8-7(tues) 奧運@倫敦
因為睇奧運, 所以睇多咗亞視, 每日幾乎聽要一次呢首洗腦歌係咁"COME ON一齊SHOUT呀周呀周"...聽一次笑一次...其實佢又真係幾功德無量! tum得我好開心!
仲有我好欣賞劉鍚賢呀, 朱慧珊呀, 林韋辰呀, 陳嘉輝呢班加埋200歲的藝人, 好落力咁一邊chok一邊shout"呀周呀周"! 令人好興奮呢…
今年兩台一齊播奧運, 呢個安排又真係幾得意! 開幕禮見到克勤, 依然會令我諗起96年佢同劉華一齊去參加香港升旗禮的事件…oh! 奧運@我最喜愛的倫敦...真係好令人懷念啊!
至於做咗兩個星期o既"怒火街頭2", 其實我覺得有d悶, 唔知點解上輯感覺好睇d! 依家即使miss咗, 都唔會有意欲去睇番!
同埋我想話呢…苟姑娘雖然係幾靚, 但佢啲廣東話真係聽得人好辛苦! 睇埋字幕先勉強知佢講咩, 其實我寧願佢講國語! 佢上鏡依然係略肥, 不過其實我覺得女仔有啲肉更靚…所以佢o既外型我係幾buy的!
哈哈…law霸回春?
而呢兩位"飛虎"的路人甲乙, 一坐坐咗廿年…又係有趣…
終於睇完晒19集"護花危情"…個結局呢…點解要咁呀? 估唔到黃宗澤要咁死! 同埋, 成個劇真係一個鍾嘉欣的音樂特輯, 隔十分鐘播一次主題曲, 隔廿分鐘又唱一次"月亮代表我的心"!
嗰日睇報紙睇到呢段…sorry! 笑咗…
有讀者問我點解仲未講港姐…你又講得啱, 我真係幾乎無咩留意! 雖然我有睇番佢每個禮拜六的英國外景, 但為的係睇番我最愛的英倫…但d港姐呢…咁睇咗幾個禮拜都勉強認得啲o既, 但真係印象唔深囉! 我相信近年都真係唔太多香港人有留意港姐…你問番我舊年邊個係冠軍, 我都真係要諗好耐! 港姐呢d”雞肋活動”, 你真係摺咗佢又唔係, 繼續搞又尷尬! 同埋無咗準決賽, 其實令d佳麗更面目模糊, 無得俾某d其實有potential但比較慢熱的佳麗跑出…好似91年o既郭藹明咁!
原來今年港姐四十年, 搞成咁真係令人心o翕! 唔怪得王晶同阿叻要夾埋幫港姐做d咁o既奇怪另類宣傳!
禮拜六個戚美珍個新節目"珍情品味"…喂, 幾好睇喎! 除咗講食嘢, 仲有主人翁背後的故事, 講吓人生起跌經歷, 唔錯呀!
posted by 芒姐 at 11:00 下午
16 Comments:
今年啲港姐…除了人微妍希…全部都唔識…
而…我講唔出人微妍希個本名…XD
今年又玩真人SHOW又話全民投票…但完全無NOISE…點攪呀…
我覺得苟姑娘好靚喎，我係女見到佢個婚紗look都忍唔住講左幾次好靚呀!同埋我覺得好似佢d鬼鬼地既女仔要有d肉先好睇架喎，仲有d睇頭，真係自然散發出來既性感呀，我buy囉!但估唔到d男網友好似好唔鍾意佢，我仲以為男仔應該會好鍾意會封佢做女神。
btw，劇中既grace都幾靚，笑容可掬，同埋感覺好明珠台，做專業人士好適合，第一次拍戲都算ok。
雖然講故唔好駁故，但覺得怒火2都幾多唔合理既地方，如：四大名狀韋狀去裁判法院幫個交通傷人既client辯護、大律師幫人辦離婚架，乜現實係咁架咩，感覺唔多合理囉。
不過，雖然law霸同lynette呢段有名無實既婚姻好多辨駁位，但我覺得以三角戀來講算係ok，同埋令law霸呢個角色又多左一d鮮為人知既過去，符合law霸呢個傳奇角色，同埋首someone like you都幾好聽。
我都覺得苟姑娘好靚, 唔怪得鄭生會搭糖!
96年阿特蘭大奧運,芒姐你記唔記得個口號?係"睇奧運睇無線,ers!"個"ers"真經典!
Law Ba絕無可能40歲!45就差唔多.上集不停講佢失踪7年.失踪前佢已經好出名.加埋而家坐完監.唔通佢30歲就成名法律界咩?佢又唔係程亮.
溫哥華匿名人
to 溫哥華匿名人:
唔明, "ers" 即係咩? 我真係唔係好記得...
原來我2008年奧運同你講過同一番說話.哈哈!!
http://hejnom.blogspot.ca/2008/05/5-16fri.html
溫哥華匿名人
我都想知"ers"係咩?
苟姑娘真係幾靚...我係女性都望住個鏡頭目不轉睛! 哈哈! 身材仲要都幾好喎!
港姐最騎呢係依家無啦啦停咗幾個禮拜, 本身已無人睇, 依家直頭以為已經完咗! HAHA!
港姐既宣傳確實好奇怪,好幾次都令人以為已經選完,原來10個人都仲出多次外景,仲押到暑假尾選,暑假後再出鏡做主持拍劇果d都未必多人睇啦;
新搵返黎既余總監(?)真係搞埋好多"古老當時興,其實又唔興"既野,另一個好例子係咩咩3周半,完全唔知笑點在哪,跟手佢又決定今年唔做港男,又冇得笑,睇下近期奧運型男同A&F男模就知幾有market
怒2都幾乎放棄左,睇完夜晚第1輯重播之後即時覺得呢個第2輯唔同哂,係唔好睇左好多,成套野幾個人都要睇字幕先知講乜(金剛,苟姑娘,JJ),要跟到係好難呢
而家tbb d拍好既劇都出得7788,金枝2應該趕唔切今年出,淨返既名媛望族,大太監同法網狙擊似乎最有機會成為台慶劇,要睇之後造王者既反應如何啦
"ers"係一個助語詞,冇咩意思.
芒姐想問你,如果在傳播媒體影射某人觸犯法律,或沒觸犯法律但內容涉及其名譽和專業操守,沒指名道姓但令大多數人有理由相信所指是誰,會否構成誹謗?
溫哥華匿名人
溫哥華匿名人,
我估到你想問咩XD
++
defamation 唔係人人都 apply 到, politicians 唔可以告人誹謗, 而且誹謗訴訟唔可以申請法援, 冇返咁上下錢都玩唔起. 另外如果被指為誹謗的內容涉及公眾利益, 就會有豁免; 同埋就算上到court, 通常辯方會以 "fair comment" 打甩.
tvb既娛樂新聞/東張西望做乜咁小家?
係都要將個藝人背景or手臂貼紙既產品名稱,logo或者戲名朦左佢,搞到個人周圍有個框咁,都唔知出席緊咩活動,小小位都冇得攝入鏡,係唔出得鏡定係因為唔可以幫d品牌做免費宣傳?
誹謗 - 仲要證明到有關言論對原告帶來損失先可構成誹謗
仲要證明到有降低到該人在一般人心目中的"形象"先得...haha!
發佈留言
<< Home