9-8(mon) 新變色龍
上期講開“新變色龍”, 睇o左十幾集, 又真係幾好睇喎, 同“變色龍”有得揮! 咁當然, “變”o既劇情/故事結構各樣都紥實d, 但係“新變”就比較係情意結囉, 睇開舊又好想睇埋新, 同埋想睇o下阿妹同阿立幾時會o係埋一齊, 雖然明知阿立都唔係“好人”…哈哈哈!
呢輯加o左好多人, 又有林嘉華, 黃韻詩, 林國雄, 劉克宣, 黃莎莉, 羅石青etc…仲有o個個暗戀 (sorry, 應該係明戀) 阿鄺志立o個位姐仔…佢個角色真係好克人憎, 同埋真係好唔要面啊, baby! 但係呢段我睇得勁有共鳴, 事關我公司正上演緊同一台戲, 情況幾乎一樣…所以真係好好笑! 原來真係無論你咩樣, 只要你肯送上門, 而個男o既又苦悶…就能一拍即合! 呢段勁好笑!
而o個位姐仔, 我仲特登去search o下佢o既資料, 原來叫廖詠湘…個樣都ok, 身型好好添…但d戲唔太得, 同埋咬字發音勁古怪! 聽聞佢拍o左幾套劇就無拍喇, 之後返o左英國喎!
我發覺我睇呢套劇最主要都係想睇馬敏兒同潘志文…但其實由上一輯開始都唔覺得阿立有真係鍾意過阿妹, 只係阿妹好癡情咁…但係今輯阿立又忽然變得咁深情 (雖然依然係花心)…oh, 但之後佢會昏迷, 阿妹好似又會結婚…咁係咪要等多60集先會一齊? 咁未免太耐喇!
其實睇睇o下開始明白點解當年潘志文會咁紅, 亞視仲可以用佢o黎對抗秋官添…佢個形象又真係ok討好, 官仔骨骨, 個樣又好忠咁…同埋佢同馬敏兒都ok襯呀! 可惜“變色龍”首播時, 我都未o黎到呢個世.界…oh, 點解我成日會迷上一d唔係屬於我年代o既人和事o架?
睇到一個潘志文網頁…資料極度詳盡, 十分唔錯!
嘩! 呢套劇仲有初出道o既陳秀雯做鄺志立律師樓o既秘書…佢老公阿叉燒個樣仲好“o靚”仔…唔知點解, 我覺得有d似“不再少年時”年代o既李克勤…哈哈!
仲有呀, 呢幾集成日有影啟德機場…個接機大堂o既斜台真係好經典…好令人懷念! 啟德機場相比起依家個機場, 真係有代表性好多…雖然, 每次起機落機都有好高o既難度!
至於“家好月圓”, 我好落後呀, 仲有好多集未睇…哎! 我會嘗試o係呢個weekend追番o架喇…俾d時間我! 同埋點解頂“同事三分親”o個套“搜神傳”又係鍾嘉欣擔正? 一晚兩套劇, 無綫點排陣o架?!
仲有, 正如大家所謂, 無綫搵阿一級豬楊思琦小姐做“亮相”第三輯o既主持, 真係靠害居多…你搵佢拍劇都算啦, 雖然佢d戲都係一般, 但勝在個樣同身材都算係得…但你要佢玩口才急才…真係唔好玩啦! 全個無綫反應最慢, 我諗佢認o左第二, 都無咩人敢認第一!
Oh…又係經典重溫o既時候…咁o岩o係youtube見到我細個時覺得好好聽o既一首歌…曾航生o既“永遠幸福”…仲有當年o既舊大丸添呀! 首歌10幾年後聽番, 依然咁好聽!
posted by 芒姐 at 10:35 下午
25 Comments:
最想知蔡瓊輝近況~
個MV女主角係咪黎明詩？好似好屬口面咁啵。前日好巧o係youtube度搜過曾航生d歌，原來佢今年出o左只新碟叫音樂道德經，都几騎呢嚇，不過又幾好聽
梁巔巔:
蔡瓊輝移民左黎多倫多，主持過下電視台節目。近幾年就冇見佢出現。。。唔通返左香港？
芒姐：
好耐冇POST野上黎喇。。。返工得閒睇唔得閒打中文。
我俾你搞到好恨睇新變色龍，但係哩度既中文電視尋日先做IQ成熟時第十集（好正）。唔知下一齣會做乜？
Monjeh,
廖詠湘……據香港流行曲評論人黃志華先生考證，其爺爺為1940,50年代粵曲音樂人廖志偉。當年出過好多唱片的！
有首經典名曲“海上風光”︰今晚晌岸邊四面瞧，看見個靚女真嬌俏…… 去問問妳認識的叔叔輩，一定有聽過的！
i-Joel,
你講呢隻歌我有聽過呀, 成日d"名曲滿天星"都有唱...不過原唱者我又真係唔知係邊個, 多謝你o既資料!
marky,
internet係好偉大o架...我搵到有人放o左"新變色龍"上網...miss o左都可以睇番...太偉大...你有興趣可以睇o下啊! 好齊的!
http://v.youku.com/v_playlist/f2315923o1p0.html
Polly,
o個個唔係黎明詩, 不過的確有d似, 如果我無記錯呢位姐姐好似叫"鄭維家" (sth like that), 係無記90年代的獎品小姐o個類...
梁巔巔,
我都想知...
同埋睇完"變"+"新變", 搞到我有d想睇番2003年atv套"萬家燈火", 居然又係有潘志文同馬敏兒...
我記得細個時睇“大地恩情”尾段都是講馬敏兒暗戀潘志文0架!
舊時演員真是有樣貌有演技,潘志文幾好吖.
“萬家燈火”有睇過,前段有D悶,成日喊,後段則好好睇,因加咗馬敏兒高志森等人,成日搞笑,可惜馬敏兒唔係與潘志文做情侶,做咗寶寶姐細妹,二人聯合屋企D女人成日整蠱潘志文,勁好睇!
揾到網上有少少片段……
http://www.tudou.com/programs/view/4Bv3Y9TLX8E/
http://www.tudou.com/programs/view/5XPW_rQepzM/
http://www.tudou.com/programs/view/AcZI6mnSN4s/
Marky: Hello~
呢個我知. 唔該先. ^^
但佢嘅近況同個樣係點呢而家? 好難搵到!
我諗佢正如關正傑咁, 唔想畀人知.
芒姐: 呢排睇番新變色龍, 發現仲有一個女藝人 (主持) 又係唔見咗. 就係喺劇中有個仔, 同劉志榮一齊住喺一間屋嗰個女人.
記憶中, 佢曾經係下午茶嘅主持之一.
Re:梁巔巔
閣下問的可是鄧碧梅？
最記得80年代中期有花生油廣告，出兩個版本︰鄧碧梅一個，陳齊頌（流行曲“情花開”原唱人）一個。兩個台既婦女節目殺晒！
By i-Joel
Hi! i-Joel,
係呀! 唔該!
細個唔覺得點, 而家我三十幾歲人, 就覺得佢幾正!
人, 真係會變~
Re:梁巔巔
鄧碧梅屬於賢妻良母型，人近中年當然想有個安定家庭。
到閣下四字頭時，可會對元秋心動？
又或者到五字頭時，見到黃夏蕙就心痕痕？！
By i-Joel
唏, 咁去到黃夏蕙呢 oD咁激, 就算天下無女都唔會鐘意啦!
五字頭時, 除非林青霞! 咁又唔同 wo!
^~
Re:梁巔巔(3)
閣下係梁巔巔嘛，開個小玩笑而已。
不過我見過元秋後生時既相片，幾悄架！（當年用另一個藝名︰林秀。）
我知你係講笑呀! 如果唔係我嬲咗 la! ^~
另, 元秋後生係索 ga! 聽講佢啲師兄都有溝過佢~
匿名,
嘩! 好多謝你o既“萬家燈火”片段, 之前睇過一段, 另外兩段未睇過, 等我得閒再搵多d睇番佢兩個25年前後的改變! 其實馬敏兒無咩老到, 反而潘志文真係老o左好多! oh, 如果搵佢兩個做番一對o黎一個"變色龍2003 or even 2008"都幾有睇頭呀!
係, 潘志文後生真係幾討好, 我終於明白佢當年點解咁紅!
梁巔巔,
係啦, 鄧碧梅都ok elegant呀其實我覺得...不過我個人就buy o個d強悍/有格的女性多d!
oh...其實我一路以為你係女仔添...睇完你同i-joel的對話, 我先知道唔係! 咁o岩喇, 我都想知...作為男性, 你會唔會buy馬敏兒呢隻女仔? 我覺得佢呢隻style係女仔會buy多d...定係你會揀阿可兒呢? 又或者係蔡瓊輝?
吓?!???!?!? 弊! 我似女仔!???!?!? 不過以前都曾經有啲 Blog 友以為我係女仔! 乜我 oD文筆似咩?!
"作為男性, 你會唔會buy馬敏兒呢隻女仔? 我覺得佢呢隻style係女仔會buy多d...定係你會揀阿可兒呢? 又或者係蔡瓊輝?"
喺劇入面, 我會鍾意新變龍入面嘅馬敏兒, 有性格. 但第一輯嘅佢就唔吸引 lu~
至於可兒, 唔得! 好煩嘅呢 oD女仔!
最正就梗係蔡瓊輝啦!
麗的, 當年仲有一個我最鐘意嘅, 叫李燕燕. 芒姐, 妳對佢有冇印象?
http://www.youtube.com/watch?v=rjuMxYgXP8k
片中瞓係度同鄭文雅傳波嗰個~
梁巔巔,
哈哈...又未必係文筆似o既, 只係直覺覺得係, 可能因為你個名...其實我都唔知點解...
我以為作為男性, 可兒呢d雖然煩d, 但起碼溫柔體貼任勞任怨, 最緊要係佢仰慕鄺志立嘛, 送到上門食得唔好o徙 (當然, provided佢個樣都ok)!
但我作為女性觀眾, 一見到佢出場, 集集都想問佢"你究竟幾時死?"...哈哈!
蔡瓊輝靚d, 但我個人就鍾意馬敏兒多d, 佢個樣好有性格...稱唔上好靚, 但我buy呢d囉...
"出線"我上個月重播時larp過, 李燕燕係咪有少少好似講廣東話口音唔係好正咁o架? 我前o個仲有睇另一套戲都見到佢, 但唔記得o左係邊套...你知啦, atv呢期重播好多同期的劇...超正!
"但我作為女性觀眾, 一見到佢出場, 集集都想問佢"你究竟幾時死?"...哈哈!"
Heee hee heee~
"李燕燕係咪有少少好似講廣東話口音唔係好正咁o架?"
係呀!
嗰時麗的好多劇都有佢份! 呢個直頭失晒蹤!
蔡瓊輝小姐1985息影之後, 洗盡虛幻鉛華, 回歸平凡你我世界, 蔡小姐是位值得學習的好佛教徒, 更是一位好樣的中華好女子 !
她力行佛的教誨, 堅定奉行佛法與禮佛, 並盡心全意伺奉她年邁的老母親; (她無怨無悔地獨自力行中國孝道倫理精神, 她甚至於連她自己的人生大事都先放於一旁, 來專心孝順她的老母親) 她是位既孝又順的中華好女子, 好榜樣!!!
許多佛教徒與基督教徒都是廟門外或教堂門外之披著人皮的魔呢!!!!! (別否定不相信我所言論, 請看看自己或身旁親朋好友們的行為,是人或是魔, 是非常明確清楚的!!!)
蔡瓊輝為人俠義正直,樸實誠懇, 謙誠敬長, 樂善進取, 熱心好善, 並悲天憫人, 是表裡如一的好佛教徒 .我們深切知曉:
外在的美, 是會隨著時間而逐漸變醜ˎ 消失
但是內在的美, 卻如寶玉般溫潤ˎ光明ˎ無瑕, 是具備正面能量的!
蔡瓊輝, 她是真實已具備內在的大美麗! (She deserves highest quality of inner beauty. ) 非常值得我們學習與鼓掌,
蔡瓊輝 已發輝佛教的大慈ˎ 大悲ˎ 與大安心精神!
請问你係唔係識得蔡瓊輝呢
發佈留言
<< Home