2007年11月30日星期五

11-30(fri) 李思捷

因為好多朋友話miss o左想睇番…o係呢度同大家share番…又係精彩o既!

今年台慶最精彩的一part: “萬千星輝賀台慶2007-熱爆巨星演唱會”…佢三個都真係又唱得又跳得, 仲要係好好o個隻! 唔好睇祥仔肥嘟嘟, 但係佢身手都幾唔錯o下…跳舞好過好多人! 難怪可以攞到40點收視!

祥仔扮阿rain係幾好笑, 因為夠騎呢, 樓華扮女人又係強…但我最欣賞反而係李思捷簡單而務實的表演…黃凱芹其實無咩特徵, 但佢都出奇地扮得好似…呢d先最難! 仲有扮城城都好似!


(萬千星輝賀台慶2007-熱爆巨星演唱會 - 李思捷、王祖藍、阮兆祥)

唔知大家記唔記得李思捷o係98年叱吒佢扮四大天王 (不過o個幾位被扮o既天王個樣好明顯唔係幾gur…可能真係扮得太似, 但點解我唔見有學友o個part?)…勁過晒d咩“殘酷一叮”幾屆台主啦! o個時仲以為佢會紅添, 點知過o左差不多十年, 佢都無紅到…其實佢o既成就真係應該不止如此…又係o徙o左! 佢扮o野真係最勁…但係又唔知無綫幾時簽o左佢呢? 更加唔明點解既然都簽o左佢, 又咁多年都唔重用佢呢?!



仲有呢段…扮劉華同城城, 我覺得扮城城o個段真係救命…似到呀…真係神乎奇技!!! 同埋sorry都要講句…佢o既唱功好過晒兩位天王!



尋日睇“娛樂直播”, 播歌o個part居然係cream o既李蘊首新歌, 估唔到佢咁快就單飛自己出o黎唱情歌…但係見佢依家個年紀同個look都好尷尬, 細路女又唔係, 大人又唔係, 好似未發育o既少女咁…點解要o係d咁尷尬o既年紀走出o黎? 大定o左先啦! 依家o係樂壇點定位? 佢唔同isabella咁, 13歲個樣似人o地30歲…可唔可以等自己個樣似番個大人先出o黎唱情歌呀?! 唔係咁等唔切呀嘛?!

仲有, 無意中睇到呢段新聞…真係咁都得? 都好remote喎? 要搵臨床身心行為學專家去評論佢o既行為…真瘋癲! 欣宜雖然係造作, 但又真係慘o既, 俾人笑足咁多年!!! 咩都笑夠啦!


專 家 話 : 自 信 不足 可 催 眠 治 療

自 《 兒 歌 》 頒 獎 禮 後 , 吳 卓 羲 與 欣 宜 未 有 再 合 作 , 兩 人 前 晚 再 度 碰 頭 , 吳 卓 羲 卻 急 急 腳 走 , 似 有 欠 風 度 , 臨床 身 心 行 為 學 家 李 寶 能 表 示 , 這 反 映 當 事 人 比 較 軟 弱 或 消 極 , 他 說 : 「 好 似 話 古 墓 有 咒 語 ,咁 出 番 o黎o既人 死 左係 咪 都 係 因 為 咒 語 呢 ? 當 事 人 已 經 形 成 心 理 陰 影 , 寧 可信 其 有 不 可 信 其 無 ; 又 或 者 係 受 到 身 邊 人 際 關 係 連 帶 影 響 , 有 o的 人 比 較 消 極 o既, 就 會 選 擇 逃避 或 者 避 開 佢 , 咁 對 自 己 講 都 係 一 個 保 護 作 用 。 其 實 好 多 人 都 係 咁 , 總 之 如 果當 事 人 定 力 唔 夠 就 會 中 招 。 」 李 寶 能 表 示 有 此 情 況 者 , 可 接 受 催 眠 治 療 強 化 自 信 心 , 令 他 清洗 負 面 記 憶 , 自 能 痊 癒 。


延伸閱讀:

2005-9-1(thurs) 觀眾不滿鄭欣宜吻吳卓羲投訴破今年紀錄



2005-8-27(sat) 2005兒歌金曲頒獎典禮

18 Comments:

Anonymous 匿名 said...

如果無記錯,叱吒果段係頒叱吒男歌手三甲前的tag,學友唔係三甲所以無扮到...
記得果時聽電台直播,真係以為係播帶的...

2:31 下午  
Blogger blue said...

唔知芒姐你有無睇今年英皇新秀大賽, 李思捷同王祖藍2個做司儀, 一開場佢地2個扮野同唱歌, 唱得好過晒d參賽者, 仲要好好笑呀陰功.
王祖藍仲要扮女人唱phantom of the opera, d高音唱得好好. 聽講佢係演藝first hon仲學過唱opera.
其實佢地2個應該去做eyt啦, 早排eyt d人扮野都唔好笑.

8:32 下午  
Blogger Unknown said...

有似樓華上歐瑞強個電台節目唱歌,又唱流行曲又唱opera,真係o晒咀,真人不露相露相非真人呢…

阿李小妹妹…硬係覺得佢媽媽好想做星媽(感覺而已…),實在咁細個不如讀吓書先,攪不好他日在娛圈發展得不好都有後路…
細路女入行,諗起李彩rain,三日唔埋兩日就見佢低胸露腿出呢,廿幾歲女攪到三十幾歲咁,感概…

8:53 下午  
Blogger 電蟲 said...

其實李思捷好多年前經已出過碟,不過番唱+唱騎呢歌居多,其中一首仲要係番唱城城的"失憶諒解備忘錄",d歌詞改過晒,而家去o個兩間k場應該都仲搵到黎唱~~佢o個時d歌藝其實麻麻,仲令人覺得佢似顏福偉o個類騎呢歌手,可能而家進步左掛~~反而我對佢印象比較深係做"喜劇之王"個導演仔,舉手投足都似足星爺,唔知佢係咪刻意扮o既呢?

11:24 下午  
Anonymous 匿名 said...

嘩!!!我仲以為係播帶,點知真係佢自己唱!!!點可以似得咁緊要~~~??不枉我咁buy佢!

我都記得係出過碟仲做過勁歌候選男新人tim!上勁歌金曲做勢仲冇fans,冇咩人理佢,所以我對佢特別深刻﹗

我都係唔明tvb,捧佢同祖藍哥哥做主持仲好過捧honey,amigo仲有阿‥‥貽興王啦﹗天份呢d野真係冇得講架﹗我真係覺得佢地仲有才華過阿amigo囉.之前祖藍哥哥做兒童節目時我成日睇架,因為好好笑,佢會整古d o靚仔~好抵死!!
佢地搞氣氖又得,要得體又得,口齒又伶俐﹗不過可能淨係唔識識擦鞋啦...哈-_-

12:33 上午  
Anonymous 匿名 said...

http://www.youtube.com/watch?v=VPy4Ze_7lIM

4:25 上午  
Anonymous 匿名 said...

真係唔記得原來李思捷98年已經扮過四大天王! 哈哈佢真係扮得好似! 佢同王祖藍都好EYT ARTIST FEEL哈哈因為扮乜似乜! I LIKE IT! :P
其實個人幾LIKE李思捷架. 有時我覺得佢拍d劇都好出架, eg. 爭分奪秒。不過tvb硬係唔多盡力捧佢, 好似冇人先搵佢咁..唉. 希望08年會見到tvb更加惜才啦!

至於果位李小妹妹. 我同意你既講法. 見到佢真係覺得好奇怪, 佢又唔係大個, (even個樣都唔係大呀下) 但係就唱埋d以愛情做theme既歌..真係好怪! 真係唔知佢想點.. 到底佢個fans market係大朋友定小朋友?? 如果係大朋友既話..佢好似冇乜說服力..甚至令人好想熄電視tim哈哈哈。 講真, 不如都係讀多幾年書先啦。 by the way, 少少低b諗法就係形住佢會好hill因為自己係artist哈哈哈哈哈哈哈 XD

7:23 下午  
Anonymous 匿名 said...

芒姐, 我想問下你可唔可以繼續轉貼你係蘋果既專欄呀? 佢話要訂戶先可以睇wor...唔知係咪因為我係外國呢?

點解台慶完全冇關詠荷既蹤影既? 果時做晒勢宣傳佢回巢咁ga wor, 哈哈...其實都唔知有冇人有keep住睇同事三分親, 我開始既時候都係因為陀槍情意給先睇, 關詠荷好勁呀, 印象中佢係一個師奶咁(對娥姐印象太深刻啦), 但已經又突然變左時代女性

之後睇睇下就梗係俾祖藍哥哥吸引住啦, 只係見到佢個樣我已經好想笑~~hoho

同埋覺得陳自瑤都幾慘, 手機男女事件搞到咁, 而家仲要繼續係到同佢談情wor, 演技一流呀!!

11:20 上午  
Blogger Unknown said...

未睇Monjeh呢個post之前, 完全唔知道李思捷原來咁有來頭.
唔知係咪第一部睇佢拍嘅戲係"隔世追兇", 所以先入為主咁認為佢個樣不夠friendly, 會冇乜觀眾緣?
掉轉來講, 咁都證明佢飾演的角色好成功, 令人(我)印象深刻.

12:06 下午  
Blogger 芒姐 said...

start,

哈哈..."隔世追兇"好迷石修個外賣仔?! 咁情況咪同我睇完"1號皇庭"之後一路都覺得姚瑩瑩低低地一樣?

佢做戲我又唔覺得特別出, 即係ok唔錯o個隻啦...但做綜藝節目, 尤其係扮o野真係一絕!

12:33 下午  
Blogger 芒姐 said...

牛奶妹妹,

哈哈...我成日覺得自己貼自己o野有d肉酸, 係有時懶想quote番先貼...再加上我懶啦, 或者有時間會不定期貼o下o係hejnom2 o既...不過要搵次的起心肝先...我知呢個內地site有貼晒好多視評, 幾方便, 可能你會有興趣:

http://bbs.ent.163.com/bbs/tvb/322402.html

係啦, 關詠荷曾經係一姐o黎o架嘛...不過佢個level o個d大部份都無出席, 好似蔡少芬, 宣萱o個d...雖然佢o地都有幫無綫拍劇! 其實我識關詠荷時佢多數做d"烈女"style/時代女性, 係"陀槍"先變o左師奶...依家個女強人look都唔係特別o岩佢, 尤其講英文時, 反而佢做阿媽o個part ok!

陳自瑤佢兩個又係好戲o既...但報紙話佢o地翻撻喎...

係啦, 我都係一見樓華就想笑!

12:42 下午  
Blogger 芒姐 said...

christy,

我都係鍾意李思捷做綜藝節目多d...今年台慶呢part佢o地終於有得發圍...咁先係o架嘛!

李小朋友的fans可能同佢一齊成長o左...依家d小朋友11,12歲都好早熟, 又大肚又落仔咁...可能佢o地嫌呢d歌幼稚添啦!

之前都話佢o係學校懶靚懶巴閉咁...不過當然傳聞呢d o野唔知啦o下...但咁細個讀多兩年書先呢樣一定o岩囉! 第時想讀都無得讀就慘喇...係人都知讀書開心過做o野好多啦!

12:47 下午  
Blogger 芒姐 said...

匿名,

thank you! 我最鍾意phantom o個段!

12:48 下午  
Blogger 芒姐 said...

rainbow,

我又真係唔知佢出過碟又上過勁歌做勢喎...果然係fan屎!

tvb捧人有好多因素o既...哈哈! 不過佢三個的確係可造之才, 口才同娛樂大眾能力又高!

12:50 下午  
Blogger 芒姐 said...

電蟲,

oh...唱騎呢歌o架? 下次我去k聽o下先! 其實又唔可以話佢歌藝十分好, 但佢主力扮o個兩位天王歌藝係點大家有目共睹...佢o地唔係sell呢d!

李思捷最煞食o既...始終係佢o既扮o野功力!

12:52 下午  
Blogger 芒姐 said...

Domotoiceko,

嘩! 咁勁? 我以前都個個禮拜聽albert au個節目, 不過近幾年無lu!

係啦...樓華唱歌真係幾得, 佢係差個樣同埋高度囉...不過依家佢唔洗靠樣都殺出另一條血路啦!

阿李小妹妹…絕對認同佢阿媽係好想做星媽!
上年"便利"單o野扮無辜 (詳情見http://hejnom.blogspot.com/2006_06_24_archive.html)...唔好玩啦! 便利係cheap, 但佢兩母女起碼都要負上一半責任啦...

2:56 下午  
Blogger 芒姐 said...

blue,

我有睇過呀! 王祖藍歌藝唔洗講, 以前佢未入無綫都有聽過佢個名, 之後做o個d咩"dada didi"兒童節目偶然我都會睇o下...終於佢都有出頭天喇!

早排eyt都係靠佢扮pizza姐食o左一次糊!

2:58 下午  
Blogger 芒姐 said...

nevil,

啊...原來係咁! 我都唔記得喇...不過當時真係"驚為天人"!

2:59 下午  

發佈留言

<< Home