9-19(fri) 家.好.月.圓.慶.中.秋
Oh, 原來不經不覺,“家好月圓”已經做到大結局, 今個weekend仲會整個咩“家好月圓團圓夜”…不過好似無上年“溏心夜宴”咁grand喎, 氣勢亦真係唔夠上年! 一開頭夾著上集餘威係威係勢, 但係到後段反而好似跌o左watt…我個人認為啦o下, 不過好似話連收視都不升反跌喎…真大鑊! 同埋點解唔好似我o地講咁將個大結局夾正o係中秋播呀? 咁個“家好月圓團圓夜”先fit晒timing o架嘛!
我o既電視精朋友仔靚女婷投訴我點解今次講得咁少“家好月圓”…其實係因為我都未睇…一路都慢人十集, 但又唔係太提得起勁去追番未睇o既集數, 拖o下拖o下咁…又唔係完全引唔起我o既追看意欲o既, 但又的確係無上次“溏心”後段咁“引人入勝”! 嘩, 同埋舊年個勢真係勁到呢…去到邊度睇咩節目都係講緊“溏心”, 直頭係“溏心周”或“溏心月”呀! 即使呢度o既朋友都好熱烈咁討論…今次唔係無, 不過對比起上次又好似差少少!
我個人o黎講會鍾意上年o個套多d…劇情-wise都好 (或合理) 少少! 雖然上次都有d搵戲o黎做, 但係今次更甚…不過話分兩頭, 無呢d誇張劇情, 又點可以引起大家討論, 一邊睇一邊鬧呀?! 同埋佢真係勝在有一班好演員…除o左上年紅o左o個批老戲骨, 今次連平時唔多起眼o既周聰都上o左位, 佢個公公個角色好活好可愛呀, 以前o係其他戲都無咁精靈, 呢套真係特別cutie, 連我都好鍾意佢! 佢個成日都好似想O嘴o既表情…好搞笑…尤其係前日一班演員一齊上勁歌o個晚, 佢d表情都好抵死! 周聰叔叔你今次真係上o左位!
其實呢兩個禮拜無記都有企圖力谷套劇o架喇, 全體演員又上優秀選又上勁歌…今次個排場都ok型, 但唔夠上年咁有氣勢…嘩, 人多勢眾咁大大小小演員連串星都上埋去, 一字排開陪細契唱“講不出聲”…上年我o地都有o係呢度熱烈討論過o個晚勁歌, 菊姐唱歌真係好得, 尤其live真係無得頂…難怪阿黎耀祥都話好鍾意睇佢鬧人, 鬧人都鬧到好似唱歌咁…好有節拍又有晒高低音…其實“家好”咁多個演員之中我都係最鍾意sa姨…雖然佢係煩但煩得o黎幾好笑…佢鬧人又真係出奇地聽喎!
好可惜上年post o個段“講不出聲”live@jsg已經俾youtube掃走o左, 搵唔番同一段...呢段d聲無咁清...不過再睇o下都無妨...
(“講不出聲”live@jsg)
今年首"無心害你"其實都唔差, 都有d“講不出聲”o既feel, 不過又係珠玉在前, 所以都有少少被比下去, 無上年o個首咁hit…但分開o黎睇都已經係水準以上, 同埋配合到套劇個feel! 不過我個人就喜歡舊年林峰同鍾嘉欣合唱o個首插曲“心領”多過今年首“愛不疚”!
舊年鍾嘉欣上勁歌同埋o係“溏心夜宴”live唱“心領”唱得比我想像中好好多, 令我好impressed…唔知點解今年o係d show度聽到佢唱live差o左好多…又唔係話好差, 即係作為藝員都ok o既, 但作為歌星又真係唔多掂, 佢身份唔同o左自然對佢要求都高o左…我諗佢真係唔應該出碟住...否則命運可能同阿吳唱k差唔多…上得快, 跌得可能仲快…小心小心!
反而阿法拉又比我想像中唱得好喎…佢o係勁歌lead住唱"分分鐘需要你"都算唔錯, 仲要做埋手語…佢d手語真係做得好好, 唔係淨係識做咁簡單, 係成個flow都好純熟, 熟過初哥哥添…好明顯真係下過一番苦功! 無綫今次呢個安排真係得, 邊個諗出o黎應記一功…佢呢個角色確係討好, 而佢亦都真係做得好…今次佢真係成功洗底!
不過同大家一樣, 我都唔明點解啞就要唱"分分鐘需要你"呢?!
Oh, 如果大家錯過o左o個晚o既“家好月圓”@jsg...對唔住, 我o係youtube都搵唔到, 無得post上o黎同大家分享添…!
哈哈…不過我忍唔住要post o下呢兩幅“邪留丸vs紅姨”的圖片…
我諗tvb真係好憎徐子珊同黎諾懿…俾d咁o既角色佢o地做, 真係想玩死佢o地! 做奸角都唔緊要, 奸角都可以好受歡迎, 但佢兩個又奸 (或克人憎) 得無無謂謂, 為奸而奸, 無風起浪咁…一個係額頭jok住“奸角”的奸角, 一個就係廢爆的廢柴…睇到人眼火爆!
阿“柯佬-黎”其實真係想點? 佢會唔會考慮去讀o下d發音班? 你做藝人咁樣真係好大鑊, 連好簡單o既台詞都唸唔正…就算佢自己唔去, 點解無綫唔會逼佢去正視o下呢個問題?! 佢d懶音真係勁到呢…連陳敏之都大有改善, 至少睇到佢肯put effort, 但阿柯佬黎你真係想點? 中文又係咁, 英文又係咁…其實都唔係要求你講得好好, 但真係唔好太太太離譜…咩“paat貪”(part-time)…點解唔錄過佢?! 仲要話阿圓係o係外國返o黎…真係唔係話要你好字正腔圓, 但你咁樣點出得街o架?! 搵人幫佢糾正o下d中英文發音都唔係好難o者, o下嘩? Tvb…why why why???!?!?!?!?!!
至於徐小姐, 坦白講佢已經靚番好多, 但今次拍埋呢班女演員度, 即刻又被比下去…上次“甜言蜜語”無比較, 都覺得佢ok o左 (雖然o個次都覺得配角姚嘉妮靚佢好多…依然係o個句, 我唔明點解姚嘉妮紅唔起? 佢無論樣同演技都唔錯…唔係話要上一線, 但我覺得佢依家二線都未係, 但佢明明係可以好d!)… 最慘係佢仲要飾演用美人計勾引阿卡, 令佢神魂顛倒o既角色…你唔係話一味扭o下蛇腰就得…尤其仲要佢個情敵係楊怡! 大佬, 俾著我都揀楊怡啦…真係毫無說服力! 個角色仲要係勁唔討好o個隻…tvb真係想整死佢!
不過前兩集佢又有幾句其實幾精警喎...佢話荷媽係“道理天后”, 煩到爆…仲有話佢o地成家人都低b, 邊有咁大個人玩咩猛鬼街, 猜咩親人枚, 咩“sa姨, 正攞婆”, “jo飽, 負心郎”…其實又幾係真諦…講出大家心聲! 笑死我!
不過咁, 呢d劇情擺明係低b , 但咁先好笑嘛…就係鍾意睇呢d! 一日o係度無無聊聊唸咩“姨大過姑, 姑大過表…”同埋猜親人枚, 反而幾搞o野, 因為平時d家庭唔會咁騎呢, 仲要日日都有d騎呢事發生…呢套劇就係勝在低b 同埋完全失真...仲真情過“真情”…咁先好睇, 咁先有話題, 等你可以望住個電視機O晒嘴! 好似前兩集sa姨忽然良心發現, 大鬧+打嘉美, 跟住阿卡o個句: “唔好打喇, 唔好打得咁細力呀!”etc.…成場戲都好dramatic, 但大家一邊鬧佢over, 一邊又睇到目不轉睛, 呢幾排如果出街食飯o既地點有電視機, 一定成日會睇到呢個情景!
所以話雖然d劇情真係婆婆媽媽, 睇到人keep住想熄機, 集集係咁鬧交, 食一餐安樂茶飯都唔得, 但有時又真係幾好笑...d人愈係克人憎, 劇情愈係搵戲o黎做, 睇得d觀眾愈係嬲…就愈係要睇落去…因為不過隔一陣d壞人又會俾人揭穿, 大快人心! 仲有, 上個禮拜jo飽同紅姨補擺婚禮o個幕, d仔女上台向jo飽同荷媽祝酒o個幕真係寸到爆…又係大快人心…好o野!
(家好月圓 27 阿紅俾卡寸)
另一段睇到人唔係眼火爆 (因為眼火爆都好d, 起碼可能都有趣d), 而係想瞓覺o既係凌B同于素秋o個段…哎呀, 大佬呀! 咩“煲煲豬腳薑, 激死朱元璋”真係內麻當有趣o既表表者, 十分難頂, 其實佢拍出o黎, 甚至係寫出o黎o既時候都知道係肉酸多於感人o架啦…點解仲要咁做…邊個諗出o黎o架?
呢段n角戀唔知點解可以做到一d都唔感人, 只係好煩人o既感覺! 鍾嘉欣自上次溏心後變成萬人迷, 個個都話好鍾意佢, 尤其係d少男…點知今次反而俾人鬧爆! 我本人就一向都唔特別buy佢, 又唔係話好差, 睇得出佢好努力, 但完全唔係我杯茶, 感覺異常咁yim悶…今次個角色仲要克人憎過上次, 懶可憐咁, 最慘係係又喊唔係又喊, 同埋佢同mk wong段情真係寫得一d都唔細膩, 一d都唔討好!
呢幾日話佢日日會寫report俾管家仔, 同上次“沒有常在心的日子”有異曲同功之妙, 不過上次o個段煩得o黎都感人些少 (係些少)…今次呢段真係正如大家所講…cut o左佢罷啦…雖然一日都o係度喊, 但一d都唔感動! mk wong又係慘, 兩次演出溏心個角色都出唔到, 今次o個個凌b直頭ok無聊, 整段都係負責談情追女仔!
至於d人話陳豪做得出過林峰, 其實某程度上我都同意! 林峰今次真係無我想像中咁有發揮…親情o個part都ok, 愛情o個part真係好煩! 咁兩個角色我會揀阿卡喇…官家仔個角色係大好人, 但你話好吸引, 我又覺得唔係, 可能程亮衰衰地仲吸引...有時大好人反而未必係最討好...d人衰衰地反而得人鍾意, 人就係犯賤o架啦! 同埋坦白講, 林峰始終係做有識之士/有錢仔耍家d, 今次有少少草根o既角色唔係太o岩佢…出唔到!
後生o個批最出應該係楊怡, 今次又話佢o既演出o係網上被激讚, 其實佢o係網上一向都好受歡迎, 唔止今次, 但又唔知點解硬係現實中又無咁紅 (唔係唔紅, 但又無網上反應咁熱烈囉)…真係令人費解! 其實楊怡我一向都好buy, 尤佢佢01年o係“婚前昏後”俾人話係張可頤翻版時已經幾鍾意佢, 但又係唔明佢點解紅唔起 (我覺得以佢o既條件應該不止於此, 可以再紅好多)…咁多個花旦佢係喊得最好o個個…個樣真係好慘, 好得人同情, 呢個可能就係佢同鍾嘉欣喊o既最大分別!
仲有, 我見阿中仔溫家衡都紅o左好多, 上勁歌有好多fans…佢係咪以後唔做“東張西望”, 改去拍戲?!
posted by 芒姐 at 10:51 下午
28 Comments:
好憎林峰!
好扮嘢!
Monjeh,
打手語唱《分分鐘需要你》應該是電影《聽不到的說話》（1986,德寶）留下的後遺症。
男主角是劉青雲（亦是其首部電影演出）。故事環繞劉青雲與聾啞人士（演員演出）的關係，其中便有用手語配合《分分鐘需要你》整首歌。
好勁呀!喺你個BLOG度留名...
不過我想講其實我一路都好鍾意黎諾懿,好靚仔好可愛吖!!!喺今次慘啲要做個咁既角色啫!!!上次做歡仔話一亳子都唔好分俾我阿媽同個契家佬嗰時不知幾型!!!哈哈!!!
靚女婷
其實點解家好會俾人話係要嚟捧林峰？管家仔呢個角色係成日出場，但絕大部分時間都係塊綠葉,無主戲,係群戲中極少對白，愛情線無可觀性，管家仔比于素秋牽著走之餘兩位對手仲要比人罵爆，角色又不見十分十分討好，最多係個唔討厭既好人，有心捧林峰既，管家仔呢個角色係可以寫到有咁慘得咁慘，有咁偉大得咁偉大，為頭家受盡委屈諸如此類，但搞到似為于素秋受盡委屈多啲囉。反而阿卡一出就好搶，性格鮮明，夠搞笑，對白搶，有主戲．耐唔中又有關鍵位比佢罵吓人，爆吓大獲，多次係主線起到重要作用，無論邊個去演呢個角色，焦點都會落係佢身上。
好同意話黎諾懿勁多懶音，有時睇佢真係好忟，佢係咪有少少鄉音+懶音呢？同埋覺得佢呢套好似佢個FRIEND鄭伊健上身咁，唔止髮型，連個樣都似似地!唔知想點...
同埋一睇林峰、鍾嘉欣同凌B的三角戀就想扭台OR熄機，係冇戲搵戲黎做，同埋有咩咁值得集集喊一鑊呢？如果我係管家仔，我會覺得于素秋好煩囉！
其實我又覺得徐子珊演得OK過好多人(起碼我覺得佢今次好過鍾嘉欣)，佢真係可以演到好衰格，話冇野搵野奸係編劇編得衰姐，演員都冇計啦！
至於話家好點解唔中秋播結局，係因為撞左奧運，搞到遲左幾集，搞到依家先播！
芒姐有冇睇尖子攻略呢~~有驚喜野喎，套劇同《律政新人王2》玩左個CROSS OVER，因為幫歐陽BOBBY打官司的係MK SUN，即係律政的馬國明，好搞笑~~好似之前古靈精探有齊歡暢咁，其實咁都幾得意吖！同埋，我覺得羅仲謙個STYLE同個樣都好似郭晉安，有冇人有同感？
Monjeh,
我等你呢篇等到頸都長，終於俾我等到啦！你講中晒我對呢套劇觀感，我都係中意《溏心風暴》多ｄ！
我都覺得今輯陳豪個角色搶鏡過林峰ｏ既管家仔，我覺得某程度上係因為管家仔同于素秋ｏ既糾纏關係扣左好多分，令我留意多左陳豪個角色！
至於徐子珊個角色正如你所講係為奸而奸，令到楊怡果場委屈戲幾搶！
哈~我發覺楊怡成日都做d好可憐, 成日都受好多委屈o既角色ga~
呢d角色通常觀眾都會鍾意+同情, 再加上其實佢做得好都唔係第一日架啦, 只不過呢套劇多人睇收視好, 同埋今次都算幾多戲份, 所以咪咁突出囉! 同樣情況出現O係陳法拉身上, 今鋪真係咩底都洗哂.
仲有我諗極都唔明點解tvb會俾d咁既角色鍾嘉欣做, 明明力捧緊架嘛.
處理感情拖泥帶水到暈, 一唔開心就搵管家仔做水泡, 同凌b果段又幼稚到極點.
反而徐子珊我覺得都ok, 我對鍾嘉欣個角色仲反感過佢個角色, 始終幼幼稚稚又煩既角色先最惹觀眾反感, 煩厭.
男仔方面我覺得林峰都係無咩特出地方,一味討好, 可能角色問題掛, 我覺得佢做呢一類角色差d野, 做alfred好d, 黃宗澤就做2套都唔多掂啦, 角色又唔討好, 陳豪同上集差唔多, 都ok.
阿黎諾懿做戲就不嬲無咩特色, 唔似得其他小生, 黃宗澤有得做下搞笑, 林峰有得深情, 吳卓羲有得衝動, 陳鍵鋒有得斯文, 仲有佢講對白好似一舊舊咁(英文都算, 連中文都係咁), 同期奧運六星就得佢彈唔起. 不過整體都叫有d進步!
男既最出始終都係夏雨同黎耀祥!!
講開羅仲謙, 我覺得尖子攻略佢個角色好鬼"吳唱k" feel阿~
如果早一兩年, 我諗無線一定比呢個角色吳唱k做, 哈哈.
大部分男仔都唔鍾意林峰, 正如大部分女仔都唔鍾意鍾嘉欣, 佢兩個簡直係絕配, 真係襯到爆!
嘩 講《家好》正！
其實我鐘意《家好》多過《溏心》呀
因為《家好》d演員既戲好似仲放
(雖然好似好嘈好刻意stir up )
不過真係好好戲
關菊英最尾一個星期d戲真係出晒黎
打完嘉美響度喊我覺得幾touching呀
我覺得佢今次個角色又係傑作黎
其實我覺得d後生都做得幾好嫁
法拉楊怡陳豪even徐子珊都唔錯
雖然徐子珊樣衰d(or 可塑性大?)
不過佢屈荷媽個段真係做得唔差有potential
不過黎諾懿同呀中仔就無乜特別發揮......
不過最紅應該都係李香琴！份份雜誌都係佢d專訪！
btw 《尖子》個「三寶」d戲都唔錯呀
羅仲謙我覺得做得幾好tim
嘩!!!等你呢遍幾到頸都長埋啊﹗
係囉.阿于素秋真係煩到爆﹗同埋我對於佢無啦啦愛上阿凌b真係好懷疑囉﹗上一集先話想同管家仔一齊，轉過頭人地示愛自己又唔制喎?你想人地點先?一陣又突然鍾意左阿凌b…日喊夜喊…唉…我又未至於憎佢，但真係覺得佢好煩囉﹗仲煩過常在心…佢呢d係冇野傷心而搵黎傷心﹗
而楊怡我真係一嬲都鍾意佢﹗覺得佢真係好有天份，幾場喊到自己都喊都有佢架﹗d眼淚好觸動人﹗不過…話時話…佢都係上集既造型靚d﹗
阿嘉美上次屈荷媽我覺得都係ok喎…幾真啊﹗
哈哈﹗不過佢醜又係冇講錯，不過已經靚左好多架啦﹗
1. 周聰叔叔：其實呢個伯伯喺新紮師姐嗰度都好出位啦！大家記唔記得啊？方中SIR啊，佢話“真係活到老學到老啊”
2. SA姨唱歌真係超好聽，家好月圓有一集佢喺CAFE度唱歌俾恩賜，唔記得咩歌，係國語嘅，都係好聽到痹！我想講，以前啲artist真係掂！
3. 法拉：佢做主角嗰啲場口真係都OK囉，包括佢奶奶瑪利姐都好好啊，果然老戲骨啊。不過佢個hubby，真係又奀又細又裙腳仲要少少歪嘴添。同埋點解後黎慶都嫁咗喇，娘家次次有咩事佢都一定在場嘅？又唔見佢老公喎。唔怪得開始佢奶奶咁反對佢哋結婚啦。咁嘅新抱，真係唔妥
4. 黎诺懿：講嘢衰已經算啦，拜託佢啲口音確實超難頂！仲有個髮型啊，成個“難兄難弟”“溫拿樂隊早期”咁！而且個角色又係睇到人眼火爆咖，成日叫嗰個毒婦響尾蛇“阿媽”“我阿媽”，煩到你啊，我諗第個做我會冇咁嬲囉！
5. 仲有嘉美同阿圓嘅感情，唔係好明，佢開始明明係為錢咖。點解後黎無啦啦就自然過渡成有真愛咁哩，唔明，呢度冇交代囉。
6. 其實我唔係太鐘意荷媽呢個角色。我覺得佢成日都好似救世主，力挽狂瀾咁，好假！仲有我唔相信有人咁無原則嘅善良，包括佢對阿SA，嘉美，屢次作惡，都原諒番，親人就話冇計，但係都冇血緣關係嘅…仲有全部人對於素秋啊，俾著我就唔會點睬佢喇，仲當曬佢係自己人，點可能！
7. 呢part真係好精彩啊，我一路睇都一路講“好嘢”。不過好遺憾後黎冇呼應番囉。呢個係嗰晚最後一part，第二晚一開始就講其他內容喇。我覺得好可惜啊。
8. 锺嘉欣：呢位姐姐真係！其實之前我都BUY過佢，覺得新一脫嘅小旦裏面，佢都算形象OK，乖乖斯文咁，雖然冇乜演技，不過其實而家啲新姐仔又有邊個有演技哩？。我仲推崇過佢同峯嘅couple image咖！但係呢出戲佢真係煩到爆囉！成日都喊，就算啦，喊得把聲又唔好聽。成日扮曬乖乖同純情，其實不知幾自私！（無論係親情條線定係感情條線，佢都係為自己考慮嘅。）有幾次麻麻鬧鬼佢咩“我哋嘅家事，你唔好出聲！”之類，我都覺得好解恨啊！我諗溏心1令佢成功上位，溏心2都會令佢人氣插水囉。
9. 無心插柳柳成蔭囉。就好似1嗰時大家都鐘意程亮咁。而家大家都覺得阿卡好好。佢個角色真係好可愛囉，一開始窒紅姨啦，後黎撐阿月飛嘉美啦，安排得佢好有人情味好MAN. 反而阿好就好似，次次都在場次次都冇乜用咁。出鏡率真係高喇，不過真係冇乜發揮。其實究竟無線係咪真係like佢咖？呢個問題我成日都想問。次次話明捧佢，但係都唔兌現嘅。上次“歲月風雲”又係咁，最後焦點始終唔係佢。如果今年佢憑藉呢個角色做視帝，真係毫無說服力喇。
10. 中仔溫家衡：超唔鐘意呢只style，好奶油好GAY啊。講嘢又係口齒不清嗰只，佢千奇咪紅添啊，無線又多一個話柄。
That's all.
我諗tvb真係好憎徐子珊同黎諾懿→我睇到呢句的時候真係忍唔住笑咗出來,哈哈,講得好啱啊~同埋,我諗一個人個形象負面就真係唔好再做一啲唔討好的角色啦,我見到有人喺嘉美個blog嗰度話"你真人同戲入面一樣乞人憎啊!",令我都不禁諗,tvb真係好憎阿子珊姐頂啦~
同埋,新一批,好唔好戲,真係一拍埋就高下立見囉~楊怡啲喊位同啲委屈位真係會令人覺得佢好可憐好替佢唔抵,但鍾嘉欣就唔同,一哭就令人想轉台/熄機,好煩啊~
雖然話係鋪條路俾林峰擺視帝,但講真,今次管家仔個角色係無程亮咁討好囉,嗰段咩雅典娜公主同撒亞人之戀真係累死佢~黃宗澤仲慘,上次個角色明明可以好出位又出唔到,今次個角色完全只係一個拖泥帶水的負心男,就更加令人煩,加上嗰段急口令亦係又一令人想熄機之作囉~~
陳豪做得好好,雖然好浮誇,但又好得意喎~唔知呢,我覺得陳豪係一個好有喜感的人,咩"阿婆走得快一定有古怪",真的好抵死,佢一出場rap嗰段教啲c9買股就已經完全討好囉~
但我諗今年應該係安排jo飽同管家仔之爭掛~雖然我情繫阿公公囉,哈哈~~
"不過前兩集佢又有幾句其實幾精警喎...佢話荷媽係“道理天后”, 煩到爆…仲有話佢o地成家人都低b, 邊有咁大個人玩咩猛鬼街, 猜咩親人枚, 咩“sa姨, 正攞婆”, “jo飽, 負心郎”…其實又幾係真諦…講出大家心聲! 笑死我!"
我都覺，完全講出大家心聲！其實徐子珊表現唔錯！好有進步！絕對好過大喊包。
++,
我認同徐子珊呢幾年來有進步, 不過要佢做呢個"萬人迷"角色仍然有d吃力不討好...所以我覺得無綫係玩佢o既...
鄧塔,
嘩! 好耐無o係呢度見過你!
完全同意...公公o係其他戲真係未試過咁出!
"tvb真係好憎徐子珊同黎諾懿"...呢個我衷心覺得係, 如果唔係唔會俾個咁o既角色佢!
問心, 阿卡個角色討好過管家仔十倍...管家仔除o左盲目地痴情, 令到段四角戀更加煩之外, 真係無喇...呢個角色, 我睇唔到無綫可以點樣安排佢力爭視帝...一係tvb想玩林峰, 等佢就算攞獎都俾人鬧...反而程亮個角色出好多!
kn,
1. "新紮師妹"o既方中sir唔係許紹雄咩? 不過周聰都好似有份做其中一個老人家, 都做得唔錯, 但點都唔夠呢套出!
4. 黎诺懿："仲有個髮型啊，成個“難兄難弟”“溫拿樂隊早期”咁！
...哈哈...呢個好笑! 我認同!
5. "嘉美同阿圓嘅感情，唔係好明，佢開始明明係為錢咖。點解後黎無啦啦就自然過渡成有真愛咁哩，唔明，呢度冇交代囉"
...呢個我都好唔明!
6. 荷媽個角色其實好煩, 同埋你講得o岩, 好失真!
7. "第二晚一開始就講其他內容喇。我覺得好可惜啊。"
...係, 我完全唔明點解呢套劇好似走單元劇路線咁, 成日今集講完o左一樣o野, 下一集就好似無發生過咁...?!
9. 係啦, 上年"溏心"講到林峰係客串, 反而程亮個角色好出, 今年話呢個角色係力捧佢做視帝, 似乎係想玩佢多d!
10. 中仔溫家衡好奶油好GAY啊
...全中! 我都好怕呢d小白臉小朋友!
rainbow,
佢鍾意凌b可能貪佢帶點不覊有趣d o卦...但係我反而覺得佢當管家仔係水泡...
楊怡始終係現役咁多個花旦喊得最好o既一個...佢真係演技派...我又反而鍾意佢呢個look多d, 上輯裝太行, bob頭亦太潮, 唔襯佢...呢輯自然d!
嘉美醜唔罪, 只係安排佢做呢個傾倒眾生的角色有d兒玩死佢!
PKL,
係呀, 其實以阿菊姐o既演齡, 佢真係做得好
《尖子》個「三寶」之中其實我最欣賞梁烈唯, 佢都做o左好多年...永遠都係做呢d壞學生! 佢d戲其實唔差, 可惜個樣真係一d都唔主角!
匿名,
"大部分男仔都唔鍾意林峰, 正如大部分女仔都唔鍾意鍾嘉欣, 佢兩個簡直係絕配, 真係襯到爆!"
...某程度上, 我認同你的說法! 可惜"家好"之後, 連男仔都唔多buy鍾嘉欣, 可能法拉仲上到位...
匿名,
不過就算做幾年吳唱k做學生哥都老o左d...羅仲謙唔知o係邊度出o黎呢? 之前o係"盛裝舞步"見過佢!
匿名,
楊怡做可憐/受委屈戲的確係有一手o架, 所以無綫keep住俾佢做, 正如keep住搵鍾嘉欣喊o既角色 (雖然都唔係做得特別好)
阿黎諾懿如果要同其他奧運六星相題並論...我會話...sorry呀, 六星!
匿名,
阿卡係搶過管家仔好多...個角色都有血有肉d, 管家仔被于素秋同凌b條拖泥帶水感情線搞到佢個人都煩埋!
徐子珊其實算演得ok o既, 係個角色太克人憎, 同埋形容到佢美若天仙咁大家覺得攞膽o者!
電蟲,
係啦, 黎諾懿真係有d鄭伊健上身, 不過鄭伊健唔知點解一路以o黎觀眾緣都ok好 (尤其以佢自身的條件)
呢個weekend睇番少少"尖子攻略"...估唔到原來已經無聲無息地完o左...d人話唔太好睇, 我又覺得ok, 起碼d人我都ok buy, 劇情都可以接受呀! 但如果講補習的劇情, 又好似有線的"補習天后"做得好好多!
匿名,
管家仔呢個角色其實我一d都唔buy, 太俾于素秋牽著鼻子走...同埋搞到佢俾人感覺好煩! 唔該tvb唔好憑呢套劇俾個視帝獎林峰, 如果唔係實累佢俾人插爆!
靚女婷,
梗勁啦! 你喎...連我有時都自愧不如o既電視精!
oh, 你居然鍾意黎諾懿........呀......
i-Joel,
尋晚睇"初哥哥"大結局又聽到唱《分分鐘需要你》...真係變成o左會歌!
梁巔巔,
哈哈哈...果然係好似匿名咁講: 男o既唔buy林峰, 女o既唔buy鍾嘉欣喎...
發佈留言
<< Home