9-22(tues) 超級巨聲…官恩娜!!!
噢! 原來“超級巨聲”已經誕生o左…唔係11歲小妹妹, 唔係“走音的天使”…而係官恩娜!!!
觀音娜…我真係估你唔到…原來你樣靚身材正之外, 居然仲唱得兩嘴...你o既外型真係害o左你...我同阿mark lui一樣, 都以為你係"偶像派"~~~真係sorry晒...失敬失敬!
相信有睇前晚“超級巨聲”o既朋友, 都會同我一樣“O晒嘴”…因為真係二萬個驚喜! 即係我不嬲印象中娜姐都唱得唔差o既 (至少我知一定唔係屎塔肥或傅穎之輩)…但真係無諗過咁好! 尤其o係毫無expectation之下, 個震撼係會更大! 本來係諗住睇d參賽者, 點知卻爆出一個另類驚喜…真係要禁不住唱番句: “哎呀呀呀呀呀~~~我估不到~~~”!
平時對官恩娜印象係ok o既…因為佢講o野搞笑, 上遊戲節目同飲食節目又肯豁出去…玩同食得好癲…d綜藝節目有佢又的確係少o左d悶場, 而且佢做戲都唔錯…最緊要係樣靚身材正…如果我係男人一定超buy呢d…作為女觀眾我都ok佢噃! 同埋佢呢種係有少少野性, 有d sex appeal o個種...所以呢個索爆外型同形象真係完全害o左佢!
唔怕老實講…我同大部份人一樣, 一開場見到個嘉賓名單之後都心諗: “搞咩呀你? 搵官恩娜合唱?”…點知佢一開口已經殺晒…因為surprised, 所以大家覺得超正! 今次佢真係洗晒底…令大家對佢完全改觀…一睇完個節目上網search o下…原來所有討論區已經熱烈討論緊!
其實佢應該唱多d英文歌…呢首歌個style同range開正佢o個瓣...把聲好響, 好有power, 好好聽! 反而以前唱自己d歌係ok, 但又唔覺得咁好囉! 今次ella終於上到位... “超級巨聲”居然係佢跑出, 而唔係任何一個參賽者, 真係估你唔到! 臨尾仲要補番句話自己“唱得好有口感”…識得用自己主持飲食節目被批評o既o野o黎自嘲…有幽默感…掂!
講真, 我又唔覺得同佢合唱o個個dee dee真係唱得咁差, 唔合格不特止仲要同o個個完全唔唱得o既林師傑同分…佢今次都死得有d慘…完全係揀錯拍檔…因為觀音娜表現太過"你估佢唔到"…搶晒風頭…佢即刻被比下去! 四眼dee dee掛住同靚姐姐玩…咁就死o左喇! 不過算啦, 正如miss chan chan講, 有得同靚女合唱都真係夫復何求呀…反正觀乎o個日阿“杜文澤”o既表現, 佢似想[目及]靚姐姐多過比賽囉…wahahaha!
被歸類為“偶像派”o既官恩娜一鳴驚人, 相反被歸類為“實力派”o既泳兒表現真係嚇死人…我不嬲覺得佢幾唱得…今次令我好失望! 我唔知佢係個range唔o岩, 首歌唔熟, hea住唱定點…佢今次送o左個五音不全 (唔係完全五音不全o既, 但以19強o既standard就…) o既林師傑一程, 下次聽聞佢會送走埋gimmick王11歲小妹妹趙展彤 (不過正如阿mark話齋…佢都係時候俾心機讀書啦…都開學喇, 專注番學業啦…反正佢全程都好似好唔開心咁, 一d都唔enjoy個過程咁)…!
當然, 呢兩位其實唔洗阿泳兒送一程都係最應該出局的兩位…但網上d人話泳兒累o左林師傑又唔錯得晒喎…首先揀o個隻“兩忘煙水裡”就唔識聽歌o既人都知道錯晒啦…完全唔o岩feel, 仲要佢d中文都未讀得正…走去唱呢d歌, 歌詞講咩佢都未明, 再加上本身唱功唔得 (上幾集係跳o下舞有d gimmick distract o下大家), 仲要揀錯拍檔…真係“all wrong”囉~~~!
其實我明明聽到係泳兒唱錯先而唔係個參賽者, 之後先一齊亂晒…所以即係rewind聽多次…都真係泳兒唱錯先…但係之後訪問佢又叫人o地咩唔緊要下次練熟d之類o既…定係我聽錯?! 又或者泳兒自己錯以為人o地錯…?!
你話係個參賽者自己唔記得歌詞咁都無得怨呀, 但係俾個嘉賓搞亂o左 (仲要自己本身都唔多掂), 咁就死得仲慘…泳兒今次真係失禮晒喇! 我仲以為佢真係好唱得…點知搞成咁…原來佢只係可以唱自己的高音“氣聲”歌! 今集“超級巨星”真係高下立見! 原來係d歌星現真章, 而唔係d參賽者!
仲有同kary合唱o個個14歲小妹妹何紫慧…真係得喎! 雖然可能未至於值23分, 不過又真係唱得好過kary…難怪話其實o個集有“Kary黑面事件”但係最後cut o左…我想睇o下喎!
而頭幾集搶盡風頭的側田“飛佛”何雁詩…又再一次證明佢只係唱英文歌得, 一唱中文就唔掂喇…因為一向都係話英文歌易唱過國語歌, 國語歌又易過廣東話歌…因為廣東話係最難咬字同埋發音o既…何雁詩又係最佳例證! 同埋佢同GEM兩個完全唔係“合唱”…你有你我有我, 完全無交流, 仲好似唔多妥對方咁…互相想演o野! 搵個同自己年齡/高度樣樣差唔多的少女合唱…又係錯晒! 大家都想搶對方多過做好件事!
反而之前幾集唱到危危乎o既唐詠妮今集又唱得好o左好多喎…可能同蘇永康合唱o岩佢feel d!但係同MR.合唱“如果我是陳奕迅”o既劉威煌, 我又唔覺得係佢o地講到唱得好成咁…佢係勝在融入到個氣氛囉!
仲有, 加入o左森美做主持個節目又真係好o左好多…劉美君唱歌係好正, 但做主持只係一般…有多個人傍住佢好好多! 同埋藍奕邦做評判真係幾搞笑…尤其前日睇完林狗o係個show度扮番佢講d“金句”o既時候~~~
今集可算係咁多集之中最好睇o既一集…因為真正o既“超級巨聲”已經誕生o左…而呢個節目亦都可以功成身退喇~~yo!!!
posted by 芒姐 at 11:12 下午
13 Comments:
Oh yes! Thanks for saying good things about Ella!
I must watch this tonight...
Monjeh, agree with you completely about Wing Yee and Ella!
Wing Yee really sang very badly.
Can you give some examples of Lam Yik Bong's golden phrases?
Ella不嬲都幾好，好搞笑下，不過佢個image太｛花瓶｝，加上D緋聞/唔唱k啊/強吻事件果D，搞到個形象有D差。今次巨聲真係令到佢上哂位兼洗底成功！
我係女,都超buy ella 呢 type..要身材有身材,最殺食係夠funny同夠放,hot到爆!!
賣飛佛同佢真係...waste!!
呢集錄影時有去現場睇,反應都好好.
其實佢唱得好一d都唔意外,不嬲都知佢唱得,尤其係英文歌,記得佢上"范後感"試過自己彈琴唱一首唔記得咩英文歌,係超得的...
Ella, King!!!!
我不嬲都覺得ELLA幾靓,應該有POTENTIAL紅,不過唔知點解個IMAGE越做越CHEAP.佢同唱K真係孽緣. 當年TBB壓落嚟,佢兩個又處理得差.大家互相累死.ELLA由OK新人變姣精,唱K就直頭唔洗講啦..總知...別怪他/她啦!
溫哥華匿名人
Oh, Monjeh, you are right about Vincy. It was her who forgot the lyrics. She wasn't singing so well either. So disappointing.
William So was OK as well.
re: ella
係啦, 佢之前d緋聞/負面新聞真係令人對佢印象無咁好...同埋佢一開始行錯o左sell樣貌身材o既路, 一定令人覺得佢係花瓶...不過佢今次終於洗底喇!
re: 泳兒
我睇多次段片...佢真係亂咁o黎, 走音不特止仲要連歌詞都無記熟...真係抵打...仲累埋人添!
re: 蘇永康
佢不嬲有唱歌, 但今次我反而覺得佢有d用力得滯, over o左少少! 太想表現自己...同gem一樣!
re: 藍奕邦
e.g. of his golden phrases...“你唔需要再唱歌俾我聽, 因為你依家唱咩歌都取悅唔到我”, 仲有“actually you are not a good singer”!
pls see the clip in next post for details...haha!
我都係果批覺得ELLA唱歌唔差但真係冇expect過可以咁好囉！睇黎佢自己Ｄ歌完全發揮唔到佢既歌喉呢。
（講開又講，我身邊Ｄ男性朋友個個都好鍾意ELLA，覺得佢好靚。）
泳兒真係令人跌眼鏡囉.. 音唔準歌詞又唔熟-_- 失準得好緊要...
btw阿gimmick 11歲妹妹真係夠喇，佢真係好唔enjoy囉（個樣）。個人亦認為呢個gimmick已經夠喇係時候停喇，坦白講真係唔覺佢唱得有幾好:P
唔知點解我覺得呢次比賽歌手分分鐘重緊張Ｄ囉:P
頭一兩次睇時, 個小妹妹係幾搶同埋好似唱得幾好幾放咁, 但睇多兩次真係唔得...佢仲係"童聲"但又要唱d情歌好怪...但又無理由唱兒歌呀...但只係大佢3歲o既何紫慧又真係唱得幾好...我o係youtube睇到佢12歲時o既演出, 好過趙展彤好多喎!
發佈留言
<< Home