9-25(sat) 健康奇案錄
有日唔覺意larp咗少少tbb個"健康奇案錄"...真係幾好笑吓! 佢咁樣present個健康節目真係幾頂癮...搵個女子扮番自己條"靜脈", 仲要以查案方式審問佢, 令我諗起小時候的etv...同埋"細菌大王"...hohoho! 仲要佢o地個個個樣都好認真, 好煞有介事先最抵死! 我衷心覺得好好笑! 同埋其實佢以呢個方式去傳遞健康資訊又的確幾入腦...讚!
“徐美琪女爵士”…呢兩個星期網上熱爆…最hit嗰段片當然係“星光熠熠耀保良2010 徐美琪女爵士 - 表演21個呼拉圈直接跌落地” -->最好笑都唔係段片, 而係個標題…都話youtube d片o既comments同埋個title往往都比段片本身更精彩...雖然段片亦都好富娛樂性...尤其係徐美琪女爵士d表情造手, 仲有佢o既"造作"…表演到中間無啦啦除咗條長裙…真係好頂癮!
有個comment話佢係"富有版黃夏蕙", 另一個話"dodo姐句嘩先係最重點", 仲有"咁點解唔表演轉十億個呼拉圈? 反正都係會成功"...呢d comments真係好啜核囉!
仲有另一段“星光熠熠耀保良2010 徐美琪女爵士 - 表演拉丁舞企身一字馬”…d人o既comments, 我真係要俾爆趣!!! 咩“保良局有冇提供洗眼服務?”, “受助的人, 就免為其難, 滿足下這些有錢人的意慾吧!”…講真, 又係o既…真心想做善事o既人, 都唔會咁高調去呢d show表演…佢擺明係想出風頭多d! 不過咁又無壞…捐錢出風頭都好過齋抽水出風頭o既!
不過真係要salute to 徐美琪女爵士 (同埋d網友)囉...佢(哋)真係帶好多娛樂俾我哋!!! 而個環節名居然叫..."simply margaret"!!! 仲有一開始佢o既靚女沙龍照想點? 簡直係misrep囉...真人都唔係咁樣o既! 而dodo姐作結o個句: "嗱! 呢d就真係博晒命喇"亦都係一絕!
嘩…“公主嫁到”差唔多到尾聲. 我先開始睇番頭幾集! 你話好好睇又唔係, 但o係香港一片愁雲慘霧下. 有得無無聊聊唔駛用腦輕鬆笑吓又唔錯吓, 所以佢咁高收視絕對合理! 同埋d演員個個都討好…我發覺所有女性, 無論咩年紀 (當然我哋呢d“中女”為甚)都會幾buy陳豪…佢又真係幾搞笑, 同埋平時見佢接受訪問/待人接物都幾得體…又係呢d先kum紅o架嘛! 法拉今次個角色同埋演繹亦都幾討好…佢終於唔駛局限於淨係男士先鍾意佢, 女士就會好唔buy佢o既宿命…上位應該指日可待!
今次基本上係“宮心計”班底再多咗d人啦…連d服裝都係著番“宮心計”o個d…仲有見番小三好同小金鈴…幾得意吓!
之前行過見到地鐵燈箱廣告…譚偉權唱爆張國榮經典金曲...當中包括"白石嶺公園"~~~???!!!! “十二隻恐龍去野餐”幾時變咗哥哥經典金曲o架?
posted by 芒姐 at 11:30 下午
10 Comments:
徐美琪女爵士係乜人?
How does one become 女爵士? Who grants her the title or who's her husband?
女爵士（Dame）是英國榮譽制度中，相等於「爵士」之頭銜。所有取得爵級勳章，或從男爵爵位的英國及英聯邦女性人民，均可使用此頭銜。而這裏指的勳章則為巴斯勳章、聖米迦勒及聖喬治勳章、皇家維多利亞勳章和大英帝國勳章。另一方面，凡成為女從男爵之女性亦可取得「女爵士」頭銜，不過女性成為女從男爵的例子在歷史上可謂絕無僅有。
有別於「爵士」，女爵士的夫婿不可憑妻子獲取任何敬稱，但「爵士」之妻子則可稱為「爵士夫人」。
知名的女爵士:
阿加莎·克里斯蒂—英國偵探小說作家
傑西卡·羅森—英國考古學家、漢學家
伊麗莎白·舒瓦茲科普夫—德裔英國歌劇女高音
瓊·蘇瑟蘭—澳洲歌劇女高音
凱瑟琳·蒂澤德—紐西蘭總督
西爾維亞·卡特賴特—紐西蘭總督
香港:
鄧蓮如—前行政立法兩局首席非官守議員，已在1990年成為女男爵
王䓪鳴—前房委會主席，1996年取得DBE勳銜，但沒有使用女爵士頭銜
* * * * * * * * * * * *
呢位徐美琪女士都幾把炮喎!
公主嫁到太無聊低能，最怕佢地成日玩押韻，有d搞笑位對我來講太刻意啦，吃不消...不過呢d戲通常都好多人睇，因為輕鬆搞笑，唔使動腦思考，而且一綫主角又多，收視好絕對係意料之內。
健康奇案錄係林保怡告別TVB之作.佢連部頭約都冇續.BTW,佢唔係拍咗一個劇叫"天與地"咩?大嘢嚟喎.點解好似潛咗水?
溫哥華匿名人
芒姐,而家中什又重播"衝上雲霄"呀!
今日第一集,LUNCH既時候見到,
好開心!
係啦, 估唔到咁快又重播"衝上雲宵", 頭十幾集幾好睇...不過朝早做大家都應該會miss咗多喇...
溫哥華匿名人,
又係喎, 你唔講都差d唔記得咗呢套"天與地"...
"公主嫁到"的確係近期唯一一套比較有追看性o既劇集...至少熱熱鬧鬧開開心心嘛...不過其實放o係新年仲啱!
嘩...咁徐美琪女爵士又的確幾把炮...難怪佢可以"買起"成part show...
發佈留言
<< Home