10-27(mon) 畢打自己人
呢套“同事三分親”o既姊妹作“畢打自己人”…雖然有我幾鍾意o既一班“舊同事”, 但係頭一個禮拜都係主打d新同事…何守信都ok o既, 毛舜筠就真係最吸引…幾抵死, 幾好笑, 同埋佢捉個節奏捉得幾好! 阿君麗姐未睇到…但係阿欣宜就真係十分有待改進! o係肥姐追悼會對於欣宜o既大方得體處理手法簡直刮目相看…尤其係對於一個只得20歲o既小朋友o黎講…佢待人接物真係做得好好, 即刻加晒分! 但加分還加分…佢做戲真係好over, 好似做舞台劇咁 (或更甚)…超級造作, 令到當年的“白雪公主”感覺又返埋o黎! 其實如果佢減少呢d造作會討好好多…又或者佢真係唔適合做電視劇, 做舞台劇唱唱跳跳先係開正佢o個辮, 反而做戲真係弱d! 希望佢之後可以減少浮誇啦!
不過o個d“丁蟹效應”呀, “秋官父女效應”呀又真係搵o野o黎講, 得啖笑! 今次全球股災, 又關佢o地咩事呢?!
“珠光寶氣”做o左7, 8集, 又係一貫大製作, 你話好睇我又真係唔覺…miss幾集再睇番都無咩損失! 感覺有d似上年o既特大製作“歲月風雲”, 但劇情o黎講呢套應該好少少o既…不過感覺類似…希望佢唔會好似“歲月”咁收視仆直啦! 始終都係“家好”/ “溏心”o個隻一家人鬥鬥氣鬧鬧交o岩師奶同埋一家大細睇多d!
上個星期連續好多日都有黎姿回顧, 唔知咩事真係以為佢咩o左添…睬! 睇番佢唱“白恤衫”, 又確係經典o既!
依家亞視朝早5點幾重播“情難再”…呢套劇好幾年前大學年代重播過, 仲拎過返去同同學一齊睇o左一集添…笑爆嘴!
睇番呢d廿幾年前o既劇真係另有一番情趣…仲要係見到麥翠嫻, 黃秋生, 楊得時佢o地做學生…幾搞鬼! 因為我我識佢o地時佢o地已經係做緊d 30過外o既滄桑角色, 所以睇見佢o地做學生都好特別...更搞鬼o既係佢o地仲要著住”IQ成熟時”套校服…亞視真係無論咩年代o既學生都著o個套校服o架喎!
posted by 芒姐 at 11:08 下午
10 Comments:
唔知係咪睇慣咗同事三分親, 所以, 覺得畢劇唔多順眼. 不過, 係幾好睇~
嘩! 亞視朝早5點幾重播情難再妳都知! 勁! 嗰陣黃秋生仲好 "薯"! XDDDDD
唔講都差d唔記得黎姿出過唱片，仲要個mv男主角系古巨基，真係好懷舊。。。
Monjeh:
著舊校服算好架啦！無記做《酒店風雲》之前箇廿幾年間，凡有酒店景，做侍應著既制服係1976年《狂潮》既剩餘物資黎架！
i-Joel,
咁懂得唔浪費資源都係一年好事o黎o既...不過"iq成熟時"o個條粉紅色寫住"sl"字樣的校裙又確實太經典...一睇到就諗起套戲!
匿名,
黎姿都應該出過多過一張唱片...92/93o個期好多電影女星全部走晒去做歌星, 無論唱得唔唱得都好...
梁巔巔,
哈哈...有日咁o岩見到o者...以前仲會特登錄起亞視5:30重播的劇, 因為通常都好好睇!
係啦, 同一班人做唔同角色, 仲未睇慣, 有d怪...畢竟"同事"都睇o左年半...唔知d角色配對係咪同上次一樣, 定係又要重新適應過呢?
《畢打》我最主要都係睇毛毛~
老實講,如果冇佢我真係未必睇...
今次阿珍姐真係冇搵錯人返黎^^
毛毛勁得啊!!
匿名,
咪係, 今次毛毛係最吸引o個個...好耐無睇過佢做電視, 印象中對上一次仲係小時候...好似真係讀緊小學...
芒姐,
其實我未睇過毛毛既電視劇..(我好後生架咋)
我只係睇過佢電影~
但我真係好欣賞佢既演技!!
雖然佢冇拎過影后,但相信係好多人心中佢早就已經係影后級人馬!!*v*
琪
琪,
咁你得閒要上網搵o下毛毛d舊電視劇睇喇...不過我覺得佢早年都無演得咁好...依家真係得, 好自然流露但又好抵死! 我睇佢o個時同查小欣+江欣燕主持節目口材同急材都好好...佢係有料到o既...
發佈留言
<< Home