2008年11月14日星期五

11-14(fri) 萬千星輝頒獎典禮2008

原來聽日已經係一年一度o既“台慶頒獎禮”大日子…等我仲買o左飛睇cinderella, 唔可以即時知道賽果添…但大家記住千萬唔好sms我, 我想返屋企先成個頒獎禮由頭睇到尾, 多謝合作!

呢排日日都有好多朋友/同事問我邊個會攞視帝…我又唔係六叔, 又唔係大師, 又唔係樂小姐…我係唔會知o架, baby!

至於估o下賽果, 好啦, 慣例點都要估o下o既, 但係你問我係咪真係好關心…其實又真係無以前咁肉緊囉…雖然今年台慶大日子有朋友約我唱k, 我記起當日係19號, 都叫佢改一改期…事關作為一個電視精, 第二日返工人o地同你傾起台慶, 而你居然話未睇…又係失禮o左o架嘛…wahaha!

不過其實每年都講, 呢d電視或者樂壇頒獎禮, 從來都係一場遊戲一場show, 以前係, 依家更加係…仲要係得好明顯, 要配合好多天時地利人和o既因素, 所以大家唔洗睇得咁認真, 更加唔需要轉貼或者為此展開罵戰…反正每個人都有唔同喜愛! 總之希望今年tvb搞得個show好睇d, 可以好似前兩個禮拜“翡翠歌星賀台慶”咁有驚喜就好喇…!

講芒姐賽果預測前, 轉貼一段訪問先…o係台慶前夕咁o岩睇到黎耀祥呢篇訪問…好認同, 簡直係至理名言, 事實個遊戲真係咁玩o架嘛…祥仔成日都好中point, 上次話關菊英鬧人鬧到好似唱歌咁好聽, 又係佢講…真係好有見地…

“雖 然 被 一 致 睇 好 , 但 問 到 祥 仔 攞 獎 信 心 多 大 時 , 他 竟 說 : 「 現 實 o黎 講 , 信 心 係 冇 o既, 因 為 現 實 係 現 實 , 觀 眾 票 數 係 一 個 原 因 、 評 審 委 員 會 係 一 個 原 因 , 甚 至 公 司 大 氣 候 都 係 一 個 原 因 , 即 係 要 睇 公 司 行 緊 乜 o野 制 度 同 乜 策 略 。 好 記 得 有 年 美 國 奧 斯 卡 頒 獎 禮 , 影 帝 同 影 后 畀 晒 黑 人 攞( 編 按 : 在 02 年 舉 行 的 第 74 屆 奧 斯 卡 頒 獎 禮 , 兩 位 黑 人 演 員 丹 素 華 盛 頓 及 荷 爾 芭 莉 榮 封 帝 后 ) , 邊 度 有 咁 蹺 ? 大 到 美 國 電 影 工 業 都 要 顧 慮 政 治 因 素 啦 ! 大 家 成 日 鬧 TVB , 其 實 對 TVB 唔 係 好 公 道 , 個 遊 戲 係 咁 玩 , 要 睇 o下 乜 o野 時 候 吹 乜 o野 風 , 如 果 吹 民 主 風 , TVB 咪 唔 敢 有 違 群 眾 意 願 。

「 等 於 98 年 o個 屆 香 港 電 影 金 像 獎 ( 即 第 17 屆 ) o既 最 佳 電 影 、 最 佳 導 演 同 最 佳 新 演 員 都 畀 陳 果 o既《 香 港 製 造 》 攞 晒 , 但 係 咪 好 到 咁 緊 要 ? 當 年 杜 琪 峯 o既《 十 萬 火 急 》 拍 得 好 好 , 我 好 睇 好 , 點 解 畀 晒 陳 果 ? 因 為 當 時 電 影 市 道 太 低 沉 , 想 鼓 勵 多 o的 新 創 作 , 呢 個 就 係 我 所 講 o既 大 氣 候 。 不 過 , 雖 然 我 咁 講 , 但 都 希 望攞 獎 o既。 」”


其實今年確實有d咩候選名單我都未搞清楚…要到呢一刻寫呢篇o野先第一次睇清楚…詳情請click入:
萬千星輝頒獎典禮2008全民投票

最佳男主角&我最喜愛的電視男角色:

我諗都唔洗我預測啦…據官方同非官方統計, 如無意外今年視帝都應該係夏雨…正如我上年講過, 娛樂圈點都要講資排輩, 舊年tvb為o左搞gimmick俾陳豪起孖, 已經累佢俾人鬧唔少喇…如果今年夏雨再次攞唔到, 我驚d討論區會爆炸…夏雨攞最佳, 林峰攞最喜愛…呢個安排應該最皆大歡喜同埋滿足到各大fans所需…除非tvb今年又想玩o野…:p

p.s. 但齋論演技唔計算其他因素, 問心今年我覺得郭晉安“與敵同行”做得最好 (但呢個角色居然無份候選…你話選舉呢d o野幾咁得意呢!)!

最佳女主角&我最喜愛的電視女角色:

米雪關菊英是但一個走唔甩喇o卦?!

我知我咁樣講o左等於無講…如果你問我, 個人我會喜愛莎姨的演繹多d, 但米雪又的確好大突破…同埋菊姐舊年攞過最喜愛, 今年俾佢o黎一個冧庄咪又係gimmick囉…既然係咁…我估米雪攞最佳, 關菊英冧庄我最喜愛啦…

最佳男配角:

唔洗講…應該係黎耀祥啦o卦? 再攞唔到應該會引起公憤!

雖然, 我個人都好buy武紀勇同埋公公周聰, 仲有梁烈唯都做得幾好! 如果飛躍男唔係有王祖藍, 我可能會選梁烈唯添!

飛躍進步男藝員:

上年我估王祖藍, 今年我依然撐佢…無論係個人心水定係實至名歸, 都應該係佢喇o卦…理由就上年同埋呢一年裡面成日都講, 唔再重覆喇!

p.s. 我特登走去睇番上年個賽果 (因為已經唔記得o左…可見呢d頒獎禮有幾咁大影響力…:p), 原來舊年係崔建邦攞飛躍男…真係唔講唔記得, 講o左都唔會記得!

最佳女配角:

都應該係楊怡啦o卦? 同埋都係無論個人心水定係實至名歸, 我諗今年都應該係佢…

雖然我個人唔係太buy阿法拉, 不過佢今次o係“家好”又真係做得幾好, 睇得出佢擺o左好多心機!

飛躍進步女藝員:

個勢講到好似楊怡會起雙飛…咁我覺得都唔出奇…既然佢其實已經上o左一線半, 無綫都要安排佢候選呢個獎, 仲要明明佢03年已經得過獎, 無綫仍然要塞佢入呢個category, 咁即係呢個獎無咩準則可言, 又唔係話要俾新人或者入行少於唔知幾多年又或者至少係未攞過呢個獎o既藝員…咁安排楊怡起雙飛絕對無問題, 而演技o黎講佢又的確高其他候選者幾班…同埋基於前年阿佘起孖, 舊年陳豪起孖, 我相信今年製造另一個起孖話題都好配合無綫個flow…仲要楊怡觀眾緣好, 尤其係網上的“網友緣”更好, 佢攞獎應該無咩人會鬧o卦…?!

如果唔係佢攞, 第二個應該係胡定欣啦…鼓勵o下新人(relatively)都好o既!

最佳節目主持:

應該都係“獎門人”…不過十年o黎佢都攞到悶! 如果唔係可以俾“亮相”o既阿葛呀我覺得!

最佳劇集:

我諗唔洗估喇o卦?! “家好月圓”無走雞!

另外, “與敵同行”都拍得幾好!

最佳綜藝資訊節目:

其實我個人鍾意“光影流情”同埋“舞動奇跡2”…但我估可能又係“向世界出發”, 甚至係“一百萬人的故事”, 或者“東張西望”添…呵呵!

好啦…大家明天悉目以待! 係喎…點解今年忽然又無o左舊年o個d咩“最具創意節目”, “最佳宣傳片”, “內地觀眾最喜愛TVB男/女藝人”o個d獎呢?

最後, 又係歷年台慶回顧時間:

2007:

http://hejnom.blogspot.com/2007_11_17_archive.html


http://hejnom.blogspot.com/2007_11_19_archive.html


2006:

http://hejnom.blogspot.com/2006_11_09_archive.html


http://hejnom.blogspot.com/2006_11_13_archive.html


http://hejnom.blogspot.com/2006_11_19_archive.html


2005:

http://hejnom.blogspot.com/2005_11_19_archive.html


http://hejnom.blogspot.com/2005_11_20_archive.html


http://hejnom.blogspot.com/2005_11_21_archive.html


2004:

http://hejnom3.blogspot.com/2004_11_19_archive.html


http://hejnom3.blogspot.com/2004_11_23_archive.html


2003:

http://hejnom3.blogspot.com/2003_11_17_archive.html


http://hejnom3.blogspot.com/2003_11_19_archive.html


2002:

http://hejnom3.blogspot.com/2002_11_19_archive.html


http://hejnom3.blogspot.com/2002_11_20_archive.html

13 Comments:

Anonymous 匿名 said...

與敵同行至中意!!!對我來講絕對系今年bonus來噶~~~先前對呢套劇完全冇期待,咁估唔到鬼死咁精彩,咁of course中間都有些許拖沓,不過個整體tempo同feel都好正~~~

7:11 下午  
Anonymous 匿名 said...

嘩,你諗既同我既都差唔多

我又係勁想郭晉安憑與敵同行提名囉(其實我覺得與敵同行真係唔錯)
但,明啦,佢若憑呢個做提名,視帝之爭又多一勁敵啦喂~
我都好想黎耀祥拎呀!!不過套戲隔左咁耐,唔知觀眾都記唔記得佢呢(當住真係全民揀喇)
btw.
飛躍男雖然如無意外應該係祖藍,但個人幾想徐榮有個獎拎..佢畢打自己人既演出真係有少少suprise左我...(我以為佢真係永遠岩演裘俊呢d角色架咋;P)

希望今次呢個小圈子遊戲唔好真係太圈子啦
anyway
真係好開心秦沛拎萬千星輝演藝大獎呀!!! 本人真係幾鍾意&buy佢!! :D

12:36 上午  
Anonymous 匿名 said...

不過我支持林峰攞最年輕視帝喎!加油加油!

10:46 上午  
Anonymous 匿名 said...

總知林峰嬴就被人鬧,輸又會被人寸.一定.睇住

溫哥華匿名人

12:28 下午  
Anonymous 匿名 said...

溫哥華匿名人, 算把啦!

1:17 下午  
Anonymous 匿名 said...

總知林峰嬴就被人鬧,輸又會被人寸.一定.睇住

攞就係造馬,食飯爭獎,以約換獎
攞唔到就黑面,衰打機遲到
我幫記者朋友作埋稿都得!

:p

2:53 下午  
Anonymous 匿名 said...

芒姐個blog就快又變成林峰fans討論區.一定.睇住

:p

4:18 下午  
Anonymous 匿名 said...

咁我唔講林峰啦.純粹吹水.唔想芒姐個blog變戰場.
溫哥華匿名人

4:23 下午  
Blogger 芒姐 said...

賽果尚算合理...至少同大家估o既差唔多...可惜"與敵同行"一個獎都無, 連提名都唔多...呢d頒獎禮真係有"公信力"喇...:p

4:17 下午  
Anonymous 匿名 said...



我仲以為與敵同行算係下屆先至會有份選添.....我就係覺得冇理由郭晉安會冇份入圍格(憑與敵同行),反而有憑古靈精探入圍......

1:30 下午  
Blogger 芒姐 said...

茵,

我諗o個d候選名單其實一早set好晒...佢o地估唔到"與敵"出o黎效果咁好, tvb又後知後覺改都改唔切...搞到鄭嘉穎有份憑"與敵"候選反而郭晉安無...

6:48 下午  
Anonymous 匿名 said...

吾知芒姐认为边个男的跳的好呢??
舞王谢XX!!!企都企吾稳哦..
反跟斗又吾掂..可能年纪大左,话晒跳左十年八年..
本人觉得无论吴生做成点,总有人指指点点,呢样话吾好,个样话衰,仲无端俾人话的吾是事实的野,真系...无野讲..
讲真个句,他98年入行,00年转艺员,只系跳左两年咋,红左之后一直排戏,有几多时间跳舞,有时间都睡觉拉,真是...
换左系你,你会点?

3:11 下午  
Blogger 芒姐 said...

匿名,

男o既我就覺得無咩邊個跳得特別出色, 謝天華今次都麻麻...今次女藝員真係做得好好多!

um...換o左係我, 我會唔瞓都練好d囉...畢竟機會唔係次次有, 只要一次做得差, 可能以後都無機會...高層/觀眾etc唔會知道你背後的故事 (例如拍戲日夜顛倒, 十日無瞓過覺等), 只會睇到你演出的成績...因為佢o地會覺你無得瞓時, 其他人都無得瞓, 但其他人做到, 你無理由做唔到...這是殘酷的現實! 所以真係要珍惜每次演出機會...如果唔係, 好快就會被新人趕上!

4:02 下午  

發佈留言

<< Home