9-20(mon) 黃凱芹好好的演唱會2010

無錯…我係去咗睇黃凱芹演唱會…我d朋友話我個人未免太"與別不同/標奇立異/九唔撘八...whatever"...人人走去睇周杰倫我就走去睇黃凱芹...wahahaha!

查實大家認識o既芒姐一向都係咁o架啦, 睇黃凱芹咋嘛...搞到好似我去咗睇陳浩德/方伊琪/尹光/朱咪咪咁 (雖然下次我都真係諗住去睇吓尹光...上次耀榮叔講到佢個演唱會咁精彩, 又話係紅館最賺錢歌星...其實我諗佢個演唱會都會幾好睇吓!)…黃凱芹"maan"車邊都算係我個年代呀...雖然應該係我d表哥表姐o既年代多少少...但我一向都係活o係大我幾歲o既年代…所以fit晒! 同埋佢d歌都真係好多首都耳熟能詳…仲有佢當年其實都算有紅過o架喎...雖然我係buy同期另一個勤多d!

唔知點解大家今次聽到話我去咗睇黃凱芹o既feedback係好diversified囉…有好幾個我估唔到o既朋友原來都好想去,一猛話我做咩唔叫埋佢o地去…又有一d我以為都ok認識我o既朋友表示驚訝...但我對於佢o地o既驚訝亦有少少驚訝... 雖然我唔係黃凱芹粉絲, 但去睇佢演唱會都唔係太偏離我o既"軌道"啫...仲應該係有少少估得到我o個隻呀!

今次個演唱會又係o係無咩expectation之下, 好有驚喜囉...估唔到黃凱芹演唱會可以咁好睇…除咗佢d經典歌真係幾好聽之外, 佢d fans都真係好落力吓, 現場氣氛出奇地好...全晚不停"萬人大合唱, 世界key"! 仲要佢真又係幾有才華, 好多首歌都係佢作曲填詞, 仲要自彈自唱…同埋佢轉數都真係幾快, 把口原來亦都可以幾賤吓...呢樣我buy囉! 第一次睇演唱會可以笑到喊…佢最好笑嗰d位你睇得出係爆肚亂噏而唔係度晒稿嗰隻…我真心覺得佢得囉! 連挑剔的芒姐都覺得呢個演唱會值90分!



成個show不停有好多嘉賓, 有九唔撘八的, 亦有你一早估到的...當然係有已經發福到你無辦法認得佢o既“流離所愛”余劍明, 仲有一系列好明顯係主辦單位買菜要搭棵葱o既新人 (不過其中一個chloe chu唱得幾好, 做“囡囡”o個位冼色麗就真係嚇死你…仲要佢成場都la口la面, 好似俾人逼佢出o黎唱咁?!)…而全晚最好笑o既位係咁多個之中除咗余劍明之外, 同阿chris比較有"啦間"o既嘉賓—湯寶如...佢同黃凱芹合唱"相思風雨中"之前亂咁吹水o個段...真係笑到我呢! 係無內容但好好笑! 但係湯記無唱我最鍾意佢o個首"絕對是個夢", 實在係令我太失望..."絕對是個夢"呢d咁經典佢唔唱, 走去唱"感冒" (雖然呢首好似入過總選定十大中文金曲的top10...但好明顯唱"絕對是個夢"應該會反應更好啦!)

而咁多個嘉賓之中最最最最估唔到o既...應該係“蜜意低低斟~飲千樽美酒~~~”o既何婉盈喇…因為佢又唔似係主辦單位買菜要搭棵葱o既新人呀...亦唔多覺佢同黃凱芹有咩啦間...最多又係叫做"maan車邊"試過大家同期o係樂壇發展...但又稱唔上係同一代喎…?!

當年佢o係1991年度miss hk "piegon"決賽的九唔撘八"校際"常識問答比賽度攞咗好高分, 而被tbb賞識力捧佢做n個大小show的司儀...初頭發展仲好過當年的三甲-郭藹明/周嘉玲/蔡少芬...但後來佢走去做歌星...每次唱live都俾人噓到暈... 太可憐! 情況同譚小環一樣…做藝員好地地, 一做歌星就…

估唔到隔咗近廿年後佢仲咁"有熱誠", 睇得出佢係對唱歌好有passion, 可惜無talent...雖然佢今次唱現場同以前一樣走音, 但平心而論其實已經好咗d...同埋佢首"愛上你是我一生的錯"的確係hit, 佢一開始唱"哭一再哭~"就全場都識得跟住唱...證明卡拉ok最全盛時期d歌真係入屋到你唔信 (簡直數唔到當年攞住張"天碟"o係自己屋企同同學屋企唱咗幾多次呢首歌)...所以佢即使真係純粹o黎間場, 連同主角合唱一首歌都欠奉, 但反應都好唔錯吓....真係要講番句"何婉盈我哋支持你"!



又要講”讚”多一次…蘋果d記者作呢d賤格花名真係有一手…雖然好mean, 但真係好好笑...我最欣賞"女思捷", "烚熟人頭", "犀利光"同埋"blue姐姐"呢幾個花朵...hohoho...:p

上個禮拜睇無間音樂晚見到B2個舊mv...忽然覺得其中一個成員amy同巨聲2的林欣彤有幾分相似囉.........hoho!


另…呢排睇咗relatively多戲, “得閒炒飯”都算唔錯…william做得出奇地幾好笑吓…仲有我好buy o既萬綺雯…又係佢同谷祖琳…令我諗起o岩o岩播完o既“法網群英”! 仲有睇咗細個時好buy o既日本女星(幾乎係只係識+buy佢一個咁滯) 中山美穗套“別了誘情人”…都ok喎, 算係有d劇情, 又幾寫實吓…最重要係有兒時“偶像”中山美穗…細個睇o個d“花王劇場”最鍾意佢! 好記得佢同後藤久美子套“偶像媽咪”同埋佢一人扮演一對孖生姊妹o既“天生一對”…連我呢d非日劇迷都o翕得出佢主演過o既劇集, 證明我真係ok buy佢!