11-8(mon) 抱抱俏佳人
終於睇咗"抱抱俏佳人"…真心得喎! 個故事同情節寫得唔錯, 溫馨寫實得嚟又要有好多笑位 (有d真係幾好笑吓)…即使"pit"開三個主角我都好buy呢個元素, 套戲本身都真係得囉...鄭丹瑞同黃真真係有d計! 咁當然, 林峯+楊千嬅+周秀娜三個我都buy又真係令套戲再加多咗好多分o既!
同埋我有d唔多buy林峯o既朋友, 睇完都話覺得佢ok cute囉...選角稱職應記一功! 佢同千fa呢對姊弟戀又真係睇得人好舒服…同埋, 可能呢期真係興姊弟戀…早多十年睇可能個接受程度又無咁大o既! 依家可能“兄妹戀”反而怪咗添…hoho! 而周秀娜o既演技作為新人o黎講我覺得都算幾ok! 仲有, 麥玲玲師傅都做得出奇的好...係一大驚喜! 至於其他綠葉, 好似千fa身邊的四位知己阿毛姐, 徐子珊, 廖碧兒等都做得恰如其分…坦白講, 呢套真係得…嗰套什麼“翡翠明珠”根本無得比, 完全唔係o個回事…攞佢o黎同“抱抱”比簡直係侮辱咗“抱抱”囉…hehe!
呢排去睇咗好多舞台劇…上個禮拜又去咗牛池灣文娛中心睇朱茵同何偉龍嗰套"瘋狂夜宴搞偷情"...都算唔錯! 香港舞台劇應該支持吓o既! 朱茵真人比上鏡靚好多…我平時對佢印象只係一般….但今次見到真人真係幾索! 反而同場見到作為現場觀眾o既廖碧兒, 比起我前幾年成日喺中環撞到佢o既年代真係跌咗watt, 不過真人反而好瘦...完全唔係平時俾人講到佢咁"大隻仔"囉…可想而知郭可盈o既真人應該會瘦過火柴人! 咁都係有d肉地好睇好多!
上個禮拜開始播o既“刑警”, 我睇咗幾集啦…因為有80年代五虎之中o既兩虎聚頭已經夠吸引, 一見到三哥同華黃日華一齊, 成個80年代的感覺返埋o黎, 仲要加埋陳秀珠, 李國麟咁…真係好有親切感! 至於劇情, 暫時睇都ok…要之後睇落去先可以再作評論!
至於“巾幗”, 我知道個個都話好睇…但我同小部份朋友就覺得太過“劇力萬鈞”, 太heavy…加上個劇種都唔係我杯茶…所以我真係無咩點睇! sorry, 恕我taste怪, 同大眾唔同…hehe!
仲有…尋晚坤哥o係“金曲擂台”扮哥哥o個段…幾好笑吓! 雖然論歌藝好似胡渭康好d…但坤哥o個part真係笑咗囉! 仲要係全家一齊笑…sorry! 的確係有娛樂性呀吓!
posted by 芒姐 at 3:53 下午
14 Comments:
胡渭康唱得太登台feel!!
佢有少少走音...
雖然抱抱俏佳人劇情發展預期之內， 但真係睇得好開心，難得連個每個客串角色都幾好睇， Lady Mama真係一大驚喜！
最後風仔同Flora個場，正常男人點忍得，真係做戲咁做....
芒姐你竟然唔睇義海豪情?!! 天呀, 你竟..然..唔..睇..義海豪情!!
始終衷心希望芒姐認真看巾幗.真的值得看, 中日background. 劇情有心設計, 知道芒姐一直說巾幗不是你杯茶, 但今集真的比上集更有心思. 快去看吧.
義海唔係芒姐個杯茶.佢杯茶係大銀幕睇"林生連場大戰丁太"+"肉搏娜姐" ^O^
你睇個時戲院有冇人尖叫?
我要等DVD呀
溫哥華匿名人
我贊同芒姐唔睇巾幗2的原因, 太heavy, 太劇力萬均! 頭兩個星期我都有日日追的, 但之後慢慢就冇再睇, 因為整套劇越睇越支力, 或者一星期一集, 我會handle到!
還有..我一直覺得巾幗2個名改得唔好...到家陣我仲未記得起佢係豪情蓋天定義海豪情...."巾幗梟雄"個名都已經好用力!再加埋"義海豪情"...我覺得實在有點過左火!
或者係因為我係外國, 身邊的朋友冇一個可以講得出"巾幗梟雄之義海豪情" 全名.
但不停都講住"巾幗梟雄之義海豪情"架喎, 點解會記唔到個全名? 困難在哪裡?
不過算啦, 口味0既0野人人都唔同, 我只能夠講, 唔睇"義海"係閣下0既損失。
我都係唔鐘意睇D甘heavy既戲既人，我覺得會好辛苦，但係身邊好多人都話好睇，搞到我都心思思，不過一諗到要一次過追返，重辛苦=.=
當你已投入故事, 你唔會再理佢係咪heavy, 因為你已經同劇中人物同哭同笑, 而『義海豪情』由第一集開始已經可以令人完全投入, 劇中人笑, 你會跟住笑, 劇中人哭, 你會眼濕濕,『義海豪情』真係冇改錯名, 睇呢套劇你會睇到個「義」字同個「情」字, 而個「義」字同個「情」字並非只是個人的, 『義海』對情義的描述既有微觀的, 也有宏觀的, 很細膩, 很感人, 很好看。
jetblue
係啦...我都覺得娜姐當前, 仲要係送到上門, 有咩男人可以忍得住...呢個世界邊有唔食魚o既貓...呢part係牽強咗d囉...hoho!
哈哈...呢d"肉搏"戲好"輕ken"啫, 點會有人尖叫 ("3d肉蒲團"就唔同...hoho)...反而好多個笑位係全場一齊大笑囉...:p
哈哈...我連d人入戲院睇n次的"鐵達尼"都可以堅持唔睇, 所以我無睇"義海"其實唔係太難估到...hehe!
正如一個前圈中人同我講, 今次大家都演得"用力"咗...有d位係用力得滯添...不過我絕對相信呢套係一套好戲o黎o既...請大家繼續睇啦!
見到呢度咁多人極力推介，我覺得好內疚，我不單巾幗2冇睇，我連巾幗1都冇睇過...而且聽完推介，都依然係提不起興趣去特登睇！不過我好有興趣，"前圈中人"指邊個？haha
雖然放眼電影界，呢d肉搏戲真係好"輕ken"，但是我有個朋友話佢"接受唔到囉"，佢話接受唔到平時乖仔形象嘅林峯突然變到咁open喎！不過，身邊都有好多人睇完之後話林峯好正嘅...
"見到呢度咁多人極力推介，我覺得好內疚，我不單巾幗2冇睇，我連巾幗1都冇睇過...而且聽完推介，都依然係提不起興趣去特登睇！"
我覺得你係曲線踩緊套劇! 唔洗內疚喎, 冇睇係你自己走寶jeh!
發佈留言
<< Home