10-24(thurs) 維基電視

呢兩個禮拜香港電視業發生咗好多事, 風起雲湧…搞到人都唔得閒睇tbb d膠劇! 9:30嗰套法庭戲(係咪叫”法外風雲”?! 呢d律師/醫生劇濫拍得太交關, 搞我依家連佢d劇名我都唔多記得) 我睇咗第一集已經無咩意欲追落去…其實真係唔關佢寫唔寫實或多唔多犯駁處事, 因為我從來唔覺得呢d劇需要太~寫實~~! “壹號皇庭”都十分唔寫實, 但好睇喎…如果你照dup番現實的法庭落去, 包你悶死! 所以個問題係套劇的確悶, 同埋點解呢套都可以做到台慶劇?! 係因為有兩大視帝? 但其實呢兩大視帝依家都不太有叫座力…更加吸引唔到人睇!

老套的“巨輪”其實我依舊係ok o既…不過已經成個禮拜未睇…要慢慢追番! 事關呢期大家最關注的當然係維基電視台的風雲啦…呢d我哋已經喺H-E-J-N-O-M <=> 芒姐再現@fb即時討論晒...唔需要recap番啦…不過依家主場新聞嗰個”各界自拍職工証 撐港視”album又的確係好得...值得推介! 仲有之前口水滿的”抽水抽著火水”事件, 同埋東張西望嗰條叫人“回巢食盤菜”熱線…真係全部都好頂癮! d人係咪痴晒線? 而艾威的言論…又係笑死我…好中point!

同埋tbb特登揀呢段時間重播“刑警”同“依家有喜”…你唔好話俾我聽係咁啱得咁橋…駛唔駛咁攞景呀?

至於上年引起極大迴響o既”最佳女主角”…我覺得真係因為天時地利人和! 第一就新鮮啦, 第二就係同期撞正查小欣o既“爆足一周”, 但小欣姐一向無咩觀眾緣, 一比之下芷珊姐姐討好好多! 雖然我係buy芷珊姐姐o既, 不過不得不承認佢o既主持功力真係好大般…永遠都係以好稀奇嘅眼光望住個嘉賓高呼: “吓? 真係o架?!＂不過芷珊姐姐勝在人面廣, 請到d勁嘉賓, 但係今次女主角overall感覺好似無班男主角咁勁! 又或者係太濫搵咗太多人訪問, 所以整體感覺下降咗! 當然, 新鮮感同觀眾expectation亦係”女主角”無”男主角”咁成功o既因素! 睇咗三個禮拜, 暫時我覺得最好睇反而係袁靚靚嗰幾集…佢講嘢ok funny, 同埋某d位幾中point…呢樣我估佢唔到! 當然佢當年的小三/被包事件你接唔接受到係另作別論!