4-15(sun) 1991香港小姐選舉

前幾篇講開蔡少芬個18歲過百萬生日會, 係時候要講o下佢參選o既1991年港姐選舉…因為真係幾值得推介o既一屆!

咁多年o黎我都同d同學仔成日discuss呢屆港姐, 可能因為o個時六年級特別早考完試, 考完試無o野做o既小朋友, 就自然睇電視睇得最開心, 所以o個年o既港姐我都追得好貼…仲有o係決賽當日特登走去太古城中心學人去玩o下全民投票 (o個年係第二屆有全城投票日)!

哈哈…我當時係投蔡少芬o架…不過我真係唔知我點解會投佢, 除o左因為佢係大熱門之外?! 依家o既蔡少芬就當然係做得好啦, 但當時o既蔡少芬其實都幾唔得o下…17歲卜卜脆, 講o野勁無知 (真係好似無讀過書咁), 仲要係我最憎o既勁懶音…成個感覺真係勁cheap! 我對於佢多年來無論演技定係人品或者可以叫成個人overall o既進步, 真係覺得好impressed!



唔知大家對佢當年o既“18歲過百萬生日會”有無印象呢?! (睇完"向世界出發2"就當然記得啦…佢仲親口講番佢個version俾大家聽添), 我都係之前睇番d舊雜誌先記番起! 當時都好烘動o下…同埋大眾對佢o既印象都係年紀細細就好貪慕虛榮, 崇上名牌, 總之就係好唔得o個隻 (我諗同大眾對羊攻魚小姐o既感覺差唔多)…真係估唔到, 佢之後咁洗心革面, 直頭變o左另一個人一樣…好值得人對佢另眼相看!

當時有報導話:“91年三位港姐郭靄明, 周嘉玲同蔡少芬, 以ada呢個17歲小妹妹最適合呢行發展, 最識同人打交道, 另外兩位比較寸”…依家睇番又果然係喎! o係娛圈o既成就, 另外兩位姐姐真係同佢無得比! 至少佢都叫做做過tvb視后呀!



雖然三個我都曾經係呢16年裡面o既唔同階段buy過…要數最buy o既, 一定係大家估唔到o既…周嘉玲! 91年佢當選時, 真係覺得佢個樣超唔靚, 仲要好大份, 又超寸…但係到2001年睇亞視o既“俠骨仁心”時, 居然喜歡上佢, 仲要喜歡o左好一段時間, 有佢o既節目都錄起晒, 仲要摷番d舊雜誌, 舊錄影帶, 連佢上封面o既無聊magazine我都買o黎睇! 不過佢對比番十年前,又真係靚o左好多喎…可能o個時d妝化得怪o卦? (成日都覺得d港姐反而係選完做番自己係靚過選o個日好多, 因為d髮型同化妝通常都搞到好怪咁…除o左譚小環囉…佢係唯一一個我覺得選o個日佢一生人之中最靚o既一次!) 同埋睇佢d訪問先知原來佢係幾可愛同埋幾搞笑o架喎…真係你估佢唔到!!! 再加上佢o個種獨立+自信倔強+讀過o下書+英文好o既特質…係我好buy o個隻!


(十年前後的對比)

當然不得不提五甲裡面另外兩位…當時走孖公仔路線 (依家就好似唔多啦間咁) o既樊亦敏同何婉盈…佢兩個一落選完之後o既發展, 比起當選o個三位仲要好…o個時已經話係要特登放佢o地去拍劇或者做主持, 所以先三由不入!

仲記得決賽o個晚頒獎前無啦啦加個問答環節 (自呢年開始一連幾年都有)…好似特登係為何婉盈而設而令佢出晒位, 正當d人以為tvb係為佢舖路戴后冠o既時候, 佢居然三甲不入…但係又一個屈尾十唔夠一個禮拜就得到tvb力捧去做“勁歌金曲”同埋“新秀歌唱大賽”主持…後來仲單憑人氣 (無理由係憑歌藝o卦?) 俾唱片公司發掘去出唱片…埋o下o左日後人氣急跌, 成為大眾恥笑對象o既伏線 (你睇佢有份被列入“廣播道fans殺人事件”o既“我o地支持你”名單…就知咩事啦!)! 仲要因此而認識之後反目成仇o既“再見亦是朋友”好柏檔+前愛人曾航生…真係萬劫不復囉! 如果佢當初唔係行錯呢一步, 同佢師妹譚小環樣五音不全走去做歌手…可能o係電視圈仲紅緊!



至於樊亦敏, 都紅o左一陣子o架…佢因為個樣上鏡, 又拍過廣告…好快就被揀中做主持又拍電視劇, 發展亦都唔錯, 仲同依家已經出o左家o既何寶生有一段情添! 我記得有年學校tq請何寶生o黎做其中一個嘉賓, 佢一上台d人仲哎“樊亦敏”添…不過依家已經消聲匿跡o左! 仲記得多年後郭羨妮參選港姐時, d人仲話佢似樊亦敏 (亦的確係有d似), 佢仲話佢自己係樊亦敏o既師妹…o係學校跟過佢跳舞添!



不過其實我最想講o既都唔係d參賽佳麗, 而係佢o個年o既外景拍攝! 唔知大家仲記唔記得o個年o既準決賽? 近期又重溫o左一次, 外景o個part真係超有創意, 又超好睇! 其實咁多年o黎都成日都d同學仔講起呢一part…當時睇完已經覺得好impressed, 好匪夷所思, 諗極都唔明點可以做到…直頭好似睇o左人體奧妙展咁!

其實係我個人無知o者…後尾諗番, 就覺得唔係話真係咁神奇, 但係都不得不配服佢d時間夾得好好, 完全無穿崩!


(o係網上見到一張好搞笑o既紙幣…d人話似郭藹明喎! 睇落又真係有d似! 哈! 真係“郭藹明過海搵郭可盈, 話郭可盈個袋好型, 郭可盈叫郭藹明過海改個袋型, 改成郭可盈個袋型”喇…哈哈哈哈哈!)

話說o個年港姐搵o左o岩o岩拍完“今生無悔” (港姐選舉時呢套戲仲播緊)人氣超強o既黎明, 同埋o係台灣拍o左個廣告一炮而紅跟住回流香港o既郭富城一齊做港姐外景嘉賓 (決賽嘉賓仲有學友同劉華添…不過第二年仲強, 係四大天王首次 [佢claim啦, 但係好似o個年太陽計劃已經飲o左頭啖湯] 同台演出…但係我唔覺得太好睇, 反而91年好睇好多!)…佢o地同一班佳麗去瑞士雪山拍外景, 郭富城仲碌o左落山因工受傷o個次呢!

嘩! 呢個表演都真係幾勁…o個時我直頭覺得神乎奇技添呀! 老黎同城城兩個無啦啦可以o係外景度跳番入廠景, 又拋d o野出o黎個錄影廠度跟住o係外景接番, 又拿枝雪條出o黎派俾現場d人, 又可以拖個人入去etc…我o個時真係睇極都唔明點可以做到囉?! 大家睇o下喇!



咁當然, 後來我諗諗o下應該只係d時間夾得好好, 佢要由外景跳入廠景時就pause左段片, 跟住夾o岩時間又跳番入去…唔係咩神乎奇技大衛高柏輝, 只係練習得好無穿崩o者! 不過呢個當時o黎講咁有創意o既表演, 我呢d無知o既小朋友係欣賞到今日o架!

呢個咁精彩o既環節加埋d唔錯o既佳麗同埋其他表演嘉賓, 令我對呢屆港姐刮目相看! 呢一年o既港姐, 加埋1994年個treasure island+十級爆笑李綺虹, 同埋1999年…係近廿年o黎我覺得最可觀o既三屆港姐選舉!