2008年11月5日星期三

11-5(wed) 係咪小兒科

無咩特別…只係想講o下前日於工時間有朋友仔call我, 話我知見到置地廣場有一班fans舉住“峰”字牌…叫我落去睇o下, 話可能會見到林峰! 於是我就即刻衝落罝地噴水池位睇o下啦, 果然見到有function搞緊…無幾耐仲真係見到林峰出現, 跟住仲見埋陳鍵鋒添…嘩! 佢兩個真人都真係好靚仔o下! 真係多得朋友“報料”, 令我有得一睹“雙峰/鋒”o既風采…嘩哈哈哈!

就係呢個function喇…


逢星期六晚做o個個節目“係咪小兒科”又幾好睇喎….雖然唔知幾時同埋o係邊度好似睇過類似o既節目 (真係完全唔記得係咩情況或者o係咩台), 但呢個題材o既節目一向都ok好睇! d小朋友有d真係幾好笑o下, 又幾精靈幾醒…依家做小朋友真係難…嘩, d題目深到呢!

上個禮拜o個條小一中文題: 「誰知盤中餐, 粒粒皆辛苦。」跟住叫你說出唐詩《憫農》首兩句…嘩, 有咩可能識呀?! 依家小一唔係讀呢d呀嘛? 等我細個時仲成日自以為自己好叻咩都識, 原來我真係井底…呢d我相信無論係小學生定大學生年代o既我…都~唔~識~囉…依家d小朋友真係叻成咁o既?!

同埋上去玩遊戲o個d小朋友, 就算識一辮都無理由辮辮都識o架? 有d人話係有造馬成份o既…我唔知啦, 但係個節目算搞得幾好睇幾有聲有色…係呢期比較成功o既遊戲節目! 古巨基亦都有d當年“娛眼”古巨基的風采…所以都睇得幾高興!

嘩! 原來“萬家燈火”都出dvd o個次o係網上睇o左少少片段, 都好似幾好睇咁!

仲有, 我想講係我覺得“珠光寶氣”呢幾集好睇o左…!

16 Comments:

Anonymous 匿名 said...

哇!你好好彩,可以见到两个靓仔!
係咪小兒科有内地版啊,播好耐啦!

5:06 下午  
Anonymous 匿名 said...

係大陸既遊戲節目
幾年前睇過
連個setting都一模一樣

6:03 下午  
Anonymous 匿名 said...

好羨慕,可以見到雙峯!
係咪小兒科真係好好睇, 又可以俾我哋知道吓自己嘅無知。
題外話,我可以証明以家啲課程係咁深,我教幼稚園嘅, 有唔少幼稚園都會加唐詩入課程,「憫農」基本上係必被選中,高班普通話都有呢首,就好似「靜夜詩」咁,大hit咖!不過.....我都係做咗呢行先識咋!!!

7:04 下午  
Blogger Nilly said...

好羡慕你啊,可以見度峯真人。唔知佢真人會唔會更加靚仔?因為通常上鏡會醜樣啲!講到珠寶哩,我特登睇多幾集先留言,我嘅point就係:芒姐你覺唔覺ADA CHOI做得好差?我覺得佢根本拿捏唔度個分寸,好誇張好表面,無論嬲,笑,開心定係唔開心。

7:44 下午  
Blogger poutine said...

芒姐終於見到林峯真人了, 看你這樣說來,原來你見到他,我也有“功勞”,哈哈。

10:01 下午  
Anonymous 匿名 said...

係台灣既百萬小學堂

10:47 下午  
Anonymous 匿名 said...

我都睇過內地呢個遊戲節目,好似係廣東電視台搞,所以主持同大部份人都係用廣東話,好似都播咗好耐下,我睇到果集好似係孫耀威玩,仲玩得幾叻添!

10:50 下午  
Anonymous 匿名 said...

Monica Jeh Jeh,

I believe the show hosted by Leo Ku is from an U.S. show called "Are You Smarter than a 5th Grader?" You might have watched the English version of it.

BC

6:04 上午  
Blogger Clement said...

多謝Mon姐,"萬家"missed咗大結局,而家有得睇啦.

11:17 上午  
Blogger mandy said...

前一排仲做緊「家好月圓」時,林峰上左黎公司做訪問,嘩,佢一行入公司,引起左我地既小哄動呀,佢果日帶眼鏡,好斯文架,當晚仲有人好攪笑話「唔知佢會唔會0黎一齊睇家好月圓呢?」
芒姐,我覺得「珠光寶氣」裡面,蔡少芬做得幾好喎。
我係敏兒呀

12:03 下午  
Blogger 芒姐 said...

敏兒,

無可否認...真係幾靚仔!

「珠光」入面呢...我都ok蔡少芬, 雖然尋日去食飯, 聽到隔離枱d姐姐話佢好浮誇, 跌晒watt...但我諗佢個角色本身應該係咁o既...因為睇完都令我覺得阿三妹幾克人憎o下, 即係佢成功啦!

仲有大家人力推o既林保怡, 話佢演得入型入格...我都覺得唔錯! 其實佢同邵美琪+黃德斌o個段我覺得係比較上最吸引...

10:20 上午  
Blogger 芒姐 said...

Clement,

oh, 我反而無睇添...淨係睇o左有馬敏兒o個幾段...

10:21 上午  
Blogger 芒姐 said...

re: 係咪小兒科

我諗最大機會係睇過台灣版...雖然我都真係無咩印象! 我諗世界各地都有互抄呢類節目...成如我成日講: "天下文章一大抄"...如果抄得ok都可以接受o既...

10:23 上午  
Blogger 芒姐 said...

poutine,

莫非你就係舉住"峰"字牌的其中一位朋友...?!

10:23 上午  
Blogger 芒姐 said...

Nilly,

我覺得真人同上鏡差唔多, 無咩太大分別!

有d artistes就差好遠...好似上次見到蒙嘉慧, 居然有少少"眼前一亮"...個人認為佢靚過上鏡好多, 因為上鏡感覺都幾殘!

有次見到陳敏之, 又係"眼前一亮"...sharp過上鏡好多...坐o係度都o係人群中一眼見到佢!

廖碧兒就瘦過上鏡好多, 上鏡幾大隻, 真人好fit喎!

蔡少芬我覺得都可以接受, 我諗佢個角色本身係要好浮誇...再睇埋落去睇o下佢有無d性格大變化囉...畢竟都有成80集, 可能後期會有大twist呢...:)

10:27 上午  
Anonymous Moo said...

I thought the idea of the gameshow was from the US - at the end of the show, you see the show credited Mark Burnett who's a famous producer in the US producing reality shows.

11:04 下午  

發佈留言

Links to this post:

建立連結

<< Home