9-16(sat) 遊戲天王

自從播完“15/16唔玩唔舒服”之後, 依家tvb十點半o個個新遊戲節目“遊戲天王”…又ok有趣喎! 本來見佢成個節目無無聊聊, 又係走d“15/16”路線一班嘉賓分開幾集玩, 又係人多混亂o個隻…都唔係太睇好…但係唔覺意睇o左幾集, 又幾好睇喎! 齋係節目內容就絕對吸引過“15/16”… d遊戲雖然應該都係抄日本/台灣o個d節目, 但都有加入d香港本土元素…幾得意又幾有新意! “15/16”o個d問題, 其實係無聊過無聊, 睇完都唔記得佢講o左d咩…唯有係睇主持同埋嘉賓…如果o個集無勁cast, 都唔洗旨意有人睇!

“遊戲天王”o個d咩“腸粉王”, “捉老鼠”, “功夫[妹]”環節…全部其實都幾無聊o既, 但愈簡單o既遊戲, 反而愈好笑! 成班人柴娃娃咁, 都幾有趣! 所以如果我o係屋企, 我都會睇o下呢個節目…起碼佢會吸引到我望住個電視多過“15/16”, 通常睇“15/16”都係一邊聽, 一邊做第二d o野!

不過好似太多主持囉…林曉峰由“獎門人”年代傍實曾志偉o既“獎老”, 到依家做大哥帶住一班細o既, 其實都做得幾稱職…但四個主持未免太多, 仲要加多個rocky…大部份人都無咩存在價值, 可能只係為o左想一氣過捧多幾個人!

其實要帶新人, 咪林曉峰拍o靚妹李綺雯咪算囉! 李燦琛同蘭茜好似多餘o左, 又無咩發揮機會…o靚妹o係亞視年代做d show仔o既主持都做得ok o既…但佢”亞視味”太濃, 唔明點解無線會搵佢過檔?! 同埋o黎到無線佢又唔係太突出喇! Rocky亦都做得幾放o既…佢真係好似多發展機會過個高鈞賢好多!

又, 前幾日o係中環見到羅霖, 心諗: “佢生o左三個都都真係仲keep得幾靚喎!” 點知之後o個晚睇“娛樂直播”就即刻訪問佢…整咩佢呢排成日上電視, 莫非佢打算復出?

本來無咩興趣睇佢個訪問, 點知一邊上網一邊睇, 睇睇o下又幾好睇! 估唔到佢講o野雖然無啦啦多o左d鄉音, 但係又講得好有條理好得體, 仲幾有point! 以前even佢選亞姐o既時候, 都唔覺佢講o野咁有sense, 仲要講得好流利又好有條理...唔怪得知劉坤銘揀佢, 真係美貌與智慧並重…帶得出o黎見人!





哈哈…上面呢個朋友forward俾我o既連環圖雖然好鬼白痴, 但又好鬼死搞笑…搞到我一邊睇一邊忍唔住笑o左出o黎, 要同大家分享o下!

玩“蝦仔daddy”式押韻…”孖襟of the opera”…”螄蚶of the opera”, ”k分of the opera”…”賓賓of the opera”…”靚坤of the opera”…”私奔of the opera”…”仆親of the opera”…”拉登of the opera”…好低能…但係加埋d圖, 真係幾好笑!