3-18(sun) 光影流情
上個禮拜tvb o個n線新節目, 最好睇o既唔係“向世界出發”(因為謝檸檬確實太over, 你話我o地對佢有偏見到係咁話), 更加唔係三線新劇, 反而係禮拜一晚11點o個個懷舊節目“光影流情”…個節目本身已經好好睇, 再加上對於我o地呢d超級愛懷舊o既老餅, 更加係如獲至寶!
本來都無留意有個咁o既節目, 好彩星期一晚返到屋企唔覺意開電視, 睇到好多精彩舊片段…仲要抵死到有同一個景o係現在同埋四/五十年前o既對比, 教你搵番五十年前出現過o係某套粵語長片o既場景…exactly就係我平時睇粵語長片最鍾意睇同埋最鍾意做o既o野 (亦都係我鍾意睇時裝粵語長片o既原因…古裝我係一定唔會睇o架!)! 好似睇o下彌敦道四十年前係咩樣, 以前搭巴士又係點, 雖然每一次都唔係點搵到o個個地方究竟係等如依家o既邊一度…今次呢個節目就俾晒以前D景你睇, 仲幫你對比埋…滿足晒我o既要求, 直頭係有突添…!
呢個節目真係perfect…一定要讚! 又食正大家呢幾年o黎最愛“集體回憶”呢條水…掂呀! 加上無線咁多年來大把珍貴片段, 唔用簡直係o徙晒…今次可以“無本生利”, 都算佢醒!
第一輯講遊樂場+以前d玩具…啟德遊樂場我就真係未去過, 我諗我出世前已經拆o左…但係荔園我就真係有好多童年回憶, 相信大我十幾年o既朋友就更加有回憶! 去荔園睇大笨象 (我記得係好鬼臭o既), 餵香蕉 , 仲有玩o個隻tum tum轉o既船…好好玩啊! 我諗我最後一次去荔園, 應該係佢臨close之前, 同d同學仔去佢o個個“飄雪樂園”…無幾耐就摺o左lu! 97年東東同梁詠琪o個套“初戀無限touch”, 好似都有sell係荔園臨拆之前去取景o既…未去過荔園o既朋友, 可以睇o下呢套戲!
呢個節目仲會整d舊新聞+舊電視節目表出o黎…真係好珍貴! 仲有“溫拿狂想曲”o既片段, 再引申去話以前d“sur滑梯”真係長過依家o個d好多…刺激好多呢! 仲有陳錦鴻做呢d節目o既主持都幾稱職, 又搵o下修哥講o下以前o既事, 最適合不過! 希望無線會出多d呢d節目, 長播長有就好喇!
終於睇多o左幾集“同事三分親”…咁又真係好睇過第一集好多o既! 關詠荷果然係有觀眾緣, 佢一出o黎個感覺係討好過江欣燕好多…又可能係加埋江欣燕本身個角色唔討好!
至於呢d辦公室政治話題, 都ok好睇同埋有共鳴o既…d演員亦都做得幾好幾自然! 做江欣燕條o靚o個位先生係邊個o黎o既呢? 佢都做得幾好! 仲有o個個外籍人士都做得唔錯…終於除o左河國榮之外, 無線仲有其他外籍人士演出!
同埋點解又要搵上年對“手機偷拍情侶suspects”- 蔡淇俊同陳自瑤做一對?! 係咪想引起話題呢?
仲有, 呢套戲又有“粥粉麵飯”個“粉”黃卓慧做…睇o黎呢期真係力捧佢喎!
至於“寫意人生”…無咩特別, 同“亂世佳人”一樣都唔係我杯茶…只係有一樣o野想講…點解黎姿個樣真係老o左咁多?!
Oh, 發現無線個收費電視台原來上個禮拜開始播我細個好鍾意睇o個套“成功路上”…郭晉安真係廿年來都係咁o既樣…點解能夠keep得咁好o既呢?! 仲有第一次拍劇o既劉小慧…好清純呢!!!
又, 上星期六晚做"博愛歡樂傳萬家"…又見到“才子”王貽興, 佢真係完完全全咁變o左做明星喇喎! 仲有佢同港男黃長興一齊做o個幕舞台劇…佢兩個無論個名定係個look, 都比黃長興同佢細佬黃長發更似兩兄弟囉…仲有, 有好多人話見過黃長興真人, 話好靚仔喎…咁佢又好似好樣過佢細佬好多o既!
posted by 芒姐 at 6:33 下午
14 Comments:
喂喂, 啟德遊樂場係1982年關閉o架!
芒妹, 其實你都好後生o者, 愛懷舊或者係真o既, 不過講到老餅, 你應該仲未算喎, 你呢度有好多三字頭讀者o架, 你成日自稱老餅, 會得罪好多人!
一直都唔多識黃長興, 後來見到佢o係"賭場風雲"扮年青版o既三哥, 又好似幾ok!
re番喝彩的post
gary哥哥扮"哥哥",我係佢個blog度摷到一篇文:
http://hk.myblog.yahoo.com/iam-garytam/article?mid=2934
原來當年有人話佢似郭晉安,咁又有人話過部晉安似張國榮,根據a~b,b~c的道理,所以a~c
(有冇用錯數學formula?:p)
做江欣燕條o靚o個位先生係邊個?
Mon Jeh, do you mean the man beside 江欣燕 on the picture (his left hand on the blue folder)?
His name is 徐榮. I remember him as the robotic OCTB in CIB刑事情報科 (His OCTB partner in CIB is 李永豪).
哈哈~芒姐﹐我真係好佩服你﹐居然知道粥粉麵飯係邊個打邊個~對我黎講﹐真係個個都一模一樣~
我就梗係會支持娥姐啦!實在太耐無見她~
最近我睇緊鳳凰四重奏 (終於有d時間睇喇~)
而家睇緊清朝~
嘩~阿佘+陳鍵鋒﹖勁唔襯囉~我實在接受唔到呢個配搭~姐弟戀都麻麻啦﹐何況唔係~
再上tvb睇睇個網頁~
簡直噴飯~
陳鍵鋒20歲~ 阿佘19歲﹖﹖
好﹐算~
但馬德鐘19歲﹖﹖﹖﹖ o_0
唔係掛﹖~
唉~叫馬德鐘扮19歲唔係問題 (其實都幾大架喇~不過要配合返阿佘既年齡~o甘就算啦~)
但係唔好叫陳鍵鋒扮二世祖啦~
真的看不下去~
搞到我想SKIP到去60年代~我個妹睇緊~好似幾好笑~
不過我就真係幾鍾意阿佘得閒旁白一下﹐俾d comments~幾有意思~
做江欣燕條o靚o個位先生響"火舞黃沙"飾演「國基叔」, 戲中經常青筋暴現咁鬧人同咆哮.
Re 那位外籍人士：
http://appledaily.atnext.com/template/apple/art_main.cfm?iss_id=20070320&sec_id=462&subsec_id=830&art_id=6917150
芒姐, 好想提下係同事三分親中飾演"樓華"角色的王祖藍, 我個人幾欣賞佢呀, 雖然唔係睇過佢好多野, 但係聽講佢扮野好有一手(上年有個廣告佢扮好多歌星,好似係宣傳唔知乜鬼籌款show),佢真係幾得,個角色好好笑,食正劉華個名,更覺搞鬼
泰美,
係呀, 王祖藍真係幾有才華, 尤其扮啦...佢o係"東方之珠"扮埋郭晉安把聲幫佢代唱o個o下抵死!
o係呢套劇佢都做得幾好, 可惜外形局限, 好難再上到位...
雙面伊人,
嘩, 呢個哥哥好得...我最欣賞佢: " 2000 年 毅 然 放 棄 月 薪 達 6 、 7 萬 的 IT 工 作 ， 決 心 全 職 做 臨 時 演 員 "呢份決心同埋guts...係你同我都無o既...不過我會努力咁向佢學習...話唔定兩三年後我可以有呢份勇氣!
匿名,
re: "火舞黃沙"飾演「國基叔」, 戲中經常青筋暴現咁鬧人同咆哮.
...呢個哥哥係咪新人o黎o架?! 定係o係呢行好耐但我唔識佢?!
oli,
睇o黎娥姐觀眾緣真係爆燈, 無線唔播"陀槍2", 真係不智!
"鳳凰四重奏"係幾好睇...我就幾鍾意第2同埋第4代!
清朝麻麻地, 好彩幾集就過o左...佘佘拍陳鍵鋒...o係"紅衣手記"已經好姐弟, 尤其女人唔kum老, 依家o既佘佘真係大過陳鍵鋒好多, 唔多襯, 寧願佢同馬德鐘!
shaw_mag,
我真係從來都無留意過o個位先生添...
jj,
咁睇落gary哥哥又真係有d似阿旺o既, 至於郭晉安似哥哥, 其實唔係舊年睇番呢段88年台慶片段, 都唔記得原來佢曾經俾人話係哥哥接班人!
....
http://hejnom.blogspot.com/2006_04_01_archive.html
老餅,
oh sorry, 咁我收番呢句...我收番! 哈!
其實我話自己係"老餅", 係指心境而並不是年齡, 年齡呢家o野, 你大極都總有人會大過你o既, 所以我從來都唔覺得年齡係一個問題...
原來啟德遊樂場係1982年關閉...咁又唔怪得知我未聽過...
發佈留言
<< Home