2007年11月24日星期六

11-24(sat) 通天幹探

套“通天幹探”做o左兩個月, 終於都做完…其實初段係幾好睇, 又幾好笑…尤其係john lung同晶晶未一齊之前…黎姿都真係做得幾好! 不過佢好難真係做到好醜, 個角色其實醜得o黎都有d靚囉 (好矛盾)…或者頂多話係一般囉, 不過係幾可愛!

之前已經聽話黎姿會死, 陳豪會變衰 (或者唔可以叫好衰o既, 係用唔正當的手法去捉鄭嘉穎囉!), 不過估唔到黎姿o係結局前一個禮拜就死o左...更估唔到係佢死後仲可以拖拖拉拉5集 (實則唔止5集, 因為最後一個禮拜每集個半鐘)…講點去拉鄭嘉穎…洗唔洗拖咁長呀? 呢幾集都幾煩o下…好心見好就收啦!

同埋敖嘉年又真係幾女人o既…成日都要佢做呢d角色, 但又真係好適合喎!

尋日娛樂直播訪問 “通天幹探”四個主角, 又居然幾好笑o下! 第一好笑就係揀敖嘉年訪問佢o地…平時佢做訪問o個d我都盡量唔睇, 因為真係超悶, 但係今次又係超級抵死…因為佢都係“通天”其中一個“要角”嘛!

成個節目都好好笑, 佢o地一開始話揀坐位都已經反映o左大家的感情關係, 所以ginger坐最右, 跟住係john lung, 晶晶, 莊文希, 最後係主持toby!

鄭嘉穎都話見到係toby做主持都打o左個突, 又勾番起佢o既過去…黎姿到o個時識先笑, 先發現佢就係toby…未免係太後知後覺!

呢個安排幾好, 平時“娛樂直播”好鬼悶, 呢集係罕有地好笑, 好似舊年“天幕下的戀人” 三個主角上“娛樂直播”接受訪問咁, 又係玩番主持amigo轉頭, 不停講唐詩詠 (佢都係“天幕下”三姊妹之一)!

跟住敖嘉年問陳豪話佢同蒙嘉慧好似有段床上戲, 叫佢講o下有咩感覺, 點知陳豪不停問番敖嘉年同鄭嘉穎: “你o地o個段又點?”…好搞笑! 佢o地不停話只係得親密照…跟住敖嘉年仲要問番鄭嘉穎同佢拍“親熱戲”時有咩感覺…?

睇佢o地訪問, 發現yoyo個人其實真係幾爽朗, 雖然佢滿口懶音再加埋佢d真經典o既英文發音…佢句“al佛”真係令人好“佛-strated”…不過佢真人都幾搞笑, 同埋真係幾爽, 同一般女仔好唔同, 睇佢同阿mo訪問就比較好笑…阿mo依舊幾灰諧, 反而鄭嘉穎未免太拘謹同認真, 黎姿就可有可無咁咁, 同埋轉數真係比較慢(所以話呢個世界係公平o既, 佢有美貌, 所以…)…如果唔係整個訪問會更好笑!



仲有, 有日無啦啦睇到亞視2點幾3點個投資節目“理財博客之投資多面睇”預告…覺得個主持好熟面口…check o下資料, 原來真係98年向海嵐/吳文忻o個屆個國際親善小姐殷莉! 點解咁記得佢…因為當時又係話其中一個最醜港姐, 話佢似長頸鹿嘛! 咁依家個樣好o左d, 起碼pro d!

原來依家朝早亞視好多得意戲重播, 關詠荷同陳庭威o既“觸電情緣”之後, 有套叫什麼“大家happy”!

“觸電情緣”成日都重播, 呢套“大家happy”真係聽都未聽過…有劉家傑同鮑起靜, 好後生的鮑姐, 同埋幾乎未睇過佢做戲o既劉家傑, 仲有好多舊香港o既景…幾吸引!

有無人知呢套劇係邊年播o既呢? 似七十年代尾啦…! “麗的年代”o個d戲好多都好有趣, 好似前幾年o係同一時段重播o既“再見狂牛”呀, “愛情長跑”咁, 又係之前聽都未聽過…但又幾好睇!

8 Comments:

Anonymous 你的多年讀者 said...

但自從蒙嘉慧做左al-佛同常在心第三者之後, 我就好唔鍾意佢, 同埋佢做親d角色都'懶'係女強人, 但一個講英文仲講得差過我阿媽+講中文都講到lur晒嘅人, 真係好難令人相信佢真係劇中所講咁強囉!

我不太滿意個結局呀, john lung明明仲係好掛住晶晶架嘛, 但佢一個屈尾十又同阿ginger姐一齊, 仲生埋仔添, 咁算點先?

哎, 我冇睇到果集'娛樂直播', 真可惜! 好想睇下阿toby同鄭嘉穎同台演出嘛!

1:04 下午  
Anonymous Kitty said...

通天幹探初頭確實唔錯,可惜後面太拖劇,我反而覺得最後一個禮拜拉鄭嘉穎拉得唔係咁精彩,所以都冇去用心咁睇。

"理財博客"o既殷莉我睇過,但你唔講我都唔記得佢係98港姐喎!真係令我有d愕然,不過宜家我又記番,o個時又好似真係有聽過呢個名o既佳麗喎!

亞視重播舊劇時段我都有留意,估唔到你都有睇"大家happy",呢套又係滄海遺珠,我覺得仲好睇過"觸電情緣",呢套"大家happy"係1983年o既(我都係上網查),真係出乎意料地好笑,又抵死幽默,強烈推介!套戲除咗好好笑之外,賣點係可以睇到劉家傑點樣做戲,佢講對白不論講中英文都好字正腔圓,令人想起"英語一分鐘",但又唔係唔自然,係比較有個人風格啦,演得都算幾好幾幽默。跟住就係要睇佢點追幾後生靚女o既鮑起靜。仲有就係演鮑姐前夫o既陳惠敏,佢又係勁抵死好笑,佢都好少做呢d戲,仲要係電視劇喎。仲仲有簡而清,車保羅,"iq成熟時"演"阿檬"o既周美玲都有,呢套佢又係鍾意車保羅。呢套戲由第一集開始已經幾好睇好笑,宜家已經做咗十三集,如果宜家先開始睇真係遲咗啦!因為已miss咗好多好笑野,不過仲未做到劉家傑追到鮑姐,相信之後都會幾好睇!

5:05 下午  
Anonymous christy said...

我重未得閒睇個大結局哈哈好在你呢度未提及個劇情姐哈哈哈 :P

我都有睇個訪問!!
哈哈一睇到係敖嘉年訪問佢地我自己都笑左先! 我覺得個訪問唔錯唔錯, 幾熱鬧下, 亞MO唔知點解我形住佢心情好好, 唔似有時既佢怕怕醜醜! 哈哈! 咁先係陳豪黎架嘛! :P
btw.. 好好笑呀你話黎姿有美貌但....哈哈哈哈哈不過咁又係, 佢o係果次既訪問入面有幾次都係唔知做咩慢左幾拍先黎笑... 令人一頭無緒..會唔會係佢呢期又探妯佬又拍劇搞到個人累到load唔到呀!?

btw. 好開心呀! 我今個星期去左黎我idol AARON KWOK個concert! 好睇到爆左呀!!!!!!!!!!!!!!!!!!!;D

12:19 上午  
Blogger 芒姐 said...

christy,

我都未睇個大結局呀...本來直頭住唔睇, 因為自從上個星期有一集唔覺意睇O左, 悶爆都未過O個個半鐘, 搞到我要去O左三次TOILET, 睇O左幾份報紙去打發時間先完成一集, 覺得未免太難頂!

我見到係敖嘉年訪問, 我自己都笑左出O黎! 係呀, 呢個訪問出奇地好睇! 黎姿正常係咪咁我又唔知, 不過平時訪問好似又真係無咁反應慢O既...

AARON個concert我都睇O左...我反而覺得之前幾次好睇D, 呢次係好DUM本, 但其實最想睇O既仍然係佢D精彩歌舞多過舞台設計...個人意見啦O下!

2:48 上午  
Blogger 芒姐 said...

Kitty,

不過套"大家happy又真係聽都未聽過...我又覺得劉家傑做戲太字正腔圓,似當年"IQ成熟時"班DJ...仲有鮑姐好厚粉...同埋其他好多人我都唔識, 所以都係比較喜歡之前的"愛情長跑", "再見狂牛"ETC..當然所有都唔夠"IQ成熟時"啦...

2:53 上午  
Blogger 芒姐 said...

你的多年讀者,

嘩! 你個名令人好疑惑...究音我會唔會係認你O既呢?!

蒙嘉慧其實外型係適合做女強人, 不過唔殅以開口講O野...同埋其實都反應現實O既, 因為現實好多所為PROFESSIONAL都係講O野LUR LUR脷...嘩哈哈!

TVB WEBSITE好似有得睇番'娛樂直播', 不過唔係全集, 再唔係等O下YOUTUBE或者土豆囉...佢O地咁多FANS, 應該會有人UPLOAD了...

2:57 上午  
Anonymous Al佛 said...

"大家Happy"既片段.
http://www.youtube.com/watch?v=_Sa55rJI37o
我估唔到劉家傑都會演戲, 佢做得都幾搞笑. 睇完呢條片之後, 你估下佢有冇用呢種方式向狄娜示愛呢? :-)

我一直以為鮑起靜係麗的/亞視死硬派, 從不亮相無線, 但係最近睇左由賈思樂同陳玉蓮主持既0個輯"Bang Bang咁既聲",見到佢上去做嘉賓, 佢0個陣時應該未到三十歲, 係我睇電視以來見到既最後生既鮑起靜.

7:26 下午  
Blogger 芒姐 said...

Al佛,

嘩...Al佛, 好勁喎! 連"大家Happy"片段都俾你搵到...呢套戲又真係幾趣緻O既!

O下? 我又真係唔知佢有離開過亞視 (或唔係一開始就做亞視)...?! 鮑姐後生真係幾靚, 係皮膚差D O者!

12:50 上午  

發佈留言

<< Home