1-14(sat) “奪面雙琪”事件回顧

(續前篇)

記得99年“奪面雙琪”事件發生無耐, 有一晚睇完演唱會搭巴士返屋企, 無意中聽到梁詠琪接受“海琪的天空”訪問, 佢話其實當時都唔知點好, 如果唔係笑住行落樓梯, 唔通喊住落咩? 咁我又真係幾認同佢呢句說話o架喎…但奈何你面目可憎, 又真係唔怪得人…呢幾日“東張西望”同“娛樂直播”不停咁播番99年10月4日o個段片 (如果唔係呢件事, 大家都唔會咁記得鄭伊健幾時生日…我記得o個晚仲係台灣個921大地震o既振災節目之後, o個晚之後o既新聞, 已經唔係振災, 而係“奪麵”!)…又再憶起6年幾前對好勝gigi o既討厭…笑係ok, 但係你太高姿態, 笑得太克人憎, 係o個d忍唔住笑出o黎o個隻, 難怪俾人話好勝!

D戲唔好就唔好玩d咁“激”o既o野啦, 功力未夠一做得差少少就俾人講足一世o架喇! 你d戲又唔好人緣又唔好, 你就唔好去call記者做場咁o既真人show啦!



所以有報導話:

“當初鄭伊健和梁詠琪在一起的時候﹐遭到了“伊面”的經理人林珊珊的強烈反對﹐理由是覺得當時的梁詠琪“配不上”鄭伊健﹐更無法與邵美琪相比。為了給鄭伊健施加壓力﹐林珊珊把梁詠琪在鄭伊健家過夜的事情主動透露給媒體﹐並策劃渲染出“奪面雙琪”事件。但出乎意料的是﹐身負罵名的梁詠琪不但沒有離開鄭伊健﹐反而兩人的感情迅速升溫。如今兩人在娛樂圈的地位完全顛倒﹐梁詠琪的影響力已經遠遠超過了鄭伊健﹐因此很多人猜測是梁詠琪麻雀變鳳凰後變了心。”

…我都覺得唔係無可能o架!

不過講得最o岩o個句都係:“問題唔係佢"係"或者"唔係"第三者, 而係佢個人o既品行同人格o既問題”…呢句真係講得好好! 上次“梁榮忠朱慧敏事件”時已經講過, 最大問題唔係梁榮忠o既行為, 而係佢o既態度!

同埋佢勾o個個係一向形象超健康超討好超長情超有情有義o既鄭伊健…如果佢勾o既係壞孩子如謝霆鋒, 我諗大家o既反應都會完全唔同, 因為大家都預o左謝霆鋒係d周圍滾o既人…所以又係image o既問題! 大家對於“會照顧邵美琪一生一世”o既言論 (雖然其實呢dｏ野有邊個會信呀? 但係你建立o左個咁o既形象十年, 忽然?於一旦, 觀眾係接受唔到o架!) 仲言猶在耳, 你一下子居然等人年華老去時掟o左佢再同個o靚妹一齊…除o左背棄o左邵美琪, 仲係背棄o左全香港o既觀眾!

跟住再重溫埋o個d咩 “鄭伊健談曾承諾會照顧邵美琪一生一世”, 又咩“99年11月鄭伊健與梁詠琪在日本街頭激吻六次拍拖照曝光”等舊聞, 仲有佢o地個訂情音樂劇“仲夏夜狂想曲”o個隻合唱歌“一往情深”o既mv, 的確係睇得人好嬲o架嘛!



出o左“奪面雙琪”呢一連串新聞之後, 佢兩個o既人氣真係直插谷底…尤其係好勝gigi, 去到邊俾人噓到邊! 個樣又殘到呀, 個眼肚直頭好似會跌落個嘴咁…所以話人唔受歡迎時, 樣都特別衰 (由人紅自然靚principle度derive出o黎)! 我記得o個期咁o岩上佢主演o個套“心動”, 之前本來都有少少興趣睇, 但到呢d新聞出o左之後, 真係令人憎到佢入骨…即刻戲都唔想睇! 相信有好多人都同我一樣, 所以套戲o既票房都俾佢拖累晒!

到差唔多x’mas o個期, 有個商台搞o既“六神合體演唱會”, o個期o既我仲係好鍾意睇商台d拉闊音樂會, o個年幾乎六個都有睇 (當然好勝gigi o係poly 搞o個個梗係無啦), 另外o個五“神”, 包括文文 (好似同佢好熟咁, 其實只係我有兩個好友都好鍾意佢, 成日懶親切咁叫佢, 所以我又叫埋一份o者!), 走音王盧巧音, 陳奕迅, 楊千嬅同埋謝霆鋒都各有擁蠆, 其實好勝gigi都有一jar著紅衫o既fans, 但佢o地點大聲都蓋唔過全場人o既噓聲! 佢一出場就噓, 仲要個個活動都係咁…我當時都覺得: 洗唔洗咁呀? 佢係克人憎, 但都未至於好似殺o左人咁, 去到邊俾人噓到邊呀?! 我驚d人如果手上有石頭, 直頭會拿起o黎掟佢!

真係好少見d人咁齊心, 即使以前睇頒獎禮親身聽到謝霆鋒, 譚小環或者juno被噓, 都未試過咁大聲, 有咁多人一齊噓! 雖然o個下有小小同情佢, 但又覺得唔怪得d人o既…你做得藝人, 形象好緊要…活生生o既一隻狐狸精, d人梗唔鍾意你啦!

其實我都唔係由一開始就咁憎好勝gigi, 仲曾經好熱愛佢添 (講出o黎都驚俾人噓呀!)! 96年佢候選新人獎, 我反而係支持佢而唔係楊千嬅! 仲記得當年叱吒新人獎係邊幾個?嗎? 女金: 梁詠琪, 女銀銅應該係千嬅同何超儀是但一個銀一個銅啦; 男金: 鄭中基, 男銀: 陳eason, 而男銅居然係 “大飲茶”主持李中希…你真係估佢唔到 (拉得緊, 又得狠狠…)…

當時好多有梁詠琪o既節目, 我都會錄起添o架 (當然, 往後完全無興趣睇番)…所以話image係好緊要, 佢o個時雖然唱歌唱到走晒音, 但係形象清純可愛…佢當時plug o既“愛自己”同“某年仲夏”, 到依家我仍然覺得好好聽, 睇“初戀無限touch”, 都係為o左梁詠琪 (雖然o個期o既東東我都幾buy)…中六那年我破天荒剪o左個短髮, 都有一半係因為佢! 哈哈! 因為當年真係“重未如此”興過短髮, 咁又覺得真係幾型幾潮幾方便, 洗頭又超快, 但每日要gel頭返學確係有d麻煩! 不過我真係覺得o係o個段時間剪o左個短髮係超明智之舉…人生點都要短兩o下髮o既, 呢個係perfect timing!

好記得當時d人成日話梁詠琪+滕麗明+陳煒好似…三個人分別o係歌壇, tvb, atv初出道, 又係留o個期最興o既短髮, 又係眼大大…其實真係幾似o架! 當然, 你睇番10年後o既佢o地就梗係唔似啦!

之後好勝gigi o既形象已經愈o黎愈差…唔洗等到“奪面雙琪”事件, 已經唔多buy佢!

話時話, “奪面雙琪”呢個名真係改得好到不得了, 除o左抵死, 仲超貼切呀嘛! o個期好似o岩o岩上o左套戲叫“奪面雙雄”, 咁d傳媒就居然諗到個咁啜核o既名, 真係不得不寫個“服”字! 另外睇到有人形容為“舉琪不定”事件…哈哈! 都幾好笑…呢個名都好正!

(待續…寫得太長喇…好似寫o左篇論文去分析“奪面雙琪”同埋“好勝gigi”咁!)



原來聽日已經係“勁歌總選”, 差d唔記得o左! dee-till o既賽果預測已經無興趣…只係希望“最受歡迎男女歌手”係我最喜愛o既克勤同千嬅 (因為實唔會勁到俾何韻詩o架啦, 唯有寄望千fa…千祈唔好俾o個個“樂壇李笑好”容祖兒…又或者俾鄭伊面同好勝gigi囉, 反正佢o地兩個咁“受歡迎”…!