10-21(tues) 珠光寶氣
嘩! “珠光寶氣”原來真係好勁o個隻…成82集, 做足4個月…分分鐘做到農曆新年, 都好似幾有氣勢咁…雖然, 呢d大製作都有唔少仆直的例子! 不過d演員我都ok, 戚其義o既既定班底大家都睇慣晒...“妙手2, 3”, “金枝”, “火舞”, “烟脂水粉”等…全部都係呢班人! 睇得多都有感情o既…不過我仲想講係佢同92年"龍的天空"同埋93年"天倫"都有好多重疊的cast…前者有李司棋, 黎姿同埋邵美琪, 後者有關禮傑, 蔡少芬同埋黎姿…好有15年前後對比的感覺!
尋晚睇o左“東張西望”個特輯…d主要演員上晒去, 見佢介紹有法國, 西藏, 泰國, 青島, 上海咁多外景...都幾吸引o下! 原來呢部係黎姿最後一部電視劇咩? 點解會咁? 雖然話要幫佢細佬打理生意, 但真係咁決絕以後唔拍劇?!
劇情未睇, 只係臨尾larp o左15分鐘, 所以唔講住…不過首主題曲幾型, 我幾鍾意…好配合呢套劇個感覺, 關淑怡都唱到o個種幾grand o既feel出o黎…相反鍾嘉欣首插曲真係完全唔得, 我聽o左少少都聽唔出係邊個唱, 只係覺得完全唱唔出o個種味道, 到上字幕先知原來係于素秋…!
(珠光寶氣主題曲…幾型!)
至於“與敵同行”, 結局晚o係酒樓larp o左少許, 其他劇情就只係睇到第三個禮拜, 又係慢人十拍…不過其實都睇得幾辛苦, 因為個劇情都幾慘o下…戥鄭嘉穎好無奈, 想揭發郭晉安又揭o左十幾集都未揭到! 其實套劇個名真係改得幾好, 名副其實與敵同行…戥個主角好難受囉!
上個禮拜lunch time o係中環見到蒙嘉慧…喂! 原來佢真人真係幾好樣喎, at least好過上鏡好多囉我覺得! 唔係太老仲幾sharp添…真係估唔到!
禮拜六6點鐘唔覺意睇到電視, 居然見到有“真人版小丸子”電視劇, 又幾得意喎…尤其係我一向都幾鍾意睇小丸子!
仲有, 我想問袁彩雲究竟係邊台o既呢? 點解台台都見到佢? 無綫“與敵同行”又有佢, 亞視奧運又有佢, 連有線宣傳片都見到佢…?!
posted by 芒姐 at 11:16 下午
13 Comments:
睇咗四集「珠光寶氣」，三位女主角，暫時未能有評語，不過有一點想講，就是司棋姐做果個勢利阿媽，做得唔錯喎。起碼唔會令我諗起「家好月圓」既荷媽先。
gigi退出，都確係幾可惜，我覺得佢做戲都唔錯的，最緊要係對屋企有情嘛，我buy佢呀。
我反而勁鍾意鍾嘉欣首插曲
呢首歌比佢隻大碟入面D個好好多
同埋佢絕對唱到個feel出黎
係中間好多字o個度怪左少少
不過整體黎講佢唱得好好
(可能之後黎姿講野踏住左, 影響左個feel)
主題曲都唔錯
關淑怡一貫水準
不過個MV真係令人頭暈
我都想知點解袁彩雲可以跳來跳去.....
..迷思..
芒姐, 我見到鄧梓峰頂機師帽寫住 solar, 係衝上雲霄的剩餘物資.
你講開天倫,星期六晚深夜睇到個節目,好似叫極度凶靈,有邵仲衡,幾有型!記得天倫佢同郭藹明一對。唔知邵仲衡會唔會拍返劇呢!
我覺得司棋姐做d勢利阿媽好有新鮮感，不過佢突然加幾句"上海話"就好得人驚。
其實我唔識上海話，所以初時都覺得佢都好似模似樣。但後來愈聽愈懷疑，覺得佢好似將d普通話歪歪地就算，如"shao mei"(小妹)，或者讀成句廣東話句子，但零零舍舍把最尾個"你"字讀成"ni"（xxxxxxx ni")。
於是我問左個識上海話既朋友，佢話司棋姐d上海話冇個音岩，有d似自己作出來。於是我好失望，因為套戲咁大製作，但呢d細節位竟然唔做得好少少。
不過我想補充一句，司棋姐做呢個勢利阿媽好好睇好吸引，型過荷媽好多。荷媽真係太道理王喇。
紙巾,
司棋姐呢個勢利阿媽角色又的確係寫實過o個完美人版道理王荷媽角色o既...
oh, 我仲以為d上海話係搵expert教過度過添...原來亂咁o黎o架...
匿名,
邵仲衡舊年有提過, 佢舊年都有忽然出現o係亞視部完全無人睇o既青春劇"激流青春"做類似阿sir的角色...
myblahblahblah.
oh yes...crossover!!! wahahahahaha!
b.,
咪係...真係台台都見到佢!
匿名,
個人認為鍾嘉欣o既唱功真係十分有待改善...希望佢今次o既演出可以好過"家好"啦...
敏兒,
呢套戲暫時未係好可以令我有衝動每日追, 或者睇落去會好d o既...反正有成80幾集...睇到過年!
發佈留言
<< Home