2011年2月3日星期四

2-3(thurs)"虎盡甘來, 兔氣揚眉"!!!

終於過咗認真麻麻的虎年喇...芒姐先恭祝大家"虎盡甘來, 兔氣揚眉"!!! 仲要借用成日醒我金句一籮籮o既"李阿婆夫人"舊年送我的最有用金句, 就係: "年年唔輸陣,日日真心癲"!!! 呢句真係超警世囉!!! 做人為咩...最緊要都係開心啫! 所以新一年, 芒姐送埋最簡單但最受用的一句祝福俾大家...就係永遠開開心心!!!

新年當然要睇吓d賀歲片...舊年就淨係睇咗"72家租客", 仲要破例睇咗兩次...今年兩套都有睇! tbb仝人o既"我愛香港"講六/七十年代屋村生活, 係幾有香港精神, 但我覺得有d祝到鹿唔識脫角...個theme係好有意思, 但個故事勁單簿 (幾乎係無咁滯, 上年套"72家"個故事都好過佢), 浪費咗咁多個好演員! 仲要今年無舊年咁"tbb星光熠熠", 無得好似舊年咁入戲院齋數星星...:p

至於另一套"喜事"系列o既"最強喜事", 反而比想像中好喎! 已經好幾年無入戲院睇"喜事"系列...前幾年d人睇完話勁爛呀嘛...今年我覺得ok喎, 即係唔係話好好睇, 但一貫賀歲劇水準囉(你明我講咩啦~)...嘻嘻哈哈, 熱熱鬧鬧, 個story都唔算太無聊 (係杜汶澤無啦啦扮女人o個part好為做而做囉)...整體都ok啦!

電視劇方面, "仁心解碼"其實ok, 不過我唔係集集睇...講精神病其實幾新鮮又幾有意思! "隔離七日情"講豬流感...如果上年即拍即播食住個勢會更好! 不過佢居然一播又撞正豬流感翻發, 真係咪話唔邪! 呢套雖然無無聊聊, 但我本人又幾鍾意睇喎! 同埋我真係想講, 欣宜進步咗好多, 起碼比起佢做"畢打自己人"減少咗
造作!

嘩! 我哋呢期個個都好buy風趣幽默o既丁生, 唱k當然都要支持吓佢啦! 可惜第一次去o既RED MR.居然連"寒冰掌"都無(仲要大部份歌都無), 太jar喇...!



不過佢有"嗶嗶嗶"唱囉...真係一首好奇特的歌曲...呵呵! 仲有呢首詹瑞文o既"嘟嘟嘟-嫁入豪門版"又係一絕!!!



喂! 呢段"荃加福祿壽玩轉台慶"之"李思捷惡搞摘星之旅林峯"雖然做咗好耐, 但真係好笑...點都要推一推...:p

2 Comments:

Anonymous 匿名 said...

"仁心解碼"上年响溫哥華中文電視台播咗!出奇地好睇.但係唔知點解到最後個幾集"脫咗腳".爛尾!
其實我真係覺得曾志偉有心做本土電影,同想搵D年輕演員接班上位.佢訪問時對峯少同唱K話搵題材比佢地...我覺得佢真心嘅(當然成唔成事就睇老板)
溫哥華匿名人

3:08 下午  
Anonymous 匿名 said...

點解芒姐而家少UPDATE左咁多?
IRIS

3:52 下午  

發佈留言

Links to this post:

建立連結

<< Home