2013年1月1日星期二

1-1(tues) happy 2013!!!!

踏入2013年, 首先要同大家講句新年快樂! 芒姐在此祝願大家心想事成, 一切順順利利! 我深信只要有信心, 一切都會好! 真的! 命運…雖然可能真係有安排, 但應該都有一part係可以自己創造o既! 2013年大家一齊努力啦!

自從睇過尋晚TBB跨年秀由幾個"天與地"年青版演員唱"重口味"之後, 即刻覺得EASON喺勁爆頒獎禮個LIVE版本有二百個精彩...原來歌, 真係唔可以亂唱…佢哋唱番”年少無知”咪仲好!



叱咜…我已無聽好耐, 以前會突登1月1日留o係屋企聽, 或者周圍撲飛睇叱咜去睇, 視為年度第一大盛事…當然人大咗, 好多嘢都會變…因為”變幻原是永恆”才是最不變的世紀金句…經我個friend提醒我今晚做叱咤後, 我本來都打算臨尾聽一聽應吓景…點知我搵唔到收音機, 我屋企居然連收音機都無埋而我不自知…好嘢! 而tbb亦都第一年唔播叱咜, 改為播舊年1月1日結局o既”天與地”, 認真應景! 因為與此同時, “年少無知”居然攞到叱咜我最喜愛歌曲…”天與地”又攞年度劇集, 又攞年度歌曲, 仲揀正1月1日重播…威晒! 好彩youtube都有得睇番呢段…



上個禮拜未播“天與地”的時段, tvb無啦啦搵咗套陳年學校戲嚟播…當年都無咩聽過, 唔知今次其實係咪首播呢? 有吳家樂, 黃紀瑩, 陳彥珩, 梁雪湄, 伍文生etc扮學生…仲有張兆輝同梁婉靜扮老師…好有趣吓…尤其過咗接近廿年睇番佢哋o既後生樣! 我相信套戲大約係94-95年拍…睇番佢哋呢個樣…令我諗起“阿sir早晨”年代o既家樂仔同埋”餐餐有宋家”年代o既黃紀瑩…!

嗰日睇報紙話tvb仲有好多倉底貨未播…今日下午會播”談談情 練練武”, 之後仲有”鳳舞香羅”…正喎! 呢d多倉底貨通常反而幾好睇!



至於黃金時段嗰兩線劇…"幸福摩天輪"我開始頂唔順…老套到喊! 居然可以成套劇齋講尋人o個吓好嘢…係上次羅蘭姐vs姚子羚+李成昌/馬海倫o個兩個單元比較好睇d之外, 套劇的主線異常難受! 我同意大家講話鍾嘉欣又演呢d懶熱心但永遠幫倒忙又要帶點楚楚可憐的角色好係煩…我哋作為女性當然唔buy, 而我相信就算係男性都會開始想打巴佢(個角色)! 同埋林峯個堂妹林夏薇…其實佢演技都唔係太大問題, 但我諗佢應該好難上到一線, 皆因佢個感覺真係唔多討好, 我都講唔出點解…可能呢d就係觀眾緣! 又或者只係我一個人咁覺得…我唔知喇!

”法網狙擊"就一般啦…謝天華同森美兩兄弟chok住chok住的look (仲要佢兩個都唔算靚仔)…令人覺得似笑片多過認真戲! 不過套劇係ok o既, 又係一般一年至少會有4,5套的律師戲…唔算特別精彩! 但o個d律政署政府律師唔好叫咩”甘高檢”, “況高檢”咁作狀得唔得? 邊有人會咁叫o架?!



前幾個禮拜睇勁歌, 見到松松姐姐出番o黎, 仲同胡渭康合唱“正義柔情永在”! 呢首“蜀山奇俠之仙履奇緣”主題曲…曾經係我哋小時候的卡拉ok必唱熱選...即刻要去youtube搵番松松姐姐+溫兆倫的經典版本聽吓先得!

嘩, 仲有我想講…星期日個“決戰一分鐘”遊戲節目其實幾鬼悶…我睇咗少少已經頂唔順無睇喇!

8 Comments:

Blogger 堂本冰子 said...

芒姐新年快樂﹗~

我屋企唔聽903於是我年年都係叱吒頒獎禮先會望吓,年年都有啲人唔識的拎獎又年年都有啲喊到阿媽都唔認得…睇時都別有一番樂趣…但今年真係無留意…係朋友喺fb洗版先知原來今晚做…

講起倉底貨,據說梁榮忠和家燕媽媽那套《我外母唔係人》係ok的?同埋n年前我睇過《紅衣手記》都相當ok的…好似話因為學護轉制所以無得出街…好似你咁講,好多時倉底既反而幾好睇…

12:48 下午  
Anonymous 匿名 said...

我十年前見過黃紀瑩真人, 都好靚女下, 估唔到咁快要做師奶八婆角色, 依家直情係連影都冇埋!

5:49 下午  
Blogger 芒姐 said...

黃紀瑩選港姐時係幾靚, 雖然佢一開口內涵真係零, 所以攞最上鏡都幾合理!

8:54 下午  
Blogger 芒姐 said...

堂本冰子,

十幾歲時奉叱咤頒獎禮為年度大事, 考試都唔讀書要聽埋先...同埋好buy商台那種洗腦式教育...依家諗番, 好有保險公司feel! 不過, 誰沒有年青過? haha!

"我外母唔係人"上個月重播, 我好like喎! "紅衣手記"幾年前好似深夜做過, 又係好ok...倉底萬歲!

8:57 下午  
Anonymous 匿名 said...

我呢D海外觀眾通常都第一手睇到倉底劇. 你講個幾套我都睇過. 大部份當時覺得OK,比起而家個D劇就直頭係好睇. 所以當劇集質素越來越唔得,倉底越耐播出越比較下變成正貨. 好諷刺.

溫哥華匿名人

11:26 上午  
Anonymous 匿名 said...

“決戰一分鐘”OK, 吸唔吸引都好睇參賽者。

2:16 上午  
Blogger nazia shah said...

我真的很伟大查看您的博客,留下深刻的印象,阅读和查看它,你正在做伟大的工作,希望你能保持它,我成为你的粉丝,表示赞赏。
http://www.fashiontrends.pk/

6:13 下午  
Anonymous Hindi Full Movie said...

This definitely answered my difficulty, thank you!

10:52 下午  

發佈留言

Links to this post:

建立連結

<< Home