9-14(sun) 馬敏兒
呢期因為繼續中o左“變色龍”毒, 真係好有衝動去買番件“變色龍”tee事關之前報紙話G.O.D.會出一系列以經典劇集logo作圖案的T恤…不過我上次去又好似唔見有, 等我得閒再去睇o下先!
仲有, 呢期真係好欣賞馬敏兒…其實不嬲都幾欣賞, even係以前randomly睇過佢一兩套戲o既時候都已經覺得佢幾型, 事關佢係我不嬲buy o個隻style, 唔算話好靚, 但真係好有格! 我之前講過覺得佢個樣有d似陳慧琳, 依家睇o左咁多集感覺依然不變, 只係佢個感覺好似無陳kelly咁悶! 同埋當時佢作為新人, d演技都算係唔錯!
因為中o左毒, 所以走去search埋佢近年o既演出睇兩下, 一search先知原來亞視2003年o既“萬家燈火”係有佢同埋潘志文再度合作, 不過今次唔係演一對!
嘩! 25年前後佢個樣無咩變過, 咁多個佢反而係keep得最好, 潘翁就真係老o左好多! 咁又係, 通常後生時個樣好成熟o個d, 反而係最“kum”老, 因為老極都仲係差唔多樣! 身型亦都keep得好好, 好過依家d女星瘦蜢蜢!
原來馬敏兒係1960年出世, 同劉華差唔多大…佢做阿妹呢個角色時只係得18/9歲…嘩! 二十級匪夷所思呀! 你話佢o個時有30歲我都信! 潘志文大佢十年, 睇“變色龍”又真係睇唔出, 不過睇“萬家燈火”時, 你話佢o地相差15年我都信! o係萬家o個堆“阿姐”裡面, 佢都算keep得幾後生, 不過唔知係咪好耐無演戲, 反而好似後生時做得自然d!
來一個廿五年前後的對比…好鍾意睇呢d對比, 馬敏兒個樣真係無咩大改變, 係把聲沉o左少少...
http://v.youku.com/v_playlist/f2315923o1p11.html
(“新變色龍”第12集…呢集幾好睇!)
(“萬家燈火”潘翁vs馬敏兒, 可惜佢o地唔係做一對…)
講番呢個禮拜o既“新變”…讚完依然要再讚…阿嬌姐李月清真係做得超正, 好好笑…做張瑛個新老婆o個位都好抵死! 其實劉翁都做得好好呀!
不過鍾意阿立o個位姐姐真係好煩…每一集我都keep住問佢: “你究竟幾時死?”
同埋太慘喇...無啦啦做咩要整死全嬸? 仲要係因為搭飛機返o黎參加阿妹個婚禮…其實又唔洗太煽情o架, o下嘛? 同埋其實我都唔係好明, 雖然我係幾buy馬敏兒or even阿妹呢個角色, 但又真係有無咁多人品又好家底又好咩都好似好好o既人對佢咁死心塌地? 上一輯又係咁, 今一輯又係咁…好明顯係用o黎影襯出阿立的衰, 但偏偏佢又真係最鍾意阿立!
仲有首主題曲, 聽聽o下都算唔錯, 咁當然就唔及得上一輯o個首咁經典啦…o個首真係一聽即刻會諗起“變色龍”!
如果想網上重溫番“新變色龍”, 可以去呢度…
http://v.youku.com/v_playlist/f2315923o1p11.html
posted by 芒姐 at 11:50 下午
19 Comments:
印像中馬敏兒都拍過一兩套TVB既劇(應該係近十年內既事),另外李影都好似為個女同TVB拍過一兩套劇
其實全嬸嘅死唔係刻意煽情，好似那時鄧碧雲過咗TVB，麗的冇招先至唸到呢條橋。
Re: 匿名
無錯. 鄧碧雲當時響TVB拍緊"網中人"，做緊發哥既阿媽，無法演出"新變色龍"，而且劇情講到阿妹結婚，全嬸無理由唔出席，唯有用飛機失事結束佢既角色。
響第23集，脫標同妞妞去麗的電視台拿獎，居然影住佢地企響"新變色龍"劇照前面，唔知係唔係編導專登玩野! :)
雖然冇左全嬸，不過有吳回做"再世全叔"--文叔，都算頂癮! 哈哈!
女人竟然 keep 得好過男人, 馬敏兒又真係得天獨厚!
聽蕭若元講, 馬敏兒係飛女一名, 而且好寸嘅呢. 不過, 好有演戲天份.
嬌姐死, 一齣戲入面逐個逐個死, 係蕭編嘅劇一大引人元素~
如果我係女, 我會鐘意新劇入面嘅賀昇. :O
Re: al 佛兄,
哈, 係! "再世全叔" ---> 劇中賣雲吞麵 ga ma! 鄺志立去 o親都食細蓉, 有次好唔掂, 叫大蓉, 再世全叔即刻知佢唔開心.
P.S. 唔知有冇記錯! :P
突然間諗起~
芒姐, 借地方一用, 唔佳!
有冇邊位大哥大姐有以前麗的同亞視嘅舊片重溫 & 演員消息資料呀)))))))))))
劇集: 奇兵三＋六, 三國春秋
演員: 李燕燕
Thank you!
芒姐特登開個專題寫我童年偶像馬敏兒!! 我一定要回應來支持一下了!!
記得我之係度前都講過馬敏兒係我最欣賞同最喜愛的麗的花旦啦
我細個果陣講唔出點解總之就係好buy佢, 依家人大左再睇返佢以前既演出
就了解到佢有果種魅力, 對佢既好感比以前自己細個時仲深左添
講外貌佢唔算好靚好絕色(有些人會覺得佢個樣苦添!!), 但果種自然流露既型格同時代感, 俾到我一種好舒服既感覺, 而且演戲好自然, 完全唔做作, 我諗從女性角度睇就算講唔上喜歡都一定唔會反感囉!!
呢一點阿可兒廖小姐就同佢岩岩相反啦, 嬌柔做作扮到楚楚可憐咁 女仔多數唔buy架!!
好可惜前幾年為公為私自己都好忙, 無機會睇萬家燈火添, 岩岩睇返d片段
潘馬再次合作都幾得意呀, 雖然戲中佢地唔係一對, 但我心中image緊廿幾年後阿立同阿妹外型應該就係咁架啦..haha, 睇返馬敏兒,近年做戲真係冇咁自然喎
不過潘翁可能keep住有拍下戲, 演技就越來越老練了, 至於外型, 畢境潘翁都50幾了, 同40幾既馬敏兒係有出入架啦, 馬同攞婆關菊英(1958年出世)都係果種年輕一臉成熟老定左, 年紀大左反而冇乜大變果隻囉
財嬸叫許瑩英, 粵語長片年代就拍戲了, 佢做呢財嬸個平日巴巴閉閉又小家既八婆真係一絕, 同嬌姐既寃家戲(仲永遠都鬥輸俾嬌姐)勁有火花呀!! 反而上集同嬌姐成日鬥咀既財叔張瑛就都冇佢地咁好氣了,haha
其實劉克宣同張錚等老戲骨個個都性格鲜明,演得好出吖!!
有關潘翁同劉翁以及馬敏兒係tvb拍既劇, 我夜d返來再講…
馬敏兒真係屬於成熟型,估唔到佢得十八/九就好似廿五歲以上咁。
我最鍾意"新變"裡面既馬敏兒,因為佢o係"新變"既造型好亮麗,而且個角色性格好岩佢既味道,"變"裡面未免有點鬱鬱寡歡。
"聽蕭若元講, 馬敏兒係飛女一名, 而且好寸嘅呢. 不過, 好有演戲天份."
咁我會想起佢第一套劇"鱷魚淚",同佢演個角色有d似,唔知係唔係因為睇到佢寸寸地叫佢做呢個角色。
梁巔巔:
關於李燕燕
從未睇過佢既演出之前我都聽聞過李燕燕,主要以前睇過一d電影資料有佢既介紹,睇完"出線"之後的都幾鍾意佢,幾有特色,笑容好甜。
佢係拍電影出身,77年長城電影公司新人,同期新人有劉雪華,處女電影係同鮑起靜老公方平合演既"巴士奇遇結良緣",此片頗為成功,係佢既名作之一。80年加入麗的電視(佢d前輩如張錚、平凡、鮑起靜等都先後入麗的),參演多部劇集,如"大地恩情"、"出線"、"馬永貞"等等。期間亦有接拍電影,知名的電影作品仲有"忌廉溝鮮奶"等,佢o係電影方面發展似乎都不俗。
網上睇過"巴士奇遇結良緣",好鍾意佢裡面d笑容,而且我覺得佢演出既角色實在係好女友同賢妻良母既典範。
佢八十年代中好似移咗民,我都好想知佢近年既消息。
話時話,佢應該同鄭文雅、馬敏兒同年紀。
Kitty,
Hello! 唔該晒! ^^
咦, 我頭先去過妳個 Blog, 妳咪係亞視嘅演員嚟嘅!!!! 咁妳可以問吓亞視嘅人睇吓有冇李燕燕嘅消息噃!
另, 哈, 喂, 妳知嘛, 我當年都幾鍾意睇妳咖喎!
妳近來好嗎?
P.S. 妳個 Blog 係 space live, space live 要留言好難嘅!
妳試吓用 sina 或者 blogsppot 嘛. :)
梁巔巔
你誤會啦!我係一個普通觀眾咋,唔係個位亞視演員,只不過我用space live幫佢整個好似網站咁既野,為興趣姐,反正網上關於佢既野太少啦!我比較鍾意寫我喜愛而網上資料又少既藝人,或者遲d有機會會介紹下李燕燕。
我都知space live好難留言,因為要係用戶,不過無辦法,都整咗3年,要搬好難,當初好似冇咁多blog選擇,後來先發現有呢個問題,所以又申請咗一個留言版放上去囉!但係space live個版面自由度比較大,可以分類到好似網站咁。
不過如果我開多個blog會考慮下其他,如sina。另外,yahoo幾方便,但佢都要sign in先可留言,唔知好唔好。而blogspot留言係幾好,不過個版面彈性似乎好低喎!
i. 係呀, sorry, 我去妳度再睇真啲先知我弄錯了! 真大懵! :P
ii. "或者遲d有機會會介紹下李燕燕。"
好呀! 等妳!
iii. 如果係, 用 sina 啦! User Friendly, 多功能而且瀏覽量又高!
re: 馬敏兒...
嘩! 估唔到到依家都有咁多人係buy馬敏兒, 真係令人感動!
哈哈...佢係飛女都唔出奇, 個樣寸寸o地o個隻我buy呀, 同埋通常d人寸, 某程度上都會係寸得起o個隻...
係呀, "新變"裡面o既馬敏兒型過"變"裡面好多呀!
馬敏兒有拍過tvb劇嗎? 係咪"盞鬼老豆"...但其實我對呢套劇無咩印象!
re: 鄧碧雲
其實即使鄧碧雲過o左檔, 都唔係一定要話佢飛機失事咁慘情呀...蔡琼輝都無返o黎飲阿妹o個餐啦...
不過是但啦...總之我就係最唔想見到個可兒, 佢幾時走o架? 又話只係拍10集倒就閃o左o既...每集見到佢我都想熄機...
re: 再世全叔
...其實呢個idea都幾好, 佢個感覺其實都似阿立阿爸, 等佢可以訴o下心聲嘛...
芒姐
係呀, 套劇係叫”盞鬼老豆”, 大約1994年底tvb差唔多係同時間簽左麗的三位花旦(馬敏兒, 魏秋樺, 李影) 拍劇(當年k-100仲揾左陳芷菁同莫可欣訪問馬同魏)
魏秋樺拍過神鵰, 真情等.. 李影拍左Leon既阿sir早晨以及Sammi既親恩情未了(佢之前80年代都有幫tvb拍過劇), 而馬敏兒就同阿燦,Benz雄, 龔慈恩合作拍左係tvb唯一既一套劇”盞鬼老豆”..
套劇係一般既小品劇, 當年回響並唔算大, 所以你冇乜印象都唔奇呀,96年係香港播, 但我95年係Vancouver讀書果時已經租帶睇左(因為知道馬敏兒復出所以特登去租既), 故事detail我都唔太記得啦, 大概係講做警察既benz雄同馬敏兒係兩公婆, 有一仔一女(阿女係係阿sir早晨既壞女學生劉美珊, 唔知芒姐你對佢有冇印象? 仲有當時仲好young既行姐陳彦行做佢同學), 而因為一件事Benz雄因工殉職, 而同事件有關既阿燦就俾benz雄上身去照顧馬敏兒三母子, 被阿燦既前妻誤會佢兩個有染, 從中發生左好多事來…
當時既馬敏兒比萬家燈火果陣仲後生一d.
找到盞鬼老豆既故事大綱同片頭
http://www.tudou.com/programs/view/vQtTJWasckU/
栗昭（廖偉雄）不務正業，與前妻淑賢(龔慈恩)離婚五年。一次，昭與銀行內巧遇劫匪打劫，本想與匪徒拼一生死來博取意外死亡保險金，怎料天意弄人，昭偏偏大難不死，而熱愛生命的鐘晴（許紹雄）反而中槍身亡。晴死後遺下妻子葉娉婷(馬敏兒) 及兩子女，無法安心離世，終是找昭上身，借他照顧家人。昭有感情死後仍對家人關懷備至，覺悟自己曾忽略家庭，逐決意與賢重修舊好，此時卻出現情敵劉志遠(洪朝豐)…
張c奶,
嘩~呀~~~出現情敵~~~洪朝豐!!!! 哈! 係喎...佢o個時仲幾正常咁o既樣!
原來套劇係玩"鬼上身"o個d神怪o野o架?
劉美珊我記得...包包面, 有少少"黐脷筋", 但講o野幾牙尖咀利咁o架嘛!
發佈留言
<< Home