2011年2月27日星期日

2-27(sun) 魚躍在花見

睇咗第一集“華麗明星賽”, 都ok喎…呢期星期日d節目都算唔錯, 10:00個“心有靈犀”就更加好笑, 尤其頭幾集, 姑勿論d artists係做戲定博出位定點, 大部份都做得幾感人…尤其白姐姐o個part真係幾好睇! 同埋睇得出佢o係阿paul面前真係幾慘囉!

至於星期一至五d劇集, “隔離七日情”其實我真係ok o架喎, 郭羨妮雖然老咗好多, 但o係呢套好似靚番d, 同埋成個感覺討好咗! 馬浚偉做呢d角色都唔錯! 但最進步真係欣宜, 比起o係“畢打自己人”自然咗好多, 同埋瘦咗好多…真係有志者事竟成囉!

今個禮拜上o個套“Only You 只有您” 暫時真係略悶…我初時仲以為係好似以前o個d “loving you我愛你”咁…點知完全係兩回事!

“魚躍在花見”呢…d食物同d景係幾吸引…劇情呢…就只能用“唔該晒”o黎形容! 要一班三四十歲o既藝人演繹d小子呀/可愛少女o既角色想點呢? Chi lam個樣的確係好娃娃臉 (同埋好靚仔…:p), 但個角色真係略見低能, 胡杏兒就直頭係tbb又想玩佢啦, 基本上佢依家做咩角色d人都不滿佢o架喇…但仲要佢做埋呢d白痴千金小姐角色, 當然更乞人憎! 阿laughing哥原來只可以做laughing哥類型角色, 佢做呢d深情角色加埋個chok樣的確令人有點吃不消! 仲有佢個角色小器得好無謂, 個細佬對佢咁好仲要妒忌成咁, 又要害佢…說服力唔夠大, 令人覺得佢奸得嚴重無聊!

嘩! 雜誌話葉翠翠整到個樣成個莊思敏咁…睇“香港有運行”又真係有幾分似, 仲有d似丘凱敏添 (當然氣質完全有別)…個樣真係又變咗好多, 但的確係靚過佢選港姐時好多!

蘋果o既“2011十大最期待無綫劇集” …我最想睇o既係…“點解阿 Sir係阿 Sir”囉!!!

至於呢期最爆o既娛聞 (or even係港聞囉唔知點解)可能係isabella同小小超分手…但其實我又覺得一d都唔驚訝, 絕對係大家foresee到o既結果…各取所需…頂多係驚訝在散得快咗d啫…:p

仲有呢隻"小明上廣州"英文版都好趣怪...查實我都真係好欣賞李家仁醫生...因為佢真係對唱歌有"pair唇"囉~~~:p



《小明 Visiting Guangzhou》 

小明 to Guangzhou; Rise to train fast so fast; Mama wants to buy; For our best friends uncle and aunt; 小明 to Guangzhou; See the town up and down; Turning left and right; Guangzhou Guangzhou round and round; Cantonese oh Cantonese; It's so wonderful; Cantonese becomes so fun; I can eat a bowl; 煲個冬瓜猛咁𡁻; Tell me what it is; Cantonese or Putonghua; Oh no oh my god!

8 Comments:

Anonymous 匿名 said...

其實謝天華D戲應該OK."法綱E人","女人唔易做"裡面都做得幾好.不過好多時D演員(特別係TVB個D)演到咗某個位之後就會BOTTLENECK,更可能會有倒退.
小小超...真係一早可以預計嘅,不過冇諗過咀快就大結局JEI

溫哥華匿名人

8:56 上午  
Anonymous 匿名 said...

講起謝天華,而家竟然夜晚12:15播套9年前既作品,咁岩入面d人近排都有戲出,個安排真係好巧妙...仲有下晝都播d以前海外發行過既劇(好似有林峰),tvb真係有趣

1:59 上午  
Anonymous ++ said...

芒姐你終於更新喇?

“華麗明星賽”第一集ok,但我覺得個節目一般囉,嘉賓生鬼就會好睇,嘉賓如果悶都會幾悶...

“心有靈犀”幾好。之前d嘉賓好笑d,好似莊思敏咁,依家笑料冇咁爆。不過感動依然,每次睇我都喊濕幾張紙巾...不過近呢幾集有小小覺得嘉賓為節目效果而特登煽情。

“Only You 只有您”蒙嘉慧and鄭嘉穎都做得唔錯。我開頭都以為係短劇,睇黎唔止我一個有呢種錯覺。

“魚躍在花見”大部份人都係想睇Chilam啫~佢個樣本身就討好,有觀眾緣,如果要佢深仇大恨我估觀眾寧願睇佢低能囉!胡杏兒都幾好呀今次,唔乞人憎啊。特別係我前排重溫完律政新人王,再一次發現當時四位年輕演員都真係做得好好,恰如其分,所以對胡杏兒有番d好感。

7:22 下午  
Anonymous ++ said...

“2011最期待無綫劇集”,我絕對揀《不速之約》,雖然蘋果上冇,haha...

7:31 下午  
Blogger 芒姐 said...

小小超與isabella各取了所需, 可能早分早著大家happy啦!

12:45 上午  
Blogger 芒姐 said...

係啦, 我都有睇到12:15嗰套陳年舊戲...又OK得意喎! 郭羨妮當時個樣飽滿d反而靚d!

下晝播邊d以前海外發行過既劇呀?

12:47 上午  
Blogger 芒姐 said...

眾所周知胡杏兒我一向ok buy, 律政新人王直頭飛佛啦...呢套真係四個當時relatively新的演員都做得好好!

不過胡杏兒近年係做咩戲都俾人笑o架喇...無辦法, 公眾形象呢d嘢一差咗就無得講 (雖然我一向都唔明點解會咁差?

12:49 上午  
Anonymous ++ said...

3月8號11:45播林峯嘅《布衣神相》(其實男一係林文龍至啱,嘻嘻)!好好睇架!!雖然古裝武俠劇情麻麻地,但賴藥兒好正,好有性格,芒姐你一定要睇呀!TVB未播過架!

我知你不嬲buy胡杏兒真人smart。我之前話過TVB永遠只懂得一種粗暴捧人法,胡杏兒係受害者之一。同埋自肥田開始佢d角色都幾令人反感,好似《當狗愛上貓》咁,《太極》胡囧囧更加係打沉咗佢,苦情戲佢真係唔適合。所以依家佢要從頭累積觀眾緣啦~

6:45 下午  

發佈留言

Links to this post:

建立連結

<< Home