10-15(sun) 美男廚房
隔o左幾個禮拜, 終於又有番“美女廚房/美男廚房”睇…之前整o左幾集好唔掂o既泰國特別版, 呢兩集又返番o黎香港, 仲係由三個主持鄭中基, 梁漢文同方力申親自下廚煮番兩味, 再無o黎啦謂加多個靚仔chilam…佢係就係幾靚仔, 但又真係有d九唔搭八囉! 不過佢又真係煮得最有板有眼o個個!
搵dodo姐做主角都唔錯, 佢搞氣氛ok, 而且講o野都可以幾搞笑, 同埋勝在個感覺幾authoritative! 其他評判亦都揀得唔錯!
最騎呢當然係整四個男版“粥粉麵飯”=”柴米油鹽”出o黎…睇報紙話本來想搵今屆個港男冠軍黃長發添, 但係話驚downgrade o左佢喎, 所以唔知經理人定邊個幫佢推o左! o個四個男子真係好騎呢, 跳到一塌糊塗…我見到其中一個係o係“四葉草2”都算係男主(or配)角+曾經同吳卓羲o係幾年前孖住上做茄喱啡o既陳少邦…嘩! 整咩淪落到咁呀? 吳唱k都變成一線男主角, 點解陳少邦跌番落去同d藝訓班新人一齊做茄喱啡呀?
睇完o個幾個男裝版, 即刻覺得o個幾個“粥粉麵飯”正常好多同埋跳得好好多! 佢o地跳自己o個隻什麼“粥粉麵飯加糖水”主題曲雖然騎呢, 但起碼齊d, 感覺pro好多!
美男廚房
oh, 仲有, 禮拜六晚o個個“我們的世紀金曲”節目都真係幾好睇, 有好多經典舊歌回顧…其實前幾個禮拜日都好似有呢個節目…但係點解一時禮拜六播, 一時禮拜日播, 搞到人無所適從…咁好睇o既節目, miss左就唔好啦!
其實呢排除o左“藍月亮”, 仲有好多重播劇都好o岩我口味…所以呢排主力追呢d劇, 反而新劇就無咩睇…有larp左少少“樓住有情人”…我相信得閒無o野做都可以望o下o既, 但無時間唯有選擇放棄佢! “匯通天下”就from day 1都無興趣! 反而幾期待套台慶劇“肥田”同埋阿姐套“歌舞片”囉!
o個日larp左一眼“樓住有情人”, 又見到鍾景輝同曹永廉…以為仲係做緊“高朋滿座”添呀…一連兩線劇都係佢o地…真係令人好混淆!
之前提過o個套“轉世驚情”…睇完第一集, 居然有興趣繼續錄落去繼續睇…都話我個人騎呢o架啦! 我認同套劇係極奇無聊+無謂+騎呢…但係就係咁反而吸引到我睇…你知我除o左鍾意睇青春劇, 亦都好鍾意呢d講前世今生o既劇情…又講天地人三界, 又回到前世, 又大換天日 (世界末日之類), 又咩吸怨氣o個d騎呢o野…好趣緻! 個故事都幾多twist, 幾有趣! 睇睇o下覺得有d似亞視o既“殭屍”, 又係咁天馬行空…唔怪得知我咁likey! 再睇番字幕原來係高層李添勝監製o架喎…估唔到佢會整套咁o既o野出o黎! d劇情都好係你估佢唔到o個隻…亦都有好多個位係好唔合情理o既位, 但又幾好笑喎!
不過d主角就真係好唔吸引, 原來陳豪同唐文龍都係做前世o既o者, 主力係關德輝, 梁琤同羅敏莊…仲有李思蓓囉! 原來關德輝d演技幾唔錯o下喎, 由純良到發狂都做得幾好…抵佢有得擔成套劇…哈哈, 可惜無得o係黃金時段播呀! 睇睇o下梁琤o係呢套劇都ok…仲有做關德輝阿媽o既蘇玉華都幾elegant…佢d古裝扮相其實都幾得o下! 好過時裝好多…尤其係“刑偵1”o個時個超娘look! 我o個時仲以為佢係d四十幾o既師奶, 做得梁榮忠個阿姨咁款…點知佢o係呢十年居然愈做愈後生喎!!!
可惜到上個禮拜開始亞視又播“藍月亮”…撞晒時間, 搞到我一日只可以錄到半集…連大結局都睇唔到, 無線個site又只係得頭兩集劇情…睇到最緊張o個度就無得睇, 實在太可惜了!
今個weekend又睇多o左幾集“藍月亮”…發覺阿潔儀姐姐真係做得幾差, 演技超生硬, 成日照背對白, 表情呆滯, 眼神又遊離…不過見係佢第一套劇, 算啦…佢後期好似真係變o左好多…做兒童節目o既時候好似開籠雀咁, 直頭有d巴渣添!
反而阿羅頌華哥哥就真係算做得幾自然, 又幾靚仔…終於明白點解亞視當年咁戲重佢! 同埋其實我覺得亞視揀佢做華劍雄真係揀得perfect…因為我成日都覺得佢同做華英雄o既何家勁有幾分似!
其實睇落呢套戲真係亳無劇情可言, “淘氣雙子星”好睇好多…不過佢勝在多歌聽, 直頭成個音樂特輯咁! 連我最喜愛o既 “月半小夜曲”都差唔多播晒成隻…但so far我好似未聽到“藍月亮”喎?!
哎! 好可憐! Blogspot無啦啦推介個beta version, 又話多好多functions, 咁咪諗住試o下轉o黎睇o下囉…點知一轉之下, 好多字都變o左怪獸字, 要不停轉去unicode先睇得番, 好麻煩! 又唔俾人轉番去普通version…今次真係俾佢玩死! 大家有無方法教我點搞番掂佢呀?
posted by 芒姐 at 12:45 上午
28 Comments:
why was 李克勤 able to sing ATV theme song?(藍月亮) Didn't he have a contract with TVB? @@
蘇玉華應該係67/68年出世, 刑偵時佢只有20幾歲, 但又的確好老好娘, 同梁榮忠極度唔襯!
Dear Monjeh,
唔知係咪年紀大，好鍾意睇翻時裝舊劇集，有時睇到D時裝，汽車，街道，even室內裝修都好趣緻!
Last time I saw "浮生六劫”，馬敏兒竟然hold 住個Dior Monogram handbag!(blue in color) Very funny!
Your fan,
CC
哎也，你地傾「藍月亮」傾得咁開心，可惜我一集都未睇過。芒姐，你有冇睇尋晚無記果套「江山美人」?初初睇d片段，以為ｄ 女仔會好好樣，哎也，點之裡面果４個妹妹仔，真係唔多得喎，你又點睇？
仲有仲有，你刈猁睇「一公升眼淚」？我上網睇番ｄ劇情，應該有排喊。唔知點解無記呢排好積極播番日劇，但我覺得如果播番「悠長假期」我一定捧場，仲有原裝配音的「IQ博士」。
日劇又真係好睇過韓劇好多, 連D明星都靚D!
感覺上, 「一公升眼淚」有D似「赤的疑惑」、「赤的衝擊」... 雖然都係D苦情戲, 不過應該好過「天國的雞批」那類低B無聊白痴韓劇!
有播藍月亮﹗係 阿JOE+EVA架﹗
睇0左“藍月亮”之後我都幾like羅頌華,而潔儀姐姐做0左兒童節目之後,覺得佢有時都幾勞氣,而且佢把聲唔係有中氣0個種,有時為
0左叫住班細路叫到聲都沙埋。
係呀有播藍月亮呢首歌,不過只係半首。
有冇留意“藍月亮”裡面呀鄧浩光隻右手成日俾紗布包住,但個劇情一d都冇提咩事?聽人講話佢當年好似因為拍戲被火燒傷0左。而我有留意佢0係舊年朝早亞視重播0既“望父成龍”裡面,隻手都係包住非常"礙"眼,到最後一集先拆紗布。
我好似講0左好多亞視0既野,其實我唔係亞視fans,只係好似樓上cc話齋,人大0左意睇舊野,宜家無線同亞視d節目都只係望0下(當然有d都有睇),而我又要早起身,所以0個個鐘數就睇亞視d舊戲好過睇無線d卡通,不過宜家亞視朝早改播外購劇,一係就早到四點幾就播,哎!
Kitty,
羅頌華o係咁多個之中算係做得幾好, 又幾靚仔, 只係做戲時有d似朗誦, 唔夠natural囉! 其實我更欣賞容錦昌哥哥…佢做得更自然…可惜佢依家…! 哈! 不過羅頌華都唔知去o左邊啦!
潔儀姐姐後期好似變o左第二個人咁…不過或者人去到唔同o既年紀, 係要有唔同o既改變o既…如果佢成世係咁懶清純…都幾鬼驚!
你唔講我又真係無留意鄧浩光隻手成日包住紗布喎…其實我覺得佢個角色都無咩謂, 好似可有可無咁…反而“q表姐”裡面歐錦棠個老師角色都有d意思呀, 又會同q表姐有段情咁…但係呢套戲個主線係d學生哥囉!
M,
哈…因為我只係睇到第九集…好似未見有唱呢隻歌住…但係都真係勁多歌聽囉, 成個點唱節目咁…
敏兒 &Anonymous,
我個人比較local, 最支持都係本地製作…日劇都偶然睇o下o既…細個時睇得多d, 因為有花王2:10劇場同埋6:00劇場…後來long vacation同love generation都係tvb播時跟人睇o下…韓劇我就真係唔buy喇, 仲老套+節奏慢過香港七十年代d戲…某程度上我寧願睇深宵的粵語長片…所以至今我淨係睇過一套“美麗的日子”, 仲要係o係英國時個frd焗播俾我睇所以先睇o左d!
“江山美人”無睇過啊…你係指o個d邵氏名片呀?
哎吔, 敏兒…點解唔錄番一兩集 “藍月亮”睇呀? 好有八十年代的情懷呢? 仲有好多好歌聽!
cc,
我就算未年紀大的時候, 已經好鍾意學人懷舊…我十一二歲已經學人想當年, 同埋已經好鍾意睇d舊劇, 睇o下廿幾卅年前香港係點o既呢…所以特別鍾意睇時裝粵語長片…你講話睇d時裝，汽車，街道，室內裝修或者化妝, 都好可以懷緬o下o個個年代, 又或者睇o下咁多年o既改變…好得意! 所以每年去書展時, 最吸引到我o既除o左係d娛樂related o既書, 就係o個年香港今昔係, 百年街道圖咁…我真係應該走去讀歷史…因為我個人太鍾意舊o既o野!
哈…有一日食lunch, 我都見到亞視播緊一套好舊o既劇…因為一睇d顏色呀, 佈景呀都已經知道一定有廿卅年歷史…再睇廣告前的片頭, 原來又播"浮生六劫”…亞視真係好鍾意重播呢套劇…印象中第一次睇好似係六年級時 (91年), 好似有哥哥做o既添o架…仲有首主題曲好經典!
Miu,
係啦, 蘇玉華初初由舞台劇界走入電視圈, 個look真係超娘…我仲以為佢同羅冠蘭差唔多老添! 點知依家佢就愈o黎愈後生, 愈o黎愈靚…真係人靠衣裝 (定係妝呢?)…對比番佢十年前個look, 我敢講佢依家個樣仲後生囉!
Anonymous,
點解亞視可以用一生不變做主題曲呢個問題…其實我o地o係早前一篇日記都討論過…但係大家都得唔到一個肯定o既答案…你可以睇番:
http://hejnom.blogspot.com/2006/09/9-19tues-happy169999.html
裡面sandy o既留言, 我覺得佢o既分析都幾有道理…
Search "藍月亮"資料時竟找到這裡．太感動了，終於找到喜歡此劇的知心友．
記得上一次重播"藍月亮"已經是93年的事，足足等了13年才能再次欣賞此劇.本人十分喜歡此劇,可能是年紀大的關係,勾起不少昔日的回憶.因為片中間學校遠景同門口係0係香港蘇淅公學取景(校內景則是太古地利亞中學),即是本人既中學.其他場取景都係賽馬山,陪感親切.
不過現在翻看,發覺馬虎之處都唔少.最明顯係男主角個妹好似冇衫換, 成日都係個件綠色衫.其中一集更離譜到穿著睡袍既佢,竟然見到綠色袖!!
潔儀姐姐雖氣質清純,但完全唔識做戲,甚至可以用"恐怖"黎形容.其後佢雖然有所進步,但樣貌及氣質都不復當年勇,仲隱隱有股八婆Feel, 可惜;
反而萬綺雯做得相當自然可愛(我懷疑佢真人都係咁),演技及外型仲"愈戰愈勇".
其實佢成績不至於此,但佢真係好知足常樂,最欣賞佢既生活態度,儲夠一筆錢就去旅行散心,之後先再返黎接jobs,得閒就係屋企湊8隻貓同陪老公,幾寫意.
容錦昌表現比羅頌華好,其後都擔正做男主角;入左無記既發展都唔錯,可惜佢唔自愛兼一時諗唔開... ...唉,總之就可惜啦.
羅頌華當年我都好鍾意佢,原來佢做"藍月亮"既時候已經26歲.但無敵babyface既佢仲可以做到少男感覺, 非常難得.當年佢篇訪問仲話"藍月亮"係佢最愛既劇集.
仲有當年佢同潔儀姐姐拍完"四驅橋聖"後定傳出緋聞.
最迷佢就係佢做中華英雄,形神俱似.但94年開始走下坡,派左去做"睇真D"記者,之後就唔見左.
最後一次見佢竟然係無記,由未大紅時既鄭中基同盧巧音主持既"爆笑急轉彎"做路人甲,陰功一句對白都冇,淨係係主持後陪笑.當其時我睇見都幾心up.
朋友話我知佢而家係有線做幕後.屈指一算佢今年都44歲了.
順帶一提,片中飾演男主角損友三人組之其中一個四眼同學,就係現今著名舞台劇編劇及導演司徒慧焯.
monjeh 唔記得答你, 當年 20:45 播婆媽女婿, 21:20 播俠客行
ATV 19:00 係播最佳才子
我覺得藍月亮好好睇, 個個都做得好好!我翻查過,羅頌華於1987年tvb超級新星入行, 無線電視14期訓練班學員,當時他18歲。另外;嗰一套應該係'香港鬆一鬆',而唔係'爆笑急轉彎'。仲有有線他只是蜻蜓點水,而家同人自組制作公司,周遊列国。
Grace,
Oh, 原來你係首播時已經有追呢套劇的朋友…咁一定好有感情!
八十年代d戲成日都鍾意o係蘇淅門口取景, 不過o個頭又係風景靚同埋方便o既! 我記得細個睇新扎師兄都成日o係寶馬山o個頭取景…咁o岩我o個時又住附近, 所以好深刻!
係咩? 裡面係地利亞o黎o架?! 但係好似無咩校內景咁?!
萬二蚊其實o係亞視已經算係最紅o個幾個…好彩佢無過無線, 總覺得d亞姐去到無線有種格格不入的感覺!
睇真d, 潔儀姐姐近鏡個樣都幾唔靚o下, 係氣質清純囉!
原來容錦昌哥哥都有擔正過咩?!
羅頌華有咁多咩? 真係唔多似喎!
四眼同學係咪有d似邵國華o個位?
Anonymous,
果然做足資料搜集…d資料o係邊度搵到o架? 哈哈, 你一定係羅頌華fans…!
又係“超級新星”? 係咪即係林文龍, 梁珮玲, 彭文堅, 黃子揚o個d? 其實佢都幾有潛質呀…點解無線唔簽佢呀?!
哈哈…點解佢無啦啦會去o左無線做茄喱啡o架?! 太可惜喇
“香港鬆一鬆’係邊個主持o架? 我記得鄭中基同盧巧音個節目好似叫“開心新班子”…不過我都無咩點睇過…因為都好悶o下…同 “爆笑急轉彎”或者“美女廚房”無得比!
M,
咁我又真係有睇“婆媽女婿”o架喎… 唔怪得知無睇過“藍月亮”…o個時直頭唔知有套咁o既戲添! “俠客行”我都有追o架!
“最佳才子”就真係聽都未聽過喇!
係呀我係羅頌華哥哥嘅超級fans呀!細個時睇'500飛虎隊' 同埋 '少女日記'時已經好鐘意佢同埋容錦昌哥哥了。那時我覺得華仔哥哥好靚仔, 而容錦昌哥哥就可愛!羅頌華哥哥好好人,我以前寫信比佢佢都有回信! 真係希望佢可以再返出來拍劇, 因為真的很掛住他, 哈哈!
少女日記係鄧浩光做果套電影﹖有羅頌華同容錦晶咩﹖﹗
少女日記係ATV當時一個青少年/兒童節目,好似係同500飛虎隊參唔多時候播出。印像中主持仲好似有呂仲賢。
Anonymous,
話好勁, 原來真係有羅頌華哥哥o既超級fans! 仲寫信俾佢咁勁添…應該要公開o下佢d真跡俾大家睇o下! 你形容得好貼切…“華仔哥哥好靚仔, 而容錦昌哥哥就可愛”…佢無啦啦癲o左實在太可惜! 同埋睇完 “藍月亮”, 我都覺得羅頌華的確幾靚仔, 難怪佢可以做亞視青春劇御用男主角o既!
Oh…呂頌賢主持 “少女日記”…感覺很趣緻! 個節目唔係關於少女心事o架嘛?! 咁搵d男主持又幾有趣喎!
我想知500飛虎隊和機靈加油站之間,atv0係唔0係仲有一個兒童節目同閃電傳真機打對台?
印象中0個個節目又係有d錄影廠玩遊戲(類似有兩組人參實,過五關斬六將,最后可能係開到寶箱就勝出)?
有d男主持0既"少女日記"好似幾有趣,可惜我對呢0個節目冇印象。
我記得'少女日記'節目裏有好多MTV, 好多好聽嘅歌, 但係有D節目部份又有D似兒童節目有短劇同玩遊戲
Kitty,
500飛虎隊同機靈加油站中間好似都有好幾個兒童節目…最記得有安德尊主持o個個“德尊老師”, 一日o係度閙d細路!
你提到o個個 “有d錄影廠玩遊戲(類似有兩組人參賽,過五關斬六將,最后可能係開到寶箱就勝出)”我都好似有睇過…但唔記得係咪機靈加油站裡面其中一個遊戲定點喇?!
Anonymous,
Oh, 原來有咁多人睇過'少女日記'…好似幾好睇咁…可惜我完全無睇過添!
我道是觉得“刑偵1”里的阿苏一点也不老，而且还挺逗&可爱。。。。。。
只能说审美观和你不同。。。。。。
發佈留言
<< Home