8-20(fri) 翡翠明珠
睇報紙話cookies四位餅碎諗住重組搞番個音樂會, 點知盛傳不和o既theresa同stephy堅決唔肯出席…話實我都幾想睇番佢o地九個重組cookies表演番隻“又不是八十年代”…雖然我從來都唔係佢o地個年代…但我又真係幾鍾意睇cookies o架喎…原因成日都有講o架喇…又或者可以睇番呢度…
“雖然九個人o既年代佢o地跳舞永遠都係一片混亂…但係我最喜歡o既就係o個個年化o既cookies, 幾趣緻, 好熱鬧, 好有人氣…總有一個o岩你口味! 就算一個都唔buy, 起碼成jar人熱熱鬧鬧, 睇/認得晒咁多個o既時候, 已經唱晒成首歌! 永遠我都係buy一大group人好熱鬧咁表演多d…好有學生時期表演的情懷!”…
我一向就係鍾意睇呢d熱熱鬧鬧, 眾志成城o架嘛…
呢段九餅拆伙前最後一次o係電視表演…當年我都有錄咗o黎睇…雖然個個都一如以往地走音走得好勁, 基本上係無一粒音o岩咁滯…但又真係睇得人幾感動…好真咁樣…好過依家呢個又同o個個不和…同埋呢首歌本身我覺得好好聽囉…
上個禮拜開始做有林公子主演o既“摘星之旅”, 又上佢o個套“翡翠明珠”…今個月簡直係“林峯月”啦!
“翡翠明珠”我睇咗喇…作為林公子及tbb的半”粉絲”...點都要去支持一下o既! 雖則我最唔buy呢d唔知咩時代背景o既童話故事, 但o係毫無expectation之下, 其實套戲都唔算太爛, 仲有少量笑位 (但唔知點解d現場觀眾, 尤其係超多小朋友捧場...都好俾面係又笑唔係又笑一餐! 單憑d小朋友o既橫迴立體笑聲, 我仲以為自己睇緊白雪公主之類的童話故事添)...不過tbb的”舖天蓋地”式宣傳, 真係幾鍾意都會睇到人反感…更何況有好多人係本身唔鍾意或neutral o架嘛, 咁樣每個節目都係宣傳緊同一個節目的手法…實在係弄巧反拙…tbb幾時先會停止呢個係人都知係超錯o既“愛你變成害你”宣傳手法呢?
至於同大陸"joint venture"o個套"摘星之旅"...真係八十年代到唔八十年代…老套到唔老套…你話佢o係香港收視唔得係預咗o架喎…上次“歲月風雲”已經試過, 今年又要再o黎多次…?! 仲要上次d演員都已經大部份都係我o地認識, 但今次d年青女角基本上除咗一向無咩觀眾緣o既toby之外(話實我o係"女生宿舍"年代仲幾buy佢...搞到我俾人笑到面黃!), 另外幾位內地演員o係香港真係零知名度, 你話如果係好靚o個隻都算啦…但又真係…可能我o既審美眼光有d問題…哎…咁點會吸引到人去睇?!
如果套劇係諗住齋target內地市場我覺得合埋呀…但就咪鬼o係香港播啦...上次大大大製作"歲月風雲"仆直佢仲唔吸取教訓...根本內地人同香港人o既口味就南轅北轍! 不過可能tbb覺得拍咗唔好o徒啦…但就真係趕晒d客走囉!
反而9:30檔真係兩台都咁好睇…睇睇吓覺得“女人最痛”仲o岩feel過“法網群英”添呀…好啱女性睇…同埋我好認同其他網友講, 江美儀真係有d似sammi…其實以前o係亞視已經有d覺…但呢套個look又真係令人覺得特別似…後尾睇討論區發覺原來有好多朋友都係咁覺得囉…hoho!
嘩…有朋友o係雜誌見到呢張“少年林公子”相即刻腥俾我…wahahahaha! 仲有好多當時o既新紥歌手添…東東啦, 霆鋒啦, “我失戀你悲傷”o既洪鍵鏵啦, 朱健鈞啦 (btw, 我當年睇 “開心華之里”曾經好鍾意朱健鈞…唔准笑~~~)…真係those were the days喇…:p
posted by 芒姐 at 11:23 下午
24 Comments:
re: 另外幾位內地演員o係香港真係零知名度, 你話如果係好靚o個隻都算啦…但又真係…可能我o既審美眼光有d問題…哎…咁點會吸引到人去睇?!
芒姐你審美眼光無問題, 我同我d friends都覺得班內地女演員極之唔靚, 尤其被派去林峰間廠做間諜果位女士, 無論打扮定個樣, 都好似老過林峰同黃宗澤十幾廿年咁, 似兩位小生的姑姐或阿姨多過似同輩! 個女人又老又老土, 唔知仲以為佢係林鄭月娥、鄭汝華d friends, 我以為我睇緊中央電視台新聞報導呀!
係呀, 亞視時代的江美儀已經好似sammi, 而家仲似!
就係呢套野舊年拍到呀峯峯嘔電.TBB要佢開個唱但劇組(仲要係喺深圳)又唔放人.我估佢自己好唔LIKE呢套野.我好似從來未聽佢講"摘星之旅"呢四個字(OR EVEN JUST 摘星).佢最多都係話"深圳個套劇".
其實呀海星演得唔錯,特別係同松哥吵架戲 (特別第一集個場).
其實呢個劇同"歲月"都係有HEART (TBB有時D劇真係HEA拍但求收視),.但有心無力/吃力不討好/唔知點解出來搞成咁.我其實好欣賞D正經勵志劇情.但呢個劇真係唔夠娛樂性.兩個女角...GRRR
TBB,算啦,唔好再堅持拍呢D合拍劇(D中港演員真係唔慌唔合拍).放手啦.嚟,全場一齊唱...放手...
溫哥華匿名人
所以一向冇乜觀眾緣既 toby 都順眼哂. 不過製作認真過 tbb 其他劇集好多...
另外, 講埋張可頤個樣老左好多, 比米雪個感覺仲老, 咁講好似唔多 make sense, 但係我又真係咁覺得...
我都鍾意朱健鈞架其實...佢去左邊呀?
i used to like 朱健鈞 a lot too!!
朱健鈞...少年呀倫!
BTW,呀"方麗京"其實行年35.真實年齡唔係大兩個男角好多(同呀佘差唔多).但女演員真係唔襟老(即唔襟撈).好似張可頤咁.當年呀"寶珠"好靚嫁.
溫哥華匿名人
溫哥華匿名人:
唔得呀, 我真係接受唔到, 方麗京拍埋海星同鍾林大真係好似佢地長輩咁, 阿佘唔襟極都總算係靚女一名, 但阿方麗京... 唔只似林公子同bosco家姐, 係真係似一個長輩, 姑姐或阿姨果種長輩, 我頂唔順佢同兩位小生做對手戲呀, 救命呀!
原來方麗京真實年齡同佘佘差唔多, 真係睇唔出, 你唔講我仲以為佢係林鄭月娥、廖秀冬果個age group, 睇黎香港女高官比內地女演員保養得仲好!
仲有, 做祝耀群果個都唔靚, 但明顯後生過方麗京好多, 睇tbb網頁先知方麗京的設定年齡係24, 真係嚇成我! 佢成個款十足十一個阿姑咁, 年齡44就差唔多!
方麗京個角色如果"正常"TBB劇應該係胡杏兒做
方auntie應該摺埋！
我初時都好睇唔慣方麗京，d打扮真係幾娘，同埋羅敏莊配音好似夾唔岩口型/表情咁。不過慢慢終於睇順眼左。話時話，睇PA日記d function相，佢個look ok架喎，三個女主角中反而最靚係佢喎。
http://b.tvb.com/drama/%e6%91%98%e6%98%9f%e4%b9%8b%e6%97%85/%e6%91%98%e6%98%9f%e4%b9%8b%e6%97%85-pa%e6%89%8b%e8%a8%98/2010/08/09/%e6%91%98%e6%98%9f%e4%b9%8b%e6%97%85%e5%95%9f%e7%a8%8b/attachment/wah_7401/
講開又講，耀群(呢個名真係...)佢係咪本身係普通話人? 如果係咁，佢講廣東話算係好好喎，起碼好過jj同陳爽等。不過佢讀linus呢個名時就怪怪地囉，好lur。PA手記都有條片係林峯教佢讀個名，不停教佢讀個n音，好好笑。
http://b.tvb.com/drama/category/%E6%91%98%E6%98%9F%E4%B9%8B%E6%97%85/
林公子的確有D語言天份,不過佢教人英文之餘自己應該先搞掂"office"呢個字
溫哥華匿名人
摘星趕客趕到，連啲名都衰過人，麗京，耀群……娘到嘔電。
耀群，又唔靚鄉音又勁重。仲要寫峯澤爭佢，根本一啲說服力都冇。
麗京，唔好講笑，佢原先真係中央臺嘅主播嚟咖。
仲有唔明點解次次呢啲跨境所謂大制作，都會有梁靖琪！我知梁家樹係佢老豆，我知佢想幫個女鋪路，大陸市場好大……但係揾佢做香港女藝人嘅代表，我接受唔度囉！
仲有哩，芒姐有冇留意葉童同米雪分別喺兩部劇度大肚！無線啲編劇真係諗到冇嘢好諗，要喺啲資深藝人度攞彩攞著數。
同埋張嘉兒分別喺兩部劇度做行行企企秘書仔。港姐冠軍啊，淪落成咁，真係冇嘢好講。唔好講陳法蓉袁詠儀嗰啲靚爆嘅，94年譚小環出嚟都有套“緝私群英”做下第一女主角啦。whywhywhywhywhywhy吖！
唔好將譚小環同張嘉兒比!呀小環當年係少男殺手.未當選已經係"信和"賣相小天后!
好想唱番隻"如果天空要下雨"!
溫哥華匿名人
溫哥華匿名人，你唔好咁激動啦！
講開耀群，24歲做到集團公關經理，即係大學畢業無耐就做到經理，勁！
法網見到羅頌華再做劇,仲sole表演場喊到大條鼻涕既喊戲.
羅頌華,萬綺雯20年前係男女主角,而家法網萬綺雯仲係主角,羅頌華就係大配角!!!
邊個話男人襟老嫁!
溫哥華匿名人:kingsley讀met-thought真係嚇死我.其實佢英文講得唔算差,衰係d小學生程度的字實在令人汗顏,fans應該提點下佢.
翡翠明珠係好兒戲，但未至於好爛，比這套爛既港片多的是，最大問題係宣傳手法。
摘星既女主角超趕客（toby已經係順眼果個），加上題材問題，浪費晒衣D男演員。
點解成日討論林峯講英文？其實佢係有D字發音有問題，但佢講英文表達尚算流暢。
wow, 我都鍾意過朱健鈞 (我有冇記錯, 係咪佢同朱茵拍過一套劇..?), 同埋鍾意鍾漢良(少女阿B), 之後在流星花園見到佢都幾 surprised! 完全唔知佢去左台灣, but 而家亦都唔知佢去左邊~
點解成日討論林峯講英文...因為實在奇怪.佢讀到D超難音"R","TH",但一般香港人冇問題嘅"OFFICE"佢又讀超唔正.奇.WELL,咁佢又真係唔算100%香港人.
mermaid: 鍾漢良係少"年"阿B!
溫哥華匿名人
係呀, 朱健鈞當年被發掘咪就係拍套"少年五虎"做阿倫囉...可惜紅得快, 跌得更快...佢早幾年仲有o係無記的劇做茄喱啡的...呢幾年就真係唔見咗...!
哈哈哈...羅頌華係比較例外的例子, 其實男人四十幾都仲可以好型...以前覺得佢o既感覺有少少孫耀威/方力申o個隻...不過孫耀威keep得好過佢好多!
另, 萬二蚊亦都係例外o個隻...40歲可以keep到廿幾歲咁...佢o地兩個係有違一般男女"襟"老對比的準則...hoho!
oh...94年信和賣相天后譚小環...佢又係一個"傳奇"...未選到已經成為賣相天后...點知又係紅得快, 跌得更快的例子...一加入"開心華之里"套劇就即刻要摺埋, 跟住去唱歌又俾人噓到暈...如果佢專心拍戲後果可能會好d...
講到keep得好，我覺得羅霖真係一個奇跡！40十几歲又生過3個仔，不過睇上去就似30歲一樣。我覺得佢keep得仲好過好多男士，佢應該同郭富城，黎明既年紀差唔多，不過睇上去佢要後生好多，佢真係好似唔識變老一樣，真係好想知佢究竟係點keep既。可能有D人既様天生就顯得後生啦，羅霖拍真情果陣應該係過左30歲，但係佢就可以演到20出頭既雙雙。上天真係特別優待佢
發佈留言
<< Home