1-7(sun) 勁歌廿五年
終於拉直番d頭髮, 剪髮之前仲去o左我最鍾意o既café landmark食tea, 心情好番好多…負離子確係好方便, 莫講話唔洗日日gel, 連疏都唔洗疏…方便晒, 爽晒! 我都係唔適合做女仔o架喇…由2007年開始, 可以考慮叫我芒哥…哈哈哈! 依家感覺輕便o左好多, 真係唔好再扮成熟喇, 做番低b仔算! 我幾滿意依家呢個髮型…“失而復得”o既直髮, 我好掛住你! 無試過對我o黎講有十級麻煩o既鬈髮, 就唔會發現直髮有幾咁方便! Oh! 好久不見o既直髮look…久別重逢, 份外親切! 希望心情可以隨住很煩人的曲髮消失而變番好…要重拾心情, 唔可以容許自己再咁moody!
禮拜六睇o左一個“好好睇”o既電視節目…並唔係“慈善星輝仁濟夜”, 而係最適合我o地呢d懷舊人士睇o既“翻轉勁歌廿五年”!!!
內容其實就近乎係無, 主持人呂方同梁榮忠亦都唔係做得特別好…但係齋係d珍貴舊片段已經夠好睇啦! 呢d咁好睇o既節目, 開正我o地呢d愛回憶的老餅o個瓣…應該做多幾集呀!
不過就係略嫌佢o地挑選d片段唔夠經典囉…太多古巨基, 陳奕迅etc o既片段…雖然佢o地呢期hit, 但呢d片段未免太近期, 唔夠代表性! 作為一個主力回顧o既節目, 實在係唔夠多舊片段, 好多好經典o既都無播到!
咁多片段中, 睇番九十年代初o個d就最有回憶…因為o個個年代係我o地跟樂壇新聞跟得最貼o既時期, 基本上佢播o既片段我都有睇過, 甚至有錄起! 哈哈, 但係我想問: 點解以前有咁多勁大紥o既花, 依家又唔見晒o既呢? 同埋點解d fan屎可以o係d歌星唱唱o下歌時衝上台, 但係依家又無o左呢個現象o既呢?!
至於最精彩o既就係八十年代d片段…尤其係梅姐同哥哥o個d! 真係誰能代替你地位…o個種壓台感, 揮洒自如o既表演…比著第二個, 跳同樣o既舞步你可能會覺得好核突囉! 不過話時話, 八十年代真係連d舞蹈藝員都跳得好d o架喎!
Oh! btw, 早幾日o係銅鑼灣地鐵站居然見到“手語人”王維德個家姐, 即八十年代tvb o既舞蹈藝員, 後來轉o左去做戲o既王敏明 (最深刻o個套係o係“蓋世豪俠”裡面為o左段玉樓而一夜白髮o個個角色…仲要一日到晚都著住件紅袍…好鬼恐怖o架!) 同埋佢老公 (都係做藝員o既, 叫歐偉麟…因為早前執舊雜誌時見到佢兩個幅相先知佢叫咩名, 不過真係醒唔起佢拍過咩戲!)…
(一本1989年舊雜誌裡面o既一幅相…王敏明+歐偉麟! o個時佢o地只係情侶…)
講番個“翻轉勁歌廿五年”節目…最尾回顧d人o既得獎宣言…發現你要得獎, 真係一定要諗定d佳句…好似許志安o既“廚房宣言”, 同埋李克勤o既“我要多謝我老婆”! 一定要能夠引起話題, tvb先會頒獎俾你!
睇完呢個節目, 真係搞到我想即刻拿番晒咁多年o既舊錄影帶同埋vcd出o黎睇…其實年年都有睇勁歌總選, 唯獨係90年 (即樂壇改朝換代之年…華仔同sally第一年拿男女歌手獎o個年) 唔知點解無錄到囉?! 唔知呢一年有無出番vcd呢?
哈哈…呢段係我好鍾意睇o既片段…梅姐+草蜢仔“愛將@86勁歌總選”:
posted by 芒姐 at 9:05 下午
9 Comments:
我都係鐘意直髮多d, 記得之前電左4個月攣髮之後終於拉直番,我同身邊d朋友講,"真係自信心都番晒黎!" 行街都敢抬起頭望人啊! :P
hello，又係我呀，好耐無上過黎傾幾句，遲就遲d，不過都祝芒姐你日日happy。勁歌果個節目，我都有睇喎，構思唔錯，但d片又確係新左d，而且時間又短，如果可以將每一年的頒獎(當然係80年代啦)重播，我估都會有收視。
講開又講，果晚哥哥同阿梅段片真係最正，嘩，你睇哥哥一舉手一投足，而家邊有人做到?連我阿媽都話，呢d 至係唱歌架嘛。
我也喜歡阿梅和哥哥的片段呢！這些就是巨星風采了。
我在想那時沒有無線咪，他們拿著咪唱快歌效果都一樣好！
呂方和梁榮忠沒有甚麼火花，上年林敏驄和另一個主持做得好一點。
Salute to our unrivalled supertars Leslie and Anita!
我d朋友成日叫我電攣髮，不過我一直嫌麻煩，因爲我係一個好拖拉成日都遲到o既人，所以好驚攣髮阻住我d時間。所以o甘多年都係直髮。有時起身用梳梳幾下就搞掂，幾方便！
Ling,
曲髮真係超麻煩, 以我呢d咁懶同埋返親工都係last minute o既人, 更加唔o岩曲髮!
Chong Hoi&匿名,
哥哥同梅姐的確係無人可以代替o既!
舊年同林敏驄一齊主持好似係林曉峰...阿lo就普通啦, 林敏驄反而幾搞笑!
敏兒,
我都祝你2007年開開心心呀!
其實勁歌o個d回顧節目, 反正都唔洗咩製作成本, 但又好睇過依家d節目...應該做多幾集啦!
金姐,
我都覺得重拾番自我...依家照鏡都可以同自己講番句: long time no see!
發佈留言
<< Home