7-1(sun) 回歸十年
回歸十年, 睇o左十萬個回顧節目…聽o左二十萬次“感謝你…小天地…”, 依家佢個旋律已經不停咁o係我腦海度重覆出現…尤其係呢兩句, 同埋飛燕姐姐+華倫哥哥把聲…好攞膽, 但又好好笑! 連今日經過尖沙嘴新世界+星光大道…入廁所都係不停播呢首歌…救命!
人人都寫回歸十年, 我呢個咁鍾意回顧o既人, 當然都要寫埋一份! 由細細個已經好鍾意回顧過去, 展望將來 (呢part其實少d)…十一/二歲己經學人回顧四年前/五年前o既呢個月我做緊d咩…係一個超老積o既小朋友! 回望呢十年…最大o既感覺當然係: 呢十年, 實在過得太太太快喇!
十年前o既今日, 係香港回歸祖國o既大日子…
十年前o既回歸前夕, 落好大雨, 仲一落就落o左n日…十年後o既回歸十年前夕, 依然落大雨, 不過程度上同十年前差好遠!
十年前o既回歸前夕, 我全日“捕”o係電視機前, 通宵係咁睇+錄晒所有慶回歸o既時事+娛樂節目 (連解放軍通宵進駐香港我都睇埋), 十年後o既今日…我依然有通宵咁坐o係電視機前睇+錄晒所有慶回歸o既時事+娛樂節目, 不過係一邊上緊網, 同埋睇完之後已經洗晒佢!
十年前o既回歸前夕, 我去配o左人生第一副con, 無咩特別原因, 只係因為o個日放假…十年後o既回歸前夕, 我戴con戴到隻眼成日都有d痛…我諗係時候要停止戴con, 或者考慮做laser!
十年前o既今日, 我踏正十二點, 見證住呢個歷史性時刻…睇住英國米字旗隨隨落下, 中國五星旗隨隨升起, 最深刻o個幕當然係肥彭伉儷同佢三個靚女, 加埋同樣落幕o既查理斯皇子, o係史無前例咁滂沱o既大雨下, 喊住咁登上隻船, 令畫面更淒涼…o個時好多香港人都認為, 個天都為我o地放聲大哭…大年後o既今日, 同樣大雨, 肥彭同樣愛吃蛋撻, 佢三個女已經差唔多結晒婚, 仲多o左三個孫…而香港人, 依然打不死! 不過我到依家都唔明, 點解佢o地要搭船 (我知, 因為有代表性呀嘛…英國人當年都係搭船o黎中國, 同埋佢o地o既navy係最強)…但係咁搭法咪搭幾日都未到? 同埋, 咁大風大雨, 我覺得無論架船幾大, 都會暈船浪囉…好彩我唔係佢個女! 哈!
十年前, donald曾係財政司司長…十年後, 佢已經躍升為特區行政長官…睇番十年前後o既片段, 發覺佢老o左好多, 不過普通話依舊爛, 但已經好o左少少…至少好過吳唱k!
十年前, 我好鍾意夜一夜都唔瞓, 深宵o係度煲帶…十年後o既今日, 我依然鍾意夜一夜都唔瞓, 深宵o係度煲帶, 享受深宵o既寧靜…可惜, 機會已經無以前咁多, 同埋身體已經大不如前, 唔夠瞓又會見暈…想唔認老都唔得! 又或者係因為十年前種落o既因, 變成今日o既果! 年青人…都係早d瞓吧啦…千祈唔好學我!
十年前, 我係一個中學生…十年後o既今日, 我已經大學畢業再出o左o黎社會做o左幾年o野, 不過又唔見得有咩建樹, 依然係無無聊聊, 八八卦卦咁o係度發o下o翕風…哈哈! 我甚至覺得, 中學年代o既我, 比起依家更加有為!
十年前o既我, 讀緊F.6, 適逢學校70周年, 好多events, 好多o野玩, 全年齋搞活動, 好開心, 好好玩…十年後o既今日, 學校已經80周年, 下個禮拜仲o係會展搞o左個晚會, 但係我o地o既身份, 已經由學生變成alumni“嬸嬸”喇! 記得回歸o個排本來有好多post-exam activities, 但係因為落o左一連n日o既超級大雨, 好多活動都要取消…本來搞o左個三日兩夜o既camp, 都要變成兩日一夜…記得有一晚睇緊o個時好鍾意睇o既獎門人, 點知屋企電話不停咁響 (因為十年前未興手提電話, 我o既第一部手提, 都係98年入大學先買), d低年級同學不停咁打o黎問我個camp點…終於, o個集我好想睇o既獎門人, 睇o左一半都無…!
而十年前o既o個集獎門人, 我記得有出o左道幾年o既孫耀威, 同埋新人楊千嬅…十年後o既今日, 後者已經貴為天后, 反而前者要再做過“新人”, 再次o係d細show度同d真正o既新人一齊唱雞尾歌! 不過聽聞佢唱片公司話會力捧佢做新一哥…成唔成功我唔知, 不過佢d舊歌真係幾好聽!
十年前, 商台o係添馬艦搞o左一個“天馬行空音樂會” …當時一連幾日o係電視度都有播番d精華片段, 當時我覺得呢個音樂會都幾精彩, 好後悔無去到…十年後o既今日, 同樣地o係添馬艦舉行o左個“香港明天會更好慶回歸十周年同一首歌演唱會”…又係有楊千嬅, 不過佢已經唔再係新人…o個時因為佢一首“再見二丁目”, 令我好留意佢, 華星年代o既佢, d歌真係揀得好好, 全部都好好聽 (sammi, 安仔, 梁炳情況一樣)…其實佢o係o個個“同一首歌”show度應該唱番十年前隻大hit作品“再見二丁目”, 咁先有意思o架嘛! 十年前回歸o個排o既hit歌…我記得o既包括再見二丁目, 歡樂今宵, 好朋友, 我們的主題曲,難兄難弟, 愛的呼喚, 我有我天地, 仲有…問題天天都多bilibalabilibala, 不驚會跌倒…
十年, 的確係值得慶祝o既…慶回歸o既節目都有十幾二十個…oh, let’s celebrate!
睇番d十年回顧片段…咁就十年, 真係好似尋日o既事咁…諗番起呢十年o既變化, 真係不得不慨嘆時光飛逝, 歲月摧人…哈哈! 十年前o既我, 又點會諗到十年後o既我會變成咁咁o既呢 (咁即係點呢?!) um…都係唔好講太多, 係時候拿番十年前錄起o既回歸錄影帶出o黎睇o下…回望過去, 展望將來嘛…!
posted by 芒姐 at 3:33 上午
26 Comments:
你係咪讀跑馬地一間有d "隔zip" 0既女校啊? 因為你講開校慶同會展party，同我學校係一樣架...我都畢左業好耐喇
搭船走的確係英國人嘅practice, 其實香港嘅英籍政府高官退休回鄉都係搭郵輪走, 仲要係最貴fare果隻, 但當然係由香港政府俾錢.
其實回歸真係咁值得慶祝咩? 我唔想談政治, 只知道呢十年黎香港晌各方面都比港英時代差, 除左經濟蕭條, 治安亦差左好多, 人人都話自由神救左香港, 係咩? 真係一擲千金嘅到底有幾多? 我只知自從有左自由神之後, 街上/公園內嘅坑渠蓋都俾會人偷, 越來越多北姑, 越來越多人搭車唔排隊, 越來越多人晌地鐵食野, 越來越多冇禮貌嘅人鍾意裝人"gum"錢, 不停有人晌迪士尼裡面做盡一切失禮人嘅野, 港產片越來越冇香港特色, 越來越多人自我審查同忽然愛國, 乜野都話係中央送大禮(佢晌香港發行債券只係為左益香港咩? 佢冇著數架咩?), 一切都要越來越就大陸市場, 香港社會變得越來越單一化, 香港越來越失去以往"east meet west"嘅特色, 所有富歷史意義嘅建築物都要拆晒佢先安樂, 取而代之嘅係D一味得個高字嘅建築物, 最終搞到內陸地區完全不透風, 乜都話要融合, 我真係唔知道普通法可以點樣同大陸法融合囉!
我覺得香港人晌慶祝之餘, 真係要好好思索以後嘅路要點樣走.
仲有, 如果唔係大陸, 我好相信當年sars唔會搞到咁一發不可收拾, 香港唔會死咁多人, 剩係識講佢點樣關顧香港, 點解唔提下, 當日第一個惹D病毒黎嘅係邊個? 隱沒疫情嘅又係邊個?
我都回歸喇, 芒姐!
十年前我仍然青春, 十年後o既今天就已經垂垂老矣, 身體機能真係比十年前差左好多呀陰公!
十年前好少會好唔開心, 十年後唔開心o既事好似愈來愈多。
十年前好多長輩仍健在, 十年後, 長輩們去o下又一個, 去o下又一個...
其實我都覺得冇咩值得慶祝, 因為睇到回歸/兩地融合背後其實有好大隱憂, 我普通話太差, 自問亦接受唔到內地人o個一套思維同處事方式, 真係好驚有朝一日要被迫返大陸做野!
飛燕姐姐把聲確實初初令我毛管豎起晒,高音到佢丫
但我幾鍾意聽飛燕姐姐同華倫哥哥果幾句。
http://bbs.ent.163.com/tvb/290049,0,50,0,40,3.html
剛剛看到貽興黃新節目的promo，看完以後還不知道新節目的内容是什麽，好像是關於公民教育，但是節目名稱要好像不是。 我覺得是時候to get rid of “最緊要..." 系列。另外好像每一天的電視節目都看見貽興黃，連煙花節目都有他份，真的令人太煩厭拉。
阿moo, 宜家興"貽興"呀嗎, 無線係唔會"get rid of" “最緊要..." 系列, 因為除左"最緊要進步"外, 遲d會有第二輯"最緊要正字", 呢期無線真係"最緊要貽興"呀...
回歸十年對於某d人0黎講真係值得慶祝既, 曾蔭權話香港而家係十年0黎最好既時候(好明顯講緊佢自已), 呢句話我相信亦係"貽興王"既心聲呀!
容許我叫你一聲師姐！
記得嗎？我早懷疑你的身份了。
(其實我心中已有定論)
不過，我會尊重你不公開的私隱權。
懂得中文(而以此「謀生」)的舊生/學生真不多，難得有同道中人。
繼續努力，共勉之。
我都覺得香港衰過十年前!
可能blog主尚屬年輕一批, 所以會覺得回歸係一件美事。大你幾年果一代嘅人, 大部分都將回歸一事睇得好負面, 好少聽到有人話值得慶祝。
原來A小姐係佢
http://ent.163.com/07/0629/
08/3I52PHEN00031H2L.html
證明蔡淇俊份人都好...
哎呀芒姐, 我睇緊阿貽興王既最緊要進步。好鬼搞笑, 佢做主持真係一d都唔掂。成個氣氛好似小學常識問答比賽咁。佢好似樣衰過以前咁,不過好多人都係岩岩入行就好睇,慢慢又係衰。
Esaltato,估唔到你仲快過我,直頭講中我ge意見,初初貽興王主持正字,都尚可接受,但煙花已經唔得,今次仲要係遊戲節目,真係格格不入,似足常識問答比賽,同埋佢把鼻塞聲(以前都唔太覺,而家聽得多,好覺),幾難頂下,無綫仲要力捧佢,唉~
Esaltato&小月,
哈哈...我都有睇o個個節目, 真係好似校際常識問題比賽, 但係o個d比賽都緊湊d, 呢個節目真係唔知想點...勁無聊! 無線咁樣捧佢法, 擺明係想玩佢多d!
re "a小姐":
前幾日見無啦啦有好多人search"a小姐"而入o左o黎, 都覺得好奇怪, 因為呢個topic係上年9月o架啦...原來有人post左段片上網, 真係無陰公! 女仔人家, 俾個"六折"玩死...d咁o既男友, 真係要拉去打"粑"!
alana wong & angel,
哈哈...其實我知道o係網上都有好多人知道我o既身份o既, 但我唔會o係呢度明確咁公開o架喇, "寧俾人知, 莫俾人見"嘛...多謝你o地幫我保留一點私隱! 有咩"私人"一點o既問題, 可以email我...呢度我會答你o既...
nice to meet u2!
芒
又盈又樂 & 匿名,
re: 回歸值得慶祝嗎?
其實回歸值得慶祝真係好見仁見致...我都認同, 全部殖民地成長o既一群, 包括我本人, 都會懷念被英國統治的年代...依家o既香港, 可能真係衰過十年前...政治, 我就一定唔會o係呢度講, 不過咁, 即使你好唔鍾意一個人, 佢生日本身都可以係一件值得慶祝o既事...當然你可以唔去同佢慶o既...但生日本身, 仲要係十年, 點都係一件值得慶祝o既事嘛...當然, 每人都可以有自己o既意見, 我亦都絕對尊重!
al佛,
哈哈...好中呀! 你呢句"最緊要貽興"好得呀...可以借來一用嗎? credits to you of course!
Moo,
我都覺得係時候get rid of“最緊要"系列...好心tvb就"見好就收"啦...佢做"煙花"真係尤其唔得, 懶funny又係咁拋書包...攞命!
jj,
唔該晒!
ling & 匿名,
我都好鍾意飛燕姐姐同華倫哥哥o個句...呢隻歌真係多得佢o地先咁hit!
喂! Sandy...好久不見! 你好嗎?
最認同係"十年前好少會好唔開心, 十年後唔開心o既事好似愈來愈多。"
我都特登走去上o左幾堂普通話...可惜依然爛呀!
芒姐,
哈哈, 當然冇問題啦, 我感到好榮幸添!
al佛,
多謝你的慷慨, 我就借來一用o架啦...
芒
發佈留言
<< Home