4-4(wed) 衛蘭my first concert
前幾日去o左睇衛蘭個“my first concert”…嘩, 真係呢…史上最呃錢o既演唱會! 沉悶程度足以媲美幾年前關心妍個什麼“I am ready演唱會”…兩個都係第一次, 兩個都係咁悶! 不過我鍾意janice多d, 所以感覺都好過關心妍少少o既, 但係就咁個演唱會本身, 直頭係我睇過咁多個演唱會之中top 5最唔得o既!
8:40開場, 10:50就完show…係, 如果你話內容好充實好豐富, 就算短都值回票價…最弊佢唔係呢! 成個演唱會個flow係可以話零囉, 好求其, 連度橋都慳番! 平時d演唱會都會度o下由一part點flow落去下一part (克勤d演唱會o係呢方面就做得好好, 尤其係02年個“情情塔塔演唱會”…咁先有誠意o架嘛…抵佢多人睇!), 你咁求其, 下次搵鬼睇咩?! 你諗唔到做咩, 搵阿老闆黎生出o黎講一part金句聽o下都好呀!
加上衛蘭搞氣氛又真係完全唔得, 莫講話搞氣氛, 基本上佢連講o野都係唔多知佢想講咩, 又無字幕喎…不過有樣要讚, 就係佢唱live真係唱得好好…可惜佢只係出過3張碟, hit歌數埋唔夠10隻, 除非係佢fan屎, 否則可能有一半歌都係唔識! 仲有其實佢同應昌佑o個首合唱歌“24”都好好聽…點解o係咁唔夠歌之下都唔唱呢隻呢?
唔夠歌都唔緊要喇, 唱多d人o地d歌咪得囉…或者俾佢個妹唱多兩隻囉…反正都係想借呢個演唱會捧埋佢個妹o架啦! 但我又真係唔明, 點解阿衛詩未收身都要著三點式出o黎見人? 係邊個逼佢咁樣搞法? 定係佢太有自信? 無理由會喜歡自暴其短o架?
可能依家個樂壇大氣候真係捧得d歌星上位得太快, 以前要等三,五,七年先可以去紅館開個唱…依家出道一,兩年就話殺入紅館…得來不易佢o地先會識得珍惜, 搞演唱會都搞得落力d! 今次呢個演唱會有d交行貨, 令我好失望, 抵佢獲得一致劣評…我唔打分俾佢添呀! Hm!!!!!!!!!!!!!!!!!!!!!
(花生女郎 (PP Gals) - DJ Boy MV)
睇番d舊歌片段仲精彩過去睇演唱會…呢隻係我成日都講, 由九十年代初樂壇曇花一現女子組合PP Gals唱o既 “DJ Boy” …十幾年後有人談論番呢個組合, 都係因為紅o左其中一個成員…張可頤!
但係張可頤當時o係四個裡面反而係最唔紅o個個…仲要“寧寧瀉瀉”疏個短髮, 有d怪! 係到94年, 佢改o左個洋名叫maggie (又或者係用番佢真正o既洋名啦…我唔知…) 走o左去選港姐, 一眼就認得出係佢, 不過就靚o左好多! 之後“難兄難弟”年代o既佢, 個樣就更加掂啦! 反而當時最起眼o個個, 係拍拍能得利果汁橡皮糖做天使&魔鬼o個個姐姐!
當然最值得留意o既, 係佢o地真係好鬼假地拎住個結他o係度扮邊彈邊唱…係好假,不過好過癮!
終於有人post呢隻歌mv上o黎, 未睇過o既朋友可以睇去睇o下, 同埋聽o下呢首咁經典o既歌…成日去k都想唱, 可惜次次都搵唔到!
仲有另一段片, 又係當年播出時笑o左好耐o既…羅嘉良同張可頤上去“超級無敵獎門人”宣傳 “難兄難弟”…大家可能都應該記得…自己睇啦…哈哈哈哈哈…
(難兄難弟獎門人)
oh, 仲有仲有…呢排講開倪詩蓓vs劉小慧, 又俾我o係youtube見到劉小慧初出道時一首好hit o既歌“留住這一刻”o既mv…個MV男主角居然係"手語人"王維德!!! 呢首歌又係好鍾意…又係我最懷念o既九十年代初MV!
(劉小慧 - 留住這一刻 MV)
因為有好多讀者話未見過倪詩蓓近年o既樣貌, 咁我又走去search下啦…呢張係我搵到比較近期o既一張…
近期有個無聊白痴網上遊戲…雖則幾無聊, 但都幾好玩呀…偉仔和郭首富爭嘉玲…
posted by 芒姐 at 1:46 下午
18 Comments:
幾個其實都幾靚!
記得有個好似撞過車幾乎死(定真係死左?)
又有個樣最靚,但隻腳勁粗.
仲有無佢地全名?
我係講緊PP Girl
其實我就覺得衛蘭唱live唔係好得(可能咁0岩我睇0個次係啦)...
其實依家d新人...就係紅得好快...好似側田咁...未又好快開個唱...但可唔可以一直咁捱落去就係唔知啦...
都係覺得好似Eason & 克勤 尼d先至正ar...真係有心咁去做自己既演唱會...唔係淨係搵d fans $$$$
題外話:
睇返你好久前的華東水災1991的文章,其實我想問你有冇錄到當年有關華東水災籌款atv的特備節目呢??
我記憶中當年有班人拿住candles,氣氛幾特別...希望可以重溫返d片段啦..
竹昇係外國地方長大, 佢地唔覺得佢咁既身型係肥。我係外國讀書,d鬼d竹昇個個都係突住個肚腩著緊身衫,擠哂d pat pat肉咁著緊身褲架。所以阿衛詩應該覺得自己冇咩問題。佢反而覺得你地d人咁瘦係唔健康。
不過d肉真係好恐怖。唔開胃。網友比比,你以孚忘記了sammi呀...拭目以待。肯定物超所值。
睇真張可頤都有好多close-up wor, 其實當年係咪都係諗住捧佢架? 咁佢當時叫咩英文名呀?
"拍能得利果汁橡皮糖做天使&魔鬼o個個姐姐"個咀好奇怪, 我唔覺得佢靚wor, 另一個長頭髮姐姐靚d wor!
第一個匿名,
你話"有個好似撞過車幾乎死"... 你講嘅係咪Face to Face?
唔係, 吳少芳好似早排仲有比車淑梅訪問.
PP Gals真係好曇花一現,不過佢地首DJ Boy真係幾好聽同幾難忘,今時今日可以重溫呢個MV真係好開心。佢o地玩樂器係玩得好假,不過難得佢o地咁投入,而且佢o地呢個形象幾特別。
張可頤係o個時我覺得最唔起眼,加上個短髮同Tina呢個名(Maggie先係佢原名),真係有d怪。佢選美時我都認得佢,我都故唔到佢會走去選美。“難兄難弟”我又係好鍾意睇,佢做得好之外,個樣都幾靚。
至於能得利果汁橡皮糖做天使&魔鬼姐姐(好似叫joey),可能佢拍過廣告加上我認為佢都幾靚,於是佢係四個之中最sharp,本來我以為佢都應該有得發展o下,點知PP Gals解散後佢一d影都冇,照計佢應該唔止拍過能得利,好似都拍過d雜誌。
另外仲有一個叫Lily(袁麗麗),即係mv裡面一開始第一個講野o個個女仔,網上有人話佢嫁咗俾參加過《未來偶像爭霸戰》的區耀國,即係《Q表姐》入面狂追Q表姐o既練馬師o個仔,佢都係唱過歌出過碟,佢地兩個都唔"啦更"o既,真係估佢唔到,可能佢o地係因為音樂而相識掛。
講起袁麗麗有的印象,佢係亞視做過一排,所以同區耀國一齊唔奇.(區耀國係未樣似成龍果個?)
嗰四個裏面係唔係有一個喺"男親女愛"入面做"青無蓮上師"........
匿名,
"男親女愛"入面個"青無蓮上師"...真係無咩印象添...
Kitty&匿名 ,
嘩! 區耀國你都識…好勁喎!
追q表姐o個個人我又真係唔多記得喇, 淨係記得施sir歐錦棠…今日睇 “同事三分親”見到佢同黃家嵐一齊, 唔知點解令我諗起 “q表姐”
pp gals四個入面, 唔記得係咪有個成日上yes!雜誌o既呢?
情迷Milano & 匿名s,
撞車昏迷o個個應該係二人女子組合face to face其中一個, 不過唔記得係吳少芳定另一位, 亦都唔知最後有無死到?! 前幾日去唱k先講開呢件事…
成日都想搵番佢o地隻 “face to face相隔空氣…”, 但係mv又無, k又無得唱…只係得 “愛上你milano, 夢在浪漫街道…”…雖然呢隻都好好聽!
匿名,
我又唔知當年係咪諗住捧佢, 不過又唔多似係…要問番當年捧佢o地o既鄭敬基喇!
當時佢叫tina…寧寧瀉瀉一個短頭髮, 所以特別記得佢!
Esaltato,
其實如果衛詩無著o個件騎呢三點式, 根本平時都唔覺得佢肥…佢呢d完全係自暴其短…同埋o個件衫真係好肉酸!
匿名,
係咪張學友上o左去跟住俾無綫封殺o個個節目…我無錄呀, 睇都唔記得有無睇到…可能睇o左少少…
比比,
算啦…可能依家d人更加覺得今日唔知聽日事, 所以要襯人氣高企時搵多d錢, 有演唱會就襯早開囉…
發佈留言
<< Home