2-12(mon) 新春朱士田演唱會
剛剛過o左o既星期五, 去o左睇朱士田 (之前睇報紙佢話自己入行前想改呢個藝名, 點知俾雷頌德笑爆, 跟住先改o左側田呢個名) x hk phil o既演唱會…都唔錯呀! 只係嫌佢唱得太多英文歌…係真係太多o個隻!
幾年前去睇關心妍演唱會, 佢又係最錯係唱得太多英文歌, 仲要好多係未聽過o既添, 香港人無共鳴o架嘛! 今次朱士田o個d都聽過o下o既, 同埋佢唱得好聽過關心妍好多…不過就真係太多喇…雖然佢自己無咩歌, 但都可以唱o下其他香港歌手o既歌呀嘛?!
除o左唱得太多英文歌之外, 其他o野都好alright…佢唱歌真係超好, 捉感情亦都捉得唔錯, 仲要係英文咬字得, 唱英文歌有得加分…最怕就係d英文唔得o既歌手唱英文歌…即係你英文差唔係罪, 但就最好唔好唱英文歌囉…! 側田演唱會個嘉賓阿kary, 又係英文人, 所以合唱起“in love with you”都唔錯! kary唱呢隻歌其實真係唱得幾好, 反而唔知點解佢唱親自己隻得獎歌“愛你變成恨你”就好似扯蝦咁, 唔多掂…可能呢隻歌個range真係太大, 高音接低音又再接高音…有d難度!
至於個演唱會整體o黎講都算唔錯, 尤其係我不嬲都幾鍾意睇hkphil x流行歌手o個d演唱會…最好睇o個個當然係01年o既李克勤x港樂演唱會啦…成個rundown同埋揀d歌都好有驚喜…如果唔係克勤都唔會因為呢個演唱會而鹹魚翻生! 仲要o個時hku會subsidize d學生去睇呢d演唱會, 睇演唱會唔洗錢定唔知半價…實在太令人振奮喇!
當我睇緊呢個朱士田x港樂演唱會o既時候, 電視同時做緊“突圍行動”大結局, 聽聞差不多個個都死晒, 好鬼慘! 連走“忠奸老實人”路線o既吳唱k都死埋…唔怪得知套戲要新年前做完…咁鬼慘, 大吉利是咩?!
不過慘中都帶笑o既…o岩o岩o係網上面睇到呢個有關“突圍行動”o既笑料…其實無線d電視劇一有關於電腦o既劇情, 都會係笑料百出! 以前成日見到用word打email或者扮live chat, 同場個主角仲會自己讀番晒成封email出o黎…但今次呢個呢…都未免太好笑喇! 首先係有個“Live Chart Room”…bar chart, pie chart我都聽過…live chart就真係未聽過喇!
但最最最好笑o既係…桌面個“突圍行動”folder…真係好頂癮!
又, 唔知大家有無睇過禮拜六個“新春豬事町”節目呢?! 真係太太太抄亞視幾年前個“開心大發現”…成個主持架構, 節目形式都好似…咁做未免太核突!!!
posted by 芒姐 at 10:36 下午
12 Comments:
本來禮拜六冇點睇電視,轉台望兩眼“新春豬事町",點知嚇我一跳,直情抄足亞記“開心大發現”,無線你係大台0黎0架!
又係兩個前輩帶住d後生,教完d生活百科後,
又係一班人重做一次,然之後話"呢個方法係得0既!",連鏡頭都學埋,就係廣告返0黎有一個由天花板影落去0既shot。
本來抄野好平常,兩個台以前都你抄我、我抄你咁!但都唔好咁明顯啦!今次搬字過紙咁抄實在肉酸,亞記要收返無記版權費。
開心大發現都係源自日本的伊東之家桌o者
不過新春豬事丁呢......
其實個監製同亞視既係一樣
可能係佢帶埋個節目過檔@@
我都有留意到呀, 抄到十足十呀, 尤其連主持架構都一樣個下肉酸嘛~ 係囉, 無線抄亞視, 真係好醜怪!
哎呀, 芒姐你個突圍行動笑話好好笑呀~ 個live chart room 笑爆咀 :-p
Dearest Monjeh,
Long time no chat!
題外話again.....睇TVB 個節目表，隔世追兇 and CNY 特備節目之後，會做陀槍師姐!
I hope that's true!
順祝你情人節快樂, Also.....祝你豬年身體健康，事事如意！: )
just found this article
金牌主持何時回家？
培養主持，說易不易。《新春豬事町》中，6位雲集，人夠多，但誰能壓場？胡楓扮演《開心大發現》內的何守信，成一家之主，但年紀大，機器慢，大家只能敬老，怎像何B昔日的風騷，玩得夠放夠癲又能穩住氣氛？米雪也不及鮑起靜，至少駐顏有術，不能放下身段做師奶發揮師奶智慧。吳家樂等如張嘉倫，專責窒人搞笑，其餘靚女只屬花瓶，只剩利嘉兒最有經驗，但她人氣下跌，擔大旗，觀眾又覺不合……
人多未能辦事，所以氣氛總不及《開心大發現》。真想問一句，何守信幾時肯返娘家？
我都有睇呀!!!
根本就係一模一樣!!!
超核突呀!!!!
突圍行動個笑話
真係好好笑~~!!
咁都俾你發現到~~~ ^0^
Tommy,
哈...我都係咁o岩o係網上睇到o者, 幅圖唔係我cap o既, 我邊有咁勁呀!
匿名,
朱樂言的評論, 我都有睇到呀...希望呢個《新春豬事町》, 只係維持新春幾個禮拜啦...唔係真係超肉酸!
CC,
好耐無見喇!
我都睇到節目表話"隔世追兇"後係播"陀槍師姐"...我諗今次應該真喇o卦, 上年已經呃o左我o地一次無啦啦播o左"廣昌隆"...我想睇"陀槍1"啊...呢輯最好睇!
我都祝你情人節快樂, 新年快樂, 咩都快樂, 幾時都咁快樂...
雪人,
係囉...tvb堂堂大台咁抄atv...真係有d肉酸!
"突圍行動"笑話...我本人都覺得好好笑呀!
JJ,
雖然"開心大發現"都抄得好明顯O架喇, 但無線抄亞視, 又真係太肉酸... 監製過檔都應該諗個新節目呀...點解佢咁求其?!
Kitty,
O係"天下文章一大抄"事例當中, 佢可算抄得最核突O個個!
發佈留言
<< Home