...嘩!你睇佢隻小腿同大腿一樣咁粗嫁!!
2.石:呢位選手出場試舉，又係呢個快舉手呀，果然係快舉手，名都未報已經舉唔倒番緊入休息室"
丹:下?番左入去喇?仲報唔報佢名呀?...報啦
3.石:再次出場試舉，快舉手
石:快r講啦!唔係又趕唔切。
丹:係！莎諾娃!莎諾娃!..
4.石:嘩！(唔記得名)佢開個個205km既發球
石:我想試下比佢開一球波打落我心口度，唔知會有咩感覺......
翁:我都唔知，因為我唔會走去試
5.丹:有拿度，無難度呀！
6.丹:高比仔，高比仔，叫叫下佢都成三十歲，就來要改口叫佢高比佬
7.丹:好彩呢位拳手贏左，如果唔係返更衣室將會同保安再來另一場拳賽
8.石:泰國既舉重選手喎，打泰拳舉手係代表投降喎
丹:所以咪好彩佢係舉重，唔係打泰拳囉
9.石:頂...頂...頂...頂...頂...頂...住唔好跌呀
丹:好彩你後尾加個住字
10.石:拳擊係少數唔比職業選手參加既項目，如果比既話(唔記得名)應該無人打得低佢
石:但係奧運拳擊戴住頭套喎，(唔記得名)咪無得使出佢既必殺咬耳仔?
丹:咁咪咬鼻哥囉
11.丹:[素爾對姚明 霸皇硬上弓呀
12.石:你估菲比斯會唔會變崩牙仔?佢囉一次金牌就咬一咬，囉八面咪咬八咬?
13.石:你唔踢波就做波牛，咁唔通你唔游水做水牛咩...= =(爛gag)
14.石:真係爆陰毒，踏單車到去尾段先整條咁既暗斜，佢真係恨不得退出比賽，求其有野就攤落去
15.石:人既一生得三萬幾日，訓教就訓左一萬幾日....咁樣仲徒時間係食野度！不如唔好食啦..........
丹:但係你唔食野我驚你過唔到果二萬幾日
16.石:我地一盤冷水潑落拿度果度，網球場既炎熱天氣都顯得特別冷.....
17.石:哎呀，拿度呢球矮仔放得太高喇
丹:係呀，係一球好高既矮仔
18.丹:大威用左九分鐘己經三比零，只係三個杯麵既時間
19.石:大威既肌肉真係好似隻馬咁
丹:點解咁睇呢?
石:我睇馬術知架，大威d肌肉結實又立立令，真係好似隻馬
20.石:李娜我地支持你
丹:你有邊個唔支持架其實...?
石:中國球手我個個都支持
21.丹:194km，費達拿都唔洗讓佢....
石:我開始懷疑自己想試既念頭(詳見第四句)
22.石:大威比個機會你做多次雙錯誤呀
(大威真係雙錯誤)
丹:你真係烏牙咀......
石:咁...講番句補數喇
石:大威大威我地支持你.....
丹:你呢個賣國賊...
23.石:大威今日真係無左團火....
丹:你估睇緊星矢咩，人人都有個小宇宙....
24.丹:我有個朋友細個話想做翁金驊....
翁:下...我同你都唔係差好多姐
26.石:中國隊舉１００幾ｋｇ好似熱身咁
丹:係架，拎冠軍都係熱身
27.石:呢個選手次次都咁用力咬住個下唇，會唔會咬到變雙唇呀？真係"鄧"佢個下唇辛苦！
28.石:咁又難怪..又要射籃板..又要平衝自己..搵到野咪禁囉..
丹:另外果個就話:咁又係呀..好難得有個頭o係自己隻手下面..哈
29.石:呢間屋難拆喇，仲難拆過鳥巢
30.石:下~~點解佢地講對住個個都係講英文?
翁:因為英文係通共語言,你都可以向大會要求特定語言
石:咁我下次要求潮州話又得唔得
翁:咁即係玩野
31.石:嘩~呢球靚啦~仲靚過鄭潔個樣..
32. 石:過去十年，無睇過電影
丹:無?咁你有冇睇開幕式呀
石:有！開幕式有.....
丹:果套咪係囉，現場拍電影
石:哦...過去十年睇過唯一一套電影，2008奧運開幕式
33.石:擺左兩隻蕉係度，但係無郁喎
丹:可能郁剩兩隻呢...
34.丹:集中精神打break point睇來唔夠好喎....
石:如果有其他方法，我一早轉左打網球啦
35.比歷克，比力打！
36.丹:不如每一次用鷹眼都要比錢，d錢就囉去做慈善啦....
石:不如捐比我啦...
丹:都係捐去網聯啦，比佢做青訓
石:可以既捐去眼科啦
丹:嘿嘿...我鍾意你呢個提儀，忍唔住笑左
37.石唱歌)危險經己在前面.....
38.丹:比歷克裁判講野，好似細路仔問阿爸，「你比我出街啦」咁樣
39.丹:拿度有一下假動作
石:祖高域都有一下假到作架，不過係冼腳姐....
丹:係呀，呃自己架係嘛....
40.黃:所以話龍門最好既朋友就係門柱
丹:估唔到呢位巴西既守門員咁快係我地既國土認識左一位新朋友
41.丹:一個ace之後又一個double faurt
丹:真係一淡沙糖一淡....
石:屎....
丹:我都唔想講喇，你幫我補埋佢
石:唔怕啦，而家深夜，又過埋食飯時間
42.丹:頭先馬術咁精彩
石:馬術精彩你又知?你唔係探緊人架咩?
丹:我邊度探緊人呀?
石:周公呀嘛....
43.丹:你唔係剩係支持仲國隊炸咩??
石:拿度件衫中國隊色嘛...火紅色
丹:估唔到你心境仲年輕，仲有火紅的心...
石:唏，我得24歲姐嘛
丹:24歲?你仲後生過談校長喎
44.石:幾次喇喎，好多螢火蟲定小強飛過
丹:小強識飛架咩??
45.石:拿度食緊既係大蕉來架喎
丹:係大蕉呀，唔係香蕉，唔係黃帝蕉呀
石:大蕉仲有個好處
石:利大便....
46.丹:拿度再贏多兩球就贏架喇
石:機會係有架
丹:係呀，一係贏一係唔贏喇
47.石:拿度真係非疑所思呀
丹:仲來，就來要比版權費喇喎
48.石:祖高域搞乜鬼會「鬼拉手」呢
丹:我地唔可以宣陽呢個堪愚學說既.....
49.(拿度救唔到一球波)
丹:石仔,冇得救喇
石:係呀,真係冇得救喇
丹:你就真係冇得救喇,拿度重有得救...
石:係呀,我真係冇得救家喇
50.石:五個拳證座四邊，翁金驊哥哥你呃我呀?
翁:有一邊座兩個既.....
石:等我仲以為一個吊係上面睇添
翁:你係咪想得太多呀
51.石:兩個都係歐洲既國家一個向東望，一個向西望，咁就變左東張西望
翁:哈哈....係咪真係變左東張西望架?
52.石:你部電腦咁多料既....我果部搵唔到喎
翁:睇你肯唔肯搵姐
石:咁你過d來過d來喇
53. 丹:你知唔知網球場菱形果d咩來呢??
石:我又想問喇，丹尼爾哥哥......
丹:拿...唔好叫哥哥喇，哥前哥後三分險呀.....叫dede好喇
丹:其實菱形果d係通風口來既.....石仔你都交足戲喎，呢番話我同你都講過5次喎.....
54.丹:不如試下裝個鏡頭係個拍上面啦....
石:試下都得喎，我地＞＞＞＜＜＜有咁既能力架
石:下次香港有比賽可以試下架
丹:我以為你會接一句，下次香港搞奧運試下添
石:唏，我係傻但我唔係痴嘛
55.石:唔知我地有冇機會講決賽呢...?
丹:我地播乜咪講乜囉，我地專業架嘛
石:但係我想睇嘛
丹:你想睇咪唔好返工囉
石:唔返工我咪無飯食?
56.石:又來我果句喇，李娜李娜我地支持你...
丹:我都係果句..我地持平d好
丹:陣間唔該講多句支持沙芬娜...
57.石:超無聊IQ題
丹:我係咪要答呀
石:梗係啦
丹:我d IQ好低能炸喎
石:廣州既簡稱
(靜左)
嘩！沙芬娜.....繼續講波
58.石:超無聊iq題...
石:麻麻同個孫仔呀煩既簡稱，麻煩....
丹:你真係令我DA， dead air呀
59.石:沙芬娜佢自己開鷹眼錄埋俾球證睇人地個球點解唔算
丹:咁勁！唔知佢可唔可以用佢對鷹眼幫我錄高清翡翠呀?
60.石:同大家講聲唔好意思先，因為呢場網球賽太精彩，所以晚間新聞將會順延到我地呢場球賽打完既
丹:其實都無關係，因為聽到我地講野，想睇新聞會去翡翠台，但係如果睇英文新聞既，就唔會聽到我地講野啦，所以係無關係既....
61.丹:好彩網球無50比0，如果唔係就成日賣廣告(自己估下點解XD)
62.丹:悔路尼曾經比藥檢捉左架，要停賽18個月
丹18個月之後....
石+丹:一條好漢....
63.石:游水馬拉松要游湖架喎
石:會唔會游游下有大閘蟹咬腳呢??
丹:唔會，因為呢度唔係陽澄湖....
64.而家全球一體化，無打仗架喇
下...俄羅斯咪打緊囉
唏...呢d細路仔你打我一把我篤你一野姐....
下！出到飛彈喎.....
亞視今晚又俾我見到袁彩雲做奧運主持真係唔得!
袁:係呀!呢個運動員真係好出名架!
谷:咦~係!佢點出名呀?
袁:佢有個網頁架!
其他主持:哈哈哈哈哈哈....
我地不如去一去片!
今晚TVB又膠一次, 伊辛巴那娃撐竿跳破世界記錄,TVB差15分鐘唔播埋佢,要係10:15播家好月圓.
伊辛巴那娃樣靚身材fit,又識攪氣氛,成個場都被佢控制晒,好似做show,咁都唔播.
TVB評述已經差,仲做埋的咁既膠野,真係抵佢死!!!!
但由早到晚不停咁播奧運, 又何嘗對non-olympics fans公平呢? 你可能覺得奧運好重要, 但對於non-olympics fans來講, 一日24小時從早到晚係咁被迫睇奧運, 真係好悶!
你可能覺得伊辛巴那娃好識攪氣氛好值得睇, 但non-olympics fans只覺得佢show off/扮野/整色整水, 睇佢只係=浪費時間!
我要好早起身返工, 平時睇完家好月圓就會即刻訓覺, 依家被迫tun遲訓覺, 我覺得好無辜!
要照顧唔睇奧運觀眾咩唔播囉,照舊9:30家好月圓都得嫁.
但最膠既係播剩最後破記錄既一跳唔播,走去播家好月圓,咁先係超級膠!!!係特登要比觀眾x既舉動!!!
我俾匿名二d金句笑到癲左
d網民好犀利呀mark哂呢d金句，真係笑爆。
我唔鍾意朱凱婷呀唔知點解，我覺得佢個人好似好過份自信咁，同埋又係講&問無聊野既（其實點解堆港姐女主持唔做多D preparation?），雖然對於主持既工作佢會比思琦妹佢地好。
講起思琦妹，我覺得佢今次有份做奧運主持完全係有賴佢唔錯既普通話。講真，佢平時份人傻下傻下咁，真係唔係玩急才果ｄ人，如果佢真係做主持咁好既平時響電視應該會見佢做主持多於拍劇吧？
重有呀，芒姐你覺唔覺tvb D「前線」記者既普通話真係勁勁勁唔得？有時甚至誇張到個運動員差d聽唔明佢想問咩 -_-
我覺得「前線」記者中劉璇最好啦，起碼採訪佢自己專長既項目唔問廢野。
呢期tvb開始叫d中國運動員講「我們就是奧運」喇！我覺得ｄ「前線」記者好慘呀，要奇奇怪怪尷尷尬尬咁向運動員提出呢個要求...
匿名個個金句..其實係我留既...
朱小姐原來同屆輸俾楊豬皮,堂堂GHS+CUHK alumna,輸矮掛?雖然香港音重,但D普通話好過好多人包括勁呃飯食之韓小姐.唔明點解唔用D普通話同英文都fluent嘅法拉同李亞男.
匿名,
咁又好難講, 條件好過朱凱婷O既多的是, 同埋選美始終睇樣 (雖然我本人從來都唔覺得楊小姐靚...主觀都係咁話)...不過我當年都唔明點解楊小姐可以贏...O個屆都係我印象中整體質素幾差的一屆, 雖然之前一年劉慧蘊O個屆更可怕!
christy,
朱凱婷...我都係一般...但點都好過一級豬楊思琦小姐...你醜好衰好咩都好, 我最怕人蠢...佢真係轉數慢到無人有!
係啦, 其實TVB有更多口才同埋普通話+英文更好的人選 (即使佢真係想搵D花旦或者港姐去做的話), 無必要揀呢幾個樣樣都唔得O既去做...盞俾人插死!
RE: 停播劇集...
其實個重點唔係O係播劇集定播奧運, 而係你唔可以今日播O下聽日又唔播O下, 跟住後日又"TUN"去11點播...令人無所適從係最克人憎的一點...
RE: 金句&徐嘉樂
D金句係OK好笑...而徐生係抵讚O既!
發佈留言
<< Home