2011年5月22日星期日

5-22(sun) 富貴再三逼人

睇咗一兩集"花花世界花家姐"…又的確係似女版"阿旺…不過其實要扮弱智都係咁上下o架啦…當然郭晉安又的確高少少o既…我只係覺得佘佘對眼有d精靈得滯! 不過都尚算ok! 套劇又係o個d唔算話十分有興趣追, 但睇吓又無妨o個隻! 反而星期日o既"華麗明星賽"真係幾好笑吓! "吹水同學會"就好似無"星星同學會"咁好睇喇…不過都好睇佢o個集請咗咩嘉賓o既…

係喎...差d唔記得胡杏兒o係"流金歲月"做o既茵茵…當年都係獲得激讚…點解依家會搞成咁?!

娛圈 360:扮懵食老虎

《花花世界花家姐》  11年
忘記姣佘吧!阿佘在正播出的《花花世界花家姐》中扮演花麗珠,智商只得 10歲,從前的電力不見了,卻多了一份純真。劇中的她恤了個齊蔭冬菇頭,說話遲緩,左看右看都照足阿旺的方式去演。至於她被林峯公子迷得暈頭轉向,鼓起泡腮含春樣卻十分討人歡喜,假若她 10年前接這角色,定必紅爆。

杏兒似模似樣
《流金歲月》  02年
因演技浮誇而被網民封為「胡囧囧」的胡杏兒,曾幾何時也被稱讚過。不過要坐時光機回到 02年,她在劇集《流金歲月》中扮演智障女孩丁善茵,無論樣貌及肢體語言都演繹得活靈活現,風頭完全蓋過主角宣萱,歸功於她到庇護工場學習智障人士的表情和說話。無巧不成話,有「 AV杏兒」之稱的日本 AV女優蒼井空,來港拍攝的從良之作《復仇者之死》,同樣飾演智障人士,未知可有向原裝偷師?


哈哈, 呢段"趙增熹vs丁子高"有好多朋友叫我睇吓…又的確係有少少似樣o既...某d角度同造型都有d似啫...但話實, 丁子高自從同楊千嬅一齊, 成個形象提升咗之後, 個樣都好咗好多! 哈哈!


(趙增熹與名人對話 - 丁子高)

仲有, 我想講呢期睇報紙講張栢芝同edison冰釋前嫌, 仲主動調位去同佢坐又影合照咁…嘩! 呢個真係要激讚…阿栢芝真係好得! 大方得o黎仲要係我哋呢一年成日講o既"贏人又贏陣"囉! 寛恕別人真係等於寛恕自己…從來懂得忘記同埋放得低o既先係最掂! 不過講就容易, 真係做得到就難…真心佩服佢!

噢! 仲有呢期禮拜日勁重播o既..."富貴逼人", "富貴再逼人"同埋"富貴再三逼人"…又係小時候的賣飛佛, 細個去戲院睇完仲要租碟睇多次…又真係好睇喎!

做細妹o個個當年的童星關珮琳d戲真係唔錯! 成套戲真係好"香港"囉…比起近年d咩"72家租客"或者"我愛香港"更加hong kong十倍! 同埋d笑話真係幾勁, 套戲完全無悶場…80代年d戲真係得! 同埋我想話…高志森同曾志偉佢哋真係好後生囉! 哈哈!

哈哈, 仲有o係屋村走廊打麻雀呀…d走廊打牌o既c9呀…全部都好typical, 好生活化的八十年代香港…令人好懷念! 你知我對d屋村其實有個情意結…鄰里關係好和睦…我鍾意!

無意中search到呢篇寫"富貴逼人"系列的文章…哈哈…寫得幾仔細呀…


提到《富貴迫人》, 相信很多人都立即彈起, 對《富貴迫人》系列的每個細節, 啷啷上口, 比「唔好用支槍指住我個頭」或「我冇做大佬好耐」有過之而無不及.

何解? 並不是因為《富貴迫人》系列是賀歲片, 而是因為觀眾在影片中, 都找到自己的影子. 主角一家生活的環境, 就是我們的「第一個十年」: 公共屋村.

公共屋村的出現, 除了因為五十年代石硤尾木屋區大火後, 急需替流離失所的居民安置家園外, 其實也歸於政府的政策. 那個年頭人人生活不穩定, 整個社會百病叢生, 加上左派勢力蠢蠢欲動. 如不能安定大眾的生活, 這片殖民地衍生的問題, 定會拖跨整個港英政府的統治. 於是, 公共屋村便成為香港人正式進入生活新年代的標誌.

公共屋村對很多人來說, 都是兒時的共同回憶: 四百尺的單位、一家五口、碌架床、間房、百葉窗、露台(騎樓)、走廊... 試問哪個「八十份子」不曾在這種空間生活過?

《富貴迫人》的一家五口, 不但是八十年代的庶民寫照, 也是流行文化寫照. 一家之主驃叔 (董驃) 任職新聞報導員, 是營營役役的打工仔, 對橫蠻的女上司一直陽奉陰諱; 驃嬸 (沈殿霞) 是閒來愛投注、「打斧頭」的主婦, 願望是中六合彩頭獎 (大眾的希望投射, 至今仍是!) ; 長女陳奕詩耽於逸樂、談戀愛, 愛穿暴露衣服 (影片再度以陳的身材製作綽頭, 堪稱經典); 次女李麗珍深愛東洋偶像文化, 打扮亦如八十年代的街頭造型; 幼女關珮琳愛製作模型, 精乖伶俐, 卻又老成成故. 影片以一家五口的生活趣事, 反映了八十年代大眾的生活文化、喜怒哀樂: 打麻將、擠地鐵、赴宴、沙灘游泳、沈迷偶像、拍錄像、橫財夢...

就如驃叔一家出席親戚的婚宴一幕, 席上已看到各人的階級矛盾: 親戚們不斷炫耀自己的財富, 使得平凡的驃叔一家顯得極為尷尬. 各人更提到當年至為敏感的話題: 移民. 驃叔竟然一反「移民好」的態度, 提出「移民乃不負責任」的意見, 所有人的反應是立刻埋頭苦吃, 其表弟更出言揶揄: 「表哥無幾何(享受)!」. 這段對白無疑是攪笑甚於批評, 但諷刺手法可謂妙絕. 亦反映到當年「不移民等於無希望」的悲觀情緒.

導演高志森曾自豪地表示, 創作《富貴》賀歲系列是勝利的一仗, 其他對手只管只大明星掛帥, 不及《富貴迫人》以小市民生活為題般受落, , 票房也速速報捷, 從此成為一個系列. 續集引申下去, 繼續描繪香港人的生活. 第二集《富貴再迫人》安排驃叔一家移民到加拿大, 殊知對異邦文化格格不入, 趣事連篇, 更落得人離鄉賤的悲涼. 不過這都是基於驃叔中了彩票、發了達而衍生的情節, 並不相互矛盾. 可惜第三集《富貴再三迫人》情節重覆, 並無新意, 拍法也相當混亂, 是為敗筆. 相隔數年後捲土重來的《富貴黃金屋》, 則以危樓、無良業主和「包二奶」為題, 偶有佳句, 但流於誇張, 已不復當年強烈的共鳴感.

如今再三欣賞《富貴迫人》, 當中的幽默仍是拳拳到肉, 對發達的奇想更是永不「過時」. 可笑的是, 本土的喜劇不但沒有變得聰明, 相反卻愈來愈反智. 我等只好懷緬舊日記憶, 或是橫眉冷笑天下事好了.

*******************************************************************
【對白節錄】

親戚甲: 就快1997啦喎, 有冇打算移民呀?

驃叔: 我地唔打算移民!...我地雖然係香港人, 體內流梗既係中國人既血液, 應該投向祖國既懷抱. 移民, 係不負責任既行為! 我地應該以不屈不撓既香港精神, 留係度, 做大時代轉變既見證人! 為實現祖國「四個現代化」而盡一分力! 所以我係度呼籲大家, 留係香港, 唔好做人地既三等公民!

侍應: 仲有一碗(翅羹), 邊個要?

表弟: 俾我表哥丫, 佢冇幾可!

(驃叔在飲宴上對移民問題作出表態)

驃嬸: 阿三阿四, d野準備好未?! (阿三阿四由驃叔的富有表弟夫婦飾演)

阿三阿四: 差唔多啦, 主人!

驃嬸: 得就得, 唔得就唔得, 乜野叫差唔多?! 仲唔快d去做?!!

阿三阿四: 係, 主人!

(驃嬸發夢, 夢見自己大富大貴, 勞役冤家)

驃叔: 六合彩頭獎派彩十九萬...(千九萬?) 係咪真架老婆?

(驃叔在新聞直播節目爆肚)

驃叔: 各位觀眾, 電視台工, 我唔想再打喇! 電視台係剝削機構! 欺壓低薪職員! 浪費左我十八年既青春...喂咩呀八婆?! 尤其是呢d人渣, 恃著同總經理通姦, 目中無人, 一朝得志, 佢就語無倫次─

(驃叔在新聞直播節目上大吐苦水, 並大罵身旁的女上司)

次女: 我地去原宿學藝, 學松田聖子、菊池桃子...如果我紅左, 你就發啦!

驃叔: 最怕你學左岡田有希子咁, 跳樓自殺!

(李麗珍央求父親批准她到日本旅行)

驃叔: 聽住, 我決定投資移民!

三女: 老豆, 你話過為「四個現代化」努力個播!

驃叔: 你識乜野丫! 我地依家咁有錢, 容乜易第日俾人清算? 君子不立危牆之下, 依家唔走, 契弟走得麼咩!

長女: 抗議! 我地要民主!

驃叔: 哈, 我地中國人唔興呢味既.

(驃叔與家人爭論怎樣利用獎金)

12 Comments:

Anonymous ++ said...

我俾花花世界花家姐搞到笑爆咗,晚晚都追,特別係第四集華DEE!哈哈哈哈哈哈哈哈哈哈!

3:18 下午  
Anonymous 匿名 said...

如今驃叔同肥姐都唔係度了, 睇"富貴迫人"只令人感到唏噓!
eliza

1:32 下午  
Anonymous 匿名 said...

係,真係好唏噓,唔止驃叔同肥姐,仲有青春無敵的李麗珍,以及美好的八十年代,一切一切,早已一去不返......

2:26 下午  
Anonymous 匿名 said...

我不嬲都OK陳豪,但自從"呀SIR"之後就開始有D...唔可以話反感...係FED UP.唔單止吳唱K變大茄去墊佢底,過咗十幾集之後連D學生都唔見埋.幾乎每個鏡頭都有佢份.而我最睇唔過眼係D傳媒真係太鍾意佢.淨係話佢個角色賤男.又好肉緊討論佢應該愛邊個. 喂,根本呢個角色超唔踮!同埋佢真係演得好差.點解隻字不提?我又唔覺佢地幾個D關係變成城中熱話.有咩鬼咁肉緊?你估當年得得地-常在心-ALFRED-水擘擘咩!
陳豪份人我絕對相信ok,所以我都唔忍心"反感"佢.但我怕佢又會成為一個"愛你變成害你"例子.
溫哥華匿名人

1:47 下午  
Anonymous 匿名 said...

呢期既戲感覺d主角都麻麻地,幾欣賞花家姐既皎皎(周家怡)同埋阿sir既miss koo家姐(朱慧敏),佢地比較帶動到劇情,唔係下下都談情嗌交呢d先有人睇.
富貴逼人系列好似每逢遇到六合彩有大獎就會播,特別有共鳴,同埋好難得呢d題材都會實地取景,個加拿大真係加拿大
仲有想講呢期d so-call爆紅既case好覺得係tvb自己做出黎,好似K4 & 鍾嘉欣喊到歇斯底里,都唔知點解冇乜大共鳴,唔覺有幾爆,似係tvb猛咁煲出黎既成果,又或者係而家已經冇集集追劇既緣故吧...

2:47 上午  
Anonymous ++ said...

我想話,唔係依家先咁,早就係咁架喇。陳豪不嬲同傳媒關係好好,好多藝人經常俾傳媒唱衰,但陳豪基本上唔會有呢種情況,唱好或幫佢遮醜就有。甚至有一d指定媒體更會經常性地踩其他對手讚陳豪,呢樣嘢都同tvb派別鬥爭有關。傳媒成日話tvb力捧邊個犧牲邊個,但研究咗咁耐之後我發覺tvb真正要保護既人係陳豪至啱,所以我唔覺陳豪會成為"愛你變成害你"的例子。筍盤好男人呢個形象俾傳媒煲到深入民心,再加上佢本身份人真係幾好,所以就算令人反感都好有限。

7:58 下午  
Anonymous ++ said...

其實以前好多爆紅既case都係tvb自己煲出黎,唔係呢期先有。以前成日見某d劇本身冇咩人討論,收視率又唔係高,但到咗某個時段突然好多份報紙雜誌統一口徑,連續煲到好似全城熱話咁,結果真係開始有話題,真係俾tvb煲紅咗。不過今次鍾嘉欣就唔係tvb煲出黎既,係佢自己跑出咗,阿sir到咗後來基本上係靠佢撐住。

8:12 下午  
Anonymous MOEE said...

贊成鍾嘉欣係自己跑出黎,阿sir由悶變左冇咁悶都係靠佢。一直覺得佢演技幼嫩,又專門演D乖乖女悶角色,今次真心地覺得佢有大躍進。印象大大改觀!

陳豪的形象向來都經營得好好,阿sir的賤男角色對佢影響唔大。

周家怡演得好好,覺得比阿佘更加好。帶動到成個劇既氣氛。

認同暫時花花世界花家姐最好笑o個集係第四集華dee。真係笑爆!

9:59 下午  
Anonymous 匿名 said...

跳跳虎個集好好笑.天台嗰場,鏡頭由林峰PAN到大口英,what a contrast.
RE: 同傳媒關係,林生自己都話佢以前唔鍾意傳媒成日問埋佢D無聊嘢,好好地同佢地講工作佢地又唔寫.於是佢開始唔想接觸傳媒,終於關係越來越差.前幾年開始,佢先諗通咗,可以放鬆D同傳媒講少少私事心底話,諗住我肯講你有得交差大家都好.AND佢唔再太介意佢地有時寫下佢绯聞笑下佢CHOK之類.玩下啫.
WELL,以上說話係佢舊年講嘅.
我結論係,佢以為不時放口風肯講d屋企人,傳媒就唔會搞佢地.但終於,林氏全家福祿壽上咗封面.佢以為任由傳媒寫極都係绯聞無所謂,結果俾傳媒夾埋條女整鋪杰嘢佢嘆.
我諗佢而家已經再次啟動自我保護模式,冇需要都唔會去接觸D傳媒.佢演唱會只响網上公佈,而唔係第一時間開記招.

溫哥華匿名人

8:27 上午  
Anonymous ++ said...

點解無啦啦講到林生同傳媒關係?哈哈!佢一出道已經俾傳媒寫衰(因為係有錢仔),可能因此有產生過抗拒心理吧!佢都話自己唔鍾意解釋,佢諗住埋頭苦幹加倍努力,用成績黎證明俾人睇佢唔係靠屋企。我諗佢都好想保護屋企人,平時佢對d負面新聞不嬲一笑置之架嘛,但果次搞著佢屋企人佢真係堅嬲同心痛,真係有諗過退出。

其實佢同傳媒關係唔係真係咁差,但佢依家當紅又風頭火勢,個個都睇住佢做新聞。有好多事就算唔關佢事就算冇佢份,但只要加佢個名就多咗好多關注度,多咗好多故事,真係想低調d都難。不過我最戥佢唔抵既係,佢對傳媒一直好尊重好忍讓,可惜人地唔會因為你有修養就唔寫你,反而會以為你好恰踩住你上。

況且香港傳媒大環境就係鍾意無中生有,鍾意捕風捉影,鍾意斷章取義,鍾意製造負面新聞。好多藝人都深受其害,但又唔可以反面,都幾慘。

ps.講番花花,我真係覺得好笑喎!好多爆笑點,假如蓋有天意性感跳跳虎果d都勁好笑!總之我追到依家一路睇一路笑。

9:12 下午  
Blogger 芒姐 said...

哈哈..."花家姐"我只係睇到頭兩集! "阿sir"我都只係睇到兩個禮拜前...真係好落後添! 但"阿sir"係咪真係tbb講到引起咁大迴響? 我又真係好似唔覺有咁誇囉...haha!

7:10 下午  
Anonymous 匿名 said...

reply返樓上有位匿名說:"六合彩有大獎就會播",其實今次唔似係因為六合彩有大獎而播,反而我覺得係因為日本核輻射洩漏所以播,因為第一齣"富貴迫人"個細女係整個大亞灣核電廠模型作為學校習作,但意外導致"核輻射洩漏"的,係咁岩播第三齣"富貴再三迫人"之前兩日先係一億六合彩,試問兩三個星期前又怎預計到會有一億彩金的六合彩呢? 等同羅樂林一日死五次一樣,"好難夾但咁都俾你夾岩時間"

80代年d戲真係得,你睇返富貴逼人,最佳拍檔,追女仔,五福星呢D系列,過左廿幾年後到今日依然可以套用到落現今香港社會,一看依然記得晒大部份劇情和對白,依然有共鳴,百看不厭的

笑哈哈

5:22 下午  

發佈留言

Links to this post:

建立連結

<< Home