6-3 (tues) 若是有天你認得這段日記, 可否緊緊的相擁不要避~~

雖然喺fb已經discuss咗十九幾日, 不過都要喺呢度再講多次…好耐無睇過一套咁高質素o既電視劇（仲要連結局都無爛尾⋯同埋譚校長終於喺結局出現到更加錦上添花）、好耐未試過睇劇睇到喊、好耐未試過有套劇引起咁大迴響⋯”女人俱樂部”真係近年難得一見o既好戲, 有笑有淚…寫情寫得細膩, 對白精警, 同埋最重要o既一part...係香港獨有o既八十年代情懷, 仲有仲有…多首八十年代經典金曲! 曾志偉今次真係做番一場好戲!

 尤其到廿集後開始好緊湊, 晚晚有高潮位…當然亦有大量感動位! 24集阿旦死嗰part再一轉落去陸永見到彩瑤的女神出現爆笑癡漢表現…由喊死變笑死…個twist幾好! 愛情寫得好, 姊妹情寫得更好…尤其對於女校出身, 一人有一個m club的朋友…係尤其有共鳴! 大結局m club熟女同少女crossover一齊跳番嗰part舞, 達成多年夢想一段…真係令人好滾動! 

呢套劇仲令我奉獻咗第一次…去現場睇結局! 雖然嗰日本身有第二d嘢做, 但比我想像中早完場, 終於十點幾碌到去將軍澳睇尾段現場直播…哈哈…現場同大家一齊睇, 氣氛又真係唔同d…正呀喂! 好彩我有去咋…雖然我都覺得自己好crazy!

而劇中最unexpectedly好睇o既…係張慧儀同陸永嗰段姊弟戀…唔覺突兀不特止仲超襯…最尾幾集每日最期待係睇佢哋…每次出場都笑爆嘴...d對白簡而精! 咩"你好似真情嘅彩瑤, 叫我一聲阿海~”, “我想同我嘅女神唱首歌⋯係⋯笑聲笑聲滿載溫馨~~”, ”“彩瑤, 你一定要打敗雙雙呀~~~”…當然唔少得示愛嗰段經典對白, 真係冧死女…:)

我想話…我估唔到陸永做戲。貢。好。笑…:p 

同埋我又想話, 張慧儀仲索過以前, 女人味更濃…平心而論, 咁多個m club中女, 其實佢keep得算最好…身型fit, 個樣無硬膠咗…再加上近期睇完佢d訪問, 原來好有內涵…呢d真係贏晒! “真情”年代都唔覺得佢太正, 睇完呢套我幾like佢!