10-25(thurs) 名媛望族 + 令人眼前一亮的霆鋒
上一期o係fb做咗個揀"徐子珊定官恩娜"民調…我以為應該會係男的多d揀徐子珊, 女o既就會多d揀官恩娜! 因為以前官恩娜都係走徐子珊o個隻有d性感又邪邪哋路線, 但近年好似反而"入屋"咗, 所以我相信女仔會buy佢多d…出o黎o既結果係…無論男女, 都係buy官恩娜多d! 佢應該真係入咗屋! 至於徐子珊, 演技真係好咗好多…究竟會唔會有機會做視后呢?
嗰套台慶大製作”名媛望族”…其實個劇情ok喎, 個setting亦幾吸引…但真係sorry都要講句…點解成套劇都係啲鄉音/懶音藝員…楊怡、朱晨麗、周志文、馬賽、JJ…仲有馬明啲英文…聽得人好辛苦! 應該全線考慮配音!
仲有, 講咗十次都要再講, 羊兒啲鄉音點解會愈嚟愈犀利? 佢以前無嘢o架喎! 但近年好似仲嚴重過佢個前朋友黎諾懿! 同埋佢個鼻⋯真係想點? 可唔可以還我以前樣貌清麗的楊怡! 我以前真係好like佢的!
而我明白劇情係要描述一個中英夾雜的年代, 但d演員為講英文而講英文, 仲要講得好難聽, 確係突兀! 我絕對係buy馬明的踏實與低調的性格, 但佢d英文…真係好令人難受! 你唔駛講得好好, 但不能太差! 我真係接受唔到! 松哥同石修啲英文都好過佢好多…佢講到好似小學生咁…我唔明tbb點解成日都要玩啲藝員, 英文差嗰批就成日要佢哋表演講英文…好似上次”衝上雲霄”咁…吳鎭宇同吳唱k俾人笑足十年! 何苦呢?!
d年輕一背演員有d令人難受…其實可以將主線擺番o係d老一輩演員度…睇到松哥同mary姐…居然令我諗起小學成日睇佢重播的”京華春夢”…hohoho! 反而姑姑真係跌咗d watt! 我想話…其實我幾buy江美儀! 佢呢個年紀算keep得好好, 演技亦唔錯⋯同埋佢真係有啲似sammi! 但個角色未免cute得滯…哈哈哈!
而朱晨麗…你俾咁重戲佢, 其實真係玩佢! 佢無論個look定演技定發音, 都有趕客feel…點解要咁玩個港姐冠軍?!
松哥其實就真係幾得...男人的確係愈老愈吸引...抵佢o係劇中艷福無邊! 而三十年前o係”京華春夢”同阿姐撲蝶o既佢同樣吸引! 呵呵!
而播到第三個禮拜o既”最佳男主角”…之前一連三集有霆鋒! 都抵佢有三集o既, 幾好睇! 其實d comments係走兩極…fb大部份人都係對霆鋒刮目相看, 當然亦有少數覺得佢好over, 交緊戲!
我咁睇…即使你話佢交戲, 以前o既佢/無番咁上下人生閱歷o既佢, 絕對係交唔到呢d戲! 所以就算佢真係交戲, 亦交得十分唔錯…係最佳男主角的standard!
之前有讀者留言話高傲如芒姐都居然俾佢冧到…嗱嗱嗱, 首先我唔認(不過同時唔否認)我”高傲”o架吓! 頂多係挑剔…hoho! 不過我幾like你個comment, 單憑我o既文字可以睇得出我o既外在性格! 抵讚!
講番霆鋒…我又真係覺得佢長大咗+man咗好多! 同我以前停留o係佢”壞習慣”, “無聲彷有聲”年代o既印象好大分別! 真係士别三日, 刮目相看! 成個感覺唔同晒! 人真係要有經歷先會成長, 而佢十幾年o既經歷, 已經等於人哋幾十年! 我諗佢個人生分水嶺係02年單頂包案, 仲有o個期佢同王菲的分分合合, 之後再加埋栢芝o既三角戀!
單頂包案…的確係經典, 當年的轟動程度, 正如佢自己講…直頭好似選新特首一樣! 我記得當年網上仲有個謝霆鋒公仔頂方包遊戲玩添…好頂癮! 而唔知點解我覺得, 其實佢係最愛王菲…所以感覺放不低! 以前覺得佢同王菲o既”王鋒戀”真係離晒罩…但依家睇番, 雖然年齡同地位有好大差距…但其實以霆鋒o既心智同埋老積程度…年齡差距又真係唔係問題…分分鐘佢思想仲老積過王菲!
今次睇呢個訪問大家有咁大反應, 係因為普羅大眾 (包括我d auntie級朋友)對佢o既認識都只係維持o係佢憤世嫉俗o既年代! 所以依家再聽佢講嘢個落差太大! 佢初出道個格你真係會有d想打佢...但o個時去親睇頒獎禮見佢未開口唱歌已經俾人噓到九彩 (佢真係無誇張到), 又覺得駛唔駛咁慘呀? 霆鋒呢d真係睇住佢大, 睇住佢脫胎換骨! 抵佢守得雲開, 成為真正的成功人士 (而唔係關心妍同王祖藍等無啦啦獲得傑青之輩)…男人真係要至少過三十歲有d人生經歷先吸引! 霆鋒俾我o既感覺唔同晒!
仲有佢去科大講嗰個talk, 都講得好好⋯無學問真係講乜都無用…呢d係佢o既肺腑之言! 知識就是力量, 書到用時方恨少...由霆鋒把口講出o黎特別有說服力! 科大搵佢講talk真係無錯! 未睇過的朋友…值得睇吓…
謝霆鋒香港科技大學講座 (英文發音 中英文字幕)
posted by 芒姐 at 11:30 下午
23 Comments:
芒姐你好多point我都好同意，忍唔住要寫多d，唔好介意，哈哈!
-男仔女仔都鍾意官恩娜多d，好似我細佬覺得徐子珊個嘴唔知想點。(btw呢套戲又黑警又多吸毒鏡頭又勁多悲慘遭遇，真係太黑暗太沉重!)
-還我以前樣貌清麗的楊怡!係啦，以前感覺佢真係好乖巧，做訪問時覺得佢好得體好識做人，拎最佳女配角又叫大家鼓掌俾琴姐。但而家可能因為佢加建木偶鼻，加上近年角色太類近演技冇乜突破，仲要爆埋同羅仲謙既緋聞，真係冇哂以前默默耕耘既感覺。
－名媛望族個故事背景的確幾吸引，暫時最頂唔順朱晨麗，佢既鄉味極濃，個look真係好唔掂喎!點解要戴d咁核突既假髮，仲要馬明同吳唱k要爭佢。
－呵呵我見到松哥同mary姐都諗起京華春夢!! 松哥真係型（型過佢後生時做京華春夢），尤其係做民初戲，上次做蔡鍔同今次呢個華人大狀都勁charming。雖然我略嫌而家個角色浮誇左d，但佢都總算做到"風流而不下流"。
佢呢套戲的確艷褔無邊，不過諗返約十年前果套"無業樓民"佢都好似同張燊悅有嘴戲。雖然只係蜻蜓點水，但果時都覺得有點不可思議，好難想像張燊悅肯拍囉（成日覺得佢係d奄尖聲悶要改劇本既人）。
btw，我同媽咪覺得訊號王笑起上來真係同松哥有幾分似，話係兩父子都係說服力。
－之前睇左謝霆峰在ust既講座，幾有年青企業家風範。同埋見到佢真係好努力，佢cut左自己做特技既片段俾lucas做一歲生日禮物，片尾那幾句給兒子的話好感動。
題外話，謝霆峰係咪細個就去外國讀書或讀國際學校，無論佢既accent同fluency都好好。馬明雖然都移民加拿大同大學畢業，但可能大個d先過去，就咁聽佢講幾句英文就真係好似麻麻，明顯松哥俾佢講得更好（所以佢真係做到呢個角色)。
霆鋒太chok, 由始至終, 我只睇到佢嘅chok, 十年前係少不更事嘅chok, 十年後係步入中年嘅chok, 我真係睇唔出佢有乜改變, 對呢個人仍然不存半點好感。
其實石修d英文都好駭人, 遠嘅唔講, 剩係"怒火街頭", 佢都已經露晒底。
你話劉松仁幾man幾charming都好, 畢竟佢都已經六張幾, 你不停要我睇佢同四張幾嘅江美儀摷攬摸啜, 對唔住都要講句, 真係好難受, 之前唔知邊集連五張幾就快六條嘅韓馬利都唔執輸想同佢搞, 大佬呀, 有冇諗過觀眾感受?
羊兒個裝整咩越來越濃, 仲有佢個京劇裝, 無論近睇遠睇我都只係見到佢個鼻, 真係好大的鼻! 同埋佢d鄉音真係好嚴重, 究竟佢係咪香港人黎架?!
睇芒姐你個blog已經好多年, 字裡行間多少都feel到你嘅傲氣啦, 你亦不必急於否認, 高傲by my own definition一向都係一個褒義詞, 高傲都要講資格嘅, 而你亦絕對有這個資格。
btw, 王菲都係高傲女人的代表。
好驚, 唔知發生咩事, 以上第三個留言係我寫的, 我係"你幾like個comment的留言者"。
霆鋒d英文發音幾好wo
同埋我都對佢刮目相看
感覺佢成熟左好多,同埋有魅力左好多,
哈哈,完全認同你"男人過左三十係有吸引力好多。
藍
人, 無論男人定女人, 我都覺得係有人生閱歷的更吸引...所以你睇依家d所謂中女幾有market, 仲要係專吸引d後生仔!
霆鋒十年的經歷等於人哋三十年!
哈哈...好混亂...係咪即係頭4個留言都係同一位朋友? 條link一樣o既?! 但睇內容應該又唔似!
紙巾我記得喎...當年"鳳凰四重奏"o個位呀嘛!
我睇討論區見到依家好多男人覺得徐子珊索(咁我都覺得佢ok索, 尤其整容後...所以佢係成功例子...羊兒相反), 不過ella sweet d...所以我想知男女對佢兩個的喜好程度會唔會有唔同!
霆鋒o係香港好似係讀國際學校, edison同學嘛! 不過如果以佢咁細個去外國, 佢d口音不太native, 頂多係講得比較好的香港人! 不過好過佢同樣claim o係外國回流的"前妻"好多! 前妻的口音同馬明有得揮!
馬明好似中學畢業先去楓葉國, 但就算以一路o係香港讀書的standard, 佢d英文確係令人難受!
石修當年o係"衝上雲霄"將cami讀成camri係一大經典, 但d英文已好過佢劇中兩個仔唱k同鎮宇好多!
不過佢今次場法庭戲真係講得ok喎!
羊兒應該係內地落o黎, 但佢以前真係無鄉音o架喎! 因為我以前好奇怪點解佢家姐好似好有鄉土味同埋口音好內地, 但佢完全唔同, 咁我諗可能佢好細個落咗o黎...但我唔明點解d鄉音會無啦啦飄番出o黎?
唔好誤會...我係真心like你個comment o既! 你無理由睇唔出...hehe!
其實高傲都唔夠, 我是有點囂張的...:p
第二、三、四個留言都係我寫的, 因為冇自家website/blog, 所以求其用左tbb個url。
我認同人係有人生閱歷會更吸引, 不過謝生... 佢做任何野, 在我眼中都只係做緊戲, 一切都有晒計算...
徐子珊係整得唔錯, 佢同羊兒最大分別, 就係佢整得夠自然, 羊兒就太貪心, 直情好似想改頭換面咁, 結果搞成而家咁。
哈哈, 囂張感覺帶點粗鄙, 高傲就有class d, 咁我覺得高傲襯你d喎。
你幾like個comment的留言者
楊怡個京劇妝﹐我覺得好似男扮女妝咁﹐好鬼man﹗同埋真係好頂唔順佢個鼻﹐塊面又長... 完全係整容失敗...
松哥超好戲﹐睇呢個劇都係為咗睇佢。但啲親熱戲我覺得over咗囉... 唔需要拍到咁露骨啫。
馬明啲英文嚇死人﹗真係估佢唔到。佢唔係喺外國讀過書嘅咩? 講得好肉酸...
- kiwi
馬明响溫哥華讀大學,霆鋒就响溫哥華長大.就咁,溫哥華呢個地方太特殊,一個中文人响呢度住可以唔係點洗講英文嘅.如果好似馬明咁大個先去幾年,基本上係唔會令佢英文有太大改變,特別係佢讀電機工程應該連上堂都唔多洗講嘢.
RE: 紙巾
好同意你講楊怡.佢以前各方面都好好,唔知點解而家咁.我始終覺得同松哥最似兩父子嘅係林峯呀.佢地笑容好好好似.
溫哥華匿名人
楊怡以前真係好好，依家搞到咁，好可惜
乜徐子珊有整過容? 我覺得佢瘦咗好多咋，有無比較圖?
芒姐&一眾電視迷點睇爆足一周今晚原來做最後一集,2013後會有期?
微博有話係想研究法律問題而做到踩界地爆料...
岩岩就想講今集好似做返電台咁,做好多電話訪問,做完d訪問播完d片(拉姑個訪問唔錯的)之後講一兩句就下一單,節奏快左,冇咁八卦亂up既感覺;令我覺得佢可以走出14點收視既低谷的
最後,大家認為究竟可唔可以因為呢個節目唔做而還我地每逢一至五響23:45既幾分鐘《娛樂頭條》?!
楊怡以前真係幾靚幾清純! 完全唔知佢點解要整...無嗰樣整嗰樣!
徐子珊算係整得幾明顯嗰隻...我D有呢方面EXPERTISE的朋友話其實官恩娜都有整, 不過整得無咁顯著嗰隻!
哈哈..我都估唔到"爆足一周"可以死得咁快!
我幾like個comment的留言者:
哈哈...多謝你! 你似乎真係幾了解我咁...我哋會唔會係識o架呢?!
我識你但你唔識我果隻囉, 不過早在diaryland時代, 我已經係你讀者, 好捧場架!
你幾like個comment的留言者
哈哈，我估唔到我diaryland年代已經有非朋友的讀者！你令我受寵若驚！多謝你！
真係冇諗過馬明d英文甘核突, 可能以為話晒叫外國讀過書, 唔會太衰
發佈留言
<< Home