2-25(sun) 律政新人王2
前幾日咁o岩睇到星島C1…居然見到呢單令我無比“震撼”o既新聞…實在太令我震驚喇! 講緊o既係近年我其中一套最鍾意o既劇集“律政新人王”話開拍續集…本來呢個消息應該令人十分振奮…點知…佢居然話係就係開拍續集, 但係四角主角之中只有劇中最唔討好o既角色vincent (陳鍵鋒)有得留低…咁即係點喎?!?!??!?!?!??!!
“馬國明踢走林峰演《新人王》
(星島日報報道) 03年無線推出《律政新人王》劇集不單錄得37點最高收視成績，更捧紅「新五虎」林峰及陳鍵鋒，事隔4年無決定開拍續集，唯獨保留「停牌律師」陳鍵鋒，另加入馬國明、官恩娜及李詩韻，原來今次馬國明有機會擔正男主角，多得戲劇分部助理總監梁家樹的欽點，力捧他成為獨當一面小生。
馬國明與郭晉安演出《同撈同煲》劇集叫好叫座，可惜卻因沒有劇集承接他令人氣下跌，直至去年奪得「06飛躍進步男藝員」，梁家樹覺得他是可造之才。最近他客串演出《突圍行動》，雖然佔戲分只有8集，但他在劇中的角色相當搶鏡，演技再次被認同。
昨日向監製關永忠求證開拍續集一事，他承認3月會開拍《律政新人王Ⅱ》（暫名），馬國明在劇中飾演一個重情重義的流氓律師，他的角色背景在果欄長大，所以劇情加插不少踩界行徑。記者致電給馬國明，追問梁家樹欽點他演出一事，他說﹕「沒有聽過，但當然好開心，自《衝上雲霄》後，梁家樹給予不少機會，第一次擔正男主角同陳鍵鋒拍住上，我會畀心機拍好部劇。」雖然他第一次演律師角色，但完全不擔心，一來他的姐夫是律師，專業問題可以請教姐夫，其次無線會安排劇中藝員視察律師樓的運作，以及到法庭旁聽做足準備工夫。
對於林峰、胡杏兒及廖碧兒齊齊「被飛」，關永忠解釋因為林峰與胡杏兒要拍攝《歲月風雲》長劇，他們要返內地拍外景出現撞期問題，所以必須加入新面孔。
他透露劇情會交代陳鍵鋒被停牌後變得自卑，女朋友廖碧兒離開香港進修及在外國結婚，陳鍵鋒的感情路波節重重，幸好有李詩韻的出現，她為陳鍵鋒折衣縮食，最後助他復牌做大律師，與馬國明這位超齡流氓律師拍住上。而官恩娜演馬國明的女朋友，原本她讀時裝設計，但因為馬國明關係令她改變主意做律師，最終變為一個有Heart的律師。”
陳鍵鋒我係ok buy o既, 但我更加buy林峰…同埋呢套劇裡面個角色, 確係林峰飾演o既阿ben吸引好多…如果現實生活真係有呢d無論人品, 性格, 外形樣樣都咁正o既律師…世界將會變得很美!!!
仲有, o係呢套劇裡面短髮爽朗胡杏兒亦都係出奇咁討好…佢同林峰飾演o既ling ling同阿ben係全套戲o既精粹! 仲有其他角色好似廖碧兒o既jessica, 譚玉瑛姐姐o既money姐, juno o既阿靚, 駱應鈞o既洪爺, 仲有阿ben一家人 (許紹雄+陳嘉儀+陳凱怡)…全部都做得好好, 起到一個超強化學作用…點解點解點解可以抽走晒d人但又開拍續集? 我完全接受唔到…!
雖然依家 (esp.舊年台慶頒獎禮 “得民心事件”之後), 我都ok接受馬明, 但我絕不能接受佢取代林峰做律政新人王囉…尤其係佢o係呢套劇做陳敏之個喜歡女人勾爛絲襪的變態佬做得太好, 太深入民心喇…點可以o係同一套劇入面忽然又做另一個角色喎?!?!?! 唔得唔得唔得呀!!!! 你當我o地d觀眾傻o架?!
你要拍你咪另外開一套講律師o既戲囉, 反正多一套唔多, 就算開一套俾馬明擔正我都絕對支持…但係點可以話係呢套咁受歡迎o既劇o既續集, 但係最受歡迎o個幾個主角又唔見o左喎?! 咁樣人面全非…掛羊頭賣狗肉!!! 即係好似當初知道“刑偵”開拍第4輯但係無o左張大勇同jessie一樣咁晴天pig pig…我寧願你開第二套劇!
不過刑偵4都好d, 起碼係完全另一個故事, 另外一d人物…但係呢套就係一個延續, 不過就無晒最應該留低o既角色! 同埋“刑偵”o個時都勉強話因為陶大宇離開o左無線, 咁無得講啦…依家林峰, 胡杏兒, 廖碧兒全部都仲o係度, 仲要仍然係親生仔/女…佢反而就抽起晒佢o地照開續集…你要捧其他人都唔係咁呀?! 你話佢o地拍緊第二d戲分身乏術, 咁咪唔好開住囉…有無咁等唔切呀? 唔等都等o左四年啦…依家草草開拍呢套咁o既“掛羊頭賣狗肉”續集…盞令所有“律政”迷失望!
本來我係好期待呢套劇拍續集…因為呢套係一套好有誠意o既戲, 當年大膽起用四個新人擔正, 效果仲出奇地好! o個時真係好喜愛好喜愛好喜愛呢套劇…點知依家呢個結果係最令我失望o既, 真係寧願佢唔好拍好過…我對無線呢個決定真係徹底失望!!! 我反對反對反對反對反對呀! 我要聯同所有喜歡呢套戲o既朋友一齊反對…我要去信tvb呀! 唔得唔得唔得呀…如果你真係拍…我會發起全民罷睇呢套續集!
另外, 前兩日收到另一份豬年大禮物…銀姐姐同john哥哥寄來的林峰利是啊! 實在太感動喇! 係我收到咁多封利是之中最特別+最有意思o既一封…仲要係用我最鍾意o既林峰利是封封俾我o既呢!!! 舊年送o個叠tvb利是封俾佢o地o既時候…都估唔到佢o地真係會咁快寄番一封俾我…好驚喜啊! 如果下次再o係中環麥當當撞到你o地…我一定會主動上前打招呼啦…來一個相認都好嘛!
posted by 芒姐 at 11:58 上午
15 Comments:
強烈同意呀!!!
馬明係好 陳鍵鋒仲好
但係話明係續集
梗係要有返上集既野至得架嘛
仲有佢續集d女主角唔係好得囉
芒姐你終于講呢個話題喇？我都強烈反對呀！
講真啊，隔o左o甘多年先至話拍續集，真係唔拍好過拍！
首先我對“續集”呢樣o野就無好感，通常d續集都會無o野搵o野o黎作，破壞晒觀衆對第一輯o既美好印象。我唔想睇到Ben同Ling Ling兜兜轉轉最後話要分手，or突然間殺出個第三者，or有病+有意外....總之第一輯如果有好結果，續集就會開始折磨佢o地！我真係覺得“續集”呢樣o野無好過有！
第二，就算係原班人馬開拍續集，都唔一定有第一輯o甘o既效果。你話喇，當年佢o地四個仲係好fresh o既新人，但係依家佢o地已經唔再係新人了，唔單止個樣成熟o左，氣質都唔同晒。
不過算喇，如果TVB係都要開續集，或者可以滿足下好似芒姐o甘想睇續集o既人。但係佢居然只out剩Vincent一個，o甘故事延續仲有幾大必要呢？？你不如開番個新故仔，同埋唔好叫《律政新人王2》！！
仲有，雖然我都係從台慶睇到馬明o甘好人緣，對佢真人有d好感，但係有乜理由要陳鍵鋒配佢！唔係親生仔就o甘對人！當年Vincent都係一個相當吸引人的角色！陳鍵鋒亦都做得好好！依家要佢配馬明，太可憐喇！仲要話續集Vincent變得自卑，Jessica跟人結婚！反對反對！亂o甘o黎！
仲有啊！學芒姐話齋，馬明個變態絲襪佬角色實在令人印象太深刻啦！過o左幾年之後，變態佬o係同一出戯度突然變o左律師，編劇唔係想同我講，變態佬o係監獄度學法律ar ma？
芒姐！你一定要代表我o地呢班“律政”迷聲討啊！開律師戯俾馬明擔正我支持（不過仍然接受唔到陳鍵鋒配佢），但係唔可以延續第一套個故仔！同埋！！一定一定唔可以叫《律政新人王2》！！！！！
反對無效
人地都開囉,算吧啦
(最多睇下佢地仲會唔會改名既o者~~
「新人王」呢個term,都out out地)
好耐好耐無出現過，就係因為見到芒姐寫呢個topic，即刻要回呀。我今日係公司見到tvb send 來的 fax，套野明天開鏡，開記招啦，即係話真係拍喇，陰公。我睇到呢張fax，見到d 配搭，簡直想暈，點解點解無咗林峰架?激死我。仲有仲有，官小姐點可取代庌碧兒同杏兒架??抗議呀。
我都好同意芒姐同其他網友既觀點啊!!!
1)李詩韻我都ok既，不過官恩娜認真麻麻喎。我真唔明點解佢仲可以在呢個圈生存到既，又冇歌，電影又唔多覺有佢，不過點解無記咁關照佢呢，拍完酒店風雲又做律政2? 純粹個人觀感啦，我覺得馬明+陳鍵鋒+李詩韻+官恩娜呢個配搭冇乜叫座力囉。我覺得幾年前既林峰係比今日既馬明紅囉，可能我不嬲都鍾意林峰多d啦，雖然台慶後都覺得馬明ok。而我最愛既陳鍵鋒，坦白講呢幾年都係普普通通，冇咩大躍進(對比吳唱k同bosco)，所以要馬明同陳鍵鋒"子貝"飛，實在有點令人擔心。
2)vincent個角色明明係好有自信既，而家遇到挫折變自卑都算。但好難想像jessica會離開佢囉。印象中jessica係d好怕事又好鍾意vincent（暗戀左好耐架嘛），照道理點會在vincent人生低潮時去外國讀書，仲要轉過頭結埋婚啊。
3)我都好同意＋＋咁講，"續集"通常都係衰，例如：刑偵/陀槍/妙手等，實在太多例子。好似妙手咁，程至美明明妙手1俾人感覺好長情，吳啟華更因此成為師奶殺手。點知後來每開新一輯，程至美就有唔同既新女。所以我覺得chris講果句"古有陳世美，今有程至美"，實在太中了。就算好似陀槍咁，三元留返o係到喇，仲可以結埋婚，點知又差d俾人姦，有個仔定女就死左，之後個老公又唔知做乜失蹤（我唔知ending係點)，真係好痴線。
4)阿ben同ling ling真係演得好好，好有火花。可能林峰同胡杏兒(尤其是佢個超型既短髮，果時真係好impressive好搶!)本身俾人感覺都係轉數高，口齒伶俐果種，所以見到佢地在戲中鬥嘴，真係覺得好盞鬼好有時代感。馬明似果d忠忠實實既人，今次陳鍵鋒又變埋自卑仔，d女角又怪怪的，成個配搭都好差。
只好講句，希望有奇蹟啦。好似初時我都話唔睇刑偵四，最後點知又睇左，而且覺得又幾好睇丫（雖然唔明點解個名要用刑偵系列）。
紙巾,
係啦...真係英雄所見略同!
其實我寧願佢唔好叫"律政2", 改過個名咪算囉...不過無線又要用番上一集個故事, 但夾硬搞到d劇情怪晒...jessica咁鍾意vincent, 又點會o係佢最需要人關心時走o左去外國結婚...咩劇情o黎o架?!
反正d舊人都唔見晒, 咪索性開套新劇, 最多好似"紅衣手記"咁搵"妙手"o既向眾仁同埋萬安生o黎客串o下, 觀眾反而會有驚喜! 另外三個無檔期, 佢最多咪搵陳鍵鋒入去客串o下, 帶起佢o地幾個囉...你要捧新人都唔係咁亂捧...咁樣掛羊頭賣狗肉反而害o左佢o地啦!
無o左阿ben同ling ling...真係最大敗筆...我唔知仲點可以用番呢個劇名?! 你都覺得胡杏兒個超型短髮look好搶呢...之前一路都唔係特別好, 但係呢個look真係出奇地得...仲好襯佢劇中個爽朗性格...現實生活中, 都真係好少有d咁o既律師...
初時知道開拍"刑偵4", 本來都真係鬧爆, 好彩佢除o左個名之外, 無o野係"刑1,2,3"的延續...o個時我都話, 你求其改個名叫"查案"咁都得啦, 做咩要用番"刑偵"? 如果唔係背住上幾輯o既口碑, 相信呢套劇會更加好...我都好鍾意睇徐飛同miss mo o架!
敏兒,
嘩, 真係好耐無見你!
今日睇報紙, 呢套戲已經開o左...真係唔知講咩好?
胡杏兒都話好喜歡呢套劇, 希望監製可以搵佢客串! 根本原班人馬O既配搭就係PERFECT, 依家咁開套續集係害O左D新人!
大部份喜歡"律政新人王"O既朋友, 都係喜歡佢O地四個年青人O既配搭, 尤其係林峰同胡杏兒...始終一定會先入為主...無O左佢O地, 我唔明點解仲可以叫"律政新人王"?
JJ,
我都知道反對無效...咁唯有希望佢o地會改名, 同埋寧願佢唔好交代阿ben同ling ling o個part, 當係一套新戲算喇!
++,
其實我係超級同意你講話"續集"永遠無好, 無論係質素或者係主角o既下場...除o左我勉強可以話"刑2"叫做仲好睇過"刑1", 不過其實個故事架構係"刑1"好d, 但感情線就"刑2"寫得更好...但只限於頭30集...後尾因為收視爆燈而夾硬加落去o個10集, 係累死o左成套劇, 夾硬寫jessie失憶, 離開大勇, 再將個騎呢劇情拖埋落"刑3"...真係破壞晒成個系列!
雖然有時基於對o個套劇o既情意結, 好想可以繼續睇落去, 所以都會想佢拍續集...但見到每次續集所帶來o既惡果, 又真係寧願佢唔好拍, 留低一個美好回憶喇!
"律政新人王"o個4個律政新人王, 雖然o係現實生活中唔會存在...但都確實係我o地o既法律界夢寐以求o既dream team, 四個年青人互相扶持, 互相幫大家諗點可以打好個case, 仲有o個份年青人o既幹勁...真係好得! 如果有間咁o既firm...我都想入囉!
雖然vincent已經算係四個之中比較唔討好o既角色, 但其實佢o係套劇頭10集 (即佢未走火入魔時), 都真係好吸引...靚仔, 有學問, 口才好, 風度翩翩...我o地成日話如果有阿ben同vincent兩個咁得o既男律師o係面前會揀邊個? 兩個都咁得真係唔知點揀...不過我都係會buy阿ben多d, 因為佢鬼馬d! (純粹係講個角色, 唔係話林峰同陳鍵鋒兩個人...雖然如果講真人, 我個人都會咁揀!)
Paul,
哎...係呀, 馬明係ok, 捧佢上位我都撐...陳鍵鋒更加應該發展不止於此, 我睇番深夜首播o個套"紅衣手記", 佢作為新人真係做得超級好, 同埋佢口齒伶俐呢樣o野我最buy, 無人比佢更適合做律師...所以開套新o既律師戲俾佢o地係絕對贊成...但唔係"律政新人王"續集囉
d女角就...哈哈哈! 李詩韻其實d戲唔差, 上次"肥田"已經讚過, 但佢未可以上位到做女主角...至於阿觀音娜, 個人認為佢d戲都可以接受 (講緊酒店風雲個街市妹...作為新人佢都演得ok), 同埋佢有時都幾搞笑, 尋日睇有線訪問佢, 佢講講o下d半鹹淡國語, 話d人減明減得太勁好肉酸, 好似兩碌竹咁, 忽然以廣東話爆o左"良碌竹"出o黎, 笑死我...但演技可以接受係一回事, 做女主角係另一回事...仲要佢講o野lur lur脷咁, 我唔知佢點似一個律師...
How can they call this 律政新人王 2 withouth Ben and Ling Ling!? I want to cry ar....>____<
『至於阿觀音娜...仲要佢講o野lur lur脷咁, 我唔知佢點似一個律師... 』
但係我記得芒姐講過現實生活中, 不口齒伶俐的律師其實大有人在... 你咪當套戲反映現實lor!
.
公主,
哎! 我都唔知講咩好...總之對無線呢個決定好失望啦...
Anonymous,
好記性呀O下!
但係通常D律師戲都係超級唔反映現實, 所以先會好睇, 如果將個真實O既法庭搬上電視, 相信會悶爆, 收視仲低過亞視O既"大城小故事"(定係"小城大故事"呀? 都唔記得喇!)...
咁算啦...我諗我真係唯有正如你所講, 當佢係反映現實, 當係紀錄片囉...!
發佈留言
<< Home