2007年11月19日星期一

11-19(mon) 萬千星輝頒獎典禮2007後記+2007萬千星輝賀台慶

嘩…呢篇長到唔長…但又廢事分兩篇喇, 同埋為慶祝我偶像六叔100歲壽辰, 寫長d都無所謂…佢創立o左電視王國, 係值得我尊敬…你知道電視對我o地呢d電視精一生的影響有幾大嗎?! 100歲喎, 你估講笑呀…真係要quote番tvb25年的宣傳口號再改頭換面一下: “happy birthday yeah yeah…齊齊賀100歲lu, 源源心思, 更多趣味, 分分鐘送俾你…全為了你!”

Happy 100th to my idol, Uncle 6!!!!!



講番禮拜六台慶頒獎禮先, o個晚去o左hum, 部錄影機又壞o左, 搞到遲遲未有機會睇番呢個頒獎禮, 同大家搭唔到嘴! 好多謝今日有朋友借o左俾我睇, 終於都可以不太out!

本來我以為應該都無咩人 (指非電視精) 知有呢個台慶頒獎禮…但原來好多人都有留意喎…我去飲個朋友仲話多謝我唔睇台慶俾面去撐場, 有朋友又話去飲時佢o地轉晒台睇台慶無人睇現場盛況…都唔好話電視台已再無影響力, 原來仲有好多人有留意台慶呢樣o野!

雖然o個晚無得睇, 但都有即場去直擊個賽果…um…我個人認為, 係有某d位出人意表, 但出人意表之中又帶點你估到佢會咁 (你明我講咩嗎?)…因為搞o下d gimmick係無綫每年台慶o既一種特色…如果唔係佢驚第二日報紙得好少篇幅報導呀嘛!

其實大家睇o左咁多年電視, 都知道頒獎俾邊個得獎好多因素…如果齋論演技好, 秦沛夏雨劉松仁o個d一早攞o左男主角…但你亦都會明白, 永遠都唔會頒俾佢o地, 所以依家睇呢d頒獎禮, 只會要求過程好睇刺激, d嘉賓講o野精警, d得獎者攞獎時有d搞笑d o既speech帶o黎少少驚喜, 好似舊年馬國明咁…賽果只要唔好太離經叛道已經“al-lai” o架喇!

其實近年已經唔會為個賽果特別激氣, 畢竟大家都明白o左真係"一場遊戲一場show", 唔係到依家仲以為d頒獎禮係觀眾投票結果呀? 睇o左咁多年樂壇同電視頒獎禮, 都知道頒俾邊個係要配合好多o野, 好似樂壇就要同唱片公司傾掂數, 電視更加小圈子, 自己玩晒, 睇o下邊個聽話, 邊個lum得掂高層囉! 你話唔公平, 係o架喇...但呢個係所有圈子o既遊戲規則, 你覺得唔o岩玩, 咪唔好玩囉...就算出o黎做o野, 間間公司都係咁...除o左實力, 當然都係要得老闆歡心, 呢d我相信一般人出o黎做o野一年 (甚至唔洗真係出o黎做o野) 都會知...所以睇頒獎禮只係希望佢唔好分得太肉酸o者!



貼番個得獎名單…否則下年一定唔會記得:

萬 千 星 輝 頒 獎 典 禮 2007 得 獎 名 單

最 佳 劇 集 : 《 溏 心 風 暴 》
最 佳 男 主 角 : 陳 豪 《 溏 心 風 暴 》
最 佳 女 主 角 : 李 司 棋 《 溏 心 風 暴 》
我 最 喜 愛 的 電 視 男 角 色 : 陳 豪 《 溏 心 風 暴 》
我 最 喜 愛 的 電 視 女 角 色 : 關 菊 英 《 溏 心 風 暴 》
飛 躍 進 步 男 藝 員 : 崔 建 邦 《 東 張 西 望 》 、
《 娛 樂 直 播 》 、 《 勁 歌 金 曲 》 、 《 再 會 歡 樂 今 宵 》
飛 躍 進 步 女 藝 員 : 徐 子 珊 《 學 警 出 更 》 、 《 舞 動 全 城 》
最 佳 男 配 角 : 阮 兆 祥 《 溏 心 風 暴 》
最 佳 女 配 角 : 陳 法 拉 《 舞 動 全 城 》
最 佳 節 目 主 持 : 庾 澄 慶 、 鄧 健 泓 《 味 分 高 下 》
最 佳 綜 藝 資 訊 節 目 : 《 向 世 界 出 發 》
最 具 創 意 節 目 : 《 味 分 高 下 》
最 佳 宣 傳 片 : 《 歲 月 風 雲 》 序 幕 篇
內 地 觀 眾 最 喜 愛 TVB 男 藝 人 : 林 峰
內 地 觀 眾 最 喜 愛 TVB 女 藝 人 : 黎 姿
最 具 欣 賞 價 值 大 獎 : 《 拾 年 》
萬 千 光 輝 演 藝 大 獎 : 沈 殿 霞




今年o既賽果, 其實又唔係話特別驚訝, 同一條橋上年都玩過, 只係上年女, 今年男...都係為o左製造話題...所以其實俾人玩o既…係陳豪! 你俾兩個獎佢做咩鬼? 佢自己都話攞一個都夠…唔係話幫住佢, 我最buy o既始終係林峰…但佢同樣係無辜o既, 係無綫為o左拉高收視或者搞o下噱頭o既犧牲品! 因為一同大家事前expect o既賽果唔同, 就會引起好大迴響, 亦正係tvb想製造o既noise, 但係個藝人就慘d, 佢都未必想攞咁多個然後俾人話佢唔得! 如果其中一個獎頒俾夏雨或者林峰咁就好好多…所以我覺得今次呢個賽果其實係害o左佢, 因為任何觀眾, 尤其係其他候選人o既支持者, 一定會超不滿!

不過佢又係唔識講o野, 攞完最喜愛問佢視帝睇好邊個, 佢居然唔話鮑鮑而揀bobby, 你心諗都唔好咁講…真係唔識do! 仲有佢攞最佳男主角o個段speech更加唔得, 唔得大體亦無咩激動位, 人人都expect你整段“廁所宣言”o架嘛…我係無綫下次都唔會再頒俾你! 反而監製阿劉家豪幾識講o野…不過佢真係老o左好多, 可能我對佢o既印象, 仲停留o係九十年代佢同萬子合作台慶劇o既年代!

又正如上一篇post好多讀者所講, 林峰唔知點解近期成日刻意咁低調, 逢show都縮到最後, 忽然走o左馬明的低調路線! 不過佢又係慘, 當年“飛躍”輸俾陳豪, 依家到大家去到男主角位, 又o黎多次陳豪!


( 嘩, 好勁! 林峰d fans有制服添…果然係好pro!)

至於女主角o個邊, 同賽前預測一樣, 雖然傻o既都知細契呢個角色無可能最喜愛, 但係女主角呢邊一人一個獎咪皆大歡喜囉…o個邊搞噱頭咪玩死陳豪囉!

另一個俾人玩o既好明顯係廖碧兒, 佢已經升o左上一線, 但年年都要佢同d新人角逐“飛躍進步女藝員”, 都唔同grade, 仲要年年都要佢輸喎…好心唔好再提名佢呢個獎啦...好尷尬! 要被人形容為"連 續 多 年 食 白 果 的 廖 碧 兒 最 終 仍 是 大 熱 倒 灶 。 "…好慘! 仲要話今年同劇 (“舞動”)兩位演員都得獎唯獨佢無…真係慘, 唔好提呢d名咪好囉, 年年咁俾人影住個尷尬樣…玩死佢!

徐子珊攞“飛女”…正如之前“舞動全城”時所講: “最大o既謎係點解另一位女角徐子珊小姐做電影時俾杜琪峰, 梁家輝, 任達華個個力讚佢, 捧到上天, 又話係最有潛質新人, 演技自然到不得了etc., 但睇佢做電視又真係唔覺喎? 唔通電影同電視的要求真係差咁遠? 點解d comments會有咁大分別? 今次特登留意佢, 係比起上次“學警出更”好o左少少, 至少無咁浮誇 (雖然上次話係角色需要…但真係over o左!), 同埋佢個樣真係靚o左d…但上次係底線之作, 今次無上次咁令人反感唔代表係做得好好…究竟係咪我唔識欣賞呢?!”…到依家我都係覺得, 佢的確係做得好過“學警”, 但又未至於可以攞獎…不過可能佢係進步得比較多o個個o卦?! 雖然佢觀眾緣又真係麻麻…! 同埋佢當晚個化妝想點?! 好似俾人打腫o左隻眼咁…!

至於女配角…對於法拉, 我都同一眾女觀眾一樣不太buy o架喇…話無bias呃你啦, 人人都bias o架啦! 相信真係無咩女觀眾buy佢, 但睇o下討論區, 的確好多男觀眾係話因為有佢先睇“舞動全城”...然後話廖碧兒係大隻妙...所以都話係男女大不同! 不過平心而論, 佢d戲只係一般, 無可能俾呢個獎佢, 但係無綫要捧佢都無法…我同大家的意見一樣, 唔覺得佢做得特別好! 反而對於早排流行o既爛gag: “陳法拉的姐姐是誰? 答案係“陳法推”...呢個我欣賞喎...好爛但好笑!

同埋好多網友都話唐寧演技一定好過佢o地, 呢樣我絕對同意, 畢竟佢都做o左近廿年戲, 係資深演員…但依家無人撐佢, 人氣同埋被捧程度好似俾前兩年仲差…所以, 都話攞獎絕對唔係齋講演技o架啦!

同埋, 陳總對於內地我最喜愛男女藝員獎vs豬肉獎的解釋又的確係愈描愈黑…有d畫蛇添足!


(呢個搞笑…緋 聞 男 友 陳 豪 登 上 視 帝 寶 座 , 廖 碧 兒 即 時 獲 眾 花 旦 恭 賀 。)

崔建邦拿“飛男”同埋鄧健泓拿“最佳節目主持”…都無咩o野好講…honey嘛! “味分高下”兩主持攞獎預o左, 但係amigo就真係…連懶係避嫌都費事添…! 唔係話佢做得唔好, 但係要飛躍佢都唔係今年飛躍啦, 早幾年佢咪仲飛躍多d (同埋佢得獎段致謝詞講得麻麻)…無理由今年唔係樓華呀?! 佢行紅地毯個樣都灰諧過人…我buy佢!

最搞笑係報紙有段報道話:

"崔 建 邦 對 於 在 台 慶 頒 獎 禮 上 成 為 飛 躍 進 步 男 藝 員 , 他 自 稱 估 不 到 會 獲 獎 , 並 表 示 第 一 個 多 謝 是 陳 志 雲 。 被 指 因 是 再 得 無 綫 總 經 理 到 陳 志 雲 的 寵 愛 , 他 說 : 「 唔 關 得 唔 得 寵 事 , 係 觀 眾 投 票 選 出 ( 編 按 : 觀 眾 投 票 只 佔 一 部 份 ) , 每 個 人 都 會 有 高 低 起 跌 , 我 都 會 約 埋 鄧 健 泓 同 陳 生 一 齊 慶 祝 。 」 問 到 是 否 兩 個 honey 一 齊 同 陳 志 雲 慶 祝 , 他 即 避 忌 說 : 「 等 陣 先 , 我 唔 係 o架, 總 之 係 開 心 o野, 攞獎 係 對 藝 人 o既 鼓 勵 。 」"

…最抵死係o個句: ( 編 按 : 觀 眾 投 票 只 佔 一 部 份 )…其實係人都知觀眾投票係佔…零部份o架啦…呢d係後台強弱鬥爭o者!



講番個show本身, 一開始行紅地毯都幾grand…do姐仲要一邊行落樓梯一邊講稿, 好危險! 仲要連背兩日稿…好忙碌! 跟住小生花旦出場要逐group配番d台詞介紹, 有d多餘…不過佢pair up d人又係抵死…情侶檔o既陳豪同廖碧兒, 仲有不和o既馬浚偉同郭羨妮! 唔好一味彈, 其實呢part由陳奕迅lead 住o既opening做得唔錯, 感覺都ok grand呀!

今年係台慶頒獎禮十周年, 佢o地剪番十年來d片, 呢part都唔錯!

商天娥套“黃金甲”又係驚, 今日台慶正日我o係銅鑼灣撞到佢, 真係發福發得好交關, 睇o黎佢今晚都係唔會去台慶! 仲有, 成個節目見到阿姐不停咁玩相機…佢真係好鍾意玩!

sorry, 阿呂良偉真係唔知想點, lililurlur但又唔知想講咩, 最弊係佢對d女藝員一d認識都無…淨係識30年前o個d…連鄧萃雯同黎姿都算新一代女演員, 再加多個“千萬星輝頒獎典禮2007”…真係攞命…我見阿雯女笑到停唔到…可能佢就係呢個台慶頒獎禮o既climax! 仲特登搵佢前老婆周海媚同場, 海媚一出場奏“今生無悔主題曲, keep得幾好, 幾可愛!

不過今年搞溫情搞得唔錯, 先有司棋姐個女神秘到場, 都幾感動…其實佢個女係幾靚, 不過又真係唔夠佢後生時靚!

當然最感動o個段係久違了o既肥姐出場啦…佢真係瘦o左同老o左好多, 好虛弱咁! 睇到人好心o翕! 連do姐呢d咁強悍o既都忍唔住喊, 我諗佢做司儀咁耐都未試過…我都睇到…! Oh! 欣宜又係慘o既, 咁細個要面對咁多o野, 仲要俾人不停攻擊!

呢part都係值得讚…肥姐又肯俾面無綫出席…互惠互利啦…難怪可以最高收32點!



至於個“萬千星輝賀台慶”真係以前好睇好多, 同一日做晒所有o野, 連續三個幾鐘一氣呵成, 依家分開o左兩日真係唔知做咩? 仲要今年頒獎禮同賀台慶兩晚隔咁近, d artists咁短時間要練兩個show, 度兩日期, 咁短時間搞兩個大show…真係搵o黎搞! 仲要d觀眾比較關注o個part頒獎禮又已經做o左, 咁仲有邊個會留意“萬千星輝賀台慶”?! 仲要連d鬥o下邊個表演項目最高分o個d都無…我真係唔知今晚搞o黎為咩?

依家又唔係全台大晒冷, 都唔齊人, 無晒最最最top o個d…宣萱呀, 蔡少芬呀, 羅嘉良呀 (定係呢d已經約滿晒? 不過佢o地仲有得拍08 calendar喎!)…仲要今晚有好多藝員都無得出, 林峰, 胡杏兒, 廖碧兒都只係出o左兩下, 以前節目時間長d, 多元化d, 每人有機會出多d, 一晚搞掂共冶一爐好睇好多! o個時真係盛大好多, 感覺grand好多…感覺真係一個大日子!

又或者真係一個人去到某個年紀就覺得以前樣樣都係好d…年輕d o既朋友可以話我聽你o地覺唔覺得以前d台慶好睇d?!

跟住整個show又係一片混亂…一開場用o左鄭融隻“大女仔”, 點知同時又有d銀樂隊吹緊另一隻歌, 兩隻一齊播, 但又唔夾, 亂晒龍…點解可以咁蝦碌?!



最令人O嘴當然係今年o既司儀組合啦…洗唔洗十個人咁多? 仲要有3/4係以一個objective standard完全唔應該出現o係台慶司儀之列o既!

三個愛將崔建邦 (呢個預o左, 都做o左好似第3年喇!), honey鄧健泓 (呢期力力力力捧…都估到會有佢份!), 但係估唔到even貽興王都有…得做主持囉…佢又真係三位honey之中口才最差…寫o野咪好囉, 好過靠把口搵食, 口才唔得仲要先天不足 (指把聲)…點解唔做番作家? 佢d文章都ok呀! 可能成件事都係想幫amigo平凡, 說明其實捧佢都唔係捧得好誇, 因為之後o個d仲誇, 同埋佢係算做得比較好o既! 本來佢o地都唔係好克人憎, 但係真係太過份力捧, 一步登天, 真係會令人反感!

跟住更出人意表係連葉翠翠同陳敏之都有得做司儀…葉翠翠係有進步o既 (雖然佢選時同選完都唔buy佢, 但佢今年真係有顯著進步)…不過我依然唔明點解要揀佢o黎捧? 又唔捧陸詩韻? 可能佢聽話d啦!

但最唔明點解會cast陳敏之做司儀? 佢作為懶音界o既表表者…咪即係等如搵黃[金己]瑩或陳彥行做台慶司儀?!!! 仲有佢上鏡個樣真係唔太靚, 相反我見過佢真人真係唔錯…係其中一個我覺得真人同上鏡差好遠o既藝人…咁就唔抵啦! 所以我亦都係唔明點解會捧佢, 尤其係捧佢做司儀…錯晒!

四個新司儀o個part穿崩魔術表演勁悶, 佢o地4個除o左高大真係無咩好處, 或者應該搵佢o地行catwalk! 佢o地四個o既存在基本上係redundant, 根本是無需要咁多人, 為捧而捧…!



阿叻依舊係巴之閉, 但又記錯晒o野亂咁o黎, 明明係到李思捷/王祖藍/阮兆祥表演又話去廣告 (其實呢part已經係算比較有娛樂性…佢o地呢d先係實力派嘛…好過亂咁力捧d無實力又無觀眾緣o既人)…最唔得係射籃球o個part, 亂改規則, 又真係好克人憎, 難怪修哥不滿…佢無必要做到咁唔公平o架, 咪由得佢o地逐個掟囉?! 葉翠翠又係慘o既, 完全無人理佢, 佢有佢介紹人名, 阿叻有阿叻講o野…完全當佢無到…洗唔洗咁呀?!

“舞動奇跡”一班參賽者跳舞o個part都ok, 無得講, 謝天華係跳得好…完全同其他人差十個level…不過搵佢去同d完全無舞蹈底子o既藝員比賽跳舞, 又真係唔公平o既…佢以前都同阿王同級啦, 即係老師同學生鬥咁…有咩好鬥? 都唔同level…唔知無綫想玩咩? 咁阿一級豬楊思琦小姐其實都跳得ok喎, 好過佢做戲或者做主持好多…不如改行去跳舞啦!



跟住o個part吊高打鼓…真係唔知想點? 唔覺得好精彩, 柴娃娃但其實又要練得好辛苦喎…吊威吔咁耐都咪話辛苦, 但又唔覺得特別好睇! 佢o地幾個主角連樣都睇唔到, 淨係不停見到中間的“toby”敖嘉年…以為佢先係呢個環節o既主角添!

D環節真係一年比一年悶, 舊年都o翕得出一兩個比較好笑…今年o個d真係…

鄭嘉穎抽中獎, 居然唔見o左人, 差d連獎都無埋…令我諗起當年仲好霉o既honey鄧健泓都試過抽中獎但係唔見o左人, d人即刻話要抽過, 最終佢連獎金都無埋…人黑開真係有條路, 依家佢又真係有運行o既! 仲有, 阿mo怕醜個樣都幾好笑…佢負責抽獎緊張到連個“8”字都倒轉o左! 同埋我想問…其實點解次次都要skip o左“7”字尾o既台慶…4就話skip o者, 7又唔好意頭咩?!



套鬧劇真係一年比一年鬧…舊年不知所謂但都有d笑位, 今年真係無咩位好笑! 以前每年呢一part趣劇係最令人期待最好笑…好似95年劉德華o既“杏加橙”, 同埋96年李克勤o既“非法在異性體內插旗”…之後o個d已經好唔得…得閒要講番以前d台慶先得!

搵庾澄慶o黎做表演嘉賓, 順手前日o黎埋攞獎, 真係超慳水慳力! 仲劉家昌師傅, 又係 “一雞兩味”…前日做完頒獎禮, 今日又要再o黎表演過! 佢同衛蘭小姐表演o個首“心在香港”…真係out到爆, 勁悶…首歌未免太慢, 仲要唱晒成首, 後面d小生花旦做咁耐怖景版, 真係好可憐!

Oh, 今年又有番利孝和夫人以佢把獨有沙聲揭曉台慶密碼解碼方法…真係令人高興! 佢係每年台慶o既一個icon o黎o架嘛! 依然係舊年o個句: 希望下年可以結合番表演項目同頒獎禮…我個人認為依家分拆o左真係無以前咁好睇!

其實每年台慶之後o既節目巡禮都係好好睇, 但係要o過左幾年睇番, 對比番最終個製成品會更加好睇…!

20 Comments:

Blogger Unknown said...

我又link了你此文啦…哈哈哈…

星期六要工作所以無睇頒獎典禮,琴日要返學於是又無睇台慶…無計…
好在睇到最期待的節目巡禮…最鐘意之後對照有幾多節目真係有出街的…

2:23 下午  
Blogger Esaltato said...

同屋企炒大鑊,咩都miss哂冇睇到。慘。

喂,可以個七字似頭七個七呀,驚慶祝完冇得做呀。

2:37 上午  
Anonymous 匿名 said...

全場最好笑竟然係最冇plan過個一句:乜徐子珊你咁似男人架?"
仲有陳豪係咁伸隻手俾于洋握,于洋都冇厘反應,搞到阿mo停左係呢個姿勢好幾秒,好尷尬...
同埋我覺得利孝和夫人個解碼方法其實三個信封都係一樣,十成十想要人答18,就算未出哂所有number時已經覺得個答案係18

2:57 上午  
Anonymous 匿名 said...

成個台慶SHOW最可取都只係個扮野環節架咋~
搵李思捷,祖男哥哥同埋祥仔做呢PART真係明智到不得了!其實叫佢地3個做司儀咪仲好.我真係唔明TVB諗咩.呢3個人我不嬲都係勁BUY,呢3個把口又得,又識搞氣氛﹗搵阿貽興王做,又唔係唔知佢把口唔得架啦.O個句咩"祝大家來年生生88"想點啊?賀年節目牙?連佢隔離D司儀都想串下佢...我睇見佢見都登佢尷尬﹗而阿HONEY我都唔知佢成晚講左幾多句野...

個台慶鬧劇仲衰,睇呢D都預左混亂架啦.不過都唔係亂到完全唔知佢地做緊乜嘛?阿旺真係唔講都唔知佢係有份...哈!

最後...阿利孝和夫人對眼乜事要年年都好似中左孔雀石綠咁呢?

7:19 上午  
Anonymous 匿名 said...

哈哈哈講得冇錯! 最好笑真係"乜徐子珊你咁似男人架?" :P 玩野得黎又中point!

我以前都係最鍾意睇鬧劇,以前果d真係好好笑!! 但今年果個真係得個鬧字, 一d都唔好笑. 果個陳振華真係得個企字, 一句野都冇講過-_-亞旺本應會好好笑, 但係又俾叻哥同志偉霸哂d位黎講, 搞到成套劇講過都唔知有冇十句野.
其實而家鬧劇唔好笑係唔係因為班藝員唔敢玩返叻哥同志偉哥呢? 同埋今次個鬧刻真係好嘈呀! 好似佢地自己圍內玩咁,都唔知佢地做緊乜!

所以今年最鍾意個part係李思捷王祖藍同阮兆祥! 笑死我! 始終都係得佢地扮野扮得最放! 講真, 唔放真係唔好笑. 希望tvb會珍惜&重用呢3位人才啦!

今次堆新主持真係...睇住電視既我真係'鄧'tvb/do姐佢地驚。 嘩,有一part夏雨拎獎金後要'arc'時間去廣告真係一額汗呀!!! by the way 真係唔明點解會搵陳敏之, 葉翠翠都話係娛樂直播既主持丫! 唔知如果王賢誌會o係tvb, 佢會唔會有機會做今次既主持呢...?

3:21 下午  
Anonymous 匿名 said...

Monjeh, your prediction of the awards are so accurate! 果然是一級電視精!

Just saw 林峰 and twins sang a duet on 勁歌金曲. 林峰 really sang very well. Really like him. 阿嬌就唱得很差...

11:21 下午  
Anonymous 匿名 said...

我都有睇林峰+twins@勁歌金曲, 唉, 阿嬌真係唱得好差, 仲要係一開口就走音(講真我好似真係未見過佢唔走音), 完全flat晒, 佢真係好冇天份, 唉...

11:33 下午  
Blogger 芒姐 said...

匿名,

我都咁好彩睇到...阿嬌真係...嚇死我! 以前係差, 但係今次真係好差...無一個音係O岩O既...點解會倒退成咁? 反而阿SA好O左喎!

12:45 上午  
Blogger 芒姐 said...

Moo,

過獎喇...唔係我勁, 係今年"溏心"一定無走雞, 點爆冷都一定有3,5,7個獎落袋!

林峰係唱得唔錯, 尤其對比起TWINS (SORRY, 係阿嬌! TO BE FAIR, SA唱得唔差!)...不過我覺得佢上次同"溏心"一班演員上勁歌O個次唱得仲好!

12:49 上午  
Blogger 芒姐 said...

christy,

O個句又係抵死...搞笑係要靠志偉, 其他人就算有POTENTIAL搞笑又未必夠膽+夠地位去窒人!

陳振華又真係可憐, 一句說話都無得講, D人又唔敢搞佢, 好似無出現過咁!

係啦, 我都覺得阿旺本來可以搞到笑, 佢講幾句都幾好笑O架, 但不停俾兩位阿哥蓋過佢把聲, O徙晒!

李思捷+王祖藍+阮兆祥三個搞笑又得, 做司儀又得, 好過今年O個四位置九唔搭八新人...陳敏之的出現真係最一頭霧水!

夏雨夾硬接O左阿姐個波去拖時間, 但佢好明顯對今年賽果有不滿, 仲叫佢爆肚講真係一個愚蠢的舉動...佢有番咁上下地位洗咩"SEH"你呀!

12:57 上午  
Blogger 芒姐 said...

rainbow,

阿利孝和夫人對眼咪就係靚之嘛...哈! 同埋人O地喜歡說"INK門"...唔係阿姐重覆我都MISS O左..."I ALWAYS CHOOSE THE MIDDLE ONE!" 嘩哈哈!

個鬧劇亂都唔緊要, 但一D笑位都無真係令人失望!

咪係...佢三個真係有實力, 搵佢O地做司儀穩陣好多呀!

1:00 上午  
Blogger 芒姐 said...

van,

係啦...呢句真係笑位, 搞笑得O黎又唔係太OFFENSIVE, 志偉哥係有D計!

陳豪係咁伸隻手俾于洋握O個PART又係騎呢...佢搞極都唔肯握, 唔知想點!

解碼方法呢D O野...都係搵D O野俾利夫人做O下出下場開O下金口, 好過齋切蛋糕嘛!

1:02 上午  
Blogger 芒姐 said...

Esaltato,

我以為係話人"7"粗鄙O乍...但粗鄙無理由都要SKIP呀! 不過今年開始4字頭, 想避都無得避!

1:03 上午  
Blogger 芒姐 said...

Domotoiceko,

OH...咁俾面! 多謝先!

節目巡禮最好係下年睇番今年O個D, 睇O下邊D拍O左邊D換晒人都幾得意!

1:05 上午  
Anonymous 匿名 said...

嘩mon姐你真係re哂所有既comments!!勁!!

我都有睇果出勁歌
真係難聽d講句阿gill真係唔好再唱歌啦
出道左成7年連唱o岩音呢個基本要求都做唔到
相反阿sa唔算話唱得好好
但真係進步左好多 抵佢多野撈過阿gill呀
林峰唱歌又真係幾好聽ge
感覺佢好緊張 唱得就住就住
上次溏心夜真係唱得好d

btw一開始twins叫林峰做師弟...我覺得真係係有d諷刺haha..尤其係同林峰合唱完之後講!!

今年無線既節目巡禮講到好似好勁咁
期待佢既j2台
希望tvb越黎越好啦

4:44 上午  
Anonymous 匿名 said...

我覺得 TVB 應該晨早 out 哂果幾隻福祿壽啦!好鬼煩,一日到黑豬 up,玩親遊戲又無無譜,成日扮到自己好似大哥咁要人敬重,但佢地又從來無尊重過人,佢地都應該係繼成虫之後最討人厭又以為自己最受歡迎既人啦!

12:06 上午  
Blogger 芒姐 said...

雲,

哈哈哈...人品佢o地真係麻麻喇, 三個之中我比較buy志偉, 起碼佢講o野都幾好笑! 阿叻真係最唔該晒!

12:40 上午  
Blogger 芒姐 said...

匿名,

係呀, 無論讚我彈我鬧我o個d都會回...禮貌o黎o架嘛...不過回完真係好累!

咪係...初出道時我係buy阿gill多d, 因為當時阿sa紅d, 我呢d人懶係鍾意鋤強扶弱o架嘛...佢好似低調d, 又成日俾人比下去, 所以我撐佢! 但後來真係阿sa愈來愈進步, 唱歌又好阿嬌好多, 同埋至少識笑面迎人...呢d都係基本禮貌o黎o架嘛...尤其作為藝人!

12:43 上午  
Blogger Unknown said...

"你o地覺唔覺得以前d台慶好睇d?!"

回應下Monjeh呢個問題. 雖然台慶一直以來都喺一個單人游戲+鬧劇, 但喺起碼以前做得冇咁明顯, 而且真是"萬千星輝"賀台慶.

今年節目巡禮嘅劇集好似少咗D? 不過一樣都喺好好睇.

嗰個"盜亦有道"好似不錯, 題材應該幾有趣, 不過最令人注目嘅當然喺劉松仁, 陳玉蓮呢個組合, 真喺好期待, 希望唔好換角色啦.

至于嗰個咩"溏心風暴之家好月圓"就真喺唔喺幾睇好了, 好應該見好就收啦, 印象之中呢類受歡迎的劇集的后續都喺成績麻麻.

"珠光寶氣"俾我嘅感覺喺"金枝欲孽"+"溏心風暴", 可能喺因為角色嘅問題啦, 希望唔會好似"歲月風雲"咁, 有頭威冇尾勢, 如果唔喺嘅話, 八十集真喺有排悶.

12:49 下午  
Blogger 芒姐 said...

start,

呢句好中POINT: "但喺起碼以前做得冇咁明顯, 而且真是"萬千星輝"賀台慶."

係啦, 今年節目巡禮長O左, 但太多篇幅講其他綜藝/資訊性節目, 劇集反而少O左!

劉松仁, 陳玉蓮套劇係咪已經拍緊O架喇?

"溏心風暴之家好月圓"...係啦...續集一定比第一集差好遠, 都唔識見好就收O既!

"珠光寶氣"又係D人多支線多的劇集, 我個人對呢D劇感覺一般...反而輕鬆小品反而仲好睇!

4:03 上午  

發佈留言

<< Home