11-11(sun) 大太監
台慶大劇”大太監”…相信真係幾高質素o既, 同埋個cast, 求其拆開佢都可以開5套劇…不過眾所周知我唔太喜歡睇古裝劇, 尤其係宮廷劇, 太heavy囉! 我只係想講, 黎耀祥同陳國邦真係幾似樣⋯廿幾年前已經咁覺得⋯當年陳國邦做”燃燒歲月”o既年青版劉青雲, 黎耀祥做”人在邊緣”o既曱甴….我仲幾乎以為佢哋係同一個人! 估唔到廿年後, 個style依然幾似!
另一個“亮點”係蔡淇俊個角色居然係以前好得意o既童星東東張裕東配音…咁搞笑! 但蔡淇俊唔係講唔正廣東話呀? 點解要配音呢?!
上星期WhatsApp上瘋傳有關「三色台」男女藝員車震的短訊，指有警員在八鄉「照田雞」檢查一路邊車輛，發現一對男女藝人衣衫不整，其中一對被傳涉事的是鄧梓峰及吳綺莉。鄧梓峰在微博上高調否認，表示是「非常離譜的鬧劇」，及後再發微博指有關短訊内容完全失實，並指傳播有關「不實及誹謗性的報道，均需負上法律責任」。女方同樣否應事件。
但最好笑係呢段…”有網民表示傳聞與鄧梓峰形象不符，亦有網民高呼「你真識食」，又笑言他「殺龍巴斯」的外號暗藏玄機，或他們是繼《雷霆掃毒》一劇合作後開拍續集「《雷霆掃黃》」”
本來4, 5年前我係好鍾意睇”福祿壽”的…直至佢哋2010年同pizza姐o個個節目 (除咗pizza姐每集高歌o個part)都好好睇…但做到第n次真係呢…個“萬千升呢福祿壽”節目…唔係話太差, 不過真係好yim悶! 點解tbb永遠都唔明見好就收的道理?
依家下午兩點幾tbb重播番d未o係翡翠台播過o既劇…o係亳無expectation之下又幾好睇喎…之前o既”肥婆奶奶扭計媳”, 仲有依家播緊o既”我外母唔係人”都唔錯…哈哈! 播多d呢d倉底劇都幾好呀!
posted by 芒姐 at 5:17 下午
8 Comments:
「大太監」真係ok過「名媛望鼻」！
以前好得以~而家就……………………
黎耀祥響人在邊緣做LEON馬仔... 跟住陳國邦又響今生無悔做LEON馬仔... 都幾有緣. HAHA
「名媛望族」劇情兩個禮拜前已經開始失控...
agree名媛劇情有d失控,變左靠d藝人訪問黎谷收視引人睇,好似松哥,美儀都做左好多個訪問講拍劇時點點點,之後有咩劇情要睇,不過都已經唔夠吸引力了;
感覺上今年台慶劇好似兩套都古裝,兩套都太grand又長,追追下偶有失手或者跟甩左就唔想睇
岩岩今日睇亞生,(唔知呢度有冇人睇既呢?),係幾吸引眼球,d人有肉地有身高;不過d比賽環節有d騎呢,好似玩鬥牛機,好似即係邊個玩機動遊戲玩得靚就有獎,拖長黎做,人又太多,未認得哂就選完;
今年無記唔搞真係損失,少左個焦點;同埋有冇人可以講下咩解究林韋辰會比人叫辰哥哥?成晚聽呢個稱呼幾廿次有d打冷震同埋講緊呢個影左第個既情況令人有d難跟黎睇,感覺上舊年好睇d
哈哈...其實我一路都覺得"人在邊緣"同"今生無悔"兩套劇有d似!
哈哈...其實我一路都覺得"人在邊緣"同"今生無悔"兩套劇有d似!<<<見到呢句我忍唔住留個言…
黎明呢兩套真係影爆燈，個角色反叛又情深咁，lum死不少同學，連我呢…作為一個郭富城粉絲都忍不住勁追…
黎耀祥喺《人在邊緣》染晒髮講晒粗(但我唔點解孟加拉係粗口)好好笑…陳國邦喺《今生無悔》度做跟住黎明的0靚仔就順眼好多…
"人在邊緣"同"今生無悔"都係賈偉南作品.好好睇! 當年電視尺度鬆好多 (最緊要無人事無大小去投訴..真係好鬼煩!),"人在邊緣"超多粗口,不過好配合劇情.孟加拉應該係"X家X",呢句一定唔出得街所以要代語詞.
賈偉南而家都北上拍電視劇lu.
溫哥華匿名人
發佈留言
<< Home