1-15(sat) 2010年度十大勁歌金曲頒獎典禮
雖然好忙好忙...但勁歌總選呢d兒時o既年度盛事 (依家慘成年度笑話...:p)又無理由唔寫o既! 四大(今年變五大)唱片公司依舊缺席tvb勁歌總選...無左大半人, 都唔知仲可以點頒獎...大家係咁你杯葛我, 我又杯葛你...最終只會兩敗俱傷! 希望下年唔好再咁啦...搞到人今年完全無興趣睇任何頒獎禮...我居然連最易記o既叱咜頒獎禮過咗都唔多記得...其他就直頭無留意添啦!
舊年我寫道: "今年o既勁歌總選, 係芒姐 (亦都相信係大家) 睇過最令人尷尬o既十大勁歌金曲頒獎典禮! 個cast弱過d咩"禁毒滅罪耀北區"之類的細show…真係前所未有! 以前細個勁歌總選係一年一度最期待的大show中的大show, 感覺勁grand, 直頭要推晒所有約會捕o係屋企睇! 一到宣佈最受歡迎男/女歌星, 直情要企o係電視機旁一邊叫囂…個心仔差d跳埋出o黎咁滯!"...今年o既感覺依然差唔多, 不過有舊年的"經驗"打低, 今年預咗個show係咁上下啦! 個show本身好鬼求其, 似公司春茗多d...但係福祿壽臨時拉夫做主持其實係交足100%o架喇我覺得!
至於個賽果...最受歡迎男女歌手+亞太區男女歌手其實大家完全估到啦...無咩驚喜...初時o係街收到d朋友send咩"恭喜芒姐"sms俾我, 幾驚tbb真係玩到咁大頒埋個男歌手獎俾林峰...咁就真係玩死佢喇...好彩tbb都仲顧念佢個親生仔! 仲有...容祖兒終於真係破咗梅姐紀錄, 第6次攞女歌手獎...不過o係咁o既大勢之下都無得唔破啦...! 哎! 呢幾年勁歌總選搞成咁...真係呢...!
其他嘢就一貫悶局啦...十首金曲有好多首無咩點聽過添...哈哈! 同埋真係唔多好聽囉! 而阿古巨基以"義海豪情"主題曲攞金曲獎會唔會有d搞笑呢?! 但當然最估佢唔到係janice+jw首"男人信什麼"攞金曲金獎! 首歌係ok好聽o既...但係攞金中金又真係...唔好玩啦! 每份報紙o既形容都係"全場鴉雀無聲"! 不過我諗老黎都計算過...預咗係會俾人噓...但可能覺得有聲音總好過無聲音o既...反正呢兩年的勁歌總選都係一個笑話啫...:p
不過話實, 雖然leon唱歌真係...而且今次仲嚴重地中年發福...但係見到佢出場唱番96年金曲金獎"情深說話未曾講", 的確係全晚悶爆的勁歌總選最精彩一part...唔知點解見番佢出嚟唱歌心頭即刻湧起咗一股感動...因為佢的確係我哋個年代的icon!
仲有佢嗰d牛頭唔撘馬嘴亦係經典...4:00祥仔問你印象最深最難忘o既回憶係咩...佢答.......我笑咗...:p
我真係真心欣賞老黎o既你有你問, 佢有佢講, "睬你都有味"o既真性格...型! 反而比起佢以前個型仔look更...型!!!! 佢呢d根本自己心裡有一套既定答案, 你問佢咩佢照答自己諗咗嗰set答案...理得你死! 好鍾意佢呢種態度...hohoho! 金句王真係笨非浪得虛名!
哈哈...仲要多謝賞門人提供的"笑料"...tbb真係真心hea!!! 阿丁生又真係真心愛丁太喎...咁都留意到...:p
同埋我哋一致認為丁生原來幾funny...經過呢一年睇佢d訪問同對答技巧, 對佢改晒觀...IQ同EQ都拍得住"千嬋"...真係襯得起丁太! 原來佢哋真係天生一對...之前大家都睇錯晒!
o個次睇佢哋兩個上"big 4 大四喜"同埋佢o地婚禮o既"東張西望"訪問...丁生o既對答成熟大方之中又不失funny, 同埋睇得出佢真係好愛千嬅...同佢之前o係vrf年代或之後俾人o既玩世不恭形象完全唔同...真係失敬晒! 至於我o既前偶像丁太一向講嘢都好得o架啦...呢樣我真心欣賞佢! 搞到笑得o黎又唔會真係得罪到人! 我每次都一定會睇佢訪問...學到好多嘢!
同埋我覺得丁生丁太同王祖藍+李亞男o個pair一樣...o係世俗眼光愈唔襯反而愈排除萬難一齊, 可能咁先係最真愛...我真係衷心祝福佢哋囉!
又係要cap番個賽果...否則下年一定唔記得...
2010年度十大勁歌金曲獎項名單
金曲金獎：《男人信什麼》 衞蘭、 JW
最受歡迎男歌星：古巨基
最受歡迎女歌星：容祖兒
亞太區最受歡迎香港男歌星：林峯
亞太區最受歡迎香港女歌星：楊千嬅
新人薦場飆星獎：許廷鏗
─最受歡迎新人獎─
金： JW 銀：朱紫嬈 銅：吳若希
─最受歡迎合唱歌曲獎─
金：《初見》林峯、楊千嬅
銀：《一直都在》林峯、蔡卓妍
銅：《愛得起》鍾嘉欣、鄭融
─ 2010年度傑出表現獎─
金：陳偉霆
銀： G.E.M.
銅：超級巨聲
─最受歡迎組合獎─
金： RubberBand
銀： HotCha
銅： Benji and Lesley
─最受歡迎唱作歌星─
金：陳奐仁、 MC Jin
銀：張繼聰
銅：王梓軒
─最受歡迎華語歌曲獎─
金：《信今生愛過》容祖兒
銀：《以前，以後》 A-Lin
銅：《我最愛糖》糖兄妹
最受歡迎改編歌曲獎：《從新出發》關心妍
最受歡迎廣告歌曲獎：《綠野仙踪》容祖兒
─幕後大獎─
作曲：陳奐仁《男人信什麼》
填詞：陳詩慧《義海豪情》
編曲：梁至音《周星呢》
歌曲監製：雷頌德《無限大》
─十大勁歌金曲獎─
《開籠雀》王菀之
《破相》容祖兒
《義海豪情》古巨基
《金鐘罩》許志安
《愛的習慣》側田
《斗零踭 》楊千嬅
《直到你不找我》林峯
《 K歌之后》鄭融
《男人信什麼》 衞蘭、 JW
《放得低》蔡卓妍
當然都要重溫吓以前係年度盛事的勁歌金曲@芒姐再現:
2010-1-16(sat) 2009年度十大勁歌金曲頒獎典禮
2009-1-13(mon) 2008年度十大勁歌金曲頒獎典禮
2008-1-14(mon) 2007年度十大勁歌金曲頒獎典禮
2007-1-13(sat) 2006年度勁歌金曲頒獎典禮
2006-1-18(wed) 2005十大勁歌金曲頒獎禮 (下)
2006-1-17(tues) 2005十大勁歌金曲頒獎禮 (上)
2005-1-29(sat) 2004頒獎禮
2004-1-16(fri) 大迷信, 大迷信, 大迷信1993/2003?!
2004-1-11(sun) 勁歌後記
2004-1-10(sat) 2003勁歌總選
2003-1-5(sun) 2002年度勁歌總選review
2003-1-4(sat) 勁歌總選前奏
2006- 3-26(sun) 時光倒流12年...1993樂壇頒獎禮回顧
posted by 芒姐 at 12:58 上午
17 Comments:
Leon唱《情深說話未曾講》時，我不自覺地跟住唱，太感動啦！四大天王時期，我最中意Leon~ 佢d電視劇、電訊廣告、歌曲...陪著我成長啊！雖然我大個咗之後，對四個天王d感覺都差不多，不過我依然欣賞Leon率直&我行我素嘅性格。當然啦，佢後生時真係靚仔好多，哈哈！
另外我真心欣賞&佩服林峯。09年攞個獎俾人插得咁勁，佢越挫越勇，10年不跌反升，人氣仲高咗，銷量仲勁咗，演唱會場次double咗，得到嘅認同多咗（不過，人紅是非多，上C1頭版都頻密咗添~唉！勁無奈！）
tvb演員出身，難免d人對佢會有偏見。但佢化壓力為動力，我覺得佢EQ確係幾高。同埋我見到佢真係好努力好勤力，所以我對佢有信心！支持！
BTW，芒姐你個微博又唔玩啦？
比起"情深說話未曾講",我其實更想聽"夏日傾惰",因為果陣(1993年)真真正正係四大天王最火紅的一年.同年仲有華仔"忘惰水",城城"狂野之城",而學友嘅"我與你"一碟賣8白金!唔知點解嗰年D歌特別正,"執迷不悔","雨後陽光"ETC.嘩嘩嘩!
都唔知點解而家D人覺得TVB演員去唱歌+拍電影好似係天下奇事+嚴重偏見.大佬呀,四大天王中有兩個都係TVB演員出身.LEON都係拍咗幾年劇,紅咗先正式唱歌出碟.而電影,講真佢3個都拍咗好多爛戲.而TVB演員去拍電影唔啱?咁發哥星爺偉仔嘉玲青雲古天樂從何而來?究竟果D成日鬧嘅係唔係年紀太細唔知,定係過去30年都冇留意過娛圈而忽然對林峯咁大興趣.奇!
溫哥華匿名人
雖然佢係答得唔係好對路, 但個感覺又唔太突兀, 冇平時咁令人o嘴!可能個問題同答案都太"行貨", 出黎仍然有種大家對左稿既感覺!
eliza
『究竟果D成日鬧嘅係唔係年紀太細唔知,定係過去30年都冇留意過娛圈而忽然對林峯咁大興趣』
溫哥華匿名人:
其實原因只有一個, 就係D人根本擺明針對林峯, 當你唔鍾意一個人, 你可以隨隨便便可以列出一堆理由, 至於點解咁多人都唔鍾意林峯(唔止男性, 女性亦不乏反林峯之人), 或者佢本人/TVB/佢fans都要認真檢討一下。
高登定律，越紅越反。（除左 Eason之外，哈）網上世界反林峯既人可能唔少，但重點係真實世界真金白銀支持林峯更多。
林峯硬食完個亞太男，佢最多係消化不良，比著第二個一早飽死玩完左。
就計今年有幾多單生果C1，八婆雜誌新聞.....冇句好聽既說話，但佢偏偏就係打不死的小強， 反林峯既人都可以諗諗點解就係吹佢唔脹，同埋林峯何來如此大班die hard fans。
倒同意TVB/佢fans要認真檢討一吓。
tvb唔識捧人就的確事實，如果tvb識得捧人， 林峯條路會順好多。
見自己個偶像吓吓畀人插到萬箭穿心，唔嬲就假，但無可否認，林峯既部份內地粉絲真係幾偏激，不過fans多，自然咩人都有，又或者文化差異？
或者仇富都係一個原因, 都是社會的錯。
To 溫哥華匿名人，
幾個月前喺某人嘅演唱會度聽過"夏日傾惰"啦，所以我今次想聽Leon其他歌多d囉！哈哈！不過話時話，點解唔係medley架！先唱得一首唔夠喉啊啊啊啊啊！要所有金曲連住唱嘛！！咁難得出現！
TVB已經不復當年勇了，以前的確係巨星搖籃，依家變成一間工廠，啤d小生花旦出黎，而唔係造d星出黎。大環境唔同咗，導致TVB藝人只能夠局限在公仔箱內，若果踩過界，人地會覺得你個身份同其他環境格格不入。同埋你唔覺，歌手走去拍戲，比起演員走去唱歌，大家會容易接受d嘅咩？
其實近十年，TVB得兩個大眾偶像出到，一個係古天樂，一個係林峯。不過古仔個時代仲好小小，因為比較早期，而且佢都走咗好耐，出咗名之後離開TVB發展的確會好好多。回顧過去，其實TVB前後都捧過唔少小生，有d都的確紅過，可惜後繼不力，而林峯算係近年TVB唯一捧得起又唔沉嘅人，所以難怪TVB依家要加碼落重注買佢。(呢段歷史你哋睇下以前620 d愛將同契仔係邊個就知了。果陣時，其實620唔太重視林峯架咋，佢大概排在第4、5位吧！)
To 幾位匿名人，
林峯依家係"犯眾憎"，成為"眾矢之的"，好難唔針對佢囉。佢嘅存在，好大機會損害咗其他人嘅利益。喺電視圈，可能好多人俾佢壓住；喺樂壇，短短幾年，已經極具威脅性。所以電視果邊d其他fans成日插：林峯你唔好拍戲啦，去唱歌仲好；音樂果邊d fans又話：林峯你唔好唱歌啦，返去拍戲罷啦！
正所謂趁佢病攞佢命，趁林峯仍然處於上位階段，遠未到爐火純青之境時，插多幾嘢，最好插到佢從此消失，咁就眼不見為淨喇~ 如果林峯就咁俾佢地打沉咗，幾年之後，佢地反而會開始對佢寬容番，甚至可能會利用大贊佢捧佢，而去打壓其他潛在威脅者。
除咗針對佢而插佢之外，當然都有純粹討厭佢嘅人。唔中意一個人嘅理由實在太多。假設某d人覺得佢做得差、不值得咁紅，睇佢唔順眼都正常嘅。咁各花入各眼，冇咩特別爭議。
總之，越紅越多人插，呢個係普遍定律，因為受關注多咗。呢個係紅的代價，就睇藝人自己承唔承受得住了。而林峯，依家的確比以前多咗好多插佢嘅人，不過支持佢嘅人，亦都比以前多咗好多。至於佢以後會點，睇佢表現了。
TVB捧人手段的確好低劣。不過有d人覺得TVB太操之過急，我唔同意。林峯已經入行超過十年，如果捧人得當，可能早就紅透。依家已經遲咗，如果再遲，可能又跟唔上時代嘅變化了。所以我只會覺得TVB捧得太刻意太著跡太露骨，而令到d人反感。
我冇了解過"部份內地粉絲真係幾偏激"呢回事，不過就算係事實，我相信同文化差異無關。正所謂"林子大了，什麽人都有"，內地粉絲人數比起香港，實在龐大得多~
我覺得TVB捧人的方法冇特別問題, 唔刻意唔著跡唔chur到盡就唔叫捧啦, 問題係佢地派比林峯的角色都唔多討好, 我都唔知點講, 總之佢以前的角色較為討好, 又或者佢現在擔正的劇劇本大都有瑕疵, 唔明點解TVB唔肯比D有誠意的劇佢演, 下下都做情聖, 次次都係D三角戀的戲, 咁點會幫到佢?
今年仲要司儀cast都弱埋
講真, 今年真係感覺唔到完左頒獎禮...真係愈來愈差
RE: 內地粉絲偏激 AND 文化差異
唔知點解佢地係極反TVB定咩,連出現响林峯身邊嘅TVB人都一律係牛鬼蛇神.佢地什至認為吳唱K出現响林峯演唱會係TVB硬塞嘅有陰謀.匪夷所思到呀.
而如果林峯有負面新聞而D TVB人冇出聲幫口就話咩睇淸真面目.但係D英皇人好似古巨基之類講兩句好說話就覺得"真係好人". 就算明知係門面話都覺得咁先啱.係唔係文化差異?
不過ANYWAY,林峯EQ超高嘅.佢地林家由顯赫一時到文革到落香港到再白手興家.傳奇過TVB劇.俾人插呢D挫唔死佢嘅.
溫哥華匿名人
港台的十大中文金曲頒獎典禮比較好看
畢竟四大/五大最紅的歌手
都很久沒有在小熒幕出現了
靠容祖兒跟古巨基撐著的tvb
看太多太密了也會有點膩
其實欣宜嘅EQ重勁.
仲有周秀娜，佢嘅EQ都好勁！
鄭少秋的EQ也絕佳！
To 匿名人，
乜你唔覺TVB永遠只懂得一種粗暴捧人法嘅咩？而且TVB只識一期集中捧一個人，其他藝員喺呢段時期就好似投閒置散咁。以前好幾個小生花旦，都係受害者。佢地受捧時，不止一次被TVB擺上枱，處於風口浪尖上。樹大招風，槍打出頭鳥，人地梗係集中火力攻擊佢地一個架啦，所以就咁打沉咗。前車可鑒，捧人咁刻意咁著跡咁"only you"，一定冇好處。
至於你講到林峯現在角色或劇本問題...我記得添哥曾經有喺一個訪問時講過，大意是，佢都想搵林峯，但唔係佢想就有一個林峯俾到佢，因為輪唔到佢揀。呢幾年，劉家豪監製嘅劇都有好高收視，好似溏心家好談情...佢中意用林峯，但佢d劇又偏向師奶婆媽，你話喇~
雖然我都認同林峯以前d角色更多樣化更有挑戰性(我中意)，不過凡事兩面睇啦，劉家豪俾林峯嘅角色普遍都好受歡迎，冇呢幾個角色，可能林峯都冇咁爆。不過講真，我個人就真係唔想林峯再拍劉家豪監製嘅劇啦，皆因本人對吵吵鬧鬧嘅劇已經厭煩~
發佈留言
<< Home