2007年4月7日星期六

4-7(sat) IQ成熟時2007

話咁快“IQ成熟時”已經重播o左兩個禮拜, 放假終於有時間睇番少少…雖然睇o左無數次, 依然咁鍾意…唔知未睇過o既朋友第一次睇又有咩感覺呢?!

如果大家唔知我講邊套戲, 麻煩去睇o下d background information先:


2003-08-01(fri) 隆重登場 – IQ成熟時



2003-08-02(sat) 經典再重溫 - IQ成熟時2



2003-08-03(sun) 廿年人事幾翻身 - IQ成熟時3



2006-10-6(fri) 愛的教育 鄧靄霖


一聽到首主題曲已經興奮, 同“甜甜廿四味”, “驟雨中的陽光”o既主題曲一樣咁好聽…麗的o個期d青春劇真係無敵! 不過呢首主題曲就更加cutie, 更加輕快, 更加跳脫…一聽個前奏音樂已經令人好開心! 真係忍唔住要post出o黎一齊唱o下囉…

“每次我寫新詩 (新詩)
費盡勞力心思 (心思)
形容詞用盡也不似 (總不似)
難形容是癡心 (癡心)
難形容是真愛 (真愛)
令我猶疑 寫了又試

心中的影子
小小的天使
你那笑臉迷住了我心智 (IQ成熟時)
應怎麼開始
開始第一次
每次遙望你苦未已

遙遙沉點注視 (注視)
每日期望孜孜 (孜孜)
時時期望建立是友誼
情懷澎湃不止 (不止)
情懷原是真摯 (真摯)
但怎可以使你會意”


(“IQ成熟時”主題曲…跑操場呢幕真係好經典!!!)

嘩! 好勁…連wikipedia都有“IQ成熟時”o既資料:
http://zh.wikipedia.org/wiki/IQ%E6%88%90%E7%86%9F%E6%99%82

《IQ成熟時》 是香港麗的電視1980年代的青春愛情廣東話輕喜劇電視劇。1981年6月1日首播,共有20集。(芒按: 我以前睇過d舊雜誌, 好似話係用o黎打無線o既“荳芽夢”…仲打到佢落花流水…唔知係咪真呢? 如果有o個個年代已經睇緊電視o既朋友, 請賜教!) 2007年3月26日起星期一至五下午在亞洲電視本港台經典午間劇場重播。

監製係梁天, 編劇係鄭丹瑞同文雋…所以咁正囉! 主題曲《IQ成熟時》由盧國沾填詞,蔡楓華主唱。

當年成日想search d演員名單都search唔到…

鄧藹霖 飾 黃玉珠 (珠仔)
莊靜而 飾 湯嘉棣 (花灑)
蔡楓華 飾 彭濟材 (Peter Pang)
鍾保羅 飾 文樹森 (阿Man)
車保羅 飾 楊熹 (阿怪)
鄧慧詩 飾 許洵麗 (細細粒)
楊詩蒂 飾 胡老師
張錚 飾 小食店老闆,楊之父親
李燕萍 飾 校長 (大白鯊)
伍永森 飾 唐主任
吳回 飾 老先生
梁淑蘭 飾 梁珍納 (阿姐)
冼金華 飾 冼美華 (事頭婆)
周美玲 飾 周小玲 ((阿檬)
何淑嫻 飾 何美芬 (吱咋妹)
陳敏兒 飾 林敏兒 (林黛玉)
莫少聰 飾
譚德成 飾 張永強
蕭山仁 飾 文之父親
良鳴 飾 Peter Pang之父親
鄭文霞 飾 湯之大媽
許淑嫻 飾 湯之細媽



(早年o係library摷舊雜誌的寶貴收穫…現在終於有機會公諸同好!!! 各位觀眾…《IQ成熟時》全版宣傳廣告…真係好珍貴啊!)

套劇真係好cutie, 睇得人不時發出會心微笑…未睇過o既朋友, 點都要睇番一集半集!

我最鍾意o既角色, 當然係鄧藹霖auntie做o既珠仔啦…通常睇呢套戲o既朋友, 男仔就一定係鍾意莊靜而o既花洒 (我真係覺得o個時o既佢有d似阿gill…只係走樣走得太快o者!), 而女仔通常都係buy有性格+爽朗智慧型o既珠仔!

鄧藹霖第一次 (亦都好似係唯一一次)做電視劇, 可以做得咁稱職其實真係幾唔錯o下! 仲有, 佢把沉沉地但係又好清o既聲, 加埋字正腔圓o既咬字, 亦都係我好buy o既o野! 94年第一次睇完呢套劇, 真係瘋狂咁迷上鄧藹霖auntie…可惜我活o係一個錯誤年代, o個時internet又未發達, 搵o左好耐都搵唔到佢d資料…只係知道佢已經係港台一個資深dj, 同埋已經由少女變成auntie! 仲有就係佢o個個家計會年年驗身廣告囉…!


(珠仔+阿man+ 花洒合照…當年係睇o左同樣喜愛“IQ成熟時”o既帶銀公主 網頁得知北角有得賣舊明星相/劇照…特登慕名去摷番幾張o架!)

到o左 2001年12月, 港台唔知記多周年紀念, 搵o左一班經典dj復出開咪做節目, 佢就主持o左一連兩個禮拜o既“把歌再談心”…嘩! o個時知道佢會再開咪做節目幾咁開心呀, 仲特登買定晒md去錄低晒佢 (須知我其實好少聽電台) 同埋推晒所有夜間節目留o係屋企…到最後o個集仲fax左d o野去俾佢 (我記得我仲問佢究竟佢個名o既正寫係點, 因為次次睇都唔同…佢話正寫應該係係“鄧藹霖”, 不過d人成日寫o左“靄”, 反正又同音, 都無咩所謂!)...而最後佢居然回o左張卡+簽名相俾我…哈哈! 我為此真係開心左好一陣子o架...hohoho!


(哈哈…破禁公開鄧藹霖姐姐的親筆簽名相+卡…勁呀! 如果係以前o既相就更加好, 後期o既佢d妝真係未免太濃!)


(我都係最鍾意佢26年前呢個頭)

o個時仲試過打去電台 (好似係關偉光o係港台一台個節目) 點鄧藹霖唱o個首插曲“不要問理由”…嘩! 佢真係播o左喎, 我仲錄o左o係casette添…又係好開心, 因為o係網上都唔係點搵得番呢首歌!

仲有另一個港台八十年代著名dj有份做呢套劇, 又係2001年港台周年有搵番佢出o黎開咪…就係o係劇入面同鍾保羅有一段情o個位插班生“細細粒”-鄧慧詩! 我o係網上睇到連佢都有fan屎 (我意思係指居然有人睇“IQ成熟時”係會鍾意細細粒呢個角色)…我個人認為佢o係呢套劇個角色真係唔多討好…成日眨眉眨眼, 又懶靚咁…同埋個角色性格都幾克人憎o下…佢真人就應該ok o既…聽佢d節目覺得佢應該係一個幾trendy o既auntie添!


(又係早年o係library摷舊雜誌的收穫…)

至於蔡楓華, 1999年重播時佢都人氣急升過, 仲有得o係伊館開演唱會…我都有去睇呀! 知唔知個演唱會叫咩名?! 答案係“楓華再現”…亦都間接俾o左靈感我幫呢度改o左個名叫“芒姐再現”…呵呵呵! 唔知今次重播, 會唔會令紅唇王子又再鹹魚翻生多次呢?



其實…我真係覺得當年o既佢, 同韓國人氣偶像阿rain好鬼死似…唔該阿rain fan屎唔好打我…打我都要講…真係似嘛!



亞視五十周年, 最有建樹都係重播晒咁多經典劇…希望佢陸續有來!

34 Comments:

Anonymous 匿名 said...

我只係細個時睇過"IQ成熟時", 當時係首播, 因為我當時都仲係細, 所以印象都幾模糊, 只大概記得, 唔知係幾個男仔入左女校讀書, 定還是幾個女仔入左男校讀書... 我記得我姐姐當時最憎嘅係鄧慧詩, 我自己最記得嘅就係佢地班房中嘅書台, 因為覺得好似自己學校MUSIC ROOM D 書台...

我又唔覺"IQ成熟時"特別好睇, 所以咁多年來一次重播都未睇過!

3:52 上午  
Anonymous 匿名 said...

我都有印象當時對台係播緊"荳芽夢"(但唔敢百分百肯定, 因為當時真係細), 我記得我屋企當時兩邊台轉來轉去(播"甜甜廿四味"時佢地又係兩邊台轉來轉去), 所以兩套劇都有某D劇情MISS左, 不過到後期屋企應該係揀定睇無線, 因為我對"荳芽夢"嘅劇情印象深D(好記得翁靜晶嗰兩條短辮, 同埋個男主角RONALD, 我記得當時有人話個男仔似少年版西城秀樹), 對"IQ成熟時"就比較模糊!

4:12 上午  
Anonymous 匿名 said...

哎也, 莊靜而咁靚女, 但竟然被安排同個核突佬蔡瘋華做一對情侶, 實在係太太太離譜喇!

3:38 下午  
Anonymous 匿名 said...

"8:00著燈開飯睇電視" 係劉家傑第一次做主角既電視劇...但當然唔多好睇.

據蕭若元自已講:
http://hkreporter.no-ip.com/Shiu/20051027/20051027c.mp3
IQ成熟時都係蕭若元寫既,阿旦同文雋係跟老蕭的編劇

2:27 上午  
Blogger m@linxism said...

1999年x mas果陣我都有睇! 最記得車保羅同鍾保羅都有份做, 同名好搞笑.

3:03 上午  
Anonymous 匿名 said...

早排睇報紙話亞視計劃請關正傑出山同埋請蔡楓華唱《IQ成熟時》的主題曲。即係以下報導:
http://news.sina.com.hk/cgi-bin/news/show_news.cgi?ct=entertain&type=entertain&date=2007-02-28&id=2339926

初時覺得如果係就有野睇啦,不過結果都係落空,呢個演唱會今個月已經做哂宣傳仲賣緊"飛",睇黎今次都好難睇到"楓華再現"。
蔡楓華當年被定位為白馬王子,襯女主角一d唔奇。
《IQ成熟時》的主題曲真係幾好聽,好有活力。鄧藹霖唱o既插曲都幾好聽,真係唔知道佢都有唱歌。

芒姐,你d珍藏好正,完全感受到你搵到d珍藏時o個種喜悅。
劇中飾演阿檬o既女演員,我反而係小學睇80's教育電視識佢,佢係etv多演師奶角色,《IQ成熟時》係我見到最後生o既佢,佢應該80's一直o係rtv同atv做綠葉,後來91年左右仲演戴夢夢幼稚園班主任。

荳芽夢n年前o係無線重播過,冇點睇過,只記得主題曲同翁靜晶個look,其實呢套野好唔好睇架?

8:13 下午  
Anonymous 匿名 said...

你有無發現d茄呢啡d名改得好‘行’?係咁e用真名改一個本個字就算﹐我絕對有理由相信0個個梁淑蘭叫梁珍納﹐係因為佢英文名叫jenny...

1:39 上午  
Anonymous 匿名 said...

芒姐有冇睇"溏心風暴"呀? 我覺得好不知所謂呀, 夏雨陳豪嗰一家人都好黑人憎, 成日都戚起膊頭咭咭聲咁笑, 作狀到爆, 芒姐你一定要晌你個專欄度鬧下呀!

10:18 下午  
Anonymous 匿名 said...

我都好同意匿名呀~好難頂~仲要陳豪梳過咁既頭~著埋d伯父衫~唔知想點咁~好核突~同埋無記d戲真係好鍾意幫阿爸阿媽改d好騎呢既名~果套咩【識法代言人】又叫阿姐做咩狀媽~而家又叫個阿爸做鮑爸~真係好古怪!!!

仲有岩岩見到陳豪同鍾嘉欣在超巿果場戲~簡直睇到眼火爆~不停重覆果兩句對白~都唔想知點~就算想凸顯佢好慳妹或者口齒伶俐(雖然呢個我唔多認同)~都唔駛安排場咁既戲~就算係~唔駛拖長咁耐!!睇睇下忍唔住走開~

10:50 下午  
Anonymous 匿名 said...

同意匿名同紙巾呀!! 夏雨成家人都好似好衰格咁, 唔只講人是非, 仲"鍍叔"到連菩薩都呃, 真係好黑人憎!!

陳豪同鍾嘉欣在超巿果場戲直頭睇到人扯火, 套戲唔知出自邊個手筆呢? 咁低質素架!!

1:13 上午  
Blogger 芒姐 said...

毛毛, 紙巾 & 匿名,

oh...溏心風暴我未有時間睇...淨係睇過個片頭, 好大堆頭咁喎...唔知點解有d"天地男兒feel (指唱完主題曲成jar人企/坐晒o係度)...監製好似係劉家豪, 唔怪得知咁"大家族"style!

哈哈...我都好同意紙巾講話tvb成日都好鍾意幫d人作d好肉酸o既暱稱...呢d咪係名符其實o既肉麻當有趣囉...除o左狀媽, 仲有"一屋兩家三姓人"o個"蕉蕉"同"蕉媽"(扮係"舅"個音喎), 其實當年o個d"肥媽"都已經有d難頂...其實有幾多人o係屋企叫阿爸阿媽呢d咁o既怪名...依家o個d簡直係走火入魔添啦...又或者佢o地覺得係點題啩?


果套咩【識法代言人】又叫阿姐做咩狀媽~而家又叫個阿爸做鮑爸~真係好古怪!!!

2:26 下午  
Blogger 芒姐 said...

金,

算吧啦...d"騎呢啡"佢o地都幫佢作個名都好俾面o架喇...同埋或者咁樣可以令大家更加記得佢o地個真名呢...用心良苦啊!

2:28 下午  
Blogger 芒姐 said...

Kitty,

哎...我都會去睇atv個演唱會, 不過睇完佢有日個"preview"之後, 發覺真係一d都唔吸引...連劉愷威都有份唱...真係唔知有幾咁經典喇?!

我都好期待"楓華再現"o架嘛...點知又無得睇! 全部唱經典歌曲o既歌手都唔出現, 真係唔知佢個演唱會點經典法喇!

《IQ成熟時》隻主題曲真係寫得幾好, 曲同詞都好呀...雖然係俗O左D, 但係個感覺好出喎!

鄧藹霖係有唱歌O架, 不過夾埋唔知有無廿隻...同埋佢都係做DJ好D...哈哈!

無錯, 搵到O個d"珍藏"時o個種喜悅, 真係非筆墨可以形容啦!

阿檬O係RTV+ATV年代真係拍過好多戲, 不過要特別講一套又真係有D難度...我未睇《IQ成熟時》之前都有見過佢! 佢O係呢套劇都做得幾好呀...尤其後尾話佢讀書讀到癲O左O個度!

我記得"荳芽夢"O係我六年級時重播過 (90/91年)...之後可能都有, 但我無留意喇! O個時好興星期六下午12點播呢D戲 (另一套係"淘氣雙子星")...但我聽到翁靜晶O個把雞仔到唔雞仔O既聲, 同埋O個個"脂粉男"就嚇到即刻轉台...換轉係依家, 可能都會睇O下O架, 個人大O左容忍度都高O左嘛...小朋友是唔KUM嚇的!

2:42 下午  
Blogger 芒姐 said...

m@linxism,

1999年x mas O個次, 係我睇得最用心O個次, 更加係我溫MID-TERM的最大動力!

前幾年睇報紙, 原來車保羅已經有個好大O既孫, 嚇到我呀!

2:43 下午  
Blogger 芒姐 said...

匿名,

"著燈開飯睇電視"呢個名, 真係好騎呢囉...如果係俾阿劉家傑先生做主角, 就更加騎呢啦啦!

2:45 下午  
Blogger 芒姐 said...

匿名,

你有所不知, 蔡楓華當年係紅透半邊, 迷倒萬千少女O既白馬王子, 連SAMMI, 千嬅佢O地O個個年代O既少女, 都話以前好迷紅唇皇子...

(http://hejnom.blogspot.com/2006/05/5-8mon.html)

當年莊靜而拍到佢, 可以話係執到支好籌添...又有邊個會想到當年O既白馬王子, 如今會落得如斯下場呢...

2:48 下午  
Blogger 芒姐 said...

七字頭,

OH...咁你認為"荳芽夢"好唔好睇呢? 個脂粉男主角好似做O左一套就唔見O左, 唔知佢去O左邊呢?

十幾年前重播我好頂唔順翁小姐同埋脂粉男, 所以無咩點睇, 如果依家重播, 我都想睇番...

2:50 下午  
Anonymous 匿名 said...

好唔好睇呀? 我諗一般啦, 當其時作為小朋友的我鍾意睇"執到寶"同埋"香港81"多D(其實依家都係)!

其實我又不太覺得那位脂粉男脂粉, 我覺得佢似一位低能兒多D, 唔知我係咪因為受左"烈火青春"影響而有此感覺呢? 你有無睇哥哥同葉童套"烈火青春"? 佢有份做茄呢啡喎!

老老實實, 查實就算依家俾我再睇番"荳芽夢", 我相信我都會頂唔順翁小姐的! 佢嗰兩條短辮真係唔知想點?! 仲有, 十幾歲女先黎跳D BALLET 基本步法, 都幾白痴同肉酸! 同埋, 成套戲太有富貴味喇, 雖然當時嘅香港的確係百業興旺, 但尋常百姓家點可能會有翁小姐間大屋咁大咁豪(聽講劉師傅後來為左追翁小姐, 特登搵人訂造一張同"荳芽夢"裡面一模一樣嘅公主床俾晶姐姐)? 一般電視觀眾好難有共鳴喎!

3:53 下午  
Anonymous 匿名 said...

"你有所不知, 蔡楓華當年係紅透半邊, 迷倒萬千少女O既白馬王子, 連SAMMI, 千嬅佢O地O個個年代O既少女, 都話以前好迷紅唇皇子..."

咁驚嚇? 我同SAMMI, 千嬅差不多大, 可以話經歷過"倩影"HIT的階段, 但老老實實, 我真係從未迷過紅唇皇子喎!! 我嘅同學朋友都無過迷紅唇皇子喎!! 我姐姐同佢D朋友都無人迷過紅唇皇子喎!! 我仲記得, 當時有一集"迷離夜"係佢做主角, 有一幕話佢俾火活活燒死, 我嘅兄姊仲一邊睇一邊指住電視機笑... 有D懷疑SAMMI, 千嬅係咪吹水?! 一個讀初小的小朋友, 點可能會迷上紅唇皇子?! 費解費解!!

也許紅唇皇子真的紅過, 但他的FANS群肯定不是我AGE GROUP內的小朋友!

4:22 下午  
Blogger 芒姐 said...

七字頭,

我有睇過哥哥的"烈火青春"呀, 係因為98年睇完梁漢文的新版特登租o黎睇...不過都唔係好記得o個位仁兄...anyway, 佢呢個style我真係唔buy!

雖然我真係唔係生o係瘋華當紅的年代, 但我相信佢點都真係有紅過o既...畢竟"倩影"都有得拿o下金曲, 佢又成日有得做o下主持, 仲要咁多套青春劇俾佢擔...照推論佢點都有一大jar fans o卦?

6:08 下午  
Blogger m@linxism said...

記得90/91年重播係星期六中午時段, 個個星期都有睇! 仲憎埋陳復生做果件 heidi / hidy , 真人都憎呢個名 d 人! (好偏激!)

前排經典台重播, 已經反而無睇 lu~

(btw, 晶姐姐係我地師姐, 當年 miss 唔鍾意提佢, 家下唔知會唔會提呢? 變左律師喎~)

11:52 下午  
Anonymous 匿名 said...

m@linxism,

晶姐姐話自己讀國際學校, 你地究竟係邊間?

1:10 上午  
Anonymous 匿名 said...

OH, 芒姐, 請別誤會, 我都相信瘋華曾經紅過嘅, 亦相信佢曾經有過相當數目嘅FANS, 我只係唔相信會有同我同齡嘅人迷戀佢啫! 或者唔同圈子嘅人真係會有唔同TASTE啦, 我身邊嘅人, 無論大過我定細過我, 無論從前定今天, 都無人迷過瘋華, 但我不能因此話佢無FANS, 或者我只可以講, 同我同圈子嘅人唔迷佢囉!

1:37 上午  
Anonymous 匿名 said...

原來車保羅已經有個好大O既孫?

係唔係死於車禍O個個外孫女?

2:57 下午  
Anonymous 匿名 said...

【老片回放】1990年《蓝月亮》土豆在线播放(仅供FANS交流)
主要演员:万绮雯 罗颂华 袁洁仪 容锦昌 邓浩光
集数:16
产地:香港
出品:ATV(亚视)
每集30分钟,1990首播,类似丽的当年制作的《青春三重奏》、《甜甜廿四味》等的校园青春剧。
http://www.tudou.com/playlist/id/482972/

8:40 上午  
Anonymous 匿名 said...

芒姐妳好, 好正既blog!!

記得有資料提過, 翁靜晶拍豆芽夢箇年得12歲(1981?), 如果有人頂唔順, 可能係當年既小妹妹做番自己年齡既野.

12:15 下午  
Blogger 芒姐 said...

匿名,

re車保羅孫女...係呀, 好似3,4年前睇過類似新聞...

12:53 上午  
Blogger 芒姐 said...

i-Joel,

你好! 多謝讚賞!

翁靜晶拍"豆芽夢"時得12歲? 無咁細嘛?! 真係仲細過cream個李蘊喎...翁小姐依家應該都over o左40好耐?! 我真係唔清楚...請賜教!

12:55 上午  
Anonymous 匿名 said...

Re:好奇
They all went to St.Mart Cannosian College I think.

6:48 下午  
Anonymous 匿名 said...

i-Joel said...
芒姐妳好!!

再在網上翻查資料,發現自己記憶有誤. 翁靜晶拍"豆芽夢"時應已17歲, 但的確是12歲時在香港娛樂圈出道.

資料源自新加坡聯合早報網:
http://woman.zaobao.com/pages6/living070410.html

再次致歉!!

7:41 上午  
Anonymous 匿名 said...

i-Joel 補記:
翁靜晶應與張柏芝一樣是擁有外國血統(英文名字為 Mary Jean Reimer Lau, Lau 為夫姓)
其個人網頁 (英文部份較詳盡):
http://www.yungchingching.com.hk/?lang=en

7:50 上午  
Blogger 芒姐 said...

i-Joel,

傻啦...洗咩致歉咁嚴重? 多謝你o既資料就真!

2:24 上午  
Anonymous 匿名 said...

請問芒姐知唔知邊度仲有IQ成熟時o既光碟賣?

3:10 上午  
Blogger 芒姐 said...

曾先生,

其實所有市面上所有賣VCD/DVD的舖頭都有得賣, 除非咁O岩賣晒無再入貨, HMV都應該有, 如想上網訂可以去YESASIA.COM.

2:11 上午  

發佈留言

<< Home