12-9(sat) 歡樂滿東華2006 (上)
今年o既“歡樂滿東華”, 唔洗講個焦點當然係yumiko啦…什麼卡拉之星全部行埋一邊! 又真係可憐o既…女仔人家, o係眾目睽睽下咁樣俾人扯甩褲法…好彩都仲有條t-back! 雖則話平時表演衣著可能仲性感, 但著得性感係一回事, 咁樣著晒衫褲但係o係毫無心理準備o既情況下俾人扯甩褲, 仲要係現場直播幾十萬人一齊睇, 又真係好慘!
曾志偉仲話要slow motion, 雖然佢都係o翕o下o者…但o係咁o既情況之下作為司儀講d咁o既o野, 又真係有d inappropriate! 雖然其他司儀同埋藝員個個都目瞪口呆唔識反應, 總係要人講o下o野o既…好過家燕姐o係度忍唔住勁笑囉…錯晒!
不過阿玉米糕咁樣一甩都起碼贏得各方同情, 個個都話佢人氣急升…不過佢又講得o岩, 梗係寧願無發生啦! 好似話o係youtube d片都俾無線下令摌走晒喇!
哎…tvb又係o既…點解要d藝人玩埋晒d咁o既o野…空中飛人都真係好難度好高o既項目o黎o架嘛…你以為真係“人生馬戲團”咩? 呢d項目唔訓練一排都唔得啦, 只係練一個禮拜就出o黎表演, 癲o架?! 嘩! 見到yumiko fing完一次錢嘉樂接唔到, 彈番去原位時個工作人員居然係搵個架推佢出去囉…有無搞錯呀? 同埋點解呢幾年d高難度表演都係搵yumiko? 唔通佢想做第二個楊盼盼?!
講番成個“歡樂滿東華”…除o左yumiko事件引起好大迴響, 個節目整體都可以話悶到抽筋! 令人好失望…尤其係我最鍾意o既“全台藝員卡拉之星大唱遊”…真係比起前兩年失色好多…悶爆!
整個節目人丁超單薄…仲要年年都係o個d人, even司儀都係咁o既情況! 除o左個個大show都有o既志偉, 阿姐, 家燕姐, 仲有東華show御用o既王賢誌, 梅小惠 (呢個完全唔知點解?), 林曉峰…好彩無o左志雲契仔amigo同埋阿叻囉…咁樣感覺好好多!
仲有就係十年人事幾翻新啦…十年前負責表演d高難度項目o既藝員, 依家一個翻新變o左總理…傅明憲變成傅明憲總理, 仲有當年o係“娛樂反斗星”成日俾曾志偉玩o既區帶娣, 依家搖身一變成為有錢太…總理夫人陳區海倫敦!! 唱隻歌有幾十萬, 人o地搵條命搏都未必有咁多, 真係今時唔同往日!!! 佢個echo年代舊拍檔李蕙敏…就由十年前“你沒有好結果”紅o左兩下變成依家聲都唔聲o下…勁可憐…真係同人唔同命!
區海倫本身歌藝係幾唔錯, 可惜佢今次太刻意要show quali, 懶勁咁點知就入錯晒拍子, 一路唱一路都唔o岩拍子, 唔知佢聽唔到音樂定點? 總之一路都跟唔到音樂…想show quali反而cheap左…好可惜!
傅明憲個樣就變得超artificial, 成個郭可盈咁, 唔知係咪搵同一個醫生? 佢又係唔整好過整, 以前個樣靚好多正常好多囉!
仲有, 李籠怡o個件咩衫o黎o架? 著件咁o既衫跳舞, 影得佢好肥, 一截截肉jit晒出o黎!
方力申同stephy o個part假到爆…方力申o係水中解鎖時stephy o係度亂叫, 超假囉…真係唔叫好過叫…!
仲有仲有, 蓋明輝小姐都係做番男人型好多…佢一作女裝打扮就超可怕, 唔該唔好“扮女人”嚇人呀!
陳總個“極速志雲飯局”…真係無話可說…咁都要整個環節俾自己表演, 唔怪得知佢旗下d騎呢之星都好似佢咁…咁有表演慾!
(下期先講我本來最喜愛但今年令我好失望o既“全台藝員騎呢之星大唱遊”環節!)
posted by 芒姐 at 11:07 下午
10 Comments:
我總係覺得玉米糕早有預謀。佢做左咁多年藝人冇理由唔識預防工作防走光。d褲扯一扯就甩連像筋都冇佢冇理由唔知下話!? 仲要錢嘉樂都係一捉捉住佢隻腳,咁既關頭邊仲咁得意"劣"佢條褲落黎, 仲要個人upside down,條褲都仲可以向上升,反地心吸力好似卡通片咁。最後仲要show一條咁nice既t-back啊~~~ 玩d咁既遊戲,身為藝人係唔係應該仲著d咁既t-back呢?
傅總理當年係幾正架,我仲記得有套係講風水佬,睇相佬,同何寶生(不肯定)做架.佢個時幾清純.仲有套古裝同古巨基,陳啟泰係最後大佬,佢都好鬼得意架...點知而家搞成咁
Stephy度好心就一個鏡頭唔停咁影住佢啦,又剩係影住個水缸,你做乜都得啦,當香港人係低b.仲有佢個麻包袋咁高擺係佢前面,又唔係從後咁由頭到腳咁笠住Stephy,乜崩都穿哂啦.真係有d敷衍觀眾
一開頭容祖兒行火炭仲假,d火o係哂兩面,佢地係中間行過去,仲之後遞高隻腳話邊度燶左...真係睇到無語
反而最有d睇頭係空中飛人(就算yumiko冇發生意外o黎講)同李克勤陳奕迅對唱個兩part
雖然個個口啞啞,不過林曉峰算o禁得住曾志偉,佢講slow motion都冇答返佢,都算識識地執生
總之以後電視臺再出d空中飛人既節目，就記緊整件連衣既衫啦！
芒姐，等左幾日，終於等到你講東華啦！
我今年係第一年睇卡拉之星，正如你所講，我諗今年真係太過正經啦！（唔知係咪因為愈黎愈多人留意，所以先被人叫佢地唔好玩得咁過火呢？）不過睇見班主持坐響庶，佢地果種「掩住半邊嘴笑」既神態都幾搞鬼既。
幾場大show入面，大家都講過阿叻響度認屎認屁，我就想幫佢講少少好話，其實佢都唔係一無是處架，我記得佢主持運財智叻星既年代，d中文都幾ok，果時d藝員要用marker同cardboard寫答案，d錯字白字真係多到飛起，但係阿叻次次都識寫（無論係中文同係廣東字），都算係咁架啦！
至於志偉，近嚟d大show竟然都要佢表演番一兩part，可見無線完全係「蜀中無大將」囉！
唉，無咗肥姐同佢鬥嘴，今年d大show真係跌晒watt呀！
PS：重溫你既舊日記時候，發現芒姐你好似會將一d資料更新/更正番，係咪架？
Esaltato,
哈哈...我覺得佢又唔會特登o既, 係太唔小心, 或者唔係太介意囉...佢o地好似話綵排都試過甩褲, 咁就應該小心d啦
不過佢條t-back又真係算幾靚, 好彩無著d爛底褲...
van,
傅總理雖然當年出o黎已經係整過兩下 (至少對眼, 佢自己都認...因為佢中學年代客串"開心鬼"個樣完全唔同), 但都自然好多...依家好嚇人!
o個套風水佬戲係咪叫"命轉乾坤"? 係有何寶生o架, 估唔到佢依家出埋家添!
古裝同古巨基又真係無咩印象喎!
我認同空中飛人(就算yumiko冇發生意外)同李克勤陳奕迅對唱o個兩part算係最好睇!
曾志偉口沒遮攔都唔緊要, 最核突係事後仲要懶家燕姐, 話佢做拍檔唔夠肥姐好...真係勁核突!
Moli,
又或者間電視台想刺激收視呢...
Onlim,
係呀, 得閒就會更新番d日記, 即係有d未o係diaryland度upload番上o黎o既都會o係心血來潮時upload番! 更正資料就好少喇...
今年卡拉之星真係令人好失望, 可能因為已經搞o左好幾年, d人都江郎才盡喇!
班主持坐響度「掩住半邊嘴笑」o既情況以前仲嚴重...因為實在太好笑! 連我都忍唔住一邊睇一邊笑o左出o黎!
你好~我是路過的，一看就不能自拔，我都是個電視精，超喜歡你寫的…勁攪笑﹗哈哈…
呀，古生和傳總理合作過兩套劇，時裝《皇家反千組》，古裝《英雄貴姓》，後者係超抄絕代雙驕的，喺古生被無記雪時播，好似無上過正式黃金時間檔，只係新聞前5點11時播過的說
Domotoiceko,
哈哈...你好! 告訴你一件事, 特地到你的網頁走一趙, 發現原來我也曾路過你的網頁, 你寫的東西同樣有趣呀! 俾心機!
都係O個句: 我們是有緣的, 電視精總會"坐埋一枱"!
"英雄貴姓"我真係未睇過添...!
發佈留言
<< Home