2012年10月8日星期一

10-08(mon) 爆足一周 + 最佳男主角

尋晚睇咗第一集查小欣o既”爆足一周”…做咗半分鐘已經全城笑爆! o係fb同討論區亦都全城鬧爆…咁廢o既節目都可以出到街! tbb真係好嘢!

不過話分兩頭...個節目本身比起d娛樂"舊聞",更加娛樂性豐富…十九幾個人坐晒o係度扮晒好認真咁discuss+"剖析"一d極其無聊o既topic…仲要係爆咗幾日o既舊聞, 係咁炒冷飯…呢件事本身先係最好笑! 仲有d假到唔恨的box files…好攞命! 成個setting令我諗起當年"今日睇真d"的解剖外星人! 仲要個個係咁chok住走出o黎…有個生面口女子成日好似忍唔住想笑又唔笑之間…好好笑! 所以我一邊睇其實一邊睇得好開心…成班友仔好似傻仔咁!

佢o個d娛樂新聞…其實有咩好discuss?! 你報導咪報導囉! 我寧願睇番"娛樂頭條"/"娛樂新聞眼"式的娛聞報導! “娛樂頭條”絕對有生存空間…做咩要cut咗佢?!?!?! 娛樂新聞同新聞一樣, 最緊要係打鐵趁熱, 等成個星期…咩都"攤"凍晒啦...呢個安排真係白癡到唔恨的舉動!

不過話實咁多單之中, 趙世曾同趙式芝o個段新聞最好笑!

同埋我要repeat番我fb…”with respect, 阿小欣姐你個格我真係有d頂唔蒲...and with even more respect, 小欣姐你個妝想點?! 我知我咁講好衰, 但你成個look加埋個髮型, 我一度以為你做緊化療! sorry呀…小欣姐! 我見到你個look真心驚! 如果下星期你個節目仲會繼續出街, 可唔可以換咗個妝同髮型…雖然我知時近哈囉喂!

睇完呢個節目再加埋上幾個禮拜”東張西望”佢訪問個燥狂導演同埋楊怡+羅仲謙o個兩段訪問…我開始明白志雲大師點解一入殤台即刻大刀闊斧殺咗幾個人…其實揀得好啱! 仲要一舉將d垃圾掃晒入tbb! 等你個tbb當年搵個李寶安嚟騎住佢…睇下依家你無咗大師呢種人才即刻搞到一鑊粥…今次真的好波!

呢個節目得啖笑…反而今晚芷珊姐姐個新節目"最佳男主角"值得期待喎! 同埋芷珊姐姐終於有自己節目, 真心戥佢高興…畢竟我細個都好鍾意睇"殭屍孫女"(仲會癲到跟住做殭屍躁…wahahaha!), 同埋佢唱o既”淘氣小雪兒”!

同埋阿芷珊姐姐今次請o既真係粒粒巨星! 原來佢人面真係好廣…仲要有幾個都係佢舊男友…鄭伊健就人人都知, 梁家輝其實我都唔多記得, 陳小春我真係第一次聽! 仲有佢最近一任男友張達倫 (即係”愛回家”o個個律師)…嘩! 唔講真係完全睇唔出細佢十二年…其實ok襯喎! 娛樂圈呢期真係愈o黎愈多姊弟戀…仲要閒閒地都相差十年八年…簡直係真人版"天梯"!


我們的女主播

黎芷珊忽然1周 第897期

我知本欄不是本刊專介紹電視節目的《電視有正嘢》,但我不得不推介下周一開始播出的《最佳男主角》。

清談節目,黎芷珊做主持,被訪者粒粒都是天王巨星。要推介,因為我實在不覺得千奇百趣有幾有趣。與其看一班柴娃娃胡鬧喧嘩,我 buy一對一的耳根清淨。

「這個節目其實好嘔心瀝血,我都不知碌了幾多人情卡才做得成!」

她訪問的人都是城中最高調的藝人;她自己,卻低調得可以。何鴻燊原配夫人黎婉華是她親姑姐,影帝梁家輝和古惑仔始祖鄭伊健皆是她前男友。梁朝偉會跟她食飯吹水;想找地方 hea,她可以直接踩上謝霆鋒屋企。

「我知道自己性格,不是做天王巨星的料子。能夠獨當一面做娛樂主播,已經好滿足。」

黎芷珊說罷嫣然一笑,頗有泰山崩於前而面不改容的感覺。 她,其實很有氣派。

真正的識於微時

叫黎芷珊數數將會出現在她節目內的「男主角」,我聽得目瞪口呆。

「劉德華、梁朝偉、黄秋生、劉青雲、吳鎮宇、任達華、梁家輝、張家輝、鄭伊健、任賢齊、謝霆鋒、曾志偉、成龍。原本還有甄子丹和吳彥祖,他們都答應了,只是沒料到我一晚播一集這麼快,檔期就不到,很可惜呢!」

據了解,這節目原本安排在周末播,但當無綫看過以上名單後,知機不可失,轉為閒日播出。黎芷珊的江湖地位,可見一斑。

「自己入行差不多三十年,很多藝人都是識於微時,我最強的地方,就是這些人脈。年紀大喇,很想做點事,對自己有個交代。」

黎芷珊的人脈關係,不是一般娛樂主播能比擬。她說的「識於微時」,是真的識於微時,甚至是童年時。她有四分一葡國血統,原名 Maria Luisa Leitao,來自澳門顯赫家族。祖父黎登是葡國人,是律師和澳門當時唯一的公證師。何鴻燊原配夫人黎婉華是她姑姐,她自小叫姑丈做 Uncle Stanley。

「過年有去 Uncle家拜年,但姑姐因為早年發生了交通意外,記性一直不太好。她應該記得我爸爸,但我想未必記得我。」

爸爸在信德船務工作,跟黎芷珊玩得埋的,反而是 Uncle Stanley二房的幾個表姐妹。

「我跟超蕸同年,我們又讀同一間中學,是由細玩到大的死黨,跟大家姐(超瓊)和 Daisy(超鳳)也很熟。我們之間的相處一早已沒有講甚麼『親戚』,大家只會叫對方名字。」


是有點優惠

黎芷珊在香港土生土長,除了身份證上從來沒有中文名外,自覺跟一般香港小孩沒有分別。她讀銅鑼灣名校聖保祿,愛玩愛唱歌,是校中常被罰留堂的風頭躉。十六歲,與另一同學上山詩鈉蒲中環名牌 Disco DD,認識了剛拍完《火燒圓明園》的梁家輝。

「他還和我去看《垂簾聽政》的首映呢!我們拍拖都是去 Disco多,那個年代興嘛,又不一定跳舞,總之就在裏頭 hea。家輝大我九年,他後來跟我說,感覺似湊女!」

三十年前的舊事,永遠有種微妙的情意結。兩人拍拖只有年多,後來卻成了一世的好友。

「感覺幾得意,好像很熟,但同時又很遙遠。很多年後我做娛樂主播,有次他趕住走,我在背後拍他,請他跟我做訪問,他回頭看見是我,便笑說:『係你呀?想唔做都唔得啦!』我的確是有點優惠的。」

十八歲,經音樂人安格斯發掘,與陳慧嫻和陳樂敏推出唱片《少女雜誌》,走清新路線。

「陳慧嫻當時在學界已很有名,我們歌藝拍馬都追不上,都知自己只是陪襯。無所謂啦,反正沒想過要做甚麼。」

這時父親心臟病過身, Uncle Stanley很照顧她,安排她入無綫。

「Uncle好有情有義,很多事他根本不需要做,但他都會做。我很記得有天陳慶祥(八十年代無綫總經理)的秘書打來,問我想做甚麼?我後來才知 Uncle幫我搭路,他想我有份穩定的工作。」

就是這樣,黎芷珊入了無綫的《 430穿梭機》。很快,第二位「男主角」鄭伊健出現了。

「我們拍拖都拍了差不多三年,好認真㗎,絕對不是『吔吔烏』!可能當時我們都後生,經常嗌交。」 鄭伊健後來經歷了邵美琪、梁詠琪和蒙嘉慧幾段情,都是黎芷珊負責採訪。

「公司最初有問過我介不介意採訪他,我說不介意,這是我的工作。由我問他幾時結婚,豈不更有娛樂性!」

她看得開,在兒童節目一做九年,由《穿梭機》做到《傳真機》,可謂經歷了兒童節目的 黄金年代。

她飾演的「殭屍孫女」收視率達 99﹪,成一時佳話,六叔邵逸夫還專程請幾位主持飲茶。

「有段時間公司想開劇捧我,但可能我太好用喇,兒童組那邊不放人,錯失了機會。」

她錯失了做女主角的機會,但得着的是另一位「男主角」的友誼。今次,是梁朝偉。

「我入去時偉仔已離開了《穿梭機》,但星仔(周星馳)跟他熟,有段時間我們經常一起吃飯。梁朝偉如今已很少坐定定做訪問,我對他說:『如果你肯做,會幫到我好多!』他考慮了一個禮拜就答應了。他是純粹為幫我提升在 TVB的地位,他知道在電視台捱有幾辛苦,又見我做咗咁多年啦,陰功!好感動。」


連夜逃亡

93年,黎芷珊離開過無綫一陣子,在外拍電視電影。這個時候,結識了吳鎮宇和張家輝。 94年無綫開《城市追擊》打亞視的《今日睇真 D》,急召她回巢。她主持經驗豐富,肯定是打仗的理想人選。

「那時甚麼新聞都跑,最深刻是有次深水埗發生兇殺案,成屋都是鮮血,血腥味真的嚇到我腳軟。還有一次在南京鄉村採訪爭撫養權案,被成班村民『圍』,我們被收了回鄉證。後來記協介入才取回證件,我們連夜逃亡。事後才知驚,但今天回想起來,又覺得這些經歷很珍貴。如不是做了這個崗位,哪會有這麼多見識?」

相比之下,在香港跑娛樂新聞簡直是零難度了。

「謝霆鋒一出道我就跟他做訪問,有段日子我是他的蒲腳。他不出街的,我們成班朋友便上他家 hea。那時,他應該是跟王菲拍拖。說到最大壓力,是訪問黃秋生,最初跟他不熟,問他一堆問題,他只答一個字,我腦袋要不停轉。他對不熟的人是絕對會黑臉的,但當熟了之後,你便會知道他其實是披着狼皮的羊。」

坐錄影廠邊個唔識?

從《城市追擊》到《全線大搜查》再到《東張西望》,黎芷珊的主播生涯不經不覺已十八年。我們每天看見她辛辛苦苦地跑,不知底蘊的會替她狼狽;其實,她很聰明。

「着靚靚、坐定定在錄影廠背稿,當然好舒服,但邊個唔識?我喜歡出外跑,這樣才可以見多些人, keep住自己的人際網絡。公司也知道這是我強項,尤其是去到外國影展,香港藝人見到我,會主動走過來做訪問;換了其他新人,嗌破喉嚨也沒用。」

只是,強項有時也會是弱點,這要視乎被訪者是誰。如有關 Uncle Stanley各房的爭產風波,她便恕難從命。

「公司最初也以為我會比其他人問得多,其實剛好相反。我就是知道她們不想說,一定不會問。我從來不會問令人難堪的問題,這點,我好堅持。」

能夠得到一眾巨星的支持,黎芷珊當然不是省油的燈。她有主見,有立場。只是,觀眾要到今時今日才真正認識她,未免有點英雄遲暮。

「我太清楚自己的性格,不是那種大野心的人。不錯是看着很多老朋友變成天王巨星,但我沒有羨慕,因為我喜歡自由,不會是天王巨星的料子。再說,我見得太多人情冷暖,當你紅時個個追捧;當你滑落時無人問津,太現實了。現在只希望能夠獨當一面,日後大家想起娛樂專訪,會想起黎芷珊。」

她的願望,是訪問系列添食,一輯一輯的做下去。


佢一定要紅

 關於黎芷珊的情史,當然未完。鄭伊健之後有邵傳勇,最近一位是無綫新紮小生張達倫。她比他大十二年,兩人拍拖九年。張達倫之前是模特兒,曾演舞台劇,黎芷珊老友蔡立兒也有份演,她去捧場,就這樣認識了。

「不是我介紹他入 TVB的,是藝員部找他。他最初真是不會做戲,做藝人始終要浸……結婚?父母在我五歲那年離婚了,我一直不相信婚姻……」 黎芷珊突然欲言又止,像有千言萬語無法啟齒。

「其實,我們剛剛分手了!(因為年齡問題?)都係,我心情依然好 down,可唔可以唔講喇?」沒料到黎芷珊這樣坦白,一時間也不知怎樣安慰她。她倒見慣場面,吸一口氣,繼續說。

「可能要同我分手後先會紅呢!我都希望過多幾年後佢會係我嘅訪問對象。佢一定要紅呀,否則對我唔住!」

四十六歲,黎芷珊目前孑然一身。

「俾死人叻哥講中囉,佢話我呢啲事業型女性,一定嫁唔去。」

嫁唔去,但肯定有人欣賞。


weekend睇咗個舞台劇叫“二度告白”, 個劇本寫得幾好…成個節目我都無望過錶囉! 呢套小本製作幾值得推介吓…不過剛剛做完咗, 下次re run大家可以睇吓!


噢! “中原一點紅”惠天賜與世長辭⋯佢咁後生…好突然! R.I.P! 同埋令人好懷念極其好睇o既 “楚留香之蝙蝠傳奇” ...

16 Comments:

Anonymous 匿名 said...

芷珊姐姐勁呀!

9:59 下午  
Blogger mandy said...

芷珊姐姐篇訪問真真好睇呀~~

11:28 下午  
Anonymous 匿名 said...

抄自tvb討論區:
「一咪問人你搵左咩料,之後重覆人地講的野,好似咩都唔知咁,請問你有咩作用,..噥,你唔係找到D當事人訪問,可以問到D人地問唔到的野..咁我做咩要睇你..當我地係白痴!!!
不果睇呢個連討論的人都無...應該都無咩人睇...HEA左佢咪算LOR..好過無野撈啦...」

11:49 下午  
Anonymous 匿名 said...

補充:
以上抄自tvb討論區的comments是關於「爆足一周」的.

11:52 下午  
Anonymous 匿名 said...

support芷珊姐姐~

11:10 上午  
Anonymous 匿名 said...

芷珊姐姐係blue-blooded!!!

6:04 下午  
Anonymous 匿名 said...

個咩"二度告白"張poster上面個女主角個樣好似關寶慧加謝安琪混合體.

1:55 下午  
Anonymous 匿名 said...

"最佳男主角"唔算好好睇,可能因為只得半粒鐘,同埋芷珊姐姐d問題好點到即止,唔夠深入... 不過個節目overall都ok,絕對好過"爆足一周"!

另外,惠天賜最右邊幅相有d似黃長興,其實我對佢同套"陸小鳳"已經無乜印象,我對佢個妹惠英紅印象深刻d!

8:30 下午  
Anonymous 匿名 said...

Oh I'm so sorry, 原來“中原一點紅”係“楚留香”唔係“陸小鳳”, see, 我真係對佢零印象!

8:34 下午  
Anonymous 匿名 said...

惠天賜係有做過"陸小鳳"喎, 西門吹雪嘛!

10:00 下午  
Anonymous eliza said...

芷姍姐姐個節目本身好好, 但俾個剪接剪到一舊舊, 唔知係咪就返平日播得返半個鐘, 應該係剪左好多冇出街, 好可惜!

11:24 下午  
Anonymous 匿名 said...

我都覺得接剪好差! 問題與問題中間冇啦啦cap下一段回答既其中一句, 搞到個感覺好碎濕濕, 同埋成日以為佢準備賣廣告...

我覺佢d問題都ok, 有時係睇個嘉賓肯唔肯share自已d野, 好似第一集劉德華咁, 佢唔係咁肯講自已既野, 所以有時都悶悶地, 劉青雲同吳鎮字就好好多!!

11:54 上午  
Blogger 芒姐 said...

係啦...見到芷珊姐姐終於有自己節目好戥佢高興!

12:37 下午  
Blogger 芒姐 said...

個節目內容唔算特別精彩或爆, 但勝在粒粒巨星, 聽佢哋吹吓水都幾好睇...但我同意係剪到枝離破碎, 希望之後會有出完整版!

12:38 下午  
Blogger 芒姐 said...

"爆足一周"呢d節目真係得啖笑!

12:39 下午  
Blogger 芒姐 said...

坦白講, "二度告白"個姐姐o係poster個樣已經唔係靚, 但真人真係嚇一跳, 完全同poster唔同樣!

12:40 下午  

發佈留言

Links to this post:

建立連結

<< Home