1-27(sat) 第二十九屆十大中文金曲

隨住十大中文金曲都做埋, 今年o既所有樂壇頒獎禮終於完晒…其實近年d樂壇頒獎禮已經變得超級routine…未過新一年, 豬肉台新城就會o係boxing day頒一jar獎先, 呢個台d奬d歌星最唔重視 , 不過可能對d o係其他頒獎禮唔會有機會得獎o既二/三線歌手起到d鼓勵作用o既! 跟住由96年開始1月1號就例必係播叱吒, 搞d出人意表o既賽果, 封殺某幾個歌手, 再聽o下俞琤d保險從業員式肺腑之言…再之後就係每年都1-1幾做o既十大勁歌, 始終tvb係大台, 點都係歌手同埋所有樂迷最重視o既頒獎禮, 亦都會係最grand一個…港台就守尾門, 爭住頒“傳媒大獎”, 連續幾年都幫華仔o係臨尾力追番個傳媒大獎番o黎, 力挽o係商台失o既勢…同埋最緊要係搵埋d九唔搭八o既政府高官/立法會議員/運動員出o黎頒獎…官方電台果然係官方電台…! 呢個trend o係近十年都無咩點變過!

今年港台搵楊千嬅做嘉賓主持都好, 反正佢今年都唔會有咩獎[手羅], 分身做o下主持無咁尷尬! 不過港台好似真係無晒主持咁, 今年金曲d主持好流, 連李志剛, 蔡浩樑都可以做金曲主持, 十幾廿年前就算o係港台做到好top都未必有機會, 永遠都係俾淑梅姐霸住…可能因為近兩年港台d dj俾人拉晒!!! 阿李志剛先生依然係英文人, 扮晒講唔正中文, 但d英文又唔係真係好喎…真係好難受o下!

今年港台孖無線玩電視現場直播, 都幾突破o下…印象中只係商台o係96年玩過, 仲要係由天黑直播到天光, o係大球場睇住日落! 咁都好, 打鐵趁熱會好睇d! 不過廣告時間唔知佢o地可以做咩…同埋港台可能無咩直播經驗, 捉時間捉得好差, 令我諗起當年亞視d直播節目, 永遠都overrun…今次就搞到大部份歌都未唱到一半就要cut!

o個隻特別為今年金曲作o既主題曲“流金頌”都真係幾難頂o下…一d都唔配合港台個style…反而98年為慶祝金曲20年o個隻“最好的聲音”好聽好多, grand好多, o岩港台個格調好多! 仲有, 劉華真係可能太疏於練習, 同另外幾個所謂“不同年代”o既男歌手合唱呢隻歌時, 真係連咪嘴都咪得唔似!

港台唔頒十優歌手俾Twins都不特止, 仲要安排佢o地坐到落第二行…真係好唔俾面! 阿詩仲慘,居然食白果…點解咁可憐?! 頒隻金曲俾佢都ok呀? 你俾泳兒只係錦上添花, 根本都無咁o既需要, 但係阿詩無份就好可憐o架啦嘛! 俾安排o黎o架?

容祖兒又係勁…live show都夠膽遲到…一開始十優歌手出o左場一陣佢先現身, 仲要喘晒氣咁! 志偉亦不忘寸佢一句話: 要影多次十優歌手大合照, 因為依家先齊人呀嘛! joey上台[手羅]獎時, 仍然係唔望曾志偉一眼, 雖然唔排除係我“凝”住o既…同埋佢同李克勤拿最佳銷量男女歌手獎, 居然要share一隻歌唱…咁唯有係“刻不容緩”啦…但係隻歌都成兩年前, 無啦啦要唱呢隻歌都幾奇怪! 仲有, 李克勤著衫真係靚左好多, 鄭融都著得唔錯!

成個頒獎禮最好睇o個part, 居然係秋官拿金針獎…本來以為應該會悶爆, 反而係最entertaining! 扮o野秋果然係扮o野秋! 除o左佢o個part, 基本上成個頒獎禮都幾悶o下…毫無精彩位!

記得金曲25周年o個時o係沙田馬場舉行幾特別呀, 偏偏o個年我又唔o係香港…希望下年30周年會再勁d, 有d突破…最鍾意o係戶外場地舉行o既頒獎禮!