12-18(thurs) 是緣是債是場夢…
今日下晝o既 “即時新聞”, 成為o左大家o係office/fb/sms廣泛談論o既話題…今次真係名副其實o既"是緣是債是場夢…夢迴夢醒都心痛…"喇!
Ok呀, 我幾鍾意佢兩個台戲, 事關亂咁o黎, 完全估佢o地唔到…仲亂過“珠光寶氣”!
[Yahoo即時新聞] 倪震宣布與周慧敏申請結婚
http://hk.news.yahoo.com/article/081218/4/9su2.html
早前被傳媒揭發在酒吧「偷食」的倪震 今日突然發表聲明，宣布已跟周慧敏 申請註冊結婚。
倪震的聲明全文：
「動搖過，才懂得堅定；失去過，才學會珍惜。一場風波，令我們更了解互相的愛；四方壓力，使我們更體會到彼此的不可分割。試煉，成就了信心。慧敏答應嫁給我了，我們已申請註冊結婚。祝福我們吧。」
倪震在蘭桂芳夜店醉酒與辣妹激吻的照片曝光，之後倪震曾發表聲明，表示自己今次錯誤是結構上出現了明顯的中年危機，不排除會尋求專業輔助。他又自稱不是個稱職的男朋友，宣布與周慧敏分手。
佢o地"兩個人之間堅貞o既愛情", 我o地無意批判, 亦都唔關我o地事...正如之前呢度有朋友講, 佢要死唔通你唔俾佢死咩? 同埋你情我願, 一個願打一個願挨…咩都好, 總之就“功德無量”…為全港市民o係過去o既一個禮拜製造o左大量話題, 風頭蓋過佢舊愛嘉欣同亨亨, 仲有佢舊愛o既舊愛大劉/甘比/麗君暨福臨門…勁! 大家有興趣討論o既, 係佢o地今次o既手法同埋手段!
Quoting facebook有朋友打趣道: “d橋段勁過衛斯理，我地懷疑戲軌係由倪匡負責，如果有頒獎，最佳男、女主角、最佳編劇、最佳導演、最佳影片，都由佢地囊括。"…講中晒我心聲…唔怪得知倪匡早前都要參與埋一份, 冷笑兩o下話: "分手都要發聲明? 註冊就話發聲明o者!"oh...原來係埋下伏筆...佢o地真係高招, 高招! 真係唔夠你o黎!
又或者真係係夾計宣傳演唱會…咁之前d人話玉女俾人落o左降頭嘛, 佢開演唱會時可能會有一個環節係搵師傅幫佢解降...再立即唱番首"是緣是債是埸夢, 夢迴夢醒都心痛…"…然後再接埋落自己首“孤單的心痛”度…嘩, perfect! rundown都諗好晒! 成件事都舖排得好好…為大眾帶來無限歡樂…多謝晒!
跟住“偽才子”前兩日接受訪問又聲淚俱下, 又扮道歉…睇完之後, 我真係粗鄙d都要講句…收皮啦!
咁依家幾好呀, 大受宣傳之效, 所有傳媒俾佢玩晒, 做o左幫佢免費宣傳o既功具…真係高招!
posted by 芒姐 at 10:48 下午
18 Comments:
無所謂啦！一個願打一個願挨，呢個結局都幾好啊（我講真架）！就算男方點賤女方都願意一再忍讓和包容，如此相愛，打風都打唔甩，咁就不如唔好分開啦！外人都無謂用道德標準衡量對錯喇！正所謂："汝非鱼，安知鱼之乐"呢！人地覺得幸福，鍾意點咪點囉！不過最唔開心一定係嘉欣，因爲風頭完全俾人蓋過！如果唔係佢仲有排上頭條架嘛！
你以為大劉夾埋呂麗君同甘比做show勁啦, 點知原來倪周場戲仲精彩, 真係峰迴路轉到你唔信, 個個都交足戲, 情節豐富過倪匡同亦舒d小說, 仲有倪生, 嘩, 七情上面聲淚俱下, 演技縱然好唔得過夏雨都拍得住林峰, tvb可以考慮簽佢(話時話, 呢樣野可能亦都0係倪生計算之內), 入戲劇組又得, 做司儀/主持同陳總拍擋亦得, 幾有potential呀, 有potential過祖藍多多聲啦!
倪匡果然寶刀未老, 佢果句伏筆真係埋得妙, 果然係行家一出手, 便知有沒有! 才子真係唔係浪得虛名, 貽興王果d, 有排學呀!
其實我懷疑有外國電視台同佢地一干人等簽左約, 佢地其實係拍緊reality tv, 結果全香港人連傳媒都免費幫佢地做晒茄哩啡; 又或者, 呢個其實係某大學journalism/社會學/psychology學者邀請佢地一齊做實驗, 目的係要做研究, 而全香港人就係咁集體做左research subjects, 哈哈, 咩野survey呀focus group呀都慳番, 勁呀!
我地都係唔好講太多, 唔係人地又話我地呢d外人總愛把自己的一套價值觀去評價、批判屬於佢倆之間的愛情架喇。
我估李小姐應該度緊另一條戲軌，最大可能係有咗。
唔知大家有無發覺d 野:
劉生的另一半陳小姐，由開始都無發表過任何一個字，只是行動配合。
李小姐的另一半許生，都係無講何野，用行動配合。
倪生就更勁，佢另一半周小姐由始至終無露面過，由倪生一個人演出。
呢三個人又有關連，真係「如有雷同，實屬不幸」。
還有阿miffty(btw, what a funny name!)小妹妹, 查實佢不過都係casting緊, 大家都係唔好怪佢喇, 21歲女要同個絲縮大叔濕吻咁陰公, 佢都犧牲好大架!
呢度d評論講中晒我心聲，勁
李小姐,劉生,倪生
仲有今年都分別結咗婚嘅劉生舊愛"菜funfun",同亨亨舊愛劉+0.
今年娛樂圈佢哋玩晒!
溫哥華匿名人
哈哈哈呢度D留言好正
因乜pair pair couple看似係獨立既個體但其實呢個新娘同果個新郎有（過）關係，果個又同呢個有「啦lung」...講講下真係重亂過珠光寶氣ｄ劇情，咁其實劇中兩姊妹嫁兩父子都好小事姐XD
多謝哂，繼「引咎分手」聲明後又學到新野。
突然好期待佢地結婚呢唔知到時會有咩新野呢？嘩，會唔會有人同佢爭C1架？！？！
P.S.：芒姐!!! 我買左果本雜誌囉!! 睇才子聲淚俱下段訪問時都噢哂咀架喇，而家結婚聲明出左再望返本雜誌封面真係由個心miu出黎囉 -_-"
原來, 事隔咁多年, 兩個男人仍然咁放唔低李嘉欣, 唔通真係"你最愛的，不一定是和你結婚和生活的那位。"?
倪老震專執"喇沙仔"舊鞋,佢絕不是李小姐first love,佢先後同三個'喇沙仔"拍過拖,先至識倪老震.而阿V前度Thomas Chan(Raidas)都係"喇沙仔",哈!哈!哈!
喇沙仔追女叻jeh, 況且, 喇沙同李小姐母校咁近, 近水樓台易追mah; 我又唔知陳德彰原來係喇沙仔, 不過佢一同周小姐一齊, 星運就立即下降, 劉錫明同黃凱芹一同周小姐扯上關係, 又係立即冇運行, 其實周小姐係咪真係咁人見人愛? 我覺得佢似tong豬dun多d lor, ha ha ha!
好少見到芒姐如此合合，大概如我蜜友所言︰「影衰晒女人」卦！
匿名８話周小姐係豬凳，又無咁嚴重！起碼陳君與劉君都尚在人間嘛！
若果真係宣傳演唱會既話，如此風頭火勢，都係唔開好過。
One of my blog visitors linked me to your site here.
>> 跟住“偽才子”前兩日接受訪問又聲淚俱下, 又扮道歉…
I totally agree he should get an Oscar !!!
Haricot
(Canada)
學荷媽話齋, 真係成個集團咁!
以旁觀者角度
其實我覺得周玉女真係唔值得同呀偽生結婚
距咁做真係蠢過隻豬
一個男人要滾
無論單身巳婚失婚都會走去滾
結左婚唔代表呀偽生會洗心革面
但如果以當事人角度去睇
偽生真係值得原諒
畢竟都一齊20年
愛情可能一早無哂
但係會有感情同親情
就正如無論你點錯都好
屋企人都會原諒你
其實我希望周玉女快快樂樂
因為年少時我曾經係距FANS....
離題的：
芒姐聖誕快樂！！
多Ｄupdate俾我討論電視娛圈野！:)
christy,
聖誕快樂呀! 好呀好呀, 我會盡O架啦...
i-Joel,
哈哈...其實我又唔係好""O既, 只係覺得成件事去到一個太騎呢同埋過份峰迴路轉O既地步...O晒嘴O者!
係啦...今次大家D留言都好正...笑死我! 果然係睇慣娛樂新聞...
睇睇O下呢期D娛聞個軸心係李小姐...真係估唔到佢吸引力大成咁...令到兩個男人癲晒...一齊為佢結婚整幾台大龍鳳!
發佈留言
<< Home