9-24(thurs) 超級偶像…泳兒!
呢一篇好明顯係呼應番上一篇“超級巨聲…官恩娜!!!”以抒發我對"實力派"歌手泳兒o既失望! 佢今次o既表現都真係令我對佢“另眼相看”…自從睇o左呢集“超級巨聲”開始, 泳兒應該可以正式歸類為“偶像派”!
我明白歌手有時可能不在狀態走o下音都情有可原…但你連歌詞都未記熟 (仲要唔係咩新歌, 而係大家耳熟能詳o既“兩忘煙水裡”囉…老細!), 而且係男女對唱o既歌, 你唱錯o左累到人o地都唱錯埋…仲要係一個比賽, 真係情何以堪呢?! 跟住之後d人一面倒以為係個參賽者無記熟歌詞唱錯先, 泳小姐居然將錯就錯推o左個責任落佢度…我都真係睇到啞o左! 初時我以為我聽錯啦…再rewind聽多兩次…應該真係泳兒唱錯歌詞先, 然後兩人亂作一團! 當然, 以o個位參賽者o既水準, 就算無泳兒佢都一定出硬局…但佢咁樣直頭係送佢一程囉!
泳兒...你知唔知自己做緊咩呢...?! 唔係要你唱得好好…但都唔係唱成咁仲要連歌詞都唱錯晒搞到人o地死快d呀…?
"實力派"歌手泳兒展示非一般"偶像派實力"...咁樣一比之下, 觀音娜簡直頭係"天籟之音"呀!!! sorry, o係youtube淨係搵到呢個騎呢version…
而o個位參賽者林師傑, 佢每次表演個鏡頭就成日影住佢爸爸媽媽…一睇就覺得佢媽咪好熟面口, 但又諗唔到係邊個…有d似畢美娜, 但又唔係...諗極都諗唔到, 但我相信就算我問人都無人會知...o個種R爆頭的痛苦…噢!
終於決定上網去search吓, 點知真係search到喎...o係tvb網頁個討論區居然有人post o左”林師傑嘅爸爸媽媽”呢個題目…oh, 真係有人同我一樣覺得佢好面善…仲要幫我解開o左個疑團! 好感動! 有一種“解開疑團的快感”囉!
原來呢個世界, 真係有唔少電視精, 仲要係好好記性o既電視精! o個位網友話佢係廿多年前“新婚夫婦"選舉o既參賽者林韓珍! 一睇呢個名我就認得喇…因為我記得佢個樣幾靚幾sweet! 但應該係“香港太太選舉” (網上面搵到資料話林韓珍應該係1989年o個屆o既冠軍, 當然大家更家記得係1987年第一屆o既冠軍…後來從政o既龐曹聖玉)…估唔到廿年後再見番佢, 已經係睇佢o既下一代...個感覺好奇怪...林師傑居然係佢個仔...真係不能相信! 咁就廿年..時間未免過得太快! 不過佢媽咪個樣又真係好後生, 仲KEEP得好靚好高貴…好樣過阿仔好多!
仲有, 其實我覺得今次娜姐可以平地一聲雷, tbb其實應該都係有預計o既…佢o地實有聽過ella唱歌, 知道今次會引起好大迴響…令到網上有咁多noise…連facebook都即刻有個“力捧官恩娜上位團”…今次官恩娜真係上位有望喇! tbb應該係有預算地"製造"佢成為"超級巨聲"...不過咁樣都無壞呀…計算得好好添!
除o左官恩娜, 仲有藍奕邦都因為“超級巨聲”而紅o左! 佢o個d金句仲有人剪輯成一段片放上youtube添…哈哈哈! 佢講o野o既tone又係搞笑, 講得好慢條斯理仲要細細聲, 逐個字好清楚咁吐出o黎, 真係好似一個老師咁o既tone囉…咩“你唔需要再唱歌俾我聽, 因為你依家唱咩歌都取悅唔到我”, 仲有“actually you are not a good singer”…etc…好抵死!
新一代「金句王」 - 藍奕邦@超級巨聲...
posted by 芒姐 at 1:58 上午
13 Comments:
講起"偶像派實力"，第一時間就諗起幾年前既盧巧音。佢個名、歌同埋形象，令人覺得佢好另類好有實力咁。但自從聽過佢唱垃圾既live後，我真係嚇到呆左，亦令我明白凡事唔應該睇表面（雖然而家呢個世代咩都講包裝，但老實講，如果個"餡"同包裝相差太遠的話，這只會有反效果)。
另外都想講下謝安琪，佢live既表現又係幾飄忽。同埋佢好似愈來愈"偶像派"。我同個fd有一兩次睇到謝安琪唱歌，大家驟眼睇以為係傅穎。謝安琪而家都算貴為天后，但都仲要戴哂大眼仔同染金髮...
(上述純為個人看法，無意挑起罵戰，謝謝!)
盧巧音當年又係衰在"經典歌曲",佢有次上勁歌(定另一節目)唱咗唔知邊隻經典合唱K歌,勁勁勁難聽,包保你同我都會唱得好過佢
溫哥華匿名人
紙巾,
睇到你呢個post, 忍唔住要會o左先...
真係200%認同!
我睇番之前d post...真係寫得佢呢位"偶像派實力"最多...
http://hejnom3.blogspot.com/2005_07_20_archive.html
http://hejnom3.blogspot.com/2004_01_03_archive.html
http://hejnom.blogspot.com/2006/02/2-7tues-2005.html
佢呢d歌藝, 真係連"偶像派"的standard都好"maan"車邊...初出道都仲ok, 後來愈唱愈驚...但仲要以"實力派"見稱(當然, 佢可以argue話佢無話自己係"實力派"...咁我無o野好講)!
你對謝安琪的評語我亦十分認同...佢呢期唱live真係好番, 但之前有一期 (都頗長時間...應該係生日前後兩年)...係每次唱live都走音, 仲要係走得好勁o個隻...令我極失望! 當然, 又唔係依家網上反佢o個批講到咁差, 但同埋亦唔係捧佢o個批講到咁"天籟之音"!
同埋我都十級認同你o個句: "大家驟眼睇以為係傅穎。"-->成個娛樂圈的姐仔/歌星仔個造型同出一轍...大眼仔+超誇放假眼睫毛+亂谷胸...雖然係靚o左, 但真係有d本末倒置! 同埋佢無理由將自己定位o係theresa/stephy/lavina/rainbow etc.之輩度啩?! 又係錯晒!
溫哥華匿名人,
真係sorry都要講句, 盧巧音近8年的live表演, 真係10次有9次都出事...淨番o個一次可能係我無留心去聽...我唔知佢點解會變成咁!
咁如果泳小姐今次的表現同佢比, 只算小巫見大巫o者!
超認同你tbb擺明有預謀！
佢地成日搵ella做野一定知佢唱得
擺明係為做noise 無論佢唱成點有noise都贏晒
真係令全港o晒 ella 一夜成名
真係估唔到個節目真係爆到個巨聲出黎...
不過我覺得ELLA唱左5年仲可以有出頭一日都要多謝tbb
唔係有tbb不停搵佢拍劇做綜藝佢可能會同其他新人咁....唔見左
btw 9:30 既小鳳仙海味仲係超有韻味幾靚！
比學警好好多
Oh Monjeh, TBB has removed the youtube link on Lam Yik Bong... :(
林師傑father是林道權,杜棋峰d fd,前排杜生的機動部隊xx都有佢father份,在藝進同學會個網都會找到林生個名,林師傑可說出於演藝世
芒姐,你有無睇開十人巷架?今集(第八集)有個巨蛋白覺得森美針對佢而發脾四,我覺得森美話得佢都有道理架!你得閒都去睇下...
仲有呀!泳兒段片好難搵番黎睇!係咪己經俾人封哂呢!
匿名:
係啦...tvb一定係有計算...佢o地點會唔知ella唱成點...至少rehearsal後都知一定有迴響! 睇o下上一集之後幾多noise...今集就悶o左d喇!
匿名,
係啦, 估唔到藍奕邦段片都無埋...其實呢段個"創作者"都有大量剪輯過呀...同埋其實都間接幫tbb宣傳...tbb整走佢真係傻!
匿名
多謝告知...你唔講真係唔知林師傑父親都係圈中人...
匿名,
無呀...十人巷o係邊度播? j2?
係啦...大部份超級巨聲的片都被封了! 雖有上tvb.com睇啦!
開始我都覺得泳兒唱錯,後來我特登聽返關正杰同關菊英唱嘅原版,先至發現林師傑中間嗰度已經唱錯段落,泳兒算好識執生,配合佢唱埋落去。最後嗰句（即係唱錯嗰度），原版都只係得一句“往日意 今日痴（從今痴淚）”呢一句，但林師傑就唱多咗“笑莫笑 悲莫悲”，其實泳兒係冇唱錯。不過泳兒喺呢度又唔識得執生，又真係講唔過去嘅。
發佈留言
<< Home